Search form

Juan 8

1Pero ri Jesús xbꞌa e chuwech ri juyuꞌ rubꞌiniꞌan Olivos. 2Chukan qꞌij, kumaj saqer xtzolij chik jumbꞌey pa rachoch ri Dios. Ja atoq riꞌ ri wineq xejel apu apeꞌ kꞌo, y rijaꞌ xtzꞌuyeꞌ qa y ngerutijoj.

3Ja atoq riꞌ ri tijonelaꞌ chin ri ley xyoꞌox chare ri Moisés y ri fariseos xebꞌeqaqa chiriꞌ kikꞌuan apu jun ixaq ri xilitej pe chi ndajin rikꞌin mak rikꞌin jun achi, y xbꞌekipabꞌaꞌ chuwech ri Jesús pa kinikꞌajal ri ekꞌo apu chiriꞌ. 4Ri fariseos y ri tijonelaꞌ xkibꞌij chare ri Jesús: Tijonel, re jun ixaq reꞌ xilitej chi ndajin rikꞌin mak rikꞌin jun achi. 5Y chupan ri ley yoꞌon kan pa qawiꞌ, ri Moisés rubꞌanun kan mandar chi kekꞌaq chi abꞌej chin ngekamisex+ ri ixoqiꞌ keriꞌ ndikibꞌanalaꞌ. ¿Achike ndabꞌij rat pa ruwiꞌ reꞌ?

6Rejeꞌ keriꞌ xkibꞌij chare ri Jesús, chin ta ndiqaqa pa kiqꞌaꞌ y keriꞌ kꞌo jun roma ndikisujuj. Pero ri Jesús xlukeꞌ qa, y xtzꞌibꞌan qa pa ulew rikꞌin ruwiꞌ ruqꞌaꞌ. 7Y roma ndikikꞌutulaꞌ apu razón chi achike ndibꞌan chare ri ixaq, ri Jesús xpeꞌeꞌ pe y xubꞌij chake: Si kꞌo jun chiꞌikajal maneq rumak+ chuwech ri Dios, ja rijaꞌ nabꞌey tikꞌaqaꞌ abꞌej chirij re ixaq reꞌ.

8Y ri Jesús xlukeꞌ chi qa y xtzꞌibꞌan chik pa ulew. 9Atoq xkakꞌaxaj ri xubꞌij ri Jesús, ri eꞌukꞌuayon apu ri ixaq chi jujun chi jujun xebꞌa. Y ri nabꞌey xebꞌa ja ri más erijilej chik. Atoq xaxe chik ri Jesús y ri ixaq xekanej kan chiriꞌ, 10ri Jesús xpeꞌeꞌ pe y xubꞌij: Ixaq, ¿apeꞌ ekꞌo ri ekꞌamayon pe awichin? ¿Nixta jun chikiwech ri xebꞌiꞌin chi kakamisex ri xkꞌojeꞌ kan?

11Y ri ixaq xubꞌij: Nixta jun, Ajaw.

Y ri Jesús xubꞌij chare: Nixta riyin nibꞌij chi kakamisex. Kabꞌiyin y ma tabꞌen chik mak, xchajeꞌ chare.*

Ja ri Jesús ri ndiyikꞌan kikꞌaslen ri wineq

12Jumbꞌey chik ri Jesús xchꞌaꞌa chake ri wineq y xubꞌij: Ja riyin ri ngiyikꞌan+ kikꞌaslen ri wineq. Ri ndoqan wichin, ndikꞌojeꞌ pa ránima ri luz chin ri kꞌaslen ma ndikꞌis ta, y ri wineq riꞌ ma ndikꞌojeꞌ chi ta pa qꞌequꞌ.

13Y ri fariseos xkibꞌij chare ri Jesús: Roj ma ndiqataqij ta chi qetzij ri ndabꞌij pa ruwiꞌ ri achike rat, roma xa rat ri ngabꞌiꞌin qa.

14Pero ri Jesús xubꞌij chake: Maske ja yin ngibꞌiꞌin ri achike riyin, kin qetzij ri nibꞌij, porque wetaman apeꞌ yin eleneq pe+ y chiriꞌ ngitzolij e. Pero rix ma iwetaman ta apeꞌ yin eleneq pe nixta apeꞌ ngitzolij e. 15Rix xaxe rikꞌin ri relik teq inojibꞌal+ ndibꞌij qa si jun wineq kꞌo rumak o naq, pero yin ma ke ta riꞌ nibꞌen. 16Si riyin niqꞌet tzij pa ruwiꞌ jun wineq, kin pa ruchojmil nibꞌen, porque ma nuyon ta nibꞌen qa, xa kin junan rikꞌin ri Nataꞌ ri taqayon pe wichin nibꞌen. 17Chupan ri ley yoꞌon kan chiwa, tzꞌibꞌan kan chi atoq ekaꞌiꞌ junan ndikibꞌij+ pa ruwiꞌ ri kitzꞌeton, kin qꞌalej chi qetzij ri ngetajin chubꞌixik. 18Riyin niqꞌalajrisaj ri achike riyin, y ri Nataꞌ ri taqayon pe wichin, nduqꞌalajrisaj+ chuqaꞌ ri achike riyin.

19Ja atoq riꞌ ri fariseos xkibꞌij chare ri Jesús: ¿Apeꞌ kꞌo ri Atataꞌ? Y ri Jesús xubꞌij chake: Rix ma iwetaman ta achike riyin, nixta achike ri Nataꞌ. Xa ta iwetaman achike riyin, iwetaman ta chuqaꞌ achike ri Nataꞌ.+

20Ja tzij reꞌ ri xubꞌij ri Jesús, atoq ngerutijoj ri wineq pa rachoch ri Dios chiriꞌ apeꞌ ndiyoꞌox kan ri ofrendas. Y ma jun xtzꞌamo e richin, roma kꞌajani tiril qꞌij+ chin keriꞌ ndibꞌanatej.

Ri Jesús ndubꞌij chake ri wineq chi ma ngetiker ta ngebꞌeqaqa apeꞌ ndibꞌa rijaꞌ

21Jumbꞌey chik ri Jesús xubꞌij chake ri wineq: Riyin ngibꞌa, y rix kin xkinikanolaꞌ, pero xa chupan ri imak ngixken wi. Apeꞌ ngibꞌa riyin, rix ma ngixtiker ta ngixbꞌeqaqa.+

22Ja atoq riꞌ ri israelitas ri ekꞌo apu chiriꞌ ndikibꞌilaꞌ chikiwech: ¿Ndukamisaj kami riꞌ, romariꞌ ndubꞌij chi apeꞌ ndibꞌa, roj ma ngojtiker ta ngojbꞌa?

23Ri Jesús xubꞌij chake: Rix, rix aj rochꞌulew, jakꞌa riyin, yin aj chikaj. Rix ikꞌuan ri aj rochꞌulew noꞌoj,+ pero yin ma ke ta riꞌ. 24Romariꞌ xinbꞌij chiwa chi chupan ri imak ngixken wi. Si rix ma nditaqij ta ri achike riyin, kin ngixken wi chupan ri imak.

25Ri wineq xkibꞌij chare ri Jesús: ¿Achike rat kꞌa? Y ri Jesús xubꞌij chake: Riyin jumul nubꞌiꞌin pe chiwa ri achike riyin. 26Riyin kꞌo kꞌiy achike ngitiker nibꞌij chiwij chin niqꞌet tzij pa iwiꞌ, pero waweꞌ chochꞌulew riyin xe nibꞌij+ ri wakꞌaxan pe pa ruchiꞌ ri taqayon pe wichin, y rijaꞌ jumul ndubꞌij ri qetzij.

27Pero rejeꞌ ma xkikꞌoxomaj ta chi ri Jesús pa ruwiꞌ ri Tataꞌaj Dios ndichꞌaꞌa wi. 28Romariꞌ ri Jesús xubꞌij chake: Atoq rix nginijotobꞌaꞌ chuwech cruz+ riyin ri aj chikaj ri xinuꞌalex chiꞌikajal, ndikꞌoxomaj achike riyin, y ndiwetamaj chuqaꞌ chi nojel ri nibꞌen, ma nuyon ta chinuwech nibꞌen,+ xa kin xe ri achike ndukꞌut pe ri Tataꞌaj Dios chinuwech, jariꞌ ri nibꞌij. 29Y rijaꞌ ri taqayon pe wichin, kꞌo wikꞌin y ma yin ruyoꞌon ta kan nuyon,+ porque jumul nibꞌen ri ndiqaꞌ chuwech+ rijaꞌ.

30Y atoq keriꞌ ndajin chubꞌixik ri Jesús, ekꞌiy ri xeꞌakꞌaxan richin xkitaqij+ achike chi achi rijaꞌ.

Ri erichin ri Dios y ri ma erichin ta ri Dios

31Ja atoq riꞌ ri Jesús kereꞌ xubꞌij chake ri israelitas ri xetaqin achike chi achi rijaꞌ: Si rix ndibꞌen jumul ri nukꞌutun chiwech, qetzij ngixok nu-discípulos. 32Y keriꞌ ndiwetamaj achike ri qetzij, y ri qetzij ndubꞌen chiwa chi ngixel libre.+

33Y rejeꞌ xkibꞌij: Roj, roj riy-rumam kan ri ojer qamamaꞌ Abraham,+ y ma jumbꞌey roj okuneq loqꞌon samajelaꞌ. ¿Achike roma ndabꞌij chi ngojel libre?

34Ri Jesús xubꞌij chake: Kin qetzij nibꞌij chiwa chi ri wineq ri ndubꞌanalaꞌ mak, chuxeꞌ ruchuqꞌaꞌ ri mak kꞌo wi.+ 35Y ri kꞌo chuxeꞌ ruchuqꞌaꞌ ri mak, maneq cheꞌel ndikꞌojeꞌ apeꞌ kꞌo ri Dios, pero riyin ri Rukꞌajol ri Dios kin jumul yinkꞌo apeꞌ kꞌo ri Nataꞌ. 36Roma kꞌa riꞌ, si riyin ri Rukꞌajol ri Dios ngixinwelesaj chuxeꞌ ruchuqꞌaꞌ ri mak, kin qetzij ngixel libre. 37Riyin wetaman chi rix, rix riy-rumam kan ri Abraham, pero nditij iqꞌij chin nginikamisaj,+ roma ma iyoꞌon ta qꞌij chi okuneq ri nutzij pa iwánima. 38Ri nitzijoj chiwa, ja ri rukꞌutun pe ri Nataꞌ chinuwech, y keriꞌ chuqaꞌ rix ja ri iwakꞌaxan pa ruchiꞌ ri okuneq itataꞌ ri ndibꞌen.

39Y rejeꞌ xkibꞌij: ¡Ri qatataꞌ roj ja ri Abraham! Y ri Jesús xubꞌij chake: Xa ta qetzij chi rix ralkꞌuaꞌl ri Abraham, ndibꞌen ta ri utz, achel xubꞌen rijaꞌ. 40Pero wokami nditij iqꞌij chi nginikamisaj riyin ri nutzijon pe chiwa ri qetzij wakꞌaxan pe pa ruchiꞌ ri Dios. ¡Ri Abraham man ta xubꞌen achel ndiwojoꞌ ndibꞌen rix chuwa! 41Rix ja ri ndubꞌen ri okuneq itataꞌ ri ndibꞌanalaꞌ.

Atoq xkakꞌaxaj keriꞌ, rejeꞌ xkibꞌij chare ri Jesús: Roj ma roma ta xubꞌen mak ri qateꞌ xojalex, kin xe wi jun qatataꞌ kꞌo, y riꞌ ja ri Dios.

42Ri Jesús xubꞌij chake: Xa ta qetzij chi ja ri Dios ri Itataꞌ, nginiwojoꞌ ta yin, porque riyin apeꞌ kꞌo ri Dios yin eleneq wi pe+ y yin qajneq pe chireꞌ. Riyin ma nuyon ta chinuwech yin pataneq, xa kin ja rijaꞌ ri taqayon pe wichin. 43¿Achike roma ma ndikꞌoxomaj ta ri nibꞌij chiwa? Rix ma nginikꞌoxomaj ta, porque ma ndiwojoꞌ ta ndiwakꞌaxaj ri nibꞌij chiwa. 44Ri itataꞌ rix ja ri itzel. Rix, rix richin rijaꞌ, y ja ri rurayibꞌel rijaꞌ ri ndiwojoꞌ ndibꞌen. Rijaꞌ kamisanel xe jampeꞌ pa nabꞌey, y ma jumbꞌey roqan ri qetzij, porque pa ránima ma jun qetzij kꞌo. Y atoq ndireqꞌon, kin richin wi keriꞌ ndubꞌen, porque rijaꞌ reqꞌóta, y rikꞌin rijaꞌ nditzꞌukutej pe nojel ruwech aqꞌ. 45Pero rix ma nginitaqij ta porque riyin ja ri qetzij nibꞌij chiwa. 46Y nixta jun chiꞌikajal rix kꞌo cheꞌel xtukꞌut chi kꞌo mak nubꞌanun, porque ma jun mak nubꞌanun. Y xu ja ri qetzij nibꞌij chiwa, ¿achike roma ma nginitaqij ta? 47Ri erichin ri Dios ndikibꞌen ri ndubꞌij, pero rix ma rix richin ta, y romariꞌ ma ndibꞌen ta ri ndubꞌij rijaꞌ.

Ri Cristo kin kꞌo wi atoq kꞌajani talex ri Abraham

48Ri israelitas xkibꞌij chare ri Jesús: Qetzij wi ri ndiqabꞌij chi xa rat aj rochꞌulew Samaria y kꞌo itzel espíritu pa akꞌaslen.

49Ri Jesús xubꞌij chake: Riyin maneq itzel espíritu pa nukꞌaslen. Riyin ja ri Nataꞌ ninimrisaj ruqꞌij, pero rix xa ma jun nuqꞌij ndibꞌen chuwa. 50Riyin ma nuyon ta chinuwech nikanoj chi ndiyoꞌox nuqꞌij, pero kꞌo Jun ri ndikanon chi ndiyoꞌox nuqꞌij y ja rijaꞌ ri ndibꞌiꞌin achike ndibꞌiꞌin ri qetzij, si ja yin o ja rix. 51Kin qetzij nibꞌij chiwa: Xa achike na jun ri ndubꞌen ri nibꞌij riyin, ma ndeqaqa ta chupan ri kamik ri kin chin jumul.+

52Y ri israelitas xkibꞌij chare ri Jesús: Wokami qetaman chi qetzij kꞌo itzel espíritu pa akꞌaslen, porque ri Abraham xken, y ri profetas chuqaꞌ, y rat ndabꞌij chi ri ndikibꞌen ri ndabꞌij, ma ngebꞌeqaqa ta chupan ri kamik ri kin chin jumul. 53¡Ni modo ke rat más nim aqꞌij ke chuwech ri qatataꞌ Abraham y chikiwech ri profetas ri xa xeken e! ¿Achike kꞌa ok más ndanaꞌ chare rat ke chikiwech rejeꞌ?

54Ri Jesús xubꞌij chake: Si riyin nuyon ta chinuwech niyaꞌ nuqꞌij, xa maneq wi reqalen, pero ri ndiyoꞌon nuqꞌij riyin, ja ri Nataꞌ ri ndibꞌij i-Dios chare rix. 55Y rix ma iwetaman ta achike rijaꞌ,+ pero riyin kin wetaman, y si riyin nibꞌij ta chi ma wetaman ta, xa riyin jun reqꞌóta achel rix. Pero riyin kin wetaman achike rijaꞌ y nibꞌen ri ndubꞌij. 56Ri ojer itataꞌ Abraham tzꞌan xkikot roma xukꞌoxomaj chi xtutzꞌet re tiempo yinkꞌo yin chochꞌulew, y kin xutzꞌet wi y tzꞌan xkikot.

57Romariꞌ ri israelitas xkibꞌij chare ri Jesús: Rat kꞌajani 50 ajunaꞌ, ¿y ndabꞌij chi atzꞌeton ruwech ri Abraham?

58Ri Jesús xubꞌij chake: Kin qetzij nibꞌij chiwa chi riyin kin yinkꞌo wi+ atoq kꞌajani talex ri Abraham.

59Ja atoq riꞌ ri israelitas xbꞌekisikꞌilaꞌ pe abꞌej chin ndikikꞌeq apu chirij. Pero ri Jesús xewex y xel pe pa rachoch ri Dios.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index