Search form

Juan 10

Ri ejemplo pa kiwiꞌ ri karneꞌl y ri kiyuqꞌunel

1Kin qetzij nibꞌij chiwa: Ri ma ndok ta apeꞌ kꞌo ri tzꞌapiꞌ chin kikoral ri karneꞌl, y xa jukꞌan chik apeꞌ ndijoteꞌ chin ndiropin qa pa koral, xa jun eleqꞌon y tzꞌamoy kichin karneꞌl chin ngereleqꞌaj. 2Pero ri ndok apu apeꞌ kꞌo ri tzꞌapiꞌ chin ri koral, ja ri yuqꞌunel kichin ri karneꞌl. 3Ri chajiy koral ndujeq pe ri tzꞌapiꞌ chuwech, y ri karneꞌl ndikakꞌaxaj ruchꞌabꞌel ri yuqꞌunel, y rijaꞌ ngeroyoj apu rikꞌin kibꞌiꞌ ri rukarneꞌl chin ngerelesaj e pa koral. 4Atoq erelesan chi pe konojel ri rukarneꞌl, ndukꞌuaj bꞌey chikiwech y ri karneꞌl ndikoqaj porque ketaman ruchꞌabꞌel ri ndiyuqꞌun kichin. 5Pero nixta jumbꞌey ndikoqaj jun ri ma kiyuqꞌunel ta, xa ngeꞌanimej chuwech, porque ri karneꞌl ma ketaman ta ruchꞌabꞌel jun ri ma kiyuqꞌunel ta.

6Re jun ejemplo reꞌ xubꞌij ri Jesús chake ri fariseos ekꞌo apu rikꞌin, pero ma xkikꞌoxomaj ta rubꞌeyal ri xrajoꞌ xubꞌij chake.

Ja ri Jesús ri utzulej yuqꞌunel kichin ri karneꞌl

7Ri Jesús xubꞌij chuqaꞌ: Kin qetzij nibꞌij chiwa: Ja riyin ri tzꞌapiꞌ chin ri koral apeꞌ ngeꞌel-ngeꞌok ri karneꞌl. 8Konojel ri xetuqaqa nabꞌey chinuwech riyin y xkibꞌij chi etaqon pe roma ri Dios chukolik rutinamit, xa eꞌeleqꞌomaꞌ y etzꞌamoy kichin wineq chin ndikeleqꞌaj ri kikꞌuan, pero ri nukarneꞌl riyin ma xekoqaj ta. 9Ja riyin ri tzꞌapiꞌ chin kikoral ri enukarneꞌl, y ri ndok pe chupan re tzꞌapiꞌ reꞌ, kin ndikolotej wi. Y achel ri karneꞌl ma ndikixibꞌij ta kiꞌ chin ngeꞌel-ngeꞌok pa koral y ndikil kiway,+ keriꞌ kikꞌaslen ri nginikitaqij.

10Ri eleqꞌon nduqaqa xe chin ndeleqꞌan, ndikamisan y ndukꞌis ruqꞌij nojel, jakꞌa riyin xinuqaqa chin niyaꞌ kikꞌaslen ri enukarneꞌl, jun kꞌaslen tzꞌaqet ri ma ndikꞌis ta. 11Ja riyin ri utzulej Yuqꞌunel.+ Ri utzulej Yuqꞌunel nduyaꞌ rukꞌaslen koma ri rukarneꞌl. 12Jakꞌa ri samajel ri xaxe roma tojon ngeruyuqꞌuj ri karneꞌl, ma ja ta rijaꞌ ri yuqꞌunel y ma erichin ta ri karneꞌl. Romariꞌ ri samajel riꞌ atoq ndutzꞌet chi ndeqaqa jun utiw apeꞌ ekꞌo ri karneꞌl, ndanimej e y ngeruyaꞌ kan kiyon. Y ri utiw kꞌo karneꞌl ngeruxil, ngerukayej ngerukꞌuaj y ri chꞌaqa chik ndikikiraj e kiꞌ. 13Ri samajel tojon ndanimej e porque ma erichin ta ri karneꞌl, y romariꞌ ma jun achike ndunaꞌ chare ri ndibꞌanatej kikꞌin ri karneꞌl.

14Ja riyin ri utzulej Yuqꞌunel, y wetaman kiwech+ ri nukarneꞌl y rejeꞌ ketaman nuwech riyin. 15Achel ri Nataꞌ Dios retaman nuwech riyin,+ keriꞌ chuqaꞌ riyin wetaman ruwech rijaꞌ, y riyin niyaꞌ ri nukꞌaslen koma ri nukarneꞌl. 16Riyin kꞌo chik chꞌaqa nukarneꞌl ri ma erichin ta re koral reꞌ; ndikꞌatzin chuqaꞌ ngenkꞌen pe chin ngenyuqꞌuj.+ Rejeꞌ kin xtikakꞌaxaj ri nutzij y xe jun bꞌotzaj ndikibꞌen+ konojel y xe jun qetzij yuqꞌunel ndikꞌojeꞌ pa kiwiꞌ.

17Ri Nataꞌ Dios ngirajoꞌ porque nijech ri nukꞌaslen pa kamik chin ndikꞌojeꞌ chik jumbꞌey nukꞌaslen.+ 18Ma jun nditiker ndikamisan wichin, nuyon chinuwech nijech ri nukꞌaslen pa kamik. Kin pa nuqꞌaꞌ yin kꞌo chin niyaꞌ ri nukꞌaslen pa kamik y pa nuqꞌaꞌ chuqaꞌ yin kꞌo chin ndikꞌojeꞌ chik nukꞌaslen.+ Jareꞌ ri rubꞌiꞌin pe ri Nataꞌ Dios chuwa chi nibꞌen.

19Atoq ri israelitas xkakꞌaxaj ri xubꞌij ri Jesús, ma junan ta ruwech kitzij xkibꞌen chik jumbꞌey pa ruwiꞌ ri xubꞌij. 20Ekꞌiy chikikajal ri wineq riꞌ ndikibꞌilaꞌ: Xa kꞌo itzel espíritu pa rukꞌaslen y xa okuneq chꞌuꞌj. ¿Achike roma ndiwakꞌaxaj ri ndubꞌij?

21Pero ekꞌo chik chꞌaqa ndikibꞌilaꞌ: Nixta jun wineq ri kꞌo itzel espíritu pa rukꞌaslen ndichꞌaꞌa utzulej teq tzij achel rijaꞌ. ¿Nditiker kami jun itzel espíritu ndukꞌachojrisaj jun wineq soqꞌ?+

Ri wineq ndikajoꞌ ndikikꞌeq chi abꞌej ri Jesús

22Chupan ri ru-tiempo ri tew, pa tinamit Jerusalén ndibꞌan ri nimaqꞌij kꞌuxlabꞌel chin ri qꞌij atoq xkꞌachaj rujosqꞌixik rupan ri rachoch ri Dios. 23Y ja tiempo riꞌ ndibꞌiyin ri Jesús pa rachoch ri Dios pa jun chijay ri ndibꞌix Chin Salomón chare. 24Ja atoq riꞌ ri achiꞌaꞌ israelitas kꞌo uchuqꞌaꞌ pa kiqꞌaꞌ xkimal apu kiꞌ chirij ri Jesús, y ndikibꞌilaꞌ chare: ¿Jampeꞌ kꞌa ndabꞌij chaqe achike rat? Taqꞌalajrisaj chiqawech si qetzij ja rat ri Jun taqon pe roma ri Dios chukolik ri rutinamit.

25Ri Jesús xubꞌij chake: Riyin xinbꞌij yan chiwa achike riyin, pero rix ma xinitaqij ta. Nojel ri samaj nibꞌen riyin, pa rubꞌiꞌ ri Nataꞌ nibꞌen, y ja ri samaj riꞌ ndiqꞌalajrisan wichin+ achike riyin. 26Pero rix xa ma nginitaqij ta, porque ma rix ta chin ri bꞌotzaj nukarneꞌl riyin. 27Ri nukarneꞌl, ndikakꞌaxaj ri nuchꞌabꞌel y riyin wetaman kiwech, y rejeꞌ nginikoqaj.+ 28Y riyin niyaꞌ ri kꞌaslen ma ndikꞌis ta+ chake, y ma ngebꞌa ta chupan ri kamik ri kin chin jumul, y nixta jun nditiker ngerumej e pa nuqꞌaꞌ. 29Ri eruyoꞌon ri Nataꞌ Dios chuwa, más nim keqalen ke chuwech nojel ri achike ekꞌo chochꞌulew, y nixta jun nditiker ngerumej pa ruqꞌaꞌ chuqaꞌ rijaꞌ. 30Riyin y ri Tataꞌaj Dios, xe jun rubꞌanun ri qánima.+

31Y ja atoq riꞌ ri israelitas xebꞌekisikꞌilaꞌ chi pe abꞌej chin ndikikꞌeq apu chirij+ ri Jesús. 32Pero ri Jesús xubꞌij chake: Rikꞌin ruchuqꞌaꞌ ri Tataꞌaj Dios, santienta utzulej y nimalej teq achike enubꞌanun pe chiwech. ¿Achike chikiwech ri nimalej teq achike enubꞌanun pe, ri ma xqaꞌ ta chiwech, y romariꞌ ndiwojoꞌ nginikꞌeq chi abꞌej?

33Y ri israelitas xkibꞌij: Roj ma ngatiqakꞌeq ta chi abꞌej roma ri utzulej teq achike eꞌabꞌanun pe. Roj ngatiqakꞌeq porque xa rat relik ok achi, y ndajunumaj awiꞌ rikꞌin ri Dios, y riꞌ ndubꞌij tzij chi itzel ngachꞌaꞌa chirij ri Dios.

34Y ri Jesús xubꞌij chake: Chupan ri ley yoꞌon kan chiwa, ri Dios ndubꞌij: Riyin nibꞌij chiwa chi rix dioses.+ Keriꞌ tzꞌibꞌan kan. 35Y qetaman chi ri rutzij ri Dios maneq cheꞌel ndibꞌan chare chi ma qetzij ta. Romariꞌ si ri Dios xubꞌij dioses chake ri achoq chake xchꞌaꞌa wi, 36¿achike roma rix ndibꞌij chi niyaqꞌ rubꞌiꞌ ri Dios xe roma xinbꞌij chi yin Rukꞌajol,+ xu ja rijaꞌ yin chaꞌayon chin xiruteq pe+ chochꞌulew? 37Si riyin ma nibꞌen ta ri samaj rubꞌiꞌin pe ri Nataꞌ Dios chuwa, ma kinitaqij. 38Pero si nibꞌen ri samaj rubꞌiꞌin pe ri Dios chuwa, maske ma nditaqij ta achike riyin, kinitaqij roma ri samaj nibꞌen, chin keriꞌ ndiwetamaj y nditaqij chi ri Tataꞌaj Dios jun rubꞌanun wikꞌin y riyin jun nubꞌanun rikꞌin rijaꞌ.+

39Ja atoq riꞌ jumbꞌey chik, xkajoꞌ xkitzꞌen e ri Jesús, pero ri Jesús xbꞌa chikiwech.

40Ri Jesús xtzolij chi apu jukꞌan ruchiꞌ ri raqen yaꞌ Jordán y xbꞌekꞌojeꞌ chiriꞌ, apeꞌ ri Juan ri Bautista xerubꞌen bautizar+ wineq jumbꞌey kan. 41Santienta wineq xbꞌekitzꞌetaꞌ ri Jesús chiriꞌ, y kereꞌ ndikibꞌilaꞌ chikiwech: Kin qetzij chi ri Juan ri Bautista ma jun retal ruchuqꞌaꞌ ri Dios xubꞌen, pero nojel ri xubꞌij kan pa ruwiꞌ re jun achi reꞌ,+ kin qetzij, ngechajeꞌ. 42Y santienta chikikajal ri wineq ri ekꞌo apu chiriꞌ xkitaqij ri Jesús.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index