Search form

Juan 20

Ri rukꞌastajibꞌel ri Jesús

(Mt. 28:1-10; Mr. 16:1-8; Lc. 24:1-12)

1Kumaj saqer chin ri nabꞌey qꞌij chin ri semana, atoq kꞌa qꞌequꞌ, ri María Magdalena xbꞌa apeꞌ muqun kan ri Jesús, y xutzꞌet chi ri abꞌej achoq chare tzꞌapin kan ruchiꞌ ri jul, elesan e. 2Rijaꞌ juꞌanin xbꞌa apeꞌ ekꞌo ri Simón Pedro y ri discípulo ri tzꞌan ndojowex roma ri Jesús, y xubꞌij chake: ¡Xkikꞌuaj ru-cuerpo ri Ajaw y ma qetaman ta apeꞌ xbꞌeyoꞌox!

3Xeꞌel e ri Pedro y ri jun chik discípulo y xebꞌa apeꞌ muqun kan ri Jesús. 4Chi ekaꞌiꞌ juꞌanin xebꞌa, pero ri jun discípulo más ndan chuwech ri Pedro, y xbꞌeqaqa nabꞌey chuchiꞌ ri jul, 5xlukeꞌ qa chin xtzuꞌun apu pa jul, xutzꞌet chi xe chik ri kꞌul+ achoq chare xbꞌir ri Jesús ekꞌo kan chiriꞌ, pero ma xok ta apu chupan ri jul. 6Kꞌateriꞌ xbꞌeqaqa ri Simón Pedro ri xambꞌey kan y xok apu chupan ri jul, y xutzꞌet chi xe chik ri kꞌul achoq chare xbꞌir ri Jesús ekꞌo kan chiriꞌ. 7Xutzꞌet chuqaꞌ ri kꞌul achoq chare xpis rujolon ri Jesús chi ma junan ta kꞌo kikꞌin ri chꞌaqa chik kꞌul, xa jukꞌan chik bꞌusun kan. 8Ja atoq riꞌ ri jun chik discípulo ri xbꞌeqaqa nabꞌey xok apu chuqaꞌ chupan ri jul, y atoq xutzꞌet nojel, xutaqij chi ri Jesús xkꞌastej e chikikajal ri animaꞌiꞌ. 9Porque ri discípulos kꞌajani tikikꞌoxomaj ri tzꞌibꞌan kan chupan ri rutzij ri Dios ri ndubꞌij chi rijaꞌ kin ndikꞌastej pe+ chikikajal ri animaꞌiꞌ. 10Y ri kaꞌiꞌ discípulos riꞌ xetzolij apeꞌ ekꞌo ri chꞌaqa chik.

Ri Jesús xuqꞌalajrisaj riꞌ chuwech ri María Magdalena

(Mr. 16:9-11)

11Pero ri María Magdalena xkꞌojeꞌ kan saqil ndoqꞌ chuchiꞌ ri jul, y pa roqꞌej xlukeꞌ qa chin xnachan apu chupan ri jul. 12Y xerutzꞌet kaꞌiꞌ ángeles seq kitziaq, etzꞌuyul apeꞌ xkꞌojeꞌ ri ru-cuerpo ri Jesús, jun tzꞌuyul apeꞌ xliꞌeꞌ ri rujolon y ri jun chik apeꞌ xliꞌeꞌ ri raqen. 13Y ri ángeles xkibꞌij chare ri ixaq: ¿Achike roma ngatoqꞌ? Y rijaꞌ xubꞌij chake: Roma xkikꞌuaj ru-cuerpo ri Wajaw Jesús, y ma wetaman ta apeꞌ xbꞌekiyaꞌ wi.

14Y atoq xubꞌij yan keriꞌ, xuyaꞌ vuelta, xutzꞌet chi chiriꞌ peꞌel apu ri Jesús, pero ri María ma retaman ta chi ja ri Jesús. 15Ri Jesús xubꞌij chare: Ixaq, ¿achike roma ngatoqꞌ? ¿Achike ri ndakanoj?

Pa rutzij ri María ja ri achi ri ndisamej pa qejoj ri ndichꞌaꞌa chare, y romariꞌ xubꞌij chare: Si rat xatukꞌuan ru-cuerpo ri Wajaw Jesús, tabꞌij chuwa apeꞌ xbꞌaꞌayaꞌ wi y riyin nekꞌamaꞌ.

16Ri Jesús xubꞌij chare: ¡María!

Ja atoq riꞌ ri María xuyaꞌ vuelta y pa chꞌabꞌel hebreo xubꞌij: ¡Rabuni! Y riꞌ ndubꞌij tzij, Tijonel.

17Y ri Jesús xubꞌij chare: Ma kanatzꞌen pe, porque kꞌajani kibꞌa e chikaj apeꞌ kꞌo ri Tataꞌaj Dios. Kabꞌiyin apeꞌ ekꞌo ri nu-hermanos,+ tabꞌij chake chi riyin ngibꞌa e apeꞌ kꞌo ri Nataꞌ, ri Itataꞌ chuqaꞌ rix. Rijaꞌ nu-Dios, y i-Dios chuqaꞌ rix.

18Ri María Magdalena xbꞌerutzijoj chake ri discípulos chi xutzꞌet ri Ajaw y xubꞌij chuqaꞌ chake nojel ri xubꞌij ri Ajaw chare.

Ri Jesús nduqꞌalajrisaj riꞌ chikiwech ri discípulos

(Mt. 28:16-20; Mr. 16:14-18; Lc. 24:36-49)

19Atoq ja ndokoqꞌaꞌ qa ri qꞌij riꞌ, ri nabꞌey qꞌij chin ri semana, ri discípulos kimolon kiꞌ, pero kitzꞌapiloꞌon pe ruchiꞌ ri jay apeꞌ ekꞌo, roma kixibꞌin kiꞌ chikiwech ri achiꞌaꞌ israelitas kꞌo uchuqꞌaꞌ pa kiqꞌaꞌ. Ja atoq riꞌ ri Jesús xbꞌeqaqa, xbꞌepeꞌeꞌ pa kinikꞌajal,+ y kereꞌ ruxunaqil kiwech xuyaꞌ: Tikꞌojeꞌ pa iwánima ri uxlanen nduyaꞌ ri Dios.

20Atoq rubꞌiꞌin chik keriꞌ chake, xerukꞌut chikiwech ri sokotajik ekꞌo pa ruqꞌaꞌ y xerukꞌalkꞌaꞌx. Romariꞌ ri discípulos atoq xkitzꞌet+ chi ja ri Ajaw Jesús ri kꞌo kikꞌin, santienta xekikot.+ 21Y ri Jesús xubꞌij chik jumbꞌey chake: Tikꞌojeꞌ uxlanen pa iwánima. Achel ri Tataꞌaj Dios yin rutaqon pe+ chubꞌanik ri rusamaj, keriꞌ chuqaꞌ riyin ngixinteq+ chubꞌanik ri rusamaj rijaꞌ.

22Y atoq rubꞌiꞌin chik keriꞌ, xerupuj ri discípulos y xubꞌij chake: Tikꞌamaꞌ pa iwánima ri Espíritu Santo. 23Ri wineq ri xtikuy kimak rix, kin ndikuyutej ri kimak chuwech ri Dios. Pero ri wineq ri ma xtikuy ta kimak rix, kin ma ndikuyutej ta ri kimak chuwech ri Dios.

Ri Jesús nduqꞌalajrisaj riꞌ chuwech ri Tomás

24Ri Tomás, ri ndibꞌix gemelo chare, jun chikiwech ri kabꞌlajuj discípulos, ma kꞌo ta kikꞌin ri discípulos atoq ri Jesús xbꞌeqaqa chikikajal. 25Romariꞌ ri chꞌaqa chik discípulos xkibꞌij chare: Roj xqatzꞌet ri Ajaw Jesús, xechajeꞌ chare.

Pero rijaꞌ xubꞌij: Si ma xtintzꞌet ta ri taqꞌel ri xkibꞌen ri clavos pa teq ruqꞌaꞌ y ma xtinjuꞌ ta ri ruwiꞌ nuqꞌaꞌ chupan ri taqꞌel riꞌ, y ma xtinjuꞌ ta nuqꞌaꞌ chupan ri sokotajik xerukꞌalkꞌaꞌx, ma jubꞌaꞌ xtintaqij.

26Waqxaqiꞌ qꞌij qꞌaxneq, atoq ri discípulos kimolon chik kiꞌ jumbꞌey y kꞌo yan chik ri Tomás kikꞌin, y maske kitzꞌapin pe ruchiꞌ ri jay, kꞌateꞌ ruwech, kꞌo yan chi apu ri Jesús pa kinikꞌajal.+ Y xubꞌij chake: Tikꞌojeꞌ uxlanen pa iwánima.

27Ja atoq riꞌ xubꞌij chare ri Tomás: Tajuꞌ ri ruwiꞌ aqꞌaꞌ chupan re taqꞌel ekꞌo pa nuqꞌaꞌ y kaꞌatzꞌetaꞌ re nuqꞌaꞌ. Tajelesaj pe ri aqꞌaꞌ y tajuꞌ pe apeꞌ kꞌo ri sokotajik xenukꞌalkꞌaꞌx, y ma tabꞌen achel jun ri ma ndutaqij ta chi kꞌo nukꞌaslen, xa kin tataqij pa awánima chi yin kꞌes.

28Ja atoq riꞌ ri Tomás xubꞌij: ¡Ja rat ri Wajaw y ja rat ri nu-Dios!+

29Ri Jesús xubꞌij chare: Rat roma xanatzꞌet ndataqij chi kꞌo nukꞌaslen. Kin jabꞌel rokiqꞌij ri nginikitaqij maske ma yin kitzꞌeton ta.+

Ri achike roma xtzꞌibꞌex re wuj reꞌ

30Kꞌiy más retal ruchuqꞌaꞌ ri Dios xerubꞌen ri Jesús chikiwech ri ru-discípulos, pero ma xetzꞌibꞌex ta nojel chupan re wuj reꞌ.+ 31Pero ri retal ruchuqꞌaꞌ ri Dios ri xetzꞌibꞌex kan chupan re wuj reꞌ, xetzꞌibꞌex chin nditaqij chi ja ri Jesús ri taqon pe roma ri Dios chukolik ri rutinamit y chi ja rijaꞌ ri Rukꞌajol ri Dios. Y xetzꞌibꞌex chuqaꞌ chin keriꞌ rix ri ngixtaqin,+ ndikꞌojeꞌ ikꞌaslen rikꞌin rijaꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index