Search form

Hebreos 9

Ri nabꞌey pacto ma ndubꞌen ta chake ri wineq chi chaj chik kibꞌanun chuwech ri Dios

1Y achel xqabꞌij yan, kꞌo leyes chupan ri nabꞌey pacto ri xubꞌen ri Dios rikꞌin ri rutinamit, ri ngechꞌaꞌa pa ruwiꞌ ri achike rubꞌanik ndiyoꞌox ruqꞌij rijaꞌ chupan ri aj rochꞌulew rachoch, y kꞌo chuqaꞌ leyes xeruyaꞌ ri ndichꞌaꞌa pa ruwiꞌ ri achike rubꞌanik ndibꞌan chare ri rachoch.+ 2Romariꞌ kereꞌ xbꞌan chare: Ri achoch riꞌ xbꞌan rikꞌin kꞌul, y kꞌo chuqaꞌ jun pimilej kꞌul jachayon rupan ri achoch riꞌ. Chupan ri kꞌojlibꞌel kꞌo pe nabꞌey, xyoꞌox ri candelero, y xyoꞌox chuqaꞌ ri mesa apeꞌ ngeyoꞌox ri kaxlan teq wey ri ngesujeꞌ chuwech ri Dios.+ Ri nabꞌey kꞌojlibꞌel riꞌ, ndibꞌix loqꞌolej kꞌojlibꞌel chare. 3Y chirij apu ri rukan kꞌul ri jachayon rupan rachoch ri Dios, kꞌo apu ri kꞌojlibꞌel ndibꞌix más loqꞌolej chare. 4Chunaqaj apu ri kꞌul chin ri kꞌojlibꞌel más loqꞌolej kꞌo jun altar bꞌanun chare qꞌanapueq apeꞌ ndiporox ri pon, y chupan ri kꞌojlibꞌel riꞌ kꞌo apu chuqaꞌ ri káxa chin ri nabꞌey pacto xubꞌen ri Dios rikꞌin ri rutinamit, y ri káxa riꞌ, qꞌanapueq nojel rij-rupan. Chupan ri káxa kꞌo jun chꞌuti bꞌambꞌel bꞌanun chuqaꞌ chare qꞌanapueq apeꞌ kꞌo jubꞌaꞌ maná ri achel xkikꞌux ri rutinamit ri Dios ojer. Kꞌo chuqaꞌ ri ruchꞌamiꞌy ri Aarón ri xjotayin pe, y ri kaꞌiꞌ tzꞌajtzꞌeq teq abꞌej achoq chikiwech tzꞌibꞌan ri rukꞌuꞌx ri nabꞌey pacto.+ 5Y pariꞌ ri káxa, ekꞌo kaꞌiꞌ kachibꞌel ru-ángeles ri Dios ri ndibꞌix querubín chake,+ ri ngeqꞌalajrisan ri nimalej ruqꞌij ri Dios. Ri ángeles riꞌ rikꞌil kixikꞌ chin ndikimujaj ri lugar apeꞌ ndikuyutej kimak ri wineq. Pero wokami ma ndiqabꞌij yan ta nojel rubꞌeyal riꞌ.

6Y rikꞌin ri keriꞌ rubꞌanik bꞌanun chare rupan ri rachoch ri Dios, ri sacerdotes israelitas qꞌij-qꞌij ngeꞌok apu chupan ri nabꞌey kꞌojlibꞌel chin ndikibꞌen nojel ri yoꞌon pa kiqꞌaꞌ chin ndikibꞌen. 7Pero chupan ri rukan kꞌojlibꞌel chin ri rachoch ri Dios, xe ri más nimalej ruqꞌij sacerdote kꞌo cheꞌel ndok apu, y xe chupan jun qꞌij pa jun junaꞌ, y atoq ndok apu, ndukꞌuaj apu kikikꞌel chikap chin ndusuj chuwech ri Dios roma rumak rijaꞌ y roma ri kimak ri tinamit ri ma chubꞌanik ta kibꞌanun.+ 8Y rikꞌin ri keriꞌ ndibꞌanatej chupan ri aj rochꞌulew rachoch ri Dios, ri Espíritu Santo nduqꞌalajrisaj chi mientras kꞌa kꞌo ri aj rochꞌulew rachoch ri Dios, kꞌajani tijaqeꞌ ri bꞌey chin ngeꞌok ri wineq chupan ri kꞌojlibꞌel más loqꞌolej apeꞌ kꞌo ri Dios. 9Nojel reꞌ ndukꞌut chiqawech chupan re tiempo re nitzꞌibꞌaj reꞌ chiwa, chi ri rusujik jalajaj teq sipanik y awej teq chikap chuwech ri Dios, ma nditiker ta ndubꞌen chake ri ngesuju chin ta ndikinaꞌ pa kánima chi chaj chik kibꞌanun chuwech ri Dios.+ 10Y ekꞌo chuqaꞌ leyes chupan ri nabꞌey pacto pa ruwiꞌ ri achike utz nditijeꞌ, ri achike utz ndikꞌuxeꞌ, y pa ruwiꞌ jalajaj teq chꞌajchꞌojrisanik ri ndikꞌatzin ngebꞌan chuwech ri Dios. Ri leyes riꞌ xkꞌojeꞌ keqalen xe hasta xuqaqa ri tiempo atoq ri Dios xuyaꞌ ri kꞌakꞌakꞌ pacto.

Ri nimalej reqalen rukamik ri Cristo

11Pero ri Cristo okuneq más nimalej ruqꞌij Sacerdote ri ndiyoꞌon más utzulej teq favores ri kꞌo qaqꞌaꞌ chake, y wokami ndisamej chupan ri qetzij rachoch ri Dios chikaj, ri más kꞌo ruqꞌij y reqalen. Ri achoch riꞌ ma wineq ta ebꞌanayon, y riꞌ ndubꞌij tzij chi ma aj rochꞌulew ta achoch.+ 12Ri Cristo xbꞌa e chikaj y xok chupan ri kꞌojlibꞌel más loqꞌolej chin ri rachoch ri Dios, ma chin ta ndusujlaꞌ kikikꞌel wakx y cabras, xa kin ja ri rukikꞌel rijaꞌ ri xbꞌiyin cho cruz ri xusuj chare ri Dios chin xojrulaqꞌ, y xe jumbꞌey keriꞌ xubꞌen chin xojrelesaj pa ruqꞌaꞌ ri tzꞌamayon qichin chin jumul. 13Chupan ri nabꞌey pacto, ri kikikꞌel ri achijaꞌ teq wakx y ri achijaꞌ teq cabra y chuqaꞌ ri ruchajil ri ati wakx ri ndixol rikꞌin yaꞌ,+ ri ndikirex chirij ri ki-cuerpos ri wineq ma echꞌajchꞌaj ta chuwech ri Dios, ndikibꞌen chik chꞌajchꞌaj chare ri wineq riꞌ chuwech ri Dios. 14Y si keriꞌ ngetiker ndikibꞌen ri kikikꞌel y ri kichajil ri chikap, ¡kin más wi nditiker ndubꞌen ri rukikꞌel ri Cristo! Porque ri rukikꞌel ri xbꞌiyin cho cruz, nduchꞌajchꞌojrisaj ri qánima chuwech ri itzel teq achike eqabꞌanaloꞌon ri xa pa kamik ngojrukꞌuaj.+ Keriꞌ xubꞌen ri Cristo chin ndiqayaꞌ ruqꞌij ri Kꞌaslik Dios. Ri Cristo rikꞌin ri ruchuqꞌaꞌ ri Espíritu ri jumul kꞌo rukꞌaslen, xusuj riꞌ chi chꞌajchꞌaj ofrenda chuwech ri Dios.

Ri kꞌakꞌakꞌ pacto xkꞌojeꞌ reqalen rikꞌin rukamik ri Cristo

15Y romariꞌ, ja ri Jesús xkusex chin xbꞌan ri kꞌakꞌakꞌ pacto, chin keriꞌ rikꞌin ri rukamik ngerukal ri wineq chuwech ri mak xkibꞌen atoq xekꞌojeꞌ chuxeꞌ ruchuqꞌaꞌ ri nabꞌey pacto. Y roma chuqaꞌ ri rukamik roj qonojel ri roj oyon roma ri Dios, ndiyoꞌox chaqe ri herencia ri ma ndikꞌis ta, herencia ri rusujun kan rijaꞌ. 16Keriꞌ nibꞌij chiwa, porque atoq bꞌanun ruwujil jun herencia, hasta kꞌa ndiken na e ri ndiyoꞌon ri herencia, ndikꞌojeꞌ reqalen ri ruwujil ri herencia riꞌ. 17Porque jun ruwujil herencia, maneq reqalen si ri ndiyoꞌon ri herencia kꞌa kꞌes, pero ndikꞌojeꞌ reqalen atoq ndiken e. 18Romariꞌ, chin xkꞌojeꞌ reqalen ri nabꞌey pacto ri xubꞌen ri Dios kikꞌin ri rutinamit, xkꞌatzin chi xekamisex y xbꞌiyin kikikꞌel awej teq chikap. 19Porque atoq ri Moisés xukꞌis rubꞌixik nojel ri mandamientos yoꞌon pe chupan ri ley chake ri ruwinaqul israelitas, xbꞌerukꞌamaꞌ pe kusmal teq karneꞌl oqꞌoman rikꞌin color keq, y xuxim chutzaꞌ jun ruqꞌaꞌ cheꞌ ndibꞌix hisopo chare, xumubꞌaꞌ pa kikikꞌel cabras y kikikꞌel achijaꞌ teq wakx xolon rikꞌin yaꞌ. Xukiraj ri kikꞌ chirij ri bꞌoton wuj ri achoq chuwech tzꞌibꞌan ri ley y pa kiwiꞌ ri wineq erutinamit ri Dios.+ 20Y ri Moisés xubꞌij chake: Rikꞌin re kikꞌ reꞌ nditzꞌukutej e ri pacto ri ndubꞌen ri Dios iwikꞌin, ri achoq chupan ndubꞌij ri ndirajoꞌ chi rix ndibꞌen.+ 21Ri Moisés chuqaꞌ xukiraj kikꞌ chirij rachoch ri Dios y chikij nojel ri ngekusex chin ndibꞌan ri rusamaj ri Dios pa rachoch. 22Chupan ri ley riꞌ, ndubꞌij chi jubꞌaꞌ ma nojel ri ndichꞌajchꞌojrisex, ndikꞌatzin chi rikꞌin kikꞌ ndibꞌan. Y si ma ndibꞌiyin ta rukikꞌel jun awej ri ndikamisex, ma ndikuyutej ta ri mak chuwech ri Dios.+ 23Romariꞌ, ri aj rochꞌulew rachoch ri Dios y nojel ri achike ekꞌo chupan xkꞌatzin chi xechꞌajchꞌojrisex rikꞌin kikikꞌel awej teq chikap. Ri achoch riꞌ jun rachibꞌel ri qetzij rachoch ri Dios kꞌo chikaj,+ y roma ri rachoch ri Dios kꞌo chikaj kin más nim ruqꞌij, xkꞌatzin chi xbꞌiyin kikꞌ más nim reqalen ke chuwech ri kikikꞌel awej teq chikap.

Ri rukamik ri Cristo xukꞌen pe kolotajik chaqe

24Keriꞌ nibꞌij chiwa porque ri Cristo, ma chupan ta ri aj rochꞌulew rachoch ri Dios, ri kin rachibꞌel wi ri qetzij rachoch ri Dios, xok chin xusuj ri rukikꞌel. Ri Cristo xbꞌa e chikaj, y xbꞌeqaqa chuwech ri Dios chin ndukꞌutuj favor pa qawiꞌ.+ 25Y ma ndikꞌatzin ta chi kꞌiy mul ndusuj ri rukikꞌel chuwech ri Dios. Pero waweꞌ chochꞌulew ri más nimalej ruqꞌij sacerdote juna-junaꞌ ndok apu chupan ri kꞌojlibꞌel más loqꞌolej chin ri rachoch ri Dios chin nderusujuꞌ kikꞌ ri xa ma rukikikꞌel ta rijaꞌ. 26Xa ta keriꞌ xkꞌatzin xubꞌen ri Cristo, kꞌiy ta mul xkꞌatzin xusuj riꞌ pa kamik, xe jampeꞌ xtzꞌukutej pe ri rochꞌulew hasta wokami. Pero chupan ri rukꞌisibꞌel tiempo rojkꞌo, rijaꞌ xuqaqa chochꞌulew chin xusuj riꞌ pa kamik xe jumbꞌey y chin jumul, chin xkuyutej ri mak kibꞌanun ri wineq.+ 27Y achel rubꞌiꞌin kan ri Dios, chi ri wineq xe jumbꞌey ngeken y kꞌateriꞌ ndiqꞌat tzij pa kiwiꞌ, 28keriꞌ chuqaꞌ ri Cristo, xe jumbꞌey xkꞌatzin xusuj rukꞌaslen pa kamik chin xkuyutej kimak santienta wineq.+ Y nduruqꞌalajrisaj chik riꞌ, pero ma chin chi ta ndukuy kimak wineq, xa kin chin ngeturukꞌamaꞌ ri nojel kánima koyobꞌen chi ngerukal.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index