Search form

Lucas 21

Ri ofrenda ri xuyaꞌ jun malkaꞌ ixaq

(Mr. 12:41-44)

1Ri Jesús xuyek pe ruwech chiriꞌ pa rachoch ri Dios y xerutzꞌet ri bꞌeyomaꞌ ndikiyaꞌ kan ki-ofrenda chupan ri káxa apeꞌ ngeyoꞌox ri ofrendas. 2Y xutzꞌet chuqaꞌ jun malkaꞌ ixaq ri maneq ok ruchajin ri xuyaꞌ kan pa káxa kaꞌiꞌ monedas jubꞌaꞌ ok keqalen. 3Y ri Jesús xubꞌij: Kin qetzij nibꞌij chiwa chi chuwech ri Dios, la jun malkaꞌ ixaq laꞌ ri maneq ok ruchajin, xuyaꞌ kan ri ofrenda más kꞌo reqalen ke chikiwech konojel. 4Porque konojel xaxe ok ruwiꞌ ri kibꞌeyomal xkiyaꞌ kan chikikajal ri ofrendas, pero la ixaq laꞌ maske kꞌiy achike ndikꞌatzin chare, ja ri jubꞌaꞌ kꞌo rikꞌin chin nduqꞌasaj rukꞌaslen ri xuyaꞌ kan.

Ri Jesús nduqꞌalajrisaj chi ri rachoch ri Dios ndiwulix

(Mt. 24:1, 2; Mr. 13:1, 2)

5Y atoq jujun wineq ngekitzijoj ri jabꞌel teq abꞌej ekusan chin pabꞌan ri rachoch ri Dios y ri jabꞌel teq ofrendas eyoꞌon chiriꞌ chin tarayilaꞌ bꞌanun chare, ri Jesús xubꞌij: 6Nojel re ngeꞌitzꞌet rix waweꞌ, ngetuqaqa qꞌij atoq nixta jun abꞌej ndikanej kan pariꞌ jun chik abꞌej, xa kin nojel xtiwulix.+

Ri ngebꞌanatej nabꞌey chi nduqaqa ri rukꞌisibꞌel qꞌij chin ri rochꞌulew

(Mt. 24:3-28; Mr. 13:3-23)

7Y kereꞌ xkikꞌutuj razón chare ri Jesús: Tijonel, ¿jampeꞌ ngebꞌanatej re xabꞌij? y, ¿achike etal nditzꞌetetej atoq jubꞌaꞌ chik ndirajoꞌ chin ngebꞌanatej?

8Y ri Jesús kereꞌ xubꞌij chake: Tichajij iwiꞌ chi nixta jun tichꞌakatin iwichin,+ porque ekꞌiy+ ngetuqaqa ri kereꞌ ndikibꞌilaꞌ: Ja riyin ri taqon pe roma ri Dios chukolik ri rutinamit, ngechajeꞌ, y ndikibꞌij chuqaꞌ chi ja xuqaqa ri qꞌij bꞌiꞌin kan. Pero rix ma titaqij ri ndikibꞌij. 9Atoq ndiwakꞌaxaj chi ngetajin guerras y chi ekꞌo wineq ri ngeyakatej chikij ri ngebꞌanun gobernar, ma tixibꞌij iwiꞌ, porque ndikꞌatzin chi keriꞌ ndibꞌanatej nabꞌey. Pero ma ja yan ta nduqaqa ri rukꞌisibꞌel chin nojel.

10Y ri Jesús xubꞌij chuqaꞌ chake: Chupan teq ri qꞌij riꞌ, ri wineq chin jun rochꞌulew ngeyakatej chikij wineq chin jun chik rochꞌulew, y keriꞌ chuqaꞌ reyes kikꞌin ri ki-soldados ndekibꞌanaꞌ guerra chake chꞌaqa chik reyes. 11Jalajaj teq apeꞌ ngebꞌanatej nimaꞌq teq kobꞌraqen, ndipuꞌun wayijal y yabꞌil. Y cho kaj kꞌo chuqaꞌ ngebꞌanatej ri ndaxibꞌij awiꞌ rikꞌin y kꞌo nimaꞌq teq etal xtitzꞌetetej ri ma jumbꞌey etzꞌeton.

12Pero nabꞌey chi ndibꞌanatej nojel reꞌ, ri wineq ngixkitzeqlebꞌej chin ndikibꞌen itzel chiwa, ngixkitzꞌen y ngixkijech pa kiqꞌaꞌ ri kꞌo uchuqꞌaꞌ pa kiqꞌaꞌ pa teq sinagogas+ y ngixkiyaꞌ pa cheꞌ. Y roma yin itaqin, ngixukꞌuꞌex chikiwech reyes y gobernadores. 13Pero atoq keriꞌ ndibꞌanatej, kin chin wi ndiyaꞌ utzulej nutzijol chikiwech. 14Roma kꞌa riꞌ, tiyaꞌ pa iwánima chi ma tinojij apu nabꞌey achike chi tzij ndibꞌij chin nditoꞌ iwiꞌ chikiwech.+ 15Porque riyin ngiyoꞌon tzij pa ichiꞌ y nojibꞌel chiwa, y nixta jun chikiwech ri wineq ri koyowal chiwa xtikaney runoꞌoj chin ta xtutzolij ruwech itzij. 16Chupan teq ri qꞌij riꞌ, hasta ri ite-itataꞌ, ri eꞌichaqꞌ-inimal, ri eꞌiwoxpochel y ri eꞌiwachibꞌil, ngixkijech pa kiqꞌaꞌ ri kꞌo uchuqꞌaꞌ pa kiqꞌaꞌ, y jujun chiꞌikajal rix ngekamisex.+ 17Y roma yin itaqin, itzel ngixtzꞌat koma konojel wineq.+ 18Pero nixta jun rusmal iwiꞌ ndisach.+ 19Si ma xkixtzolij ta chiwij y jumul xtikachꞌ iwech hasta pa rukꞌisibꞌel, kin xtikolotej ri ikꞌaslen.+

20Atoq xtitzꞌet chi ri tinamit Jerusalén kisiriren kiꞌ ejércitos chirij, tiwetamaj kꞌa chi ja xuqaqa ri qꞌij chin ndikꞌis ruqꞌij ri tinamit. 21Atoq keriꞌ nditzꞌet, ri ekꞌo pa rochꞌulew Judea, keꞌanimej pa teq juyuꞌ, ri ekꞌo pa tinamit Jerusalén, tikitzꞌamaꞌ bꞌey chin ngebꞌa nej, y ri ekꞌo pa qꞌas, ma keꞌok pa tinamit Jerusalén. 22Porque ja qꞌij teq riꞌ, ri Dios nduyaꞌ castigo pa kiwiꞌ ri aj Jerusalén chin ndibꞌanatej ri tzꞌibꞌan chupan ri rutzij ri Dios pa ruwiꞌ ri tinamit. 23Y chupan teq ri qꞌij riꞌ, ¡juyo ok kiwech ri ixoqiꞌ ri pataneq alanik chikij y ri kꞌa nditzꞌuman na akꞌual chikiqꞌaꞌ! Porque santienta kꞌayew ndiqaqa pa ruwiꞌ ri rochꞌulew, y santienta castigo nduyaꞌ ri Dios pa ruwiꞌ re tinamit reꞌ. 24Y ekꞌo wineq ngekamisex rikꞌin espadas y ekꞌo eyutun ngeꞌukꞌuꞌex pa chꞌaqa chik rochꞌulew. Y ri tinamit Jerusalén ndok kan pa kiqꞌaꞌ wineq ma israelitas ta, y ndikꞌojeꞌ pa kiqꞌaꞌ hasta tikꞌis na ri tiempo yoꞌon chake rejeꞌ chin ndikibꞌen keriꞌ.+

Ri ndibꞌanatej atoq ja nduqaqa chik jumbꞌey ri Jun aj chikaj

(Mt. 24:29-35, 42-44; Mr. 13:24-37)

25Y ngetzꞌetetej etal chuwech ri qꞌij, chuwech ri raqen ikꞌ y chikiwech ri chꞌumilaꞌ, y chochꞌulew ri jalajaj kiwech wineq kixibꞌin kiꞌ y ma ndikil ta rubꞌeyal achike ndikibꞌen porque ri mar santienta ndiwujuj y santienta ndibꞌolqotilan, 26ri wineq ndel e kánima ndikinaꞌ roma kixibꞌriꞌil chunojixik achike xtukꞌulwachij ri rochꞌulew, porque ri nimalej teq uchuqꞌaꞌ ri erichin chikaj ngeꞌelesex pa teq kikꞌojlibꞌel. 27Ja atoq riꞌ nginitzꞌet riyin ri aj chikaj ri xinuꞌalex chiꞌikajal, chi yin pataneq pa jun nube+ rikꞌin nimalej uchuqꞌaꞌ y nimalej nuqꞌij. 28Y atoq nojel reꞌ nditzꞌukutej rubꞌanik, kixkikot y tikꞌojeꞌ ruchuqꞌaꞌ ri iwánima, porque ri qꞌij chin ngixkolotej, ja nduqaqa.

29Y ri Jesús xubꞌij jun parábola chake: Tiyaꞌ cuenta chare ri ndibꞌanatej rikꞌin ri higuera o xa achike na jun chik cheꞌ. 30Atoq nditzꞌet chi ja ngeꞌel pe kꞌakꞌakꞌ ruxaq, rix iwetaman chi ja nduqaqa ri tiempo chin qatataꞌ. 31Keriꞌ chuqaꞌ rix, atoq nditzꞌet chi ja ndajin re nubꞌiꞌin chiwa, tiwetamaj chi ja nduqaqa ri qꞌij atoq ri Dios ndubꞌen reinar pa kiwiꞌ ri wineq.

32Y kin qetzij nibꞌij chiwa chi nojel ri nubꞌiꞌin pe ngebꞌanatej nabꞌey chi ngekꞌis e chochꞌulew ri wineq aj wokami. 33Ri kaj y ri rochꞌulew ngekꞌis, pero ri tzij enubꞌiꞌin, ma xe ta keriꞌ ngekꞌis, xa kin xkebꞌanatej wi nojel.

34Pero rix tibꞌanaꞌ cuenta iwiꞌ, ma tibꞌa iwánima pa ruwiꞌ ri qꞌabꞌarik y ri apux achike ndukꞌen pe ri qꞌabꞌarik,+ nixta tichꞌujrisaj iwiꞌ chukanoxik ri ngekꞌatzin chiwa, ma kꞌateꞌ atoq xtinabꞌej, ja xuqaqa yan ri qꞌij riꞌ pa iwiꞌ.+ 35Porque ri qꞌij riꞌ, nduqaqa achel ndibꞌanatej rikꞌin jun chikap ma runabꞌen ta ndiqaqa pa jun pataꞌy. Keriꞌ ndurubꞌanaꞌ ri qꞌij riꞌ pa kiwiꞌ ri wineq nojel teq apeꞌ. 36Roma kꞌa riꞌ, tichajij ri ikꞌaslen, y tikꞌutuj chare ri Dios chi nduyaꞌ uchuqꞌaꞌ chiwa chin ngixqꞌax chupan nojel ri kꞌayew nubꞌiꞌin pe chiwa ri nduqaqa yan pa ruwiꞌ ri rochꞌulew. Tikꞌutuj chuqaꞌ chi ma ngixkꞌix ta ngixbꞌeqaqa chinuwech riyin ri aj chikaj ri xinuꞌalex chiꞌikajal,+ xchajeꞌ ri Jesús.

37Ri Jesús paqꞌij ngerutijoj ri wineq pa rachoch ri Dios, y tokoqꞌaꞌ ndibꞌa pa juyuꞌ rubꞌiniꞌan Olivos, y chiriꞌ nduqꞌasaj wi ri aqꞌaꞌ. 38Y konojel ri wineq ngebꞌeqaqa kumaj saqer pa rachoch ri Dios chin ndikakꞌaxaj ri ndubꞌij ri Jesús.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index