Search form

Hebreos 11

Ri kikꞌaslen ri kuqul kikꞌuꞌx rikꞌin ri Dios

1Ri kuqubꞌel kꞌuxlaj ja ri ndataqij rikꞌin nojel awánima chi ri Dios nduyaꞌ ri awoyobꞌen y kin awetaman chi kꞌo jun qꞌij ndatzꞌet ri kꞌajani keqꞌalajin wokami.+ 2Ri ojer teq qatit-qamamaꞌ xeqaꞌ chuwech ri Dios, porque xkikuqubꞌaꞌ kikꞌuꞌx rikꞌin.

3Roj roma qakuqubꞌan qakꞌuꞌx rikꞌin ri Dios, qakꞌoxoman chi ri kaj y ri rochꞌulew xekꞌojeꞌ roma xchꞌaꞌa ri Dios y xubꞌij chi kekꞌojeꞌ.+ Y riꞌ ndubꞌij tzij chi rijaꞌ ma jun achike xukusaj chin xerubꞌen ri ngeqatzꞌet wokami.

4Ri Abel roma kuqul rukꞌuꞌx rikꞌin ri Dios, xusuj chuwech ri Dios jun ofrenda más utz ke chuwech ri ofrenda xusuj ri Caín, y romariꞌ ri Dios xubꞌij chi nixta jun rumak xreqalej y kin xqaꞌ chuwech ri ofrenda xusuj.+ Y ri Abel roma xukuqubꞌaꞌ rukꞌuꞌx rikꞌin ri Dios, maske kamineq chik, kin achel kꞌa ndichꞌaꞌa ta chaqe wokami.

5Ri Henoc roma kuqul rukꞌuꞌx rikꞌin ri Dios, keriꞌ kꞌes xukꞌuꞌex e chikaj,+ ma xqꞌax ta pa kamik y xkanox pero ma xilitej ta, porque xukꞌuꞌex roma ri Dios. Y ri rutzij ri Dios ndubꞌij chi nabꞌey chi xukꞌuꞌex, xtzꞌetetej chi xubꞌen ri ndiqaꞌ chuwech ri Dios. 6Y keriꞌ kꞌa, jun wineq chin ndiqaꞌ chuwech ri Dios ndikꞌatzin chi rukuqubꞌan rukꞌuꞌx rikꞌin. Porque ri ndirajoꞌ ndijel apu chuwech ri Dios, ndikꞌatzin ndutaqij chi ri Dios kin kꞌo wi y chi nduyaꞌ utzulej rajel-rukꞌexel chake ri ngekanon richin.

7Ri Noé roma kuqul rukꞌuꞌx rikꞌin ri Dios, xniman chuwech, atoq xbꞌix chare roma ri Dios chi ndibꞌanatej jun nim qatataꞌ ri ma jumbꞌey bꞌanatajneq,+ y rijaꞌ rikꞌin xibꞌriꞌil pa ránima chuwech ri Dios, xubꞌen jun nimalej barco chin xukal riꞌ rijaꞌ y ri aj pa rachoch. Y ma jun rumak xreqalej chuwech ri Dios roma xukuqubꞌaꞌ rukꞌuꞌx rikꞌin ri Dios,+ y roma chuqaꞌ riꞌ, kin xtzꞌetetej chi pa rubꞌeyal xbꞌanatej chi xqaqa castigo pa kiwiꞌ ri wineq.

8Ri Abraham roma kuqul rukꞌuꞌx rikꞌin ri Dios, kin xniman atoq xoyox roma ri Dios, chin xbꞌa pa jun lugar ri ndusipaj ri Dios chare. Y xutzꞌen bꞌey, maske ma retaman ta apeꞌ ndibꞌa wi.+ 9Roma kuqul rukꞌuꞌx rikꞌin ri Dios, xbꞌekꞌojeꞌ chupan ri lugar sujun chare, apeꞌ kꞌa nixta jun achike richin rijaꞌ. Y chupan jay bꞌanun rikꞌin pimilej teq kꞌul xkꞌojeꞌ, achel xkibꞌen chuqaꞌ ri Isaac y ri Jacob, ri achoq chake sujun chuqaꞌ ri lugar riꞌ. 10Keriꞌ xubꞌen ri Abraham, porque royobꞌen ri tinamit ri ma ndiwulutej ta roma kin kowilej ruxeꞌ. Ri tinamit riꞌ, ja ri Dios xnojin achike rubꞌanik ndibꞌan chare y ja chuqaꞌ ri Dios ndibꞌanun richin.

11Ri Abraham roma kuqul rukꞌuꞌx rikꞌin ri Dios, xyoꞌox uchuqꞌaꞌ pa rubꞌaqil chin xralkꞌualaj jun ralkꞌuaꞌl rikꞌin ri rixjayil Sara, porque xutaqij chi ri Dios ri ma jumbꞌey ndujel ruwech rutzij kin nduyaꞌ wi ri rusujun. Y keriꞌ xbꞌanatej maske ri Abraham rijilej chik y ri Sara ma ndalan ta.+ 12Y romariꞌ, ri Abraham, maske maneq chi ok ruchuqꞌaꞌ pa rubꞌaqil chin ngeralkꞌualaj akꞌolaꞌ,+ xekꞌojeꞌ santienta riy-rumam, kin esantienta achel ri chꞌumil ekꞌo chikaj y achel ri sanayiꞌ chuchiꞌ ri mar ri maneq cheꞌel ngeꞌajilex nojel.

13Konojel ri wineq ri roj chꞌoyineq pe pa kiwiꞌ, xeken e, y ma yoꞌon yan ta chake ri rusujun ri Dios, pero roma kuqul kikꞌuꞌx chi ri Dios kin nduyaꞌ wi ri rusujun, rejeꞌ xekikot chi kꞌo jun qꞌij ndok kichin ri sujun chake. Y hasta xkibꞌij chi maneq kitinamit chochꞌulew y xaxe jubꞌaꞌ teq qꞌij ekꞌo chuwech. 14Y rikꞌin ri keriꞌ xkibꞌij, qꞌalej chi koyobꞌen jun lugar kichin apeꞌ ngebꞌekꞌojeꞌ. 15Si xa ja ta ri tinamit apeꞌ eꞌeleneq pe kꞌo pa kánima, kꞌa kꞌo ta cheꞌel xetzolij chiriꞌ. 16Pero xkirayij jun lugar más yalan, y ri lugar riꞌ ja ri kꞌo chikaj. Romariꞌ ri Dios ma ndikꞌix ta ndubꞌij chi rijaꞌ ki-Dios, porque rubꞌanun rukꞌojlen jun kitinamit.+

17Ri Dios xutojtobꞌej ránima ri Abraham chin xutzꞌet si ndiniman, romariꞌ xubꞌij chare chi tusujuꞌ ri Isaac ri junayon rukꞌajol pa kamik chuwech.+ Y roma kuqul rukꞌuꞌx rikꞌin ri Dios, ri Abraham kin xniman y xuyaꞌ ri Isaac pariꞌ jun altar chin ta xusuj chuwech ri Dios. Keriꞌ xubꞌen ri Abraham ri achoq chare kꞌo achike esujun roma ri Dios. 18Porque chare rijaꞌ ri Dios kereꞌ rubꞌiꞌin kan: Chikikajal ri riy-rumam ri akꞌajol Isaac xkenchaꞌ ri xkeꞌok nutinamit,+ xchajeꞌ. 19Ri Abraham xutaqij chi maske xken ta ri Isaac, ri Dios kin kꞌo ruchuqꞌaꞌ chin nduyaꞌ chik rukꞌaslen. Y keriꞌ ndiqabꞌij chi achel ta qetzij xken ri Isaac, y xyoꞌox chik rukꞌaslen roma ri Dios y xjach chare ri rutataꞌ.

20Ri Isaac roma kuqul rukꞌuꞌx rikꞌin ri Dios, xubꞌij chake ri ekaꞌiꞌ rukꞌajol Jacob y Esaú ri favor ndiyoꞌox chake más chikiwech apu.

21Ri Jacob roma kuqul rukꞌuꞌx rikꞌin ri Dios, chupan teq ri qꞌij atoq jubꞌaꞌ chik ndirajoꞌ chi ndiken, xerubꞌen bendecir ekaꞌiꞌ rumam, ri erukꞌajol ri José, y ruchuqꞌuyubꞌen ruchꞌamiꞌy xuyaꞌ ruqꞌij ri Dios.

22Ri José roma kuqul rukꞌuꞌx rikꞌin ri Dios, chupan teq ri qꞌij atoq jubꞌaꞌ chik ndirajoꞌ chi ndiken, xukꞌuxlaꞌaj kan chake ri ruwinaqul israelitas chi nderilaꞌ qꞌij ngeꞌel e pa rochꞌulew Egipto, y xubꞌij kan ri achike ndibꞌan chare ri rubꞌaqil atoq xteqaqa ri qꞌij riꞌ.+

23Ri rute-rutataꞌ ri Moisés roma kuqul kikꞌuꞌx rikꞌin ri Dios, ma xkixibꞌij ta kiꞌ xkewaj oxiꞌ ikꞌ ri Moisés atoq xalex,+ maske ri rey Faraón rubꞌiꞌin chi kekamisex ri chꞌuteq kꞌajolaꞌ ri ngeꞌalex.+ Keriꞌ xkibꞌen porque ri Moisés jabꞌel ok chi akꞌual xkitzꞌet.

24Ri Moisés roma kuqul rukꞌuꞌx rikꞌin ri Dios, atoq xok pe intéra, ma xrajoꞌ chi ta xbꞌix chare chi ral rumiꞌal ri Faraón. 25Xa kin xuchaꞌ xuqꞌasaj kꞌayew junan kikꞌin rutinamit ri Dios,+ pa rukꞌexel chi xubꞌen itzel teq achike ri xubꞌen ta chare chi xa jubꞌaꞌ ta ok qꞌij xkikot y xa pa mak ta xukꞌuaj ri rukꞌaslen. 26Porque xuyaꞌ pa ránima chi más utz xuqꞌasaj kꞌayew, achel ri Jun xtaq pe roma ri Dios chukolik ri rutinamit, ke chuwech xkꞌojeꞌ ri bꞌeyomal chin ri rochꞌulew Egipto pa ruqꞌaꞌ. Keriꞌ xubꞌen porque xuyaꞌ ruwech chirij ri nimalej rajel-rukꞌexel ri nduyaꞌ ri Dios chare.

27Ri Moisés roma kuqul rukꞌuꞌx rikꞌin ri Dios, ma xuxibꞌij ta riꞌ chuwech royowal ri Faraón, xa kin xuyaꞌ kan ri rochꞌulew Egipto,+ y ma jumbꞌey xtzolij kan chirij porque kin achel ta xutzꞌet ri Dios ri ma nditzꞌetetej ta. 28Ri Moisés roma kuqul rukꞌuꞌx rikꞌin ri Dios, xubꞌen ri xbꞌix chare roma ri Dios, xubꞌij chake ri ruwinaqul israelitas chi kekikamisaj alaj teq karneꞌl y ri kikikꞌel ri karneꞌl tikikilaꞌ chirij ri ruchiꞌ teq kachoch, chin keriꞌ atoq ndeqꞌax ri kamisanel ángel, ma ngekamisex ta ri nimalaꞌtz kalkꞌuaꞌl.+ Y jariꞌ ri nabꞌey Pascua.

29Ri israelitas roma kuqul kikꞌuꞌx rikꞌin ri Dios, xjaqatej ri mar keq chikiwech, y pa chaqiꞌj xeꞌeqꞌax chupan,+ kin achel ngebꞌiyaj pa chaqiꞌj ulew keriꞌ. Y atoq ri aj Egipto xkajoꞌ chuqaꞌ xeꞌeqꞌax chupan, xejiqꞌ pa yaꞌ.

30Ri israelitas roma kuqul kikꞌuꞌx rikꞌin ri Dios, wuquꞌ qꞌij xkiyaꞌ vuelta chirij ri tinamit Jericó, y pa ruwuq qꞌij xetzaq ri pimilej teq xan ri tzꞌapiyon rij ri tinamit.+ 31Keriꞌ chuqaꞌ ri Rahab ri ixaq ri xukꞌayilaꞌ riꞌ chake achiꞌaꞌ ojer. Rijaꞌ roma xukuqubꞌaꞌ rukꞌuꞌx rikꞌin ri Dios, ma xken ta junan kikꞌin ri ruwinaqul ri ma xeniman ta chuwech ri Dios, porque rijaꞌ utz rukꞌamik kiwech xubꞌen ri israelitas etaqon e chin ndekitzꞌetaꞌ chilaqꞌel ri tinamit Jericó.+

32Kꞌa kꞌo kꞌiy achike niwojoꞌ nibꞌij, pero maneq kꞌiy tiempo chin ta ngichꞌaꞌa pa ruwiꞌ ri xkibꞌen ri Gedeón, ri Barac, ri Sansón, ri Jefté, ri David, ri profeta Samuel y ri chꞌaqa chik profetas. 33Porque rejeꞌ, roma kuqul kikꞌuꞌx rikꞌin ri Dios, ekꞌo jujun xetiker pa kiqꞌaꞌ reyes y xekimej ri ki-reinos,+ jujun chik pa ruchojmil xeqꞌaton tzij, jujun chik xkil ri sujun kan roma ri Dios, jujun chik xekitzꞌapilaꞌ xakey koj,+ 34jujun chik xkichup ruchuqꞌaꞌ nimalej teq qꞌaqꞌ, jujun chik xkikal kiꞌ pa kiqꞌaꞌ wineq ri xkajoꞌ xekikamisaj rikꞌin espada, jujun chik xyoꞌox kuchuqꞌaꞌ atoq ma jun chik kuchuqꞌaꞌ, jujun chik xyoꞌox kuchuqꞌaꞌ pa guerra, jujun chik xechꞌakon pa kiqꞌaꞌ ejércitos y xkibꞌen chi xeꞌanimej chikiwech. 35Ekꞌo ixoqiꞌ roma kuqul kikꞌuꞌx rikꞌin ri Dios, xekꞌastajbꞌex pe ri koxpochel ekamineq e, y xetzolix chake.+

Pero jujun chik wineq roma kuqul kikꞌuꞌx rikꞌin ri Dios, xeken roma ri kꞌayew xbꞌan chake y maske xsuj chake chi ngesoqꞌopix si ndikiyaꞌ kan ri Dios, ma xkajoꞌ ta, porque rejeꞌ xkajoꞌ ngekꞌastajbꞌex pe chikikajal ri animaꞌiꞌ, y ndekilaꞌ ri más jabꞌel kꞌaslen. 36Jujun chik roma kuqul kikꞌuꞌx rikꞌin ri Dios, xekꞌixbꞌisex chikiwech wineq, xeroq, xexim rikꞌin cadenas y xeyoꞌox pa cheꞌ.+ 37Jujun chik roma kuqul kikꞌuꞌx rikꞌin ri Dios, xekꞌaq chi abꞌej, jujun chik xeꞌelesex pa nikꞌaj rikꞌin sierra, jujun chik xekamisex rikꞌin espada, jujun chik jubꞌaꞌ jukꞌan, jubꞌaꞌ jukꞌan xekꞌojeꞌ, y xe chi ok kitzꞌumal karneꞌl o cabras okuneq kitziaq,+ maneq ok kichajin, bꞌis-bꞌis kiwech xbꞌan chake, y xbꞌan chuqaꞌ itzel chake. 38Ri wineq ri ma xkitaqij ta ri Dios ma erukꞌulun ta chi wineq achel rejeꞌ xekꞌojeꞌ chikikajal. Rejeꞌ xetzeqlebꞌex chin ndibꞌan itzel chake, pero roma kuqul kikꞌuꞌx rikꞌin ri Dios, xebꞌekꞌojeꞌ pa chaqiꞌj y tzꞌiran teq ulew, pa teq juyuꞌ, pa jul chin juyuꞌ y pa teq siwan.+

39Y konojel rejeꞌ roma kuqul kikꞌuꞌx rikꞌin ri Dios, xkikot ri Dios kikꞌin roma xeqaꞌ chuwech. Pero ma xuyaꞌ yan ta chake ri rusujun, 40porque rubꞌanun ruwech chi ri favor nduyaꞌ, kin nduyaꞌ chaqe roj junan kikꞌin rejeꞌ. Y ri favor riꞌ, ja ri ngojok nojel ri ndirajoꞌ rijaꞌ chi ngojok.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index