Search form

Hebreos 5

1Porque nojel sacerdote ri más nimalej ruqꞌij, ndichaꞌox chikikajal ri wineq chin ndichꞌaꞌa pa ki-cuenta ri wineq chuwech ri Dios, chin keriꞌ ngerusuj jalajaj teq sipanik y ngerukamisaj awej ri ngekikꞌen pe ri wineq chin ndikuyutej ri kimak.+ 2Ri sacerdote riꞌ xa wineq ok chuqaꞌ ri maneq ruchuqꞌaꞌ ránima chuwech ri mak, romariꞌ nditiker ndupoqonaj kiwech ri wineq ri ma ketaman ta ri ndirajoꞌ ri Dios y sachineq rubꞌey ri Dios chikiwech. 3Y roma maneq ok ruchuqꞌaꞌ ránima chuwech ri mak, ndikꞌatzin ngerusuj awej chuwech ri Dios chin ndikuyutej ri mak rubꞌanun rijaꞌ,+ y ri mak kibꞌanun ri wineq.

4Y nixta jun wineq ruyon ta chuwech ndok ri más nimalej ruqꞌij sacerdote. Xa kin ja ri Dios ndoyon richin, achel xbꞌanatej ojer rikꞌin ri Aarón.+ 5Keriꞌ chuqaꞌ ri Cristo, ma ruyon ta chuwech xok ri más nimalej ruqꞌij Sacerdote, xa kin ja ri Dios xchaꞌon richin, porque kereꞌ xubꞌij chare:

Ja rat ri Nukꞌajol,

Y wokami niqꞌalajrisaj chi jumul wi rat Nukꞌajol.+

6Achel chuqaꞌ ndubꞌij jun chik apeꞌ chupan ri rutzij ri Dios tzꞌibꞌan kan:

Rat, rat Sacerdote chin jumul,

Sacerdote achel ri sacerdote Melquisedec.+

7Atoq ri Cristo xkꞌojeꞌ chochꞌulew, rikꞌin oqꞌej y kaw ruchꞌabꞌel xubꞌen orar, xukꞌutuj kamelal chare ri Dios ri kꞌo ruchuqꞌaꞌ chin ndukal pa ruqꞌaꞌ ri kamik; y roma rijaꞌ kin xniman, xakꞌaxex roma ri Dios. 8Ri Cristo kin Rukꞌajol wi ri Dios, pero rikꞌin ri kꞌayew xuqꞌasaj, xretamaj xniman.+ 9Y roma xubꞌen nojel ri achike roma xtaq pe chochꞌulew, rijaꞌ xok Kolonel ri nduyaꞌ kolotajik chin jumul chake konojel ri ngeniman richin.+ 10Porque ri Dios xubꞌen chare chi xok ri más nimalej ruqꞌij Sacerdote, Sacerdote achel ri sacerdote Melquisedec.

Pixabꞌanik chin ngojkꞌiy chiraqen ri Ajaw

11Pa ruwiꞌ ri qabꞌiꞌin pe, kꞌa kꞌiy achike ndiqajoꞌ ndiqabꞌij, pero cuesta ndiqabꞌij rubꞌeyal chiwa porque kꞌajani kixtiker ndikꞌoxomaj roma ma ndiwojoꞌ ta. 12Y roma kꞌiy chik tiempo itaqin ri Ajaw, kin ta rix tijonelaꞌ chik, pero xa kꞌa ndikꞌatzin ngixtijox chik jumbꞌey rikꞌin tijonik chin ri rutzij ri Dios ri más ma cuesta ta ngekꞌoxomex. Xa kꞌa rix achel chꞌuteq akꞌolaꞌ, ri kꞌa tzꞌun ipan y kꞌajani kixtiker ndikꞌux rikil wey. 13Porque ri ndikitijoj kiꞌ xe ok rikꞌin ri tijonik más ma cuesta ta, xa eꞌachel chꞌuteq akꞌolaꞌ, porque kꞌajani tiketamaj utz-utz rukajal ri utz rikꞌin ri ma utz ta.+ 14Pero ri tijonik chin ri rutzij ri Dios ri más cuesta ndikꞌoxomex, ndiyoꞌox chake ri ekꞌiyineq pa kikꞌaslen chiraqen ri Ajaw, porque rejeꞌ rukꞌamon chake ndikichaꞌ achike ri utz roma kitijon kiꞌ pa ruwiꞌ achike ri utz y achike ri ma utz ta.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index