Search form

Hebreos 13

Ri ndikꞌatzin ndikibꞌen ri kitaqin ri Cristo

1Hermanos, jumul tiwojoꞌ iwiꞌ achel ri ibꞌanun pe.+ 2Ma timestaj chi ndikꞌatzin ndikꞌen apu kiwech pa iwachoch ri epataneq jukꞌan chik apeꞌ,+ porque jujun ri keriꞌ xkibꞌen, nixta xketamaj chi kin ángeles ri xekikꞌen apu kiwech pa kachoch.

3Ma keꞌimestaj ri etzꞌapel pa cheꞌ, tinaꞌ chare chi achel ta jajun rix, ri rix tzꞌapel junan kikꞌin keriꞌ. Ma keꞌimestaj chuqaꞌ ri ndibꞌan itzel chake, tinaꞌ chare chi achel ja ta rix ri ndibꞌan keriꞌ chiwa.+

4Chiꞌiwonojel tibꞌanaꞌ respetar kikꞌaslen ri achi rikꞌin ri rixjayil, man ta jun tukanoj rukꞌexel ri achoq ikꞌin kꞌulan. Porque ri Dios nduqꞌet tzij pa kiwiꞌ ri ndikikanolaꞌ rukꞌexel ri achoq ikꞌin ekꞌulan, y nduqꞌet tzij chuqaꞌ pa kiwiꞌ ri ndikikꞌamalaꞌ qa kiꞌ xa achoq na ikꞌin chin ndikibꞌen mak.+

5Ma kixjamem chirij méra,+ kixkikot rikꞌin ri ruyoꞌon ri Dios chiwa. Porque ri Dios kereꞌ rubꞌiꞌin kan: Ma jumbꞌey xkatinyaꞌ kan, y ma jumbꞌey xtinmalij kan awech,+ xchajeꞌ. 6Romariꞌ, roj kin kaw qawech ndiqabꞌij, achel ndubꞌij chupan ri rutzij ri Dios:

Ja ri Ajaw nditoꞌon wichin y ma nixibꞌij ta wiꞌ.

¿Achike kꞌa xketiker xtikibꞌen ri wineq chuwa?+

Keriꞌ tzꞌibꞌan kan.

7Ma keꞌimestaj ri eꞌukꞌuayon bꞌey chiwech y rix kitijon kan rikꞌin ri rutzij ri Dios. Tiyaꞌ utz-utz cuenta chare ri utzulej kꞌaslen xkikꞌuaj, y tibꞌanaꞌ rix achel xkibꞌen rejeꞌ ri xkuqeꞌ kikꞌuꞌx rikꞌin ri Dios.

8Ri Jesucristo kin ja achel pa nabꞌey, keriꞌ wokami y chin jumul.+ 9Ma tiyaꞌ qꞌij chi ngixukꞌuꞌex chunimaxik jalajaj teq tijonik ri ma junan ta rikꞌin ri ndubꞌij ri rutzij ri Dios.+ Porque más utz chi rix ndiwil ruchuqꞌaꞌ iwánima rikꞌin ri favor nduyaꞌ ri Dios, ke kikꞌin tijonik ri ndubꞌij achike utz o ma utz ta chin ndikꞌuxeꞌ, porque ri tijonik riꞌ ma ndukꞌen ta pe kuqubꞌel kꞌuxlaj chake ri ngeniman kichin.

10Roj ri qataqin ri Jesucristo, qichin ri kuyubꞌel mak xukꞌen pe rijaꞌ atoq xusuj rukikꞌel pa qakꞌexel chuwech ri Dios. Y ri sacerdotes israelitas ri ngekisuj kikikꞌel awej teq chikap chuwech ri Dios chupan ri aj rochꞌulew rachoch, maneq kiqꞌaꞌ chare ri kuyubꞌel mak riꞌ, porque kꞌa kikuqubꞌan na kikꞌuꞌx chi rikꞌin ri ngekisuj rejeꞌ, ndikuyutej ri mak. 11Keriꞌ nibꞌij, porque ri más nimalej ruqꞌij sacerdote kikikꞌel awej teq chikap ndukꞌuaj atoq ndok apu chupan ri kꞌojlibꞌel más loqꞌolej chin ri aj rochꞌulew rachoch ri Dios y chiriꞌ ndusuj ri kikꞌ chuwech ri Dios roma kimak ri wineq, pero ri ki-cuerpos ri awej teq chikap riꞌ, ngeꞌelesex e saqil chuchiꞌ ri tinamit y chiriꞌ ngeporox.+ 12Romariꞌ ri Jesús chuqaꞌ xkamisex saqil chuchiꞌ e ri tinamit, chin ngeruchꞌajchꞌojrisaj ri aj rutinamit rikꞌin ri rukikꞌel.+ 13Romariꞌ, ma tiqakuqubꞌaꞌ qakꞌuꞌx rikꞌin ri rusujik kikikꞌel awej teq chikap chin ta ndikuyutej qamak, xa kin tiqayaꞌ qánima rikꞌin ri Jesús ri xkamisex saqil e chin ri tinamit y ma tipoꞌ qakꞌuꞌx atoq ngojyoqꞌ roma qataqin rijaꞌ. 14Porque chireꞌ chochꞌulew, maneq jun qatinamit ri kin chin ta jumul. Roj bꞌaneq qánima chirij ri más yalan tinamit ri nduqaqa más chiqawech apu. 15Y roma ri Cristo xken qoma, ma ndikꞌatzin chi ta ngeqasuj awej chuwech ri Dios. Pa rukꞌexel riꞌ jumul tiqasujuꞌ chare ri Dios rikꞌin qachiꞌ loqꞌolej teq tzij chin ndiqayaꞌ ruqꞌij, tzij ri achoq ikꞌin ndiqabꞌij chi qetzij ja rijaꞌ ri Dios.+ 16Ma timestaj ndibꞌen ri utz chake ri wineq y ngeꞌitoꞌ ri ndikꞌatzin kitoꞌik, porque jariꞌ ri ndikikot ri Dios rikꞌin,+ pa rukꞌexel chi ngesuj awej teq chikap chuwech.

17Tinimaj kitzij ri ukꞌuey bꞌey chiwech y tibꞌanaꞌ ri ndikibꞌij chiwa, porque rejeꞌ ndikitij kiqꞌij chi ndikichajij ri iwánima, porque ketaman chi ndikꞌutux razón chake ri achike xkibꞌen chin xixkichajij.+ Romariꞌ tinimaj kitzij, chin keriꞌ ndikikot kánima ngixkichajij, y man ta ndibꞌen chake chi rikꞌin kaꞌiꞌ kikꞌuꞌx ngixkichajij, porque si keriꞌ ndibꞌen, xa ma jun utz ndukꞌen pe chiwa.

18Tibꞌanaꞌ orar qoma roj, porque kuqul qakꞌuꞌx chi utz ngojtajin rikꞌin, y ndiqarayij chi kin ta jumul keriꞌ ndiqabꞌen pa ruwiꞌ nojel.+ 19Y más nikꞌutuj chiwa chi tibꞌanaꞌ orar chi ri Dios nduyaꞌ qꞌij chuwa chi ngibꞌa yan apu iwikꞌin jumbꞌey chik.

Ri rukꞌisibꞌel teq tzij chin re wuj reꞌ

20Ri Dios ri ndiyoꞌon uxlanen pa qánima, ja rijaꞌ ri xkꞌastajbꞌan pe chikikajal ri animaꞌiꞌ ri Nimalej Qayuqꞌunel ri roj rukarneꞌl, y riꞌ ja ri Qajaw Jesús ri xbꞌiyin rukikꞌel chin xkꞌachaj ri pacto ri kin chin jumul.+ 21Kin ta ja Dios riꞌ, ndiyoꞌon nojel ri ndikꞌatzin chiwa chin ngixtiker ndibꞌen ri utz pa ikꞌaslen, achel ndirajoꞌ rijaꞌ, y kin ta roma ri Jesucristo, ri Dios ndubꞌen chuqaꞌ chaqe chi ngojtiker ndiqabꞌen ri ndiqaꞌ chuwech.+ ¡Kin ta ndiyoꞌox nimalej ruqꞌij chin jumul! Amén.

22Hermanos, nikꞌutuj kamelal chiwa, chi utz tikꞌamaꞌ apu pa iwánima ri pixabꞌanik nutaqon e chiwa chupan re wuj reꞌ, porque xa kaꞌi-oxiꞌ ok tzij ri nutzꞌibꞌan e chiwa. 23Tiwetamaj chi ri hermano Timoteo xelesex yan pe pa cheꞌ. Si rijaꞌ nduqaqa yan wikꞌin, junan ngojbꞌa apu chiꞌitzꞌetik.

24Tiyaꞌ ruxunaqil kiwech konojel ri rusamajelaꞌ ri Dios ri eꞌukꞌuayon bꞌey chiwech, y tiyaꞌ chuqaꞌ ruxunaqil kiwech konojel ri loqꞌolej teq ralkꞌuaꞌl ri Dios. Ri hermanos aj rochꞌulew Italia ndikiteq ruxunaqil iwech.

25Ri Ajaw kin ta xtuyaꞌ ru-favor pa iwiꞌ rix iwonojel.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index