Search form

Mateo 18

Ri más nim ruqꞌij chupan ri ru-reino ri aj chikaj Dios

(Mr. 9:33-37; Lc. 9:46-48)

1Chupan ri qꞌij riꞌ, ri discípulos xejel apu rikꞌin ri Jesús, y xkikꞌutuj razón chare: ¿Achike wineq ri más xtikꞌojeꞌ ruqꞌij chupan ri ru-reino ri aj chikaj Dios?

2Y ri Jesús xroyoj apu jun chꞌuti akꞌual y xuyaꞌ pa kinikꞌajal rejeꞌ, 3y kereꞌ xubꞌij chake: Kin qetzij nibꞌij chiwa, si rix ma ndijel ta inoꞌoj, y ndibꞌen qa achel kinoꞌoj chꞌuteq akꞌolaꞌ,+ ma ngixok ta chupan ri ru-reino ri aj chikaj Dios. 4Romariꞌ, ri xtuqasaj riꞌ y ndubꞌen qa achel re jun akꞌual reꞌ, jariꞌ ri más nim ruqꞌij chupan ri ru-reino+ ri aj chikaj Dios. 5Y ri xtikꞌamo apu ruwech jun akꞌual achel reꞌ pa nubꞌiꞌ, kin achel ja ta riyin ri ndukꞌen apu nuwech.

Ri ndibꞌanun chare jun wineq chi nduyaꞌ kan ri Dios

(Mr. 9:42-48; Lc. 17:1, 2)

6Pero juyo ruwech ri ndibꞌanun chare jun chikiwech re chꞌuteq wíta reꞌ ri yin kitaqin, chi ndiril jun roma ngiruyaꞌ kan. Xa más ta utz chare chi nditzeqebꞌex chuqul jun nim abꞌej jokꞌbꞌel trigo, y ndetorix pa mar chin ndibꞌa qa hasta chuxeꞌ yaꞌ. 7¡Juyo ok kiwech ri ekꞌo chochꞌulew, porque jumul kꞌo nditaqchiꞌin kichin chin ndikil jun roma nginkiyaꞌ kan! Pero, ¡juyo ruwech xa achike na jun ri nditaqchiꞌin+ kichin ri yin kitaqin chi ndikil jun roma nginkiyaꞌ kan!

8Romariꞌ, si jun aqꞌaꞌ o jun awaqen ndubꞌen chawa chi ngatzaq pa mak, taqꞌataꞌ y tatorij e. Más utz chi xe jun aqꞌaꞌ o jun awaqen kꞌo y ngatok chupan ri kꞌaslen ma ndikꞌis ta, ke chuwech tzꞌaqet aqꞌa-awaqen y xkatorix chupan ri qꞌaqꞌ ma ndichup ta.+ 9Y si jun awech+ ndubꞌen chawa chi ngatzaq pa mak, tawelesaj y tatorij e. Porque más utz chi xe jun awech kꞌo y ngatok chupan ri kꞌaslen ma ndikꞌis ta, ke chuwech ekꞌo chi kaꞌiꞌ awech y xkatorix pa infierno chupan ri qꞌaqꞌ ma ndichup ta.

Ri parábola pa ruwiꞌ ri karneꞌl sachineq

(Lc. 15:3-7)

10Titijaꞌ iqꞌij chi ma tibꞌen chake re chꞌuteq wíta re yin kitaqin chi nixta jun keqalen. Porque nibꞌij chiwa chi ri ki-ángeles+ rejeꞌ jumul ekꞌo apu chuwech ri Nataꞌ chikaj. 11Porque riyin ri aj chikaj ri xinuꞌalex chiꞌikajal xipuꞌun chin ngenkal ri esachineq pa mak.*

12¿Achike ndibꞌij rix pa ruwiꞌ re nibꞌij chiwa? Si jun achi ekꞌo 100 rukarneꞌl y ndisach e jun, ¿la ma ngeruyaꞌ ta kꞌa kan jubꞌaꞌ ri 99 pa qꞌas y nderukanoj ri sachineq? 13Y si nderilaꞌ pe ri karneꞌl sachineq, qetzij nibꞌij chiwa chi más ndikikot roma ri jun karneꞌl riꞌ, ke koma ri 99 ma esachineq ta. 14Keriꞌ chuqaꞌ ri Itataꞌ Dios chikaj ma ndirajoꞌ ta chi ndisach jun chikikajal re chꞌuteq wíta reꞌ ri yin kitaqin.

Ri ndikꞌatzin ndabꞌen atoq jun hermano ndubꞌen itzel chawa

(Lc. 17:3)

15Si jun a-hermano xubꞌen itzel chawa, kabꞌiyin ayon rikꞌin, y tabꞌij chare ri ma utz ta xubꞌen chawa. Si xtuyaꞌ chirij chi ma utz ta ri xubꞌen, ndabꞌen chi ndikꞌojeꞌ chik uxlanen chiꞌikajal. 16Pero si ma xtuyaꞌ ta chirij chi ma utz ta ri xubꞌen chawa, kaꞌakꞌuaj jun o kaꞌiꞌ ri xkeꞌakꞌaxan iwichin, chin keriꞌ nojel ri achike xtibꞌij, kin ndetamex koma ekaꞌiꞌ o eꞌoxiꞌ testigos. 17Si ri hermano riꞌ ma ndirajoꞌ ta ndirakꞌaxaj itzij rix kaꞌi-oxiꞌ, taꞌabꞌij chake ri ndikimal kiꞌ pa rubꞌiꞌ ri Ajaw, y si kꞌa keriꞌ na ma ndirajoꞌ ta ngerakꞌaxaj+ ri hermanos riꞌ, tabꞌanaꞌ tratar achel jun ma israelita ta o achel jun moloy méra pa rubꞌiꞌ ri rey.*

18Kin qetzij nibꞌij chiwa, chi nojel ri xtixim o xtikir+ chochꞌulew, rikꞌin ri Dios pataneq wi chi keriꞌ ndibꞌen.

19Keriꞌ chuqaꞌ nibꞌij chiwa: Si ekaꞌiꞌ chiꞌikajal jun kánima ndikibꞌen pa ruwiꞌ jun achike ndikikꞌutuj chare ri Dios, ri ndikikꞌutuj kin ndiyoꞌox wi pe chake roma ri Nataꞌ kꞌo chikaj. 20Porque apeꞌ ekaꞌi-oxiꞌ ndikimal kiꞌ+ pa nubꞌiꞌ, chiriꞌ yinkꞌo riyin chikikajal.

21Ri Simón Pedro xjel apu apeꞌ kꞌo ri Jesús y xubꞌij chare: Ajaw, ¿jarupeꞌ mul+ nikuy jun hermano ri ndubꞌen jun itzel chuwa? ¿La wuquꞌ kami mul?

22Ri Jesús xubꞌij chare: Ma xe ta wuquꞌ mul takuyuꞌ ri itzel xtubꞌen jun chawa, xa kin 70 mul wuquꞌ.

Ri parábola pa ruwiꞌ ri samajel ri ma ndirajoꞌ ta ndikuyun

23Romariꞌ, ri ru-reino ri aj chikaj Dios pa kiwiꞌ ri wineq, ndiqajunumaj rikꞌin ri xubꞌen jun rey ri xrajoꞌ xutzꞌet jarupeꞌ méra kikꞌas ri rusamajelaꞌ chin ndikitaj chare. 24Atoq xutzꞌuk chin ndutzꞌet ri kikꞌas, xukꞌuꞌex apu chuwech rijaꞌ jun rusamajel ri santienta millón méra rukꞌas. 25Y roma ri samajel riꞌ maneq achoq chare ndutaj ri rukꞌas, ri rajaw xubꞌij chi tikꞌayix ri jun samajel riꞌ, tikꞌayix chuqaꞌ ri rixjayil, ri eralkꞌuaꞌl y nojel ri ruchajin, chin keriꞌ nditojtej ri kꞌas. 26Ja atoq riꞌ ri jun samajel riꞌ xxukeꞌ chuwech ri rajaw, y xukꞌutuj rukamelal chare y xubꞌij: Takochꞌoꞌ chi na jubꞌaꞌ nuwech y nitaj nojel ri nukꞌas chawa. 27Ri rajaw kin xupoqonaj ruwech ri rusamajel, xuyaꞌ qꞌij chare chi xbꞌa, y xukuy ri kꞌas rubꞌanun.

28Jakꞌa ri samajel riꞌ atoq xel pe chiriꞌ, xukꞌul jun chik samajel ri junan kajaw rikꞌin. Re jun chik samajel reꞌ kꞌo jubꞌaꞌ rukꞌas chare ri jun ri xkuy rukꞌas, rajel jun laꞌeq 100 qꞌij samaj. Ri samajel ri xkuy rukꞌas xupitzꞌ chiruqul ri rachibꞌil y xubꞌij chare: Tan, tatojoꞌ ri méra aqajon chuwa. 29Ja atoq riꞌ ri rachibꞌil xxukeꞌ chuwech ri jun ri xkuy rukꞌas, y kereꞌ rukamelal xukꞌutuj chare: Takochꞌoꞌ chi na jubꞌaꞌ nuwech y nitaj nojel ri nukꞌas chawa. 30Pero ri xkuy rukꞌas, ma xrajoꞌ ta xupoqonaj ruwech ri rachibꞌil, xa xubꞌen chare chi teyoꞌox pa cheꞌ, kꞌa tutojoꞌ na ri kꞌas rubꞌanun chare. 31Atoq ri chꞌaqa chik samajelaꞌ xkitzꞌet ri xbꞌanatej, santienta xebꞌison qa y xbꞌekibꞌij chare ri kajaw nojel ri xbꞌanatej. 32Ri kajaw ri samajelaꞌ xubꞌij chi teꞌoyox ri samajel ri xkuy rukꞌas, y atoq kꞌo chi apu chuwech, xubꞌij chare: ¡Rat, xa rat jun itzel samajel! Riyin xinkuy nojel ri akꞌas, roma xakꞌutuj akamelal chuwa. 33Rat kin rukꞌulun ta wi chi xapoqonaj+ ruwech ri awachibꞌil, achel xinbꞌen riyin chawa. 34Y ri rajaw tzꞌan royowal chare, xujech pa kiqꞌaꞌ ri ngeyoꞌon castigo, kꞌa tutojoꞌ na nojel ri rukꞌas.

35Y achel xubꞌen ri ajaw riꞌ chare ri rusamajel, keriꞌ chuqaꞌ xtubꞌen ri Nataꞌ kꞌo chikaj chiwa rix, si chiꞌijununal ma xtikuy ta jun hermano rikꞌin nojel iwánima.+ Keriꞌ xubꞌij ri Jesús.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index