Search form

Hebreos 8

Ja ri Jesús ri más nimalej ruqꞌij Sacerdote chin ri kꞌakꞌakꞌ pacto

1Ri rukꞌuꞌx nojel ri ngojtajin chubꞌixik chiwa, jareꞌ: Pa qawiꞌ roj kꞌo jun más nimalej ruqꞌij Sacerdote tzꞌuyul pa rikiqꞌaꞌ ri ru-trono ri nimalej Dios chikaj. 2Y riꞌ, ja ri Jesús ri ndubꞌen ri loqꞌolej samaj chin sacerdote chupan ri qetzij rachoch ri Dios, achoch ri ma wineq ta ebꞌanayon,+ xa kin ja ri Ajaw Dios.

3Konojel ri más nimalej teq kiqꞌij sacerdotes, echaꞌon chin ngekisuj awej teq chikap y jalajaj teq sipanik chuwech ri Dios chin ndikuyutej kimak ri wineq.+ Romariꞌ ri Jesús ri más nimalej ruqꞌij qa-Sacerdote, xkꞌatzin chuqaꞌ chi kꞌo achike xusuj chuwech ri Dios. 4Si ri Jesús kꞌo ta chochꞌulew, man ta okuneq sacerdote, porque ekꞌo chik sacerdotes israelitas ri ngekisuj ofrendas pariꞌ ri altar, achel ndubꞌij ri ley xyoꞌox chare ri Moisés. 5Pero ri sacerdotes riꞌ ngesamej chupan ri aj rochꞌulew rachoch ri Dios, rachibꞌel y rumochꞌochꞌil ri qetzij rachoch ri Dios kꞌo chikaj. Y roj qetaman chi keriꞌ, porque atoq ri Moisés ja ndutzꞌuk ndupabꞌaꞌ ri rachoch ri Dios, ri Dios kereꞌ xubꞌij chare: ¡Tatzꞌetaꞌ utz-utz nojel ri achike xtabꞌen! Tabꞌanaꞌ chare ri achoch qitz achel xinkꞌut chawech pariꞌ ri juyuꞌ,+ xchajeꞌ. 6Pero ri Jesús ri más nimalej ruqꞌij qa-Sacerdote, más utzulej samaj yoꞌon chare ke chuwech ri samaj yoꞌon chake ri sacerdotes eriy-rumam kan ri Leví. Y keriꞌ chuqaꞌ ri kꞌakꞌakꞌ pacto ri xubꞌen ri Dios kikꞌin ri wineq, kin más utz chuwech ri pacto kꞌo nabꞌey, porque ja ri Jesús xukusaj chin xubꞌen ri kꞌakꞌakꞌ pacto, y más jabꞌel teq achike ndusuj ri Dios chupan ri pacto riꞌ.

Ri kꞌakꞌakꞌ pacto más jabꞌel chuwech ri nabꞌey pacto

7Xa ta ri nabꞌey pacto xtiker xubꞌen chꞌajchꞌaj chare kikꞌaslen ri wineq chuwech ri Dios, man ta xkꞌatzin chi ri Dios xubꞌen jun rukan pacto. 8Pero atoq ri Dios xutzꞌet chi ri rutinamit ma chꞌajchꞌaj ta ri kikꞌaslen, chi chꞌolinik xubꞌij:

Ngetuqaqa qꞌij, ndichajeꞌ ri Ajaw,

Atoq nibꞌen jun kꞌakꞌakꞌ pacto kikꞌin ri aj Israel y ri aj Judá.+

9Ma achel ta ri pacto ri xinbꞌen kikꞌin ri ojer teq katit-kimamaꞌ,

Chupan ri qꞌij atoq xenyuqej chikiqꞌaꞌ

Chin xenwelesaj pe pa rochꞌulew Egipto;

Y roma rejeꞌ ma xkibꞌen ta ri ndubꞌij chupan ri pacto xinbꞌen kikꞌin,

Riyin xinmalij kan kiwech.

10Romariꞌ nibꞌen jun kꞌakꞌakꞌ pacto kikꞌin ri israelitas,

Atoq qꞌaxneq chik ri tiempo chin ri nabꞌey pacto,

Y jareꞌ rubꞌeyal, ndichajeꞌ ri Ajaw:

Niyaꞌ ri nu-ley pa kinojibꞌal,

Y nitzꞌibꞌaj pa kánima,

Riyin nginok ri ki-Dios,

Y rejeꞌ ngeꞌok nutinamit.+

11Chupan teq ri qꞌij riꞌ, ma ndikꞌatzin chi ta

Chi ndikitijoj kiꞌ chikiwech chi kiwinaqul kiꞌ o chi koxpochel kiꞌ,

Chin ndiketamaj nunoꞌoj riyin ri Ajaw.

Porque chupan ri tiempo riꞌ, konojel ndiketamaj nunoꞌoj,

Chi chꞌutiꞌq chi nimaꞌq.

12Chupan teq ri qꞌij riꞌ, riyin nikuy nojel ri itzel teq achike kibꞌanun,

Y ma jumbꞌey chik nikꞌuxlaꞌaj ri kimak.+

Keriꞌ xubꞌij ri Ajaw.

13Y atoq ri Dios ndichꞌaꞌa pa ruwiꞌ jun kꞌakꞌakꞌ pacto, riꞌ ndubꞌij tzij chi xubꞌen chare ri nabꞌey pacto chi ma ndikꞌatzin chi ta, y qetaman chi ri ma ndikꞌatzin chi ta, y nditziaqur qa, jubꞌaꞌ chik ndirajoꞌ chin ndikꞌis ruqꞌij.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index