Search form

Hebreos 7

Ri Melquisedec más nimalej ruqꞌij ke chuwech ri Abraham

1Nikꞌuxlaꞌaj ri Melquisedec chiwa, porque rijaꞌ rey chin ri tinamit Salem, y sacerdote chin ri nimalej ruqꞌij Dios. Y atoq ri Abraham tzolijneq pe pa guerra roma xtiker pa kiqꞌaꞌ ri reyes, ri Melquisedec xbꞌerukꞌuluꞌ ri Abraham y xubꞌen bendecir.+ 2Y ri Abraham xujech chare ri Melquisedec ri diezmo chin nojel ri xukꞌen chikiqꞌaꞌ ri reyes. Ri bꞌiꞌaj Melquisedec ndubꞌij tzij, rey ri ndubꞌen nojel pa ruchojmil, y ndubꞌij tzij chuqaꞌ, rey pa ruwiꞌ ri tinamit Salem, y Salem ndubꞌij tzij, rey ri nduyaꞌ uxlanen chikikajal ri wineq. 3Chupan ri rutzij ri Dios, ma jun achike ndubꞌij si xekꞌojeꞌ rute-rutataꞌ ri Melquisedec, nixta etaman si xekꞌojeꞌ ratit-rumamaꞌ, ma etaman ta chuqaꞌ si xalex o xken, y rikꞌin riꞌ ndiqꞌalajin chi rijaꞌ okuneq sacerdote chin jumul, achel ri Rukꞌajol ri Dios, ri kin Sacerdote wi chin jumul.+

4Tiyaꞌ cuenta chare chi kin nimalej ruqꞌij ri Melquisedec, porque hasta ri ojer qamamaꞌ Abraham xuyaꞌ chare ri diezmo ri xrelesaj e rikꞌin nojel ri xukꞌen chikiqꞌaꞌ ri reyes pa guerra.+ 5Ri ley xyoꞌox chare ri Moisés, ndubꞌij chi ri eriy-rumam ri Leví ri echaꞌon chin ngeꞌok sacerdotes, chake rejeꞌ ndiyoꞌox ri diezmos koma ri kiwinaqul, maske ri kiwinaqul eriy-rumam ri Abraham chuqaꞌ.+ 6Pero ri Melquisedec maske ma riy-rumam ta kan ri Leví, xjach ri diezmo pa ruqꞌaꞌ roma ri Abraham, y ri Melquisedec xubꞌen bendecir ri Abraham ri achoq chare kꞌo rusujun kan ri Dios. 7Y kin qetzij wi chi ri más nimalej ruqꞌij, jariꞌ ri ndibꞌanun bendecir ri más maneq ok ruqꞌij. 8Chireꞌ chochꞌulew, ri diezmo ndiyoꞌox chake sacerdotes israelitas ri xa ngeken e, pero pa ruwiꞌ ri sacerdote Melquisedec ndibꞌix chi kꞌo rukꞌaslen, y ri Abraham chare rijaꞌ xuyaꞌ ri diezmo. 9Y rikꞌin ri xuyaꞌ ri diezmo ri Abraham chare ri Melquisedec, ri sacerdotes eriy-rumam kan ri Leví ri achoq chake ndiyoꞌox ri diezmo wokami, achel ta jajun rejeꞌ xkiyaꞌ ri diezmo chare ri Melquisedec, roma ri diezmo xuyaꞌ ri ojer kimamaꞌ Abraham. 10Keriꞌ ndiqabꞌij, porque atoq ri Melquisedec xbꞌerukꞌuluꞌ ri Abraham, kꞌajani talex nixta ri Leví y nixta jun rumam, xa kꞌa ekꞌo pa ru-cuerpo ri Abraham, romariꞌ ndiqabꞌij chi rejeꞌ kin achel xkiyaꞌ ta ri diezmo chare ri Melquisedec chuqaꞌ.

Ri Jesús xok Sacerdote pa kikꞌexel ri sacerdotes eriy-rumam kan ri Leví

11Ri samaj ri xkibꞌen ri sacerdotes eriy-rumam kan ri Leví, samaj ri kin rukꞌuꞌx ri ley ri xyoꞌox chake ri israelitas, xa ta xubꞌen chi ri israelitas xchꞌajchꞌojir kikꞌaslen chuwech ri Dios, man ta xkꞌatzin chi xuqaqa jun chik Sacerdote achel ri sacerdote Melquisedec, jun Sacerdote ri ma achel ta ri sacerdote Aarón nixta achel ri chꞌaqa chik sacerdotes eriy-rumam kan ri Leví. 12Keriꞌ nibꞌij chiwa, porque atoq ngejalatej e ri bꞌotzaj sacerdotes, ndikꞌatzin chuqaꞌ chi ndijalatej ri ndubꞌij ri ley. 13Y ri Qajaw Jesucristo ri achoq pa ruwiꞌ ndubꞌij ri rutzij ri Dios chi Sacerdote wokami, rijaꞌ jun riy-rumam kan ri Judá, y chikikajal rejeꞌ nixta jun chaꞌon chin ta okuneq sacerdote. 14Y kin qꞌalej chi ri Qajaw Jesucristo jun riy-rumam kan ri Judá. Y ri ley xyoꞌox chare ri Moisés nixta jun achike ndubꞌij chi ngeꞌok sacerdotes ri eriy-rumam kan ri Judá.

15Y más qꞌalej chi ri Dios xerujel ri sacerdotes, porque xuteq pe jun chik Sacerdote achel ri sacerdote Melquisedec. 16Ri Qajaw Jesucristo xok Sacerdote, pero ma achel ta ri ndubꞌij ri ley xyoꞌox chare ri Moisés, ri ndubꞌij chi chikikajal ri eriy-rumam kan ri Leví ngechaꞌox ri ngeꞌok sacerdotes. Ri Jesucristo xok Sacerdote roma nim ruchuqꞌaꞌ ri rukꞌaslen ri ma jubꞌaꞌ xtikꞌis. 17Porque ri Dios kereꞌ rubꞌiꞌin kan pa ruwiꞌ ri Rukꞌajol:

Rat, rat Sacerdote chin jumul,

Sacerdote achel ri sacerdote Melquisedec,+

xchajeꞌ.

18Romariꞌ, ri ndubꞌij ri ley pa kiwiꞌ ri sacerdotes eriy-rumam kan ri Leví, xjal e, porque ri ley riꞌ maneq ruchuqꞌaꞌ chin xeruchꞌajchꞌojrisaj ri wineq chuwech ri Dios.+ 19Porque ri ley nixta jun achike xtiker xuchꞌajchꞌojrisaj chin jumul chuwech ri Dios.+ Jakꞌa ri achike qoyobꞌen wokami kin más wi utz roma ja ri Jesús ri qa-Sacerdote, ri achoq roma ngojjel apu rikꞌin ri Dios.

Ja ri Jesús ri más nimalej ruqꞌij Sacerdote chin jumul

20Ri Dios kin xubꞌen jurar atoq xuyaꞌ ri Jesucristo chin xok qa-Sacerdote. Pero pa kiwiꞌ ri sacerdotes eriy-rumam kan ri Leví, ri Dios nixta jun juramento xubꞌen atoq xeruyaꞌ chin xeꞌok sacerdotes. 21Pero atoq ri Jesús xok Sacerdote, ri Dios kin xubꞌen jurar chare. Achel ndubꞌij chupan ri rutzij tzꞌibꞌan kan:

Ri Ajaw Dios kereꞌ xubꞌen jurar

Y ma ndutzolij ta rutzij:

Rat, rat Sacerdote chin jumul.

Keriꞌ tzꞌibꞌan kan.

22Y rikꞌin ri keriꞌ xubꞌen jurar ri Dios, ja ri Jesús ri etal chi kin ndikꞌachaj wi ri pacto rubꞌanun ri Dios qikꞌin roj ri qataqin, y re kꞌakꞌakꞌ pacto reꞌ más jabꞌel chuwech ri nabꞌey. 23Porque chupan ri nabꞌey pacto, xkꞌatzin chi xekꞌojeꞌ ekꞌiy sacerdotes eriy-rumam kan ri Leví, roma ngeken e y ma ngetiker ta ngeꞌok sacerdotes chin jumul. 24Jakꞌa ri Jesús chin jumul kꞌo rukꞌaslen, y romariꞌ ma ndijalatej ta, xa kin Sacerdote chin jumul. 25Romariꞌ, nditiker ngerukal chin jumul ri ngetaqin richin chin ngebꞌeqaqa rikꞌin ri Dios, porque jumul kꞌo rukꞌaslen chin ndukꞌutuj ru-favor ri Dios pa kiwiꞌ.

26Y keriꞌ kꞌa, ja ri Jesús ri más nimalej ruqꞌij Sacerdote ri ndikꞌatzin chaqe, porque rijaꞌ kin loqꞌolej wi, ma jumbꞌey rubꞌanun mak, y nixta jun itzel kꞌo pa ránima.+ Ma junan ta rukꞌaslen kikꞌin ri wineq, porque ri wineq kin eꞌaj mak wi, y rijaꞌ kin más nim ruqꞌij bꞌanun chare chikaj. 27Y ri Jesús ma achel ta ri más nimalej teq kiqꞌij sacerdotes eriy-rumam kan ri Leví, ri ndikꞌatzin chi qꞌij-qꞌij ngekikamisaj chikap chin ngekisuj chuwech ri Dios pariꞌ ri altar. Rejeꞌ keriꞌ ndikibꞌen roma kimak rejeꞌ y kꞌateriꞌ roma kimak ri kiwinaqul.+ Pero ri Jesús atoq xkꞌojeꞌ chochꞌulew, xe jumbꞌey y chin jumul xusuj ri rukꞌaslen pa kamik chuwech ri Dios, roma kimak ri wineq.+ 28Porque chupan ri ley xyoꞌox chare ri Moisés, ndubꞌij chi ri ngeꞌok más nimalej teq kiqꞌij sacerdotes, xa wineq ri kꞌo cheꞌel ngetzaq pa mak. Pero tiempo más pe chuwech ri ley riꞌ, ri Dios xubꞌen jurar chi ja ri Rukꞌajol ri más nimalej ruqꞌij Sacerdote chin jumul, porque kin ndubꞌen nojel ri ndibꞌix chare roma ri Dios.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index