Search form

Hebreos 6

1Romariꞌ tiqabꞌanaꞌ chare ri qakꞌaslen chi ndikꞌiy más chiraqen ri Ajaw. Tiqetamaj más chuwech ri nabꞌey teq tijonik xyoꞌox chaqe pa ruwiꞌ ri Cristo. Ma qojkikot xe ok rikꞌin ri tijonik qetaman chik pa ruwiꞌ ri Cristo, achel ri tijonik ri ndubꞌij chi ndikꞌatzin ndiqayaꞌ kan ri itzel teq achike ri ndukꞌen pe kamik, o ri tijonik pa ruwiꞌ ri ndikꞌatzin ndiqakuqubꞌaꞌ qakꞌuꞌx rikꞌin ri Dios, 2o ri tijonik pa ruwiꞌ bautismos,+ o ri tijonik pa ruwiꞌ ri achike roma ndiyoꞌox qꞌaꞌaj pa kiwiꞌ ri hermanos,+ o ri tijonik pa ruwiꞌ ri kikꞌastajibꞌel ri animaꞌiꞌ, o ri tijonik pa ruwiꞌ ri qꞌaton tzij ri maneq chik cheꞌel ndijalatej ri xtubꞌen ri Dios pa kiwiꞌ ri wineq. 3Y kin xtikꞌiy más ri qakꞌaslen chiraqen ri Dios, si rijaꞌ nduyaꞌ qꞌij chaqe.

4Porque ri xyikꞌex yan jumbꞌey ri kikꞌaslen, y xekikot yan chupan ri favor nduyaꞌ ri Dios, y xkꞌojeꞌ yan chuqaꞌ ri Espíritu Santo kikꞌin, 5y xkinaꞌ yan rukiꞌil ri utzulej rutzij ri Dios, y rukiꞌil chuqaꞌ ri nimalej teq uchuqꞌaꞌ ri nditzꞌetetej chupan ri tiempo más chiqawech apu, 6si rejeꞌ maske bꞌanun nojel reꞌ kikꞌin, xkimalij kan ri Dios, maneq cheꞌel xtitzolix chi pe kánima rikꞌin ri Dios, porque xa castigo ndikoyoj chikij roma xa achel ndikibꞌajij chik jumbꞌey ri Rukꞌajol ri Dios cho cruz y ndikikꞌixbꞌisaj chikiwech ri wineq. 7Ri ndikibꞌen chare ri kikꞌaslen chi ndikꞌiy más chiraqen ri Ajaw, kin eꞌachel jun ulew ri ndubꞌiqꞌ qa ri qatataꞌ ri jutaqil ndiqaqa pa ruwiꞌ. Ri ulew riꞌ nduyaꞌ utzulej tikoꞌ chake ri ngesamajin richin, y ri ulew kin ndiyoꞌox ru-favor ri Dios pa ruwiꞌ. 8Pero ri wineq ri ndikimalij kan ri Dios, xa eꞌachel jun ulew ri ma jun rikꞌaꞌtz, porque xa qꞌayis y kꞌix ngebꞌeꞌel pe chuwech. Jun ulew achel riꞌ xa itzel nditzꞌat y pa rukꞌisibꞌel xa ndikꞌatisex nojel ruwech.+

9Hermanos ri tzꞌan ngixqajoꞌ, maske kaw jubꞌaꞌ re tzij re ngojtajin chubꞌixik chiwa, kin kuqul qakꞌuꞌx chi rix ma imalin ta kan ri Dios, y ndibꞌen ri utz pa ikꞌaslen, rix achel ri ulew ri nduyaꞌ utzulej tikoꞌ y rikꞌin ri ngixtajin rikꞌin, ndiqꞌalajin chi ngixkolotej. 10Porque ri Dios kin pa ruchojmil ndubꞌen nojel, romariꞌ ma ndumestaj ta ri samaj ibꞌanun pe pa rubꞌiꞌ, y ma ndumestaj ta chuqaꞌ chi rix ndiwojoꞌ rijaꞌ. Keriꞌ ndiqꞌalajin roma eꞌitoꞌon pe y kꞌa ngeꞌitoꞌ ri loqꞌolej teq ralkꞌuaꞌl. 11Pero ndiqarayij chi chiꞌijununal nditij iqꞌij chi ngixtoꞌon y keriꞌ ta kꞌa jumul ndibꞌen hasta pa rukꞌisibꞌel, chin keriꞌ rikꞌin kuqubꞌel kꞌuxlaj ndiwoyobꞌej apu ri qꞌij chin ndiwil ri favor rusujun kan. 12Ma ndiqajoꞌ ta chi ngixqꞌorayaj, ndiqajoꞌ chi ndiwoqaj kikꞌaslen ri ndok kichin ri rusujun ri Dios porque kiyoꞌon kánima rikꞌin rijaꞌ y ma qꞌaxneq ta kikꞌuꞌx chiroyobꞌexik ri rusujun.

Ri Dios kin nduyaꞌ wi ri rusujun

13Porque ri Dios atoq kꞌo xusuj chare ri Abraham, kin xubꞌen jurar, y roma maneq chik jun bꞌiꞌaj ri más nim ruqꞌij, ri Dios pa rubꞌiꞌ rijaꞌ mismo xubꞌen jurar. 14Y xubꞌij chare: Kin qetzij wi, riyin santienta favor niyaꞌ pa awiꞌ, y nibꞌen chawa chi santienta awiy-amam ngebꞌekꞌojeꞌ,+ xchajeꞌ ri Dios. 15Y keriꞌ ri Abraham ma xkꞌo ta rukꞌuꞌx chiroyobꞌexik ri xsuj chare, y kin xyoꞌox wi chare. 16Ri wineq atoq ndikibꞌen jurar, ndikikusaj rubꞌiꞌ jun ri más nim ruqꞌij ke chikiwech rejeꞌ, y riꞌ ndubꞌij tzij chi ja ri qetzij ngetajin chubꞌixik, y ma ndikꞌatzin ta ndibꞌix chik jun achike pa ruwiꞌ ri xkibꞌij. 17Romariꞌ, ri Dios xubꞌen jurar atoq xrajoꞌ xukꞌut utz-utz chikiwech ri ngekochin ri rusujun, chi rijaꞌ ma ndujel ta ruwech rutzij, xa kin nduyaꞌ wi ri rusujun.+ 18Y rikꞌin ri kꞌo xusuj y ri xubꞌen jurar, ndiqꞌalajin chi ri Dios ma ndireqꞌon ta y ma ndujel ta ruwech rutzij. Keriꞌ xubꞌen chin ndubꞌochiꞌij qánima roj ri qakanon qatoꞌik rikꞌin chin ngojrukal, chin keriꞌ kaw kuqul qakꞌuꞌx chi rijaꞌ kin nduyaꞌ wi ri qoyobꞌen chi nduyaꞌ. 19Y ri qoyobꞌen chi nduyaꞌ kin achel jun yuqubꞌel chin ri qánima ri roj ruximon kaw, achel jun ancla yoꞌon qa pa yaꞌ ri ndubꞌen chare jun barco chi xe jun apeꞌ ndikꞌojeꞌ pariꞌ ri yaꞌ. Ri qoyobꞌen ndubꞌen chaqe chi achel roj qꞌaxneq chi apu jukꞌan chin ri pimilej kꞌul ri tzꞌapiyon ruchiꞌ ri kꞌojlibꞌel más loqꞌolej chin ri aj chikaj rachoch ri Dios. 20Chiriꞌ xok apu nabꞌey ri Jesús qoma roj y xujeq ri bꞌey chiqawech, porque okuneq más nimalej ruqꞌij Sacerdote chin jumul, Sacerdote achel ri sacerdote Melquisedec.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index