Search form

Hebreos 4

1Romariꞌ, tiqabꞌanaꞌ cuenta ri qakꞌaslen, utz chi kꞌa kꞌo cheꞌel ngojok chupan ri uxlanen rusujun ri Dios. Ma kꞌateꞌ ekꞌo jujun chiꞌikajal ri ma xkeꞌok ta chupan ri uxlanen riꞌ. 2Porque jajun chaqe roj tzijon pe ri utzulej teq tzij chin kolotajik,+ achel xtzijox ri utzulej rutzij ri Dios chake ri ojer teq qatit-qamamaꞌ. Pero chake rejeꞌ, ri xkakꞌaxaj xa ma jun utz xukꞌen pe, porque ma xkikuqubꞌaꞌ ta kikꞌuꞌx rikꞌin ri utzulej tzij xkakꞌaxaj. 3Keriꞌ nibꞌij chiwa porque roj ri qataqin ri utzulej teq tzij qakꞌaxan, qatzꞌamon bꞌey chin ngojok chupan ri uxlanen rusujun ri Dios. Pero ri Dios pa kiwiꞌ ri ma xkuqeꞌ ta kikꞌuꞌx rikꞌin, kereꞌ xubꞌij:

Romariꞌ, pa woyowal xinbꞌen jurar:

Ma la chuwaꞌq ma la kabꞌij xkeꞌok chupan ri uxlanen nusujun.+

Keriꞌ xubꞌij ri Dios, maske xe jampeꞌ pa nabꞌey atoq xubꞌen ri rochꞌulew runabꞌan chik ri uxlanen riꞌ. 4Porque kꞌo jun apeꞌ chupan ri rutzij ri Dios ndichꞌaꞌa pa ruwiꞌ ri xubꞌen ri Dios atoq xkꞌachaj yan rubꞌanik ri kaj y ri rochꞌulew. Chiriꞌ ndubꞌij:

Atoq ri Dios xukꞌis rubꞌanik nojel ri samaj xubꞌen, pa ruwuq qꞌij xuxlan.+

Keriꞌ tzꞌibꞌan kan.

5Pero achel xqabꞌij yan pe, chupan ri rutzij ri Dios kereꞌ chuqaꞌ ndubꞌij:

Ma la chuwaꞌq ma la kabꞌij xkeꞌok chupan ri uxlanen nusujun.

Keriꞌ tzꞌibꞌan kan.

6Romariꞌ, ri ojer teq qatit-qamamaꞌ ma xeꞌok ta chupan ri uxlanen riꞌ, porque ma xeniman ta. Pero qꞌalej chuqaꞌ chi kꞌa ekꞌo jujun ri ngeꞌok chupan ri uxlanen rusujun ri Dios. 7Porque atoq qꞌaxneq chik kꞌiy tiempo, ri Dios xuchaꞌ chik jun qꞌij chin nduyaꞌ uxlanen, romariꞌ xuyaꞌ pa ránima ri David chin xubꞌij:

Si wokami ndiwakꞌaxaj ri ndubꞌij ri Dios chiwa,

Ma tikowrisaj ri iwánima,+

xchajeꞌ.

8Xa ta ja chupan ri qetzij uxlanen rusujun ri Dios, xeꞌukꞌuꞌex ri ojer teq qatit-qamamaꞌ roma ri Josué, ri Dios man ta xuyaꞌ pa ránima ri David chin xchꞌaꞌa pa ruwiꞌ jun chik qꞌij chin uxlanen. 9Romariꞌ, qetaman chi kꞌa kꞌo jun loqꞌolej uxlanen chin rutinamit ri Dios. 10Porque ri jun ri okuneq chupan ri uxlanen rusujun ri Dios, nduxlan chuqaꞌ chuwech ri erubꞌanaloꞌon pe, achel ri Dios xuxlan chuwech ri erubꞌanun. 11Romariꞌ tiqatijaꞌ qaqꞌij chi ngojok chupan ri uxlanen ndusuj ri Dios, ma kꞌateꞌ kꞌo jun xtoqan rubꞌey kikꞌaslen ri ma xeniman ta ojer.

12Porque ri rutzij ri Dios kin kꞌaslik wi y kꞌo ruchuqꞌaꞌ, y más nditiker ndisokon ke chuwech jun espada+ ri kaꞌiꞌ apeꞌ kꞌo rey, y más nej ndok qa chupan ri qánima y ri qa-espíritu. Ndeqaqa hasta apeꞌ kꞌo ri rututꞌil ri qabꞌaqil, y nditiker ndunikꞌoj ri ndiqanojij y ri ndiqarayij pa qánima. 13Y nixta jun chikikajal ri ebꞌanun ri nditiker ta ndirewaj riꞌ chuwech ri Dios, nojel ri ebꞌanun roma rijaꞌ kin ngeqꞌalajin wi chuwech, y chuwech rijaꞌ ndeqabꞌij nojel ri qabꞌanun pa qakꞌaslen.

Ja ri Jesús ri más nimalej ruqꞌij qa-Sacerdote

14Ri Jesús ri Rukꞌajol ri Dios, ja rijaꞌ ri más nimalej ruqꞌij qa-Sacerdote ri xbꞌa e chikaj y xbꞌekꞌojeꞌ rikꞌin ri Dios. Romariꞌ, tiqatijaꞌ qaqꞌij chi jumul kuqul qakꞌuꞌx rikꞌin ri achike qataqin pa ruwiꞌ rijaꞌ. 15Porque ri más nimalej ruqꞌij Sacerdote riꞌ, kin kꞌo pa qawiꞌ, y nditiker ndujoyowaj qawech atoq maneq ok ruchuqꞌaꞌ qánima+ chuwech ri mak. Porque atoq xkꞌojeꞌ chochꞌulew, rijaꞌ xtaqchiꞌix achel ngojtaqchiꞌix roj. Ri itzel xukusaj nojel itzel teq achike chirij chin xutaqchiꞌij y xrajoꞌ ta xutzeq pa mak, pero rijaꞌ ma jumbꞌey xtzaq pa mak.+ 16Y roma chikaj kꞌo wi ri más nimalej ruqꞌij qa-Sacerdote, kuqul qakꞌuꞌx tiqakꞌutuj qatoꞌik chare ri Dios ri tzꞌuyul pa ru-trono,+ chin keriꞌ ndiqil rujoyowaxik qawech y ri ru-favor ri Dios atoq ndikꞌatzin chaqe.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index