Search form

Hebreos 3

Ri Jesús más kꞌo ruqꞌij ke chuwech ri Moisés

1Romariꞌ, loqꞌolej teq hermanos ri rix oyon roma ri Dios chin ngixok richin, tiyaꞌ utz-utz cuenta chare ri ndubꞌen ri Jesús, ri qa-Apóstol y más nimalej ruqꞌij qa-Sacerdote, ri achoq ikꞌin kuqul qakꞌuꞌx achel ndiqatzijoj. 2Porque ri Jesús kin jumul ndubꞌen ri samaj yoꞌon pa ruqꞌaꞌ roma ri Dios, achel chuqaꞌ ri Moisés kin xubꞌen nojel ri xchilabꞌex chare chukꞌuaxik rutinamit ri Dios.+ 3Pero ri Jesús xbꞌan chare chi más kꞌo ruqꞌij ke chuwech ri Moisés. Achel chuqaꞌ jun bꞌanuy jay, más kꞌo ruqꞌij ke chuwech ri jay rubꞌanun. 4Nojel teq achoch kꞌo bꞌanayon richin, pero ri bꞌanayon nojel ri achike ekꞌo, ja ri Dios.+ 5Y ri Moisés jun utzulej rusamajel ri Dios ri kin xubꞌen nojel ri xchilabꞌex chare chukꞌuaxik rutinamit ri Dios. Y rikꞌin nojel ri xubꞌanalaꞌ chukꞌuaxik ri tinamit riꞌ, rewan riꞌ ri achike nduqꞌalajrisaj ri Dios atoq xurilaꞌ ri tiempo. 6Jakꞌa ri Cristo ma relik ta ok rusamajel ri Dios achel ri Moisés. Ri Cristo kin Rukꞌajol wi ri Dios, y jumul ndubꞌen nojel ri ndikꞌatzin pa ruwiꞌ rutinamit ri Dios, y ri tinamit riꞌ ja roj, si qetzij ma ndiqayaꞌ ta kan chi kuqul qakꞌuꞌx rikꞌin y ngojkikot ndiqoyobꞌej ri rusujun kan.

Ma tiqayaꞌ kan chi ndiqanimaj ri ndubꞌij ri Dios

7Romariꞌ achel ndubꞌij ri Espíritu Santo chupan ri rutzij ri Dios tzꞌibꞌan kan:

Si wokami ndiwakꞌaxaj ri ndubꞌij ri Dios chiwa,

8Ma tikowrisaj iwánima, achel xkibꞌen ri ojer teq iwatit-imamaꞌ pa chaqiꞌj y tzꞌiran ulew

Atoq rikꞌin ri itzel teq achike xekibꞌanalaꞌ, xkitojtobꞌej ri janipeꞌ ndikochꞌon ri Dios.+

9Romariꞌ ri Dios kereꞌ xubꞌij:

Chiriꞌ ri ojer teq iwatit-imamaꞌ xkitojtobꞌej ri janipeꞌ ngikochꞌon,

Maske 40 junaꞌ xkitzꞌet ri nimalej teq achike xenbꞌanalaꞌ pe chikiwech.

10Romariꞌ, xyakatej woyowal chake ri ojer teq iwatit-imamaꞌ riꞌ,

Y kereꞌ xinbꞌij pa kiwiꞌ: Jumul esachineq pa kánima

Y ma ndikajoꞌ ta ndiketamaj ruchojmil ri bꞌey nukꞌutun chikiwech.

11Romariꞌ, pa woyowal xinbꞌen jurar:

Ma la chuwaꞌq ma la kabꞌij xkeꞌok chupan ri uxlanen nusujun.+

Keriꞌ xubꞌij ri Dios.

12Rix hermanos, wokami ndikꞌatzin chi ndichajij ri ikꞌaslen, ma kꞌateꞌ kꞌo jun chiwech rix ri itzel xtubꞌen qa ránima y ma xtutaqij chi ta ri ndubꞌij ri Kꞌaslik Dios, y romariꞌ xtuyaꞌ kan. 13Pa rukꞌexel riꞌ, qꞌij-qꞌij tibꞌochilaꞌ y tipixabꞌaj iwiꞌ chiwech, utz kꞌa yoꞌon tiempo chaqe, achel ndubꞌij ri rutzij ri Dios, chin keriꞌ nixta jun xtichꞌakatix roma ri mak y xtikowir qa ri ránima. 14Porque kꞌo chuqaꞌ qaqꞌaꞌ chare ri yoꞌon chik chare ri Cristo, pero ndikꞌatzin chi jumul ndiqayaꞌ qánima rikꞌin hasta pa rukꞌisibꞌel, achel qabꞌanun pe xe jampeꞌ pa nabꞌey.

15Achel ndubꞌij chupan ri rutzij ri Dios ri kꞌaja xqabꞌij pe:

Si wokami ndiwakꞌaxaj ri ndubꞌij ri Dios chiwa,

Ma tikowrisaj ri iwánima, achel xkibꞌen ri ojer teq iwatit-imamaꞌ ri xeyakatej chirij ri Dios.

Keriꞌ tzꞌibꞌan kan.

16Y kin ja ri wineq ukꞌuan kibꞌey roma ri Moisés ri xeꞌel pe pa rochꞌulew Egipto, ja wineq riꞌ ri maske xkakꞌaxaj ri xubꞌij ri Dios, xa xeyakatej chirij.+ 17¿Y achoq chake xyakatej royowal ri Dios 40 junaꞌ? Chake ri xekibꞌanalaꞌ mak, romariꞌ xeken y xepokꞌeꞌ kan pa chaqiꞌj y tzꞌiran ulew.+ 18¿Y achoq chake xubꞌen jurar ri Dios chi ma la chuwaꞌq ma la kabꞌij xkeꞌok chupan ri uxlanen rusujun? Chake ri ma xeniman ta. 19Konojel ri wineq riꞌ, ndiqatzꞌet chi ma xeꞌok ta chupan ri uxlanen sujun, porque ma xkitaqij ta ri Dios.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index