Search form

Santiago 1

Ri Santiago nduteq ruxunaqil kiwech ri hermanos

1Riyin Santiago, rusamajel ri Dios y rusamajel ri Ajaw Jesucristo, nitzꞌibꞌaj e re wuj reꞌ chiwa rix ri kiy-kimam kan ri kabꞌlajuj+ rukꞌajol ri Israel ri ikiran iwiꞌ chuwech ri rochꞌulew. Niteq e ruxunaqil iwech.

Ri kochꞌonik kꞌiy utz ndukꞌen pe

2Hermanos, santienta tikikot iwánima atoq ngixtojtobꞌex rikꞌin jalajaj ruwech kꞌayew pa ikꞌaslen. 3Porque rix iwetaman chi atoq rix qꞌaxneq chik chupan ri kꞌayew riꞌ, y nditzꞌetetej chi qetzij kuqul ikꞌuꞌx+ rikꞌin ri Dios, riꞌ ndubꞌen chiwa chi más ngixkochꞌon.+ 4Pero ma tikꞌis qa ri kochꞌonik iwikꞌin, porque kꞌiy utz ndukꞌen pe chare ri ikꞌaslen, y keriꞌ ngixkꞌiy chiraqen ri Ajaw, ngixok nojel ri ndirajoꞌ ri Dios chi ngixok,+ y ma jun ri man ta tzꞌaqet pa ikꞌaslen.

5Y si kꞌo jun chiꞌikajal ri maneq ok runojibꞌal, tukꞌutuj nojibꞌel chare ri Dios,+ y kin xtiyoꞌox wi pe chare. Porque ri Dios nduyaꞌ nojibꞌel chake konojel ri ngekꞌutun chare, ma ndukꞌekꞌej ta y ma nabꞌey ta ndukꞌusalaꞌ tzij pa ruwiꞌ ri ndikꞌutun, y kꞌaja ta riꞌ xtuyaꞌ. 6Pero ri ndikꞌutun nojibꞌel chare ri Dios, ndikꞌatzin chi kuqul rukꞌuꞌx chi ndiyoꞌox chare ri ndukꞌutuj.+ Porque si rikꞌin kakaꞌ rukꞌuꞌx ndukꞌutuj, rijaꞌ xa achel jun rubꞌolqot ri mar, ri ndukꞌuꞌex kelaꞌ, ndukꞌuꞌex kelaꞌ roma ri kaqiqꞌ. 7Ri kakaꞌ rukꞌuꞌx ndukꞌutuj nojibꞌel chare ri Ajaw, ma tunojij chi ndiyoꞌox pe chare ri ndukꞌutuj. 8Porque ri keriꞌ ndubꞌen, jun wi achike ndunojij kami, y jun wi achike ndunojij chuwaꞌq, y keriꞌ ndubꞌen rikꞌin nojel.

9Ri hermano ri maneq ok ruchajin, tikikot, porque bꞌanun chare roma ri Dios chi kin kꞌo ruqꞌij.+ 10Y ri hermano bꞌeyon tikikot chuqaꞌ, roma rukꞌoxoman chi ndikꞌatzin nduqasaj riꞌ chuwech ri Ajaw. Porque ri bꞌeyon xa achel rukontzꞌijal qꞌayis ri ma chin ta jumul ndikꞌojeꞌ.+ 11Porque atoq ndel pe ri qꞌij y nduyaꞌ pe ruchuqꞌaꞌ, ndichaqiꞌj qa ri qꞌayis, y ri rukontzꞌijal nditzaq e, y nojel ri rex ok nditzuꞌun xa ndikꞌis qa. Keriꞌ chuqaꞌ ndibꞌanatej rikꞌin ri rukꞌaslen ri ndubꞌen bꞌeyomal, xa ndikꞌis qa.

12Kin jabꞌel roruqꞌij ri ndikochꞌon ri kꞌayew+ nduqꞌasaj, porque atoq xukachꞌ yan, nditzꞌetetej chi qetzij kuqul rukꞌuꞌx rikꞌin ri Dios, y ndiyoꞌox chare jun nimalej rajel-rukꞌexel+ y riꞌ ja ri kꞌaslen ma ndikꞌis ta, ri rusujun ri Dios chake ri ngeꞌojowan richin. 13Atoq jun nditaqchiꞌix chin ndubꞌen itzel teq achike, ma tubꞌij chi ja ri Dios nditaqchiꞌin richin, porque ri Dios ma ngerutaqchiꞌij ta ri wineq chin ndikibꞌen itzel teq achike, nixta rijaꞌ nditaqchiꞌix chin ndubꞌen itzel teq achike. 14Atoq jun nditaqchiꞌix chin ndubꞌen itzel teq achike, xa ja ri itzel ri ngerurayij pa ránima+ ri nditaqchiꞌin richin, y jariꞌ ndukꞌuan richin chin ndubꞌen mak. 15Y atoq jun wineq nduyaꞌ qꞌij chare ri itzel teq rayinik chi ndubꞌen qa ruxeꞌ pa ránima, ndeꞌalex pe ri mak+ y atoq ri mak kꞌiyineq chik pa rukꞌaslen, kamik ndukꞌen pe+ chare.

16Hermanos ri tzꞌan ngixinwojoꞌ, ma tichꞌakatij qa iwiꞌ. 17Chikaj rikꞌin ri Dios pataneq nojel ri utzulej teq achike y nojel ri loqꞌolej teq sipanik. Ja rijaꞌ bꞌanayon kichin nojel ri chꞌumilaꞌ ri ndujalalaꞌ riꞌ ri luz ndikiyaꞌ, pero rijaꞌ ma jumbꞌey ndijalatej ruwech+ y maneq qꞌequꞌ rikꞌin. 18Y roma keriꞌ xrajoꞌ rijaꞌ, xuyaꞌ ri aj chikaj kꞌaslen chaqe, roma xqataqij ri utzulej teq tzij chin kolotajik ri ndichꞌaꞌa pa ruwiꞌ ri qetzij. Y keriꞌ xojok achel ri nabꞌey teq ruwech tikoꞌ+ ri ngechꞌup chin ngesuj chuwech.

Tiqabꞌanaꞌ pa qakꞌaslen ri ndubꞌij ri rutzij ri Dios

19Hermanos ri tzꞌan ngixinwojoꞌ, tikꞌuxlaꞌaj ri nibꞌij chiwa: Rix iwonojel tiwakꞌaxaj utz-utz nabꞌey ri ndibꞌix chiwa, ma xetal paqiꞌ titzolij ruwech jun tzij y ma chaꞌanin paqiꞌ tipuꞌun iwoyowal+ pa ruwiꞌ jun achike. 20Porque ri wineq ri xe oyowal koma, ma ngetiker ta ndikikꞌuaj jun chojmilej kꞌaslen chuwech ri Dios. 21Romariꞌ, tiwelesaj e pa ikꞌaslen nojel ri ndichꞌabꞌaqrisan richin y nojel ri itzel teq achike kꞌo pa iwánima. Tiqasaj iwiꞌ chuwech ri Dios chunimaxik ri rutzij tikon kan pa iwánima, porque ri utzulej teq tzij riꞌ kꞌo ruchuqꞌaꞌ chin ngixrukal.+

22Pero ma xe tiwakꞌaxaj ri utzulej teq tzij tzijon chiwa, xa kin tibꞌanaꞌ pa ikꞌaslen ri ndubꞌij,+ porque si ma ke ta riꞌ ndibꞌen, xa iyon chiwech ndichꞌakatij qa iwiꞌ. 23Porque si jun wineq xe ndirakꞌaxaj ri rutzij ri Dios y ma ndubꞌen ta ri ndubꞌij ri tzij riꞌ,+ xa achel jun wineq ri ndutzꞌet ruwech pa jun espejo. 24Atoq xutzꞌet yan riꞌ pa espejo y ndibꞌa, ja paqiꞌ ndumestaj qa achike rubꞌanun ri ruwech. 25Pero ri ma ndumestaj ta ri tzij rakꞌaxan pe y jumul ruyoꞌon pa cuenta ri ndubꞌij ri chojmilej teq tzij ri elesayon richin chuxeꞌ ruchuqꞌaꞌ ri mak, y jumul ndutij ruqꞌij ndubꞌen ri ndubꞌij ri utzulej teq tzij riꞌ, ri jun riꞌ kin jabꞌel roruqꞌij+ rikꞌin nojel ri ndubꞌen pa rukꞌaslen.

26Si kꞌo jun ndunojij chi qetzij runiman ri Ajaw, pero xa ma nduqꞌet ta riꞌ rikꞌin ri ngerubꞌilaꞌ,+ xa ruyon chuwech nduchꞌakatij qa riꞌ, y ma qetzij ta ri ndunojij chi runiman ri Ajaw. 27Porque chuwech ri Tataꞌaj Dios, ri qetzij runiman rijaꞌ, ma jun itzel pa rukꞌaslen,+ xa kin chꞌajchꞌaj y kereꞌ ndubꞌanalaꞌ: Ngerutoꞌ ri mebꞌaꞌ teq akꞌolaꞌ y ri malkaꞌ teq ixoqiꞌ chupan ri kꞌayew ndikiqꞌasaj, y ndubꞌen cuenta ri rukꞌaslen chin ma nduchꞌabꞌaqrisaj ta riꞌ rikꞌin ri itzel teq achike ndusuj ri rochꞌulew.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index