Search form

Hebreos 2

Ma tiqamestaj ri nimalej reqalen ri kolotajik sipan chaqe

1Roma ri kꞌaja xqabꞌij pe pa ruwiꞌ ri Rukꞌajol ri Dios, kin más ndikꞌatzin ndiqatij qaqꞌij chi ndiqakꞌoxomaj ri ndubꞌij ri utzulej teq tzij chin kolotajik qakꞌaxan pe, ma kꞌateꞌ tisach ri qetzij bꞌey chiqawech. 2Porque ojer kan ri Dios xchꞌaꞌa y ri mandamientos xeruyaꞌ atoq xchꞌaꞌa, xeꞌok ley pa ruwiꞌ ri rutinamit, y ja ri ángeles xerukusaj chin xkiyaꞌ.+ Ri mandamientos riꞌ xkꞌatzin chi xekinimaj ri rutinamit ri Dios, y ri xkiqꞌej ruwiꞌ ri ndubꞌij ri mandamientos riꞌ y ma xekinimaj ta, kin xebꞌan castigar achel ndubꞌij chupan ri ley riꞌ. 3Y romariꞌ, si maneq reqalen xtiqabꞌen chare ri nimalej kolotajik sipan chaqe, ¿achike modo xtiqakal qiꞌ chuwech ri castigo? Re kolotajik reꞌ, ja ri mismo Ajaw Jesús xyoꞌon rutzijol nabꞌey, y ri xeꞌakꞌaxan richin, xkiyaꞌ rutzijol chaqe.+ 4Y re kolotajik reꞌ kin qetzij wi. Keriꞌ xqꞌalajin, porque ri Dios xuqꞌalajrisaj rikꞌin nimalej teq retal ruchuqꞌaꞌ y nimalej teq achike ri ma jumbꞌey etzꞌeton, rikꞌin jalajaj teq milagros, y rikꞌin chuqaꞌ chi ri Espíritu Santo xuyaꞌ jalajaj loqꞌolej teq sipanik chake ri rusamajelaꞌ ri Dios+ achel xrajoꞌ rijaꞌ.

Ri Rukꞌajol ri Dios xuꞌok wineq chiqakolik roj ri roj okuneq ruchaqꞌ

5Keriꞌ nibꞌij chiwa, porque ri Dios ma pa kiqꞌaꞌ ta ángeles ndujech ri kꞌakꞌakꞌ rochꞌulew ri ndikꞌojeꞌ más chiqawech apu, rochꞌulew ri ndiqayaꞌ rutzijol chiwa. 6Porque chupan ri rutzij ri Dios kꞌo jun ri kereꞌ rubꞌiꞌin kan chare ri Dios:

¿La kꞌo kami jun wineq ri kin utz rukꞌaslen chin ta ndakꞌuxlaꞌaj?

¿La kꞌo kami jun wineq ri kin utz rukꞌaslen chin ta ndayaꞌ ri a-favor pa ruwiꞌ?+

7Ma richin ta kꞌiyal qꞌij xabꞌen chare chi más maneq ok ruqꞌij ke chikiwech ri ángeles,

Kin xabꞌen chi xkꞌojeꞌ ruqꞌij y xanimrisaj rubꞌiꞌ.

8Y xabꞌen chi pa ruqꞌaꞌ rijaꞌ ndikꞌojeꞌ nojel ri achike eꞌabꞌanun.+

Keriꞌ tzꞌibꞌan kan.

Y keriꞌ kꞌa, atoq ndubꞌij chi pa ruqꞌaꞌ rijaꞌ ndikꞌojeꞌ nojel ri erubꞌanun ri Dios, ndubꞌij tzij chi nderilaꞌ qꞌij atoq pa qaqꞌaꞌ roj wineq ndikꞌojeꞌ nojel.+ Pero wokami yan, kꞌajani tiqatzꞌet chi nojel kꞌo chi ta pa qaqꞌaꞌ. 9Pero ndiqatzꞌet chi ri Jesús xe chin jubꞌaꞌ teq qꞌij xbꞌan chare chi menos jubꞌaꞌ ruqꞌij ke chikiwech ri ángeles, y ndiqatzꞌet chuqaꞌ chi xnimrisex chik ruqꞌij+ y xnimrisex chik rubꞌiꞌ roma ri kamik xuqꞌasaj. Y roma ri Dios xrajoꞌ xuyaꞌ ru-favor pa qawiꞌ, ri Jesús xken qoma roj qonojel.

10Porque ri Dios ri achoq ichin nojel ri achike ekꞌo y achoq roma ebꞌanun nojel, rijaꞌ roma ndirajoꞌ chi santienta ralkꞌuaꞌl ngebꞌekꞌojeꞌ chupan ri nimalej ruqꞌij, romariꞌ xubꞌen chi xuqꞌasaj qꞌaxomal+ ri Jesús chin xok nojel ri xrajoꞌ ri Dios chi xok, y keriꞌ ja ri Jesús ri xjaqo bꞌey chin ngekolotej ri ralkꞌuaꞌl ri Dios. 11Porque ri Jesús ri ndichꞌajchꞌojrisan kꞌaslen, kin richin wi ri Dios, y erichin chuqaꞌ ri Dios ri ndichꞌajchꞌojrisex kikꞌaslen. Romariꞌ ri Rukꞌajol ri Dios ma ndikꞌix ta ndubꞌij chi eruchaqꞌ,+ 12achel ndubꞌij rijaꞌ:

Chake ri enchaqꞌ, nitzijoj ri utzulej anoꞌoj,

Y chikikajal ri ndikimal kiꞌ chin ndikiyaꞌ aqꞌij, nibꞌixaj ri abꞌiꞌ.+

13Y ndubꞌij chuqaꞌ:

Riyin kuqul nukꞌuꞌx rikꞌin ri Dios.

Y ndubꞌij chuqaꞌ:

Ja chireꞌ yinkꞌo kikꞌin ri ralkꞌuaꞌl ri Dios ri eruyoꞌon chuwa.+

Keriꞌ xubꞌij ri Jesús.

14Y achel kꞌo ki-cuerpo y kikikꞌel ri eralkꞌuaꞌl ri Dios, keriꞌ chuqaꞌ ri Jesús xkꞌojeꞌ ru-cuerpo y rukikꞌel, chin keriꞌ, rikꞌin ri kamik xuqꞌasaj ndukꞌis ruqꞌij nojel ri uchuqꞌaꞌ kꞌo pa ruqꞌaꞌ ri rajawal ri kamik, y riꞌ ja ri itzel.+ 15Ri kamik xuqꞌasaj ri Jesús, chin chuqaꞌ ngerukal konojel ri jumul ekꞌo pa ruqꞌaꞌ ri xibꞌriꞌil, porque kixibꞌin kiꞌ chuwech ri xtibꞌanatej kikꞌin atoq ngeken e. 16Porque ma chikitoꞌik ta ángeles xuqaqa ri Jesús chin xuqꞌasaj ri kamik, rijaꞌ xuqaqa chikitoꞌik ri xtikikuqubꞌaꞌ kikꞌuꞌx rikꞌin ri Dios achel xukuqubꞌaꞌ rukꞌuꞌx ri Abraham. 17Y chin xtiker xubꞌen keriꞌ, xkꞌatzin chi xuꞌok wineq achel ri wineq ri ngerukal e, chin xok ri más nimalej ruqꞌij Sacerdote ri ndujoyowaj kiwech ri wineq ri ngeꞌok ruchaqꞌ,+ y kin jumul wi ndubꞌen rusamaj ri Dios pa ruchojmil, chin keriꞌ roma ri kamik xuqꞌasaj, ndikuyutej kimak ri wineq chuwech ri Dios. 18Y roma rijaꞌ xuqꞌasaj santienta kꞌayew atoq ri itzel xutaqchiꞌij chin ta xrajoꞌ xutzeq pa mak, ndiqꞌalajin chi rijaꞌ kꞌo ruchuqꞌaꞌ chin ngerutoꞌ ri ngetojtobꞌex roma ri itzel.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index