Search form

Hebreos 12

Ri Dios ndukꞌajisaj kiwech ri eralkꞌuaꞌl

1Y roma kin ekꞌiy ri ojer teq qatit-qamamaꞌ ri xkikꞌut kan rikꞌin ri kikꞌaslen achike rubꞌeyal ri ndikuqeꞌ qakꞌuꞌx rikꞌin ri Dios, romariꞌ tiqelesaj e pa qakꞌaslen nojel ri ndubꞌen chaqe chi ma ngojan ta, y ri mak ri ndubꞌen chaqe chi ngojtzaq, tiqaxikꞌaꞌ qiꞌ, ma qojkos chin ndeqakꞌisaꞌ ri bꞌey kꞌa kꞌo na chiqawech.+ 2Y jumul tiqayaꞌ qawech chirij ri Jesús ri xjaqo bꞌey chiqawech chin ndiqakuqubꞌaꞌ qakꞌuꞌx rikꞌin ri Dios y nditoꞌon qichin chin jumul kuqul qakꞌuꞌx hasta pa rukꞌisibꞌel. Ri Jesús roma retaman chi kin xtikikot, ma xupoqonaj ta riꞌ xuqꞌasaj ri kꞌix xukꞌen pe ri kamik xuqꞌasaj cho cruz, xa kin xukachꞌ.+ Y xbꞌetzꞌuyeꞌ e pa rikiqꞌaꞌ ri Dios ri tzꞌuyul pa ru-trono.+

3Romariꞌ, utz-utz tiyaꞌ cuenta chare ri xubꞌen ri Jesús. Rijaꞌ kin xukachꞌ nojel ri kꞌayew xuqꞌasaj pa kiqꞌaꞌ aj mak teq wineq, chin keriꞌ rix ma kixkos y ma tipoꞌ ikꞌuꞌx. 4Kin qetzij chi rix nditij iqꞌij chi ma ngixtzaq pa ruqꞌaꞌ ri mak, y romariꞌ iqꞌasan kꞌayew. Pero kꞌa ma iqꞌasan ta jun kꞌayew ri rix rukꞌuan pa kamik. 5Y xa imestan ri pixabꞌanik ruyoꞌon ri Dios chupan ri rutzij, pixabꞌanik ri achel nduyaꞌ jun tataꞌatz chare jun ralkꞌuaꞌl. Ri Dios kereꞌ xubꞌij:

Walkꞌuaꞌl, ma tabꞌen chi maneq reqalen

Ri rukꞌajisaxik awech nibꞌen yin ri Awajaw,+

Ma tipoꞌ akꞌuꞌx atoq nibꞌij chawa chi ma utz ta ri ngatajin rikꞌin.

6Porque riyin ri Awajaw Dios nikꞌajisaj kiwech ri ngenwojoꞌ,

Y ri nikꞌen apu kiwech chin ngeꞌok walkꞌuaꞌl, ngenraq atoq ma chaj ta ngetajin rikꞌin.

Keriꞌ xubꞌij ri Dios.

7Tiyaꞌ pa iwánima chi ri kꞌayew ndiqꞌasaj, xa kin jun rukꞌajisaxik iwech ndubꞌen ri Dios.+ Rijaꞌ Tataꞌaj ri ngixrutzꞌet achel ralkꞌuaꞌl, porque, ¿la kꞌo kami jun akꞌual ri ma ndibꞌan ta castigar roma ri rutataꞌ chin ndikꞌajisex ruwech? 8Porque si ma ndikꞌajisex ta iwech achel ndubꞌen ri Dios chake konojel ralkꞌuaꞌl, riꞌ ndubꞌij tzij chi ma rix ralkꞌuaꞌl ta, xa rix achel akꞌolaꞌ ri ma qꞌalej ta achike kitataꞌ. 9Tiqakꞌuxlaꞌaj chi jumbꞌey kan, atoq kꞌa roj akꞌolaꞌ, ri qate-qatataꞌ xkikꞌajisaj qawech y roj xeqanimaj. Si keriꞌ, kin más rukꞌulun chi ndiqanimaj ri Tataꞌaj Dios ri kꞌo pa kiwiꞌ konojel espíritus, chin keriꞌ ndiqil ri kꞌaslen ma ndikꞌis ta. 10Kin qetzij chi ri qate-qatataꞌ xkikꞌajisaj qawech jun tiempo chireꞌ chochꞌulew, y ja ri achel más utz pa kiwech rejeꞌ xkibꞌen chukꞌajisaxik qawech, pero ri Tataꞌaj Dios ndukꞌajisaj qawech chin ndukꞌen pe utz chaqe, chin xtok loqꞌolej ri qakꞌaslen achel ri rukꞌaslen rijaꞌ.+ 11Kin qetzij chi atoq xkꞌajisex qawech, ma utz ta xqanaꞌ chare, xa xqꞌaxa chaqe, pero si xqetamaj ri xrajoꞌ xukꞌut ri Dios chiqawech, ndikꞌojeꞌ uxlanen pa qánima y ndiqetamaj ndiqabꞌen ri utz chuwech rijaꞌ.+

12Romariꞌ, ma tiyaꞌ kan chi kuqul ikꞌuꞌx rikꞌin ri Dios, porque ndikꞌatzin chi rix ndiyaꞌ ruchuqꞌaꞌ ri iqꞌaꞌ ekosneq y ruchuqꞌaꞌ ri iwaqen ngeqꞌaxa.+ 13Tiyaꞌ pa iwánima chi ndikꞌuaj jun chojmilej kꞌaslen, chin keriꞌ ri ngejetzꞌmaꞌy ma ngeꞌel ta e chupan ri utzulej bꞌey y ngekꞌachaj.+

Pixabꞌanik chin ma tiqayaꞌ kan ri Dios

14Titijaꞌ iqꞌij chi ndikꞌojeꞌ uxlanen chiwech kikꞌin konojel wineq,+ y titijaꞌ iqꞌij chi ndikꞌuaj jun chꞌajchꞌaj kꞌaslen, porque nixta jun nderutzꞌetaꞌ ruwech ri Ajaw, si ma chꞌajchꞌaj ta rukꞌaslen.+ 15Titoꞌ iwiꞌ rix iwonojel, chin man ta kꞌo jun chiꞌikajal ri ma xtiril ta ri favor nduyaꞌ ri Dios. Ma kꞌateꞌ xtalex pe jun kꞌayilej noꞌoj chiꞌikajal ri ndukꞌen pe kꞌayew chiwa y xa nduchꞌabꞌaqrisaj kikꞌaslen ekꞌiy.+ 16Man ta jun chiꞌikajal ri ndukꞌamalaꞌ qa riꞌ xa achoq na ikꞌin chin ndubꞌen mak, o ndubꞌen chi nixta jun reqalen ri kin loqꞌolej wi chuwech ri Dios, achel xubꞌen ri Esaú ri xa roma jun leq rikil xuyaꞌ kan chare ri ruchaqꞌ ri bendición ri kin richin wi rijaꞌ roma nimalaꞌtz.+ 17Porque rix iwetaman chi atoq xqꞌax ri tiempo, ri Esaú xrajoꞌ chi xyoꞌox ta ri bendición riꞌ chare, pero maske santienta xoqꞌ, maneq cheꞌel xutzolij ri xbꞌanatej yan, y ri rutataꞌ ma xuyaꞌ chi ta ri bendición chin ri nimalaꞌtz chare.+

18Keriꞌ nibꞌij chiwa porque rix jeleneq apu rikꞌin ri Dios, y ma xiqꞌasaj ta ri xkiqꞌasaj ri ojer teq qatit-qamamaꞌ. Rejeꞌ kixibꞌin kiꞌ xejel apu chunaqaj ri juyuꞌ rubꞌiniꞌan Sinaí, porque xa ta xkitzꞌen apu, xeken ta. Ri juyuꞌ riꞌ ndijina pa qꞌaqꞌ, qꞌequ-qꞌequꞌ xubꞌen, y xwujuj santienta kaqiqꞌ pa ruwiꞌ.+ 19Xakꞌaxex chi xqꞌajan jun trompeta y xakꞌaxex chuqaꞌ ri xubꞌij ri Dios, y ri xeꞌakꞌaxan xkikꞌutuj kamelal chare ri Moisés chi ma tichꞌaꞌa chi pe más ri Dios chake. 20Keriꞌ xkikꞌutuj ri ojer teq qatit-qamamaꞌ, porque ndiqꞌaxa chake ndikibꞌen ri ru-mandamiento ri Dios, ri kereꞌ ndubꞌij: Xa achike na jun xtiyoꞌon pe jun raqen chuwech re juyuꞌ reꞌ, tikꞌaq chi abꞌej chin tikamisex, chi wineq chi awej keriꞌ tibꞌan chake. 21Y kin santienta xibꞌriꞌil xukꞌen pe ri xtzꞌetetej chiriꞌ, porque hasta ri Moisés kereꞌ xubꞌij: Ngibꞌarbꞌot roma nuxibꞌriꞌil.+

22Pa rukꞌexel riꞌ, rix, rix jeleneq apu chunaqaj ri juyuꞌ rubꞌiniꞌan Sión, apeꞌ kꞌo rutinamit ri Kꞌaslik Dios, ri aj chikaj Jerusalén+ y rix jeleneq apu chikinaqaj millones chi ángeles ri junan ngekikot ndikiyaꞌ ruqꞌij ri Dios. 23Rix jeleneq apu chikinaqaj ri nabꞌey teq ralkꞌuaꞌl ri Dios ri kimolon kiꞌ pa rubꞌiꞌ y tzꞌibꞌan chik kibꞌiꞌ chikaj,+ rix jeleneq apu chunaqaj ri Dios ri ndiqꞌato tzij pa kiwiꞌ konojel wineq. Rix jeleneq apu chikinaqaj ri ki-espíritus ri chojmilej kikꞌaslen, ri eꞌokuneq chik nojel ri ndirajoꞌ ri Dios chi ngeꞌok. 24Rix jeleneq apu chunaqaj ri Jesús ri xkusex roma ri Dios chin xubꞌen ri kꞌakꞌakꞌ pacto qikꞌin. Rix jeleneq apu chuqaꞌ rikꞌin rukikꞌel ri Jesús, kikꞌ ri ndukꞌutuj rukuyik kimak ri wineq,+ y ma achel ta rukikꞌel ri Abel ri xkamisex ojer, ri xa ndukꞌutuj chare ri Dios chi nduqꞌet tzij pa ruwiꞌ ri xkamisan richin.

25Romariꞌ, tibꞌanaꞌ cuenta iwiꞌ chi ma tiyaꞌ kan roꞌiwacheq chuwech ri Dios ri ndipixabꞌan iwichin, porque si ri ojer teq qatit-qamamaꞌ ma xkikal ta kiꞌ chuwech ri castigo, roma xkiyaꞌ kan rokacheq chuwech ri Dios atoq xepixabꞌex roma ri Moisés, pior kꞌa roj riꞌ, ma ngojkolotej ta si xtiqayaꞌ kan roqacheq chuwech ri Dios ri ndipixabꞌan pe qichin chikaj. 26Ojer kan atoq ri Dios xpixabꞌan pariꞌ ri juyuꞌ, xselon ri rochꞌulew,+ pero wokami ri Dios ndubꞌij: Jumbꞌey chik nibꞌen chare ri rochꞌulew chi xtiselon, y ma xe ta ri rochꞌulew, xa keriꞌ chuqaꞌ nibꞌen chare ri rokaj,+ xchajeꞌ. 27Y atoq ndubꞌij ri Dios chi xtubꞌen chik jumbꞌey chi ndiselon ri rochꞌulew y ri rokaj, riꞌ ndubꞌij tzij chi nojel ri kꞌo cheꞌel ngeselox ngeꞌelesex e,+ chin keriꞌ xaxe ri maneq cheꞌel ngeselox ngekanej kan. 28Romariꞌ roj ri ndajin ruyaꞌik ri ru-reino ri Dios chaqe, reino ri ma jun xtiselon richin,+ qojmatioxin chare, tiqayaꞌ ruqꞌij rikꞌin xibꞌriꞌil y rikꞌin ndiqabꞌen ri ndiqaꞌ chuwech rikꞌin nojel qánima. 29Porque ri qa-Dios, kin achel qꞌaqꞌ ri kꞌo cheꞌel ndukꞌis qaqꞌij.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index