Search form

Mateo 16

Ri xbꞌanatej rikꞌin ri Jonás, jun retal ri ndukꞌulwachij ri Jesús

(Mr. 8:11-13; Lc. 12:54-56)

1Ri fariseos y ri saduceos xebꞌeqaqa apeꞌ kꞌo ri Jesús, y xkikꞌutuj chare chi tubꞌanaꞌ jun retal ruchuqꞌaꞌ ri Dios chikiwech,+ ri ndikꞌutu chi ja rijaꞌ taqayon pe richin.

2Pero rijaꞌ kereꞌ xubꞌij chake: Atoq ndiqaqꞌij qa, rix ndibꞌij chi jabꞌel utz qꞌij nderubꞌanaꞌ chuwaꞌq roma keq-keq rubꞌanun ri kaj. 3Y atoq ndiseqresan pe, si keq-keq rubꞌanun ri kaj y muqul, rix ndibꞌij: Wokami ndipuꞌun qatataꞌ, ngixchajeꞌ. Rix iwetaman nditzꞌet ri rubꞌanun ri kaj, pero, ¿la ma ngixtiker ta ndikꞌoxomaj achike ndubꞌij tzij ri ndibꞌanatej chiwech wokami? 4Re wineq aj wokami kin eꞌitzel chikibꞌanik y ma ndikinimaj ta ri Dios rikꞌin nojel kánima.+ Ndikikꞌutuj chi ndibꞌan jun retal ruchuqꞌaꞌ ri Dios chikiwech, pero xaxe ri achel xbꞌanatej rikꞌin ri profeta Jonás, jariꞌ ri xtikitzꞌet, xchajeꞌ ri Jesús.

Y ja atoq riꞌ xeruyaꞌ kan y xbꞌa.

Ri kitijonik ri fariseos y ri saduceos ndijunumex rikꞌin ri levadura

(Mr. 8:14-21)

5Atoq xeꞌeqꞌax yan apu jukꞌan chik ruchiꞌ ri lago, ri discípulos xkimestaj xkikꞌuaj kaxlan wey. 6Y ri Jesús xubꞌij chake: Tiwakꞌaxaj utz-utz ri nibꞌij chiwa: Tichajij iwiꞌ+ chuwech ri levadura kichin ri fariseos+ y ri saduceos.

7Y ri discípulos ndikibꞌilaꞌ chikiwech: ¡Rijaꞌ keriꞌ ndubꞌij chaqe, porque ma xqakꞌen ta pe kaxlan wey!

8Atoq ri Jesús xuyaꞌ cuenta chare ri ndikibꞌilaꞌ chikiwech,+ xubꞌij chake: ¡Kin qꞌalej chi ma kin ta kuqul ikꞌuꞌx wikꞌin! Porque ichajin pena chi ma ikꞌamon ta pe kaxlan wey. 9¿Kꞌajani tikꞌoxomaj ri xbꞌanatej chiwech? ¿Ma ndikꞌuxlaꞌaj ta kꞌa chi rikꞌin woꞌoꞌ kaxlan wey xentzuq 5,000 wineq, y ri janipeꞌ chakech xeꞌinojisaj rikꞌin ri ruchiꞌ xekolotej? 10¿Ma ndikꞌuxlaꞌaj ta chuqaꞌ chi rikꞌin wuquꞌ kaxlan wey xentzuq 4,000 wineq, y ri janipeꞌ chakech xeꞌinojisaj rikꞌin ri ruchiꞌ xekolotej? 11¿Achike roma ma ndikꞌoxomaj ta chi ma pa ruwiꞌ ta kaxlan wey xichꞌaꞌa atoq xinbꞌij chi tichajij iwiꞌ chuwech ri levadura kichin ri fariseos y ri saduceos?

12Ja atoq riꞌ ri discípulos xkikꞌoxomaj chi ma pa ruwiꞌ ta ri levadura ri ndikusex chin ndibꞌan kaxlan wey xchꞌaꞌa wi, xa kin pa ruwiꞌ ri tijonik ndikiyaꞌ ri fariseos y ri saduceos.

Ri Pedro ndubꞌij chi ja ri Jesús ri taqon pe roma ri Dios chukolik ri rutinamit

(Mr. 8:27-30; Lc. 9:18-21)

13Atoq ri Jesús xbꞌeqaqa pa jun lugar chunaqaj ri tinamit Cesarea, ri tinamit ri ndibꞌix chin ri Filipo chare, ri Jesús kereꞌ xukꞌutuj razón chake ri ru-discípulos: Riyin ri aj chikaj ri xinuꞌalex chiꞌikajal, ¿achike riyin ndikibꞌij ri wineq?

14Y rejeꞌ xkibꞌij chare: Ekꞌo ngebꞌiꞌin chi ja rat ri Juan ri Bautista,+ ekꞌo chuqaꞌ ngebꞌiꞌin chi ja rat ri Elías,+ y ekꞌo ngebꞌiꞌin chi ja rat ri Jeremías, o jun chikiwech ri profetas.+

15Ri Jesús xubꞌij chake: Jakꞌa pa iwech rix, ¿achike riyin?

16Y ri Simón Pedro xubꞌij: Ja rat ri Rukꞌajol ri Kꞌaslik Dios,+ ri Jun taqon pe roma ri Dios chukolik ri rutinamit.

17Y ri Jesús xubꞌij chare: Kin jabꞌel roꞌaqꞌij, rat Simón rukꞌajol ri Jonás, porque ma jun ta wineq xqꞌalajrisan chawa+ ri xabꞌij, xa kin ja ri Nataꞌ kꞌo chikaj ri xqꞌalajrisan pe chawa. 18Y riyin nibꞌij chawa, chi rat, rat Pedro,+ y pariꞌ re abꞌej+ reꞌ nipabꞌaꞌ ri nu-iglesia,* y ri rajawal ri kamik ma nditiker ta chirij. 19Riyin kin xkenyaꞌ chawa ri lawiꞌil chin ri ru-reino ri aj chikaj Dios, y nojel ri xtaxim o xtakir chochꞌulew,+ kin ja ri Dios xtukꞌuan awichin chubꞌanik.

20Ja atoq riꞌ ri Jesús xubꞌij chake ri discípulos chi ma jun achoq chare tikibꞌij chi ja rijaꞌ ri taqon pe roma ri Dios chukolik ri rutinamit.

Ri Jesús nduqꞌalajrisaj chi ndikamisex

(Mr. 8:31–9:1; Lc. 9:22-27)

21Y xe jampeꞌ ri qꞌij riꞌ, ri Jesús xutzꞌuk rubꞌixik chake ri ru-discípulos, chi ndikꞌatzin ndibꞌa pa tinamit Jerusalén apeꞌ nduqꞌasaj santienta kꞌayew pa kiqꞌaꞌ ri intéra teq achiꞌaꞌ kꞌo kiqꞌij, pa kiqꞌaꞌ ri sacerdotes israelitas más kꞌo ruchuqꞌaꞌ kitzij, y pa kiqꞌaꞌ ri tijonelaꞌ chin ri ley xyoꞌox chare ri Moisés, y ndikamisex,+ pero pa rox qꞌij ndikꞌastajbꞌex pe+ chikikajal ri animaꞌiꞌ. 22Ja atoq riꞌ ri Pedro xukꞌuaj apu jubꞌaꞌ más kelaꞌ, y kereꞌ ruchꞌolixik xubꞌen: Ajaw, ¡man ta tirajoꞌ ri Dios chi keriꞌ xtakꞌulwachij! ¡Ma jumbꞌey tibꞌanatej keriꞌ awikꞌin!

23Pero ri Jesús xtzuꞌun apu rikꞌin ri Pedro y xubꞌij chare: ¡Katel e chinuwech, rat Satanás!+ Xa rat jun qꞌatoy nubꞌey, porque ma bꞌaneq ta awánima rikꞌin ri ndirajoꞌ ri Dios, xa rikꞌin ri ndikajoꞌ ri wineq.

24Ja atoq riꞌ ri Jesús xubꞌij chake ri ru-discípulos: Si kꞌo jun ndirajoꞌ ngiroqaj, ma tuyaꞌ pa nabꞌey ri ndurayij rijaꞌ,+ xa tubꞌanaꞌ achel rutelen ru-cruz chin ndekamisex y kiroqaj. 25Porque si jun wineq ja ri aj rochꞌulew rukꞌaslen ndupoqonaj, ma ndiril ta ri kꞌaslen ma ndikꞌis ta. Jakꞌa ri ma ndupoqonaj ta ri rukꞌaslen chin nduqꞌasaj kꞌayew roma ngiroqaj, kin ndiril ri kꞌaslen ma ndikꞌis ta.+ 26Porque, ¿achike ndikꞌatzin chare jun wineq xa ta nduchꞌek nojel ri bꞌeyomal chin ri rochꞌulew, y ma ndikolotej ta ri ránima? O, ¿achike nditiker nduyaꞌ jun wineq chin ndukal ri ránima?+ 27Porque riyin ri aj chikaj ri xinuꞌalex chiꞌikajal, nginuqaqa chik jumbꞌey rikꞌin nimalej ruqꞌij ri Nataꞌ, y kikꞌin ri nu-ángeles+ chuqaꞌ. Y ja atoq riꞌ niyaꞌ rajel-rukꞌexel chake ri wineq ri xkibꞌen ri utz pa kikꞌaslen, y niyaꞌ castigo chake ri xkibꞌen ri ma utz ta.+ 28Kin qetzij nibꞌij chiwa chi ekꞌo jujun ri ekꞌo chireꞌ ri ma ngeken yan ta e, hasta kꞌa nginikitzꞌet na riyin ri aj chikaj ri xinuꞌalex chiꞌikajal chi ngitzolij chin nibꞌen reinar.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index