Search form

Mateo 27

Ri Jesús ndukꞌuꞌex chuwech ri Pilato

(Mr. 15:1; Lc. 23:1, 2; Jn. 18:28-32)

1Atoq xseqresan pe, xkimal kiꞌ+ konojel ri sacerdotes israelitas más kꞌo ruchuqꞌaꞌ kitzij y ri intéra teq achiꞌaꞌ kꞌo kiqꞌij chikiwech ri tinamit, chin xkibꞌij chikiwech achike ri ndikibꞌen chin ndikiteq ri Jesús pa kamik. 2Xkiyut, xkikꞌuaj y xbꞌekijachaꞌ+ pa ruqꞌaꞌ ri Pilato,+ ri ndubꞌen gobernar pa rubꞌiꞌ ri rey aj Roma.

Ri Judas ndutzeqebꞌaꞌ riꞌ

3Ri Judas ri xjacho ri Jesús,+ atoq xutzꞌet chi ri Jesús nditaq pa kamik, xunaꞌ chi ma utz ta xubꞌen, xbꞌerutzolij ri 30 monedas bꞌanun chare saqipueq+ chake ri sacerdotes israelitas más kꞌo ruchuqꞌaꞌ kitzij y chake ri intéra teq achiꞌaꞌ kꞌo kiqꞌij. 4Ri Judas xubꞌij chake: Mak xinbꞌen riyin chi xinjech pa iqꞌaꞌ jun achi ri nixta jun mak rubꞌanun.

Y rejeꞌ xkibꞌij chare: ¿Achike kꞌa qa-cuenta roj? ¡Riꞌ, chawech wi rat!

5Ri Judas xukiraj kan ri méra pa rachoch ri Dios, xel pe chiriꞌ y xbꞌerutzeqebꞌaꞌ riꞌ.+ 6Pero ri sacerdotes israelitas más kꞌo ruchuqꞌaꞌ kitzij xkimal ri méra, y xkibꞌij: Ri ley xyoꞌox chare ri Moisés ndubꞌij chi xajan ndiqayaꞌ qa re méra reꞌ rikꞌin ri méra chin ri rachoch ri Dios, porque rajel rukikꞌel jun ri ndekamisex, xechajeꞌ.

7Atoq xe jun ruwech kitzij xkibꞌen pa ruwiꞌ ri méra, xkilaqꞌ ri rulew ri bꞌanuy bꞌojoꞌy, chin kꞌo apeꞌ ngemuq ri fueranos ri ngeken chikikajal. 8Romariꞌ, ri jun ulew riꞌ, ndibꞌix ulew rajel kikꞌ+ chare. Y kꞌa keriꞌ ndibꞌix chare wokami. 9Y rikꞌin ri keriꞌ xbꞌanatej, kin xbꞌanatej ri rubꞌiꞌin kan ri profeta Jeremías, atoq xubꞌij: Xkimal ri 30 monedas ebꞌanun chare saqipueq,+ ri jubꞌaꞌ rajel xketaj jujun israelitas chin xjach pa kiqꞌaꞌ ri Jun ri ndojowex roma ri Dios. 10Y rikꞌin ri méra riꞌ, xkilaqꞌ rulew ri bꞌanuy bꞌojoꞌy, achel rubꞌiꞌin kan ri Ajaw chuwa. Keriꞌ rubꞌiꞌin kan ri Jeremías.

Ri Pilato ndukꞌat ruchiꞌ ri Jesús

(Mr. 15:2-5; Lc. 23:3-5; Jn. 18:33-38)

11Ri Jesús xukꞌuꞌex chuwech ri gobernador Pilato,+ y ri Pilato kereꞌ xukꞌutuj razón chare: ¿Ja rat ri ki-Rey ri israelitas?

Y ri Jesús xubꞌij: Ja rat ri ngabꞌiꞌin keriꞌ.

12Y atoq ri sacerdotes israelitas más kꞌo ruchuqꞌaꞌ kitzij y ri intéra teq achiꞌaꞌ kꞌo kiqꞌij ndikisujuj apu ri Jesús, rijaꞌ nixta jun achike xubꞌij.+ 13Ri Pilato xubꞌij chare: ¿La ma ndawakꞌaxaj ta janipeꞌ chi sujunik ndikibꞌij chawij?+

14Pero ri Jesús ma jun achike xubꞌij, romariꞌ ri Pilato tzꞌan xsach rukꞌuꞌx chirij.

Ri Pilato ndujech e ri Jesús chin ndikamisex

(Mr. 15:6-20; Lc. 23:13-25; Jn. 18:38–19:16)

15Y juna-junaꞌ pa nimaqꞌij Pascua, rukꞌamon chare ri Pilato ndusoqꞌopij e jun ri tzꞌapin pa cheꞌ, jun ri ndichaꞌox koma ri wineq. 16Chupan ri tiempo riꞌ, tzꞌapel pa cheꞌ jun achi rubꞌiniꞌan Barrabás, ri etaman ruwech chi machꞌikilik chubꞌanik. 17Y atoq ri wineq kimolon apu kiꞌ, ri Pilato xubꞌij chake: ¿Achike ndiwojoꞌ rix chi nisoqꞌopij e, ja ri Barrabás o ja ri Jesús ri ndibꞌix chi taqon pe roma ri Dios chukolik ri rutinamit? 18Keriꞌ xubꞌij ri Pilato chake, porque retaman chi ri xejacho ri Jesús pa ruqꞌaꞌ, xkijech roma ndiququt kánima chirij.

19Y atoq ri Pilato tzꞌuyul apeꞌ ndubꞌen gobernar, ri rixjayil kereꞌ rubꞌixik xuteq chare: Ma tatzeq apu awiꞌ rikꞌin ri jun chojmilej achi riꞌ, porque riyin, mier santienta kꞌayew xinnaꞌ pa wachikꞌ roma rijaꞌ. Keriꞌ rubꞌixik xuteq chare.

20Pero ri sacerdotes israelitas más kꞌo ruchuqꞌaꞌ kitzij y ri intéra teq achiꞌaꞌ kꞌo kiqꞌij, xkiyaꞌ tzij pa kixikin ri santienta wineq chin tikikꞌutuj chare ri Pilato chi ja ri Barrabás tusoqꞌopij e+ y tubꞌanaꞌ mandar chi tikamisex ri Jesús. 21Y ri Pilato xukꞌutuj chik razón chake: ¿Achike chikiwech re ekaꞌiꞌ reꞌ ndiwojoꞌ chi nisoqꞌopij e? Y ri wineq xkibꞌij: ¡Ja ri Barrabás!

22Ri Pilato xubꞌij: ¿Y achike kꞌa nibꞌen chare ri Jesús, ri ndibꞌix chi taqon pe roma ri Dios chukolik ri rutinamit? Y konojel xkibꞌij apu: ¡Tibꞌajix cho cruz!

23Y ri Pilato xubꞌij chake: ¿Achike mak rubꞌanun? Pero rejeꞌ más kaw ngesikꞌin apu chubꞌixik: ¡Tibꞌajix cho cruz!

24Atoq ri Pilato xutzꞌet chi xa ma jun utz ndukꞌen pe ri ndubꞌij chake ri wineq, y xa más ndiyakatej koyowal konojel, xukꞌutuj chi tukꞌuꞌex apu yaꞌ chare chin xuchꞌej ruqꞌaꞌ chikiwech, y xubꞌij chake: Riyin nichꞌej nuqꞌaꞌ chiwech chin ndiqꞌalajin chiwech chi nixta jun numak niweqalej pa ruwiꞌ rukamik re achi reꞌ. Riꞌ kin rix wi.

25Y konojel ri wineq xkibꞌij: ¡Pa qawiꞌ roj y pa kiwiꞌ ri qamiꞌal y ri qalkꞌuaꞌl tiqaqa ralal rukamik re achi reꞌ!

26Ja atoq riꞌ ri Pilato xusoqꞌopij e ri Barrabás, y xubꞌij chi tiroq ri Jesús, y xujech e chin ndebꞌajix cho cruz.

27Ri soldados ri ekꞌo chuxeꞌ rutzij ri Pilato xkikꞌuaj apu ri Jesús chojay chin ri palacio, y xekoyoj konojel ri chꞌaqa chik soldados chin xkimal apu kiꞌ chirij ri Jesús. 28Xkichꞌil e rutziaq, y xkiyaꞌ jun kꞌul keq+ chirij, 29xkipachꞌuj raqen teq kꞌix chin xkibꞌen jun corona y xkiyaꞌ pa rujolon. Pa rikiqꞌaꞌ ruqꞌaꞌ xkiyaꞌ jun aj, y ngexukuyaj chuwech, ngetzeꞌen chirij,+ y ndikibꞌilaꞌ chare: ¡Nim aqꞌij rat ri ki-Rey ri israelitas! ngechajeꞌ. 30Y ndikichubꞌalaꞌ ri Jesús, xkimej ri aj pa ruqꞌaꞌ, y ndikijichꞌalaꞌ rujolon chare. 31Atoq xetzeꞌen yan chirij, xkelesaj e ri kꞌul keq chirij, xkiyaꞌ chi e ri rutziaq, y xkikꞌuaj chin ndikibꞌajij cho cruz.

Ri Jesús ndibꞌajix cho cruz

(Mr. 15:21-32; Lc. 23:26-43; Jn. 19:17-27)

32Atoq xeꞌel e chiriꞌ, xkikꞌul jun achi aj Cirene rubꞌiniꞌan Simón, y ri soldados xkibꞌen chare chi xukꞌuaj ri cruz rukꞌuan ri Jesús.

33Y xebꞌeqaqa pa jun lugar ri pa chꞌabꞌel hebreo rubꞌiniꞌan Gólgota, y Gólgota ndubꞌij tzij: Juyuꞌ ri achel rubꞌaqil jolomaj nditzuꞌun. Atoq ekꞌo chik chiriꞌ, 34xkiyaꞌ vino xolon rikꞌin kꞌayilej aqꞌon chare ri Jesús, pero atoq xutojtobꞌej, ma xrajoꞌ ta xutij.

35Atoq xkibꞌajij yan ri Jesús cho cruz, ri soldados xkiyaꞌ pa etzꞌanin+ ri rutziaq chin xkijech chikiwech, 36y xetzꞌuyeꞌ kꞌa qa chiriꞌ chin ndikichajij ri Jesús. 37Y pariꞌ e ri rujolon, chutzaꞌ e ri cruz xkibꞌajij jun tzꞌalen apeꞌ tzꞌibꞌan ri achike roma ndikamisex, y kereꞌ ndubꞌij: Jareꞌ ri Jesús, ki-Rey ri israelitas.

38Junan rikꞌin ri Jesús xebꞌan crucificar chuqaꞌ ekaꞌiꞌ eleqꞌomaꞌ, jun xyoꞌox pa rikiqꞌaꞌ y jun pa ruxakan.+ 39Y ri ngeꞌeqꞌax chiriꞌ, ndikiyoqꞌolaꞌ ri Jesús, ndikiselolaꞌ kijolon,+ 40y kereꞌ ndikibꞌilaꞌ kan chare: ¡Rat ri ndabꞌij chi ndawulij ri rachoch ri Dios y pa oxiꞌ qꞌij ndapabꞌaꞌ chik jumbꞌey,+ takoloꞌ awiꞌ ayon chawech si qetzij rat Rukꞌajol ri Dios, y kaqaqa pe chuwech la cruz!

41Keriꞌ chuqaꞌ ri sacerdotes israelitas más kꞌo ruchuqꞌaꞌ kitzij, ngetzeꞌen chirij, junan kikꞌin ri tijonelaꞌ chin ri ley xyoꞌox chare ri Moisés y ri intéra teq achiꞌaꞌ kꞌo kiqꞌij, y kereꞌ ndikibꞌilaꞌ: 42Rijaꞌ ekꞌo wineq xerukal, pero ma nditiker ta ndukal riꞌ ruyon chuwech. ¡Si ja rijaꞌ ri ki-rey ri israelitas, tiqaqa kꞌa pe chuwech la cruz y ndiqataqij! 43Rijaꞌ xubꞌij chi kin kuqul rukꞌuꞌx rikꞌin ri Dios. ¡Si qetzij ndojowex roma ri Dios,+ ri Dios tikolon kꞌa richin! Porque rijaꞌ xubꞌij: Riyin Rukꞌajol ri Dios.

44Y jajun ri ekaꞌiꞌ eleqꞌomaꞌ ri ebꞌajin cho cruz chunaqaj, ndikibꞌilaꞌ apu tzij chupalej ri Jesús.

Ri rukamik ri Jesús

(Mr. 15:33-41; Lc. 23:44-49; Jn. 19:28-30)

45Atoq xnikꞌajer ri qꞌij, qꞌequꞌ xubꞌen qa nojel ri rochꞌulew, y ri qꞌequꞌ+ xkꞌis e hasta pa rox hora chin tiqaqꞌij. 46Y pa rox laꞌeq hora chin tiqaqꞌij, ri Jesús xsikꞌin chubꞌixik: Elí, Elí, ¿lemá sabactani? xchajeꞌ. Y riꞌ ndubꞌij tzij: ¡Nu-Dios, nu-Dios! ¿Achike roma xanayaꞌ kan nuyon?+

47Y jujun chikikajal ri ekꞌo apu chiriꞌ, atoq xkakꞌaxaj ri xubꞌij ri Jesús, ndikibꞌilaꞌ: Rijaꞌ ja ri profeta Elías ndiroyoj, ngechajeꞌ. 48Ja atoq riꞌ jun chikikajal ri wineq xbꞌa paqiꞌ y xbꞌerumubꞌaꞌ pe jun esponja pa vinagre, xuyaꞌ chutzaꞌ jun aj y xuyaꞌ e chare ri Jesús chin ndutzꞌuꞌ.+ 49Pero ri chꞌaqa ndikibꞌilaꞌ: Tawoyobꞌej na, qꞌalej wi riꞌ si xtuqaqa ri Elías chutoꞌik, ngechajeꞌ.

50Y ri Jesús jumbꞌey chik rikꞌin nojel ruchuqꞌaꞌ xsikꞌin, xujech ri ru-espíritu pa ruqꞌaꞌ ri Dios y ja xken. 51Y kꞌateꞌ ruwech ri kꞌul+ jachayon rupan rachoch ri Dios, xel pa kaꞌiꞌ, xretzetej pe pariꞌ y xukꞌis qa hasta pa xulan, xbꞌanatej jun kobꞌraqen y ri nimaꞌq teq abꞌej xepax. 52Ri kikꞌojlibꞌel ri animaꞌiꞌ xejaqatej, y santienta wineq ekamineq ri xkikꞌuaj chojmilej kꞌaslen chuwech ri Dios xekꞌastajbꞌex pe.+ 53Xebꞌeꞌel pe chupan teq ri kꞌojlibꞌel riꞌ, y atoq xbꞌanatej yan ri rukꞌastajibꞌel ri Jesús chikikajal ri animaꞌiꞌ, ri wineq chojmilej kikꞌaslen riꞌ xeꞌok apu pa loqꞌolej tinamit Jerusalén, y xkikꞌut kiꞌ chikiwech santienta wineq.

54Ri ki-jefe 100 soldados y ri soldados ri ekꞌo apu chiriꞌ chin ndikichajij ri Jesús, atoq xkinaꞌ ri kobꞌraqen y xkitzꞌet nojel ri ndajin, santienta xkixibꞌij qa kiꞌ y ndikibꞌilaꞌ: ¡Kin qetzij chi re achi reꞌ Rukꞌajol ri Dios!

55Chiriꞌ ekꞌo apu ekꞌiy ixoqiꞌ, ngetzuꞌun apu chi nej. Ri ixoqiꞌ riꞌ koqan pe ri Jesús xe jampeꞌ eleneq pe pa rochꞌulew Galilea chin ndikilij. 56Chikikajal ri ixoqiꞌ riꞌ, kꞌo ri María Magdalena, ri María ruteꞌ ri José y ruteꞌ chuqaꞌ ri Santiago, y kꞌo apu chuqaꞌ kiteꞌ ri erukꞌajol ri Zebedeo.

Ri Jesús ndimuq

(Mr. 15:42-47; Lc. 23:50-56; Jn. 19:38-42)

57Atoq xqaqꞌij qa, xbꞌeqaqa jun achi bꞌeyon rubꞌiniꞌan José aj tinamit Arimatea, ri okuneq jun discípulo chin ri Jesús. 58Ri achi riꞌ xok apu chuwech ri Pilato, xukꞌutuj ru-cuerpo ri Jesús chin ndumuq, y ri Pilato xubꞌen mandar chi tiyoꞌox chare. 59Ri José xuqasaj ru-cuerpo ri Jesús cho cruz, xupis pa jun loꞌx kꞌul, 60xbꞌerumuquꞌ+ pa jun kꞌakꞌakꞌ jul rukꞌoton apu chuwech jun xeq juyuꞌ, xusirirej jun nim abꞌej chuchiꞌ ri jul chin xutzꞌapij kan, y xbꞌa. 61Saqil pe apeꞌ xmuq ri Jesús, xetzꞌuyeꞌ kan ri María Magdalena y ri jun chik ixaq rubꞌiniꞌan María.

Jujun teq soldados ngetaq chin ndikichajij apeꞌ muqun ri Jesús

62Chukan qꞌij, atoq qꞌaxneq chik ri qꞌij chin xkibꞌen ri israelitas rukꞌojlen ri ndikꞌatzin chake chupan ri nimaqꞌij Pascua, ri sacerdotes israelitas más kꞌo ruchuqꞌaꞌ kitzij y ri fariseos xbꞌekimoloꞌ kiꞌ chuwech ri Pilato, 63y xkibꞌij chare: Nimalej gobernador, roj ndiqakꞌuxlaꞌaj chi ri jun chꞌakatinel+ achi riꞌ atoq kꞌa kꞌes, xubꞌij kan chi atoq ndiken, pa rox qꞌij ndikꞌastajbꞌex pe+ chikikajal ri animaꞌiꞌ. 64Roma kꞌa riꞌ, tataqaꞌ chi tichajix oxiꞌ qꞌij ri jul apeꞌ muqul ri Jesús, ma kꞌateꞌ kebꞌeqaqa ri ru-discípulos, xtikeleqꞌaj e ri ru-cuerpo, y xtikibꞌij yan chik chake ri wineq chi xkꞌastajbꞌex pe chikikajal ri animaꞌiꞌ. Xa ta keriꞌ ndibꞌanatej, ri chꞌakatinik riꞌ más nim nderubꞌanaꞌ chuwech ri nabꞌey chꞌakatinik rubꞌiꞌin kan. 65Y ri Pilato xubꞌij chake: Keꞌikꞌuaj jun bꞌotzaj soldados+ chuchajixik ri jul. Rix iwetaman achike ruchajixik ndikꞌatzin chi ndibꞌen.

66Xebꞌa kꞌa, xbꞌekiyaꞌ retal+ ri abꞌej achoq chare tzꞌapin kan ruchiꞌ ri jul chin ma tiselox y xekiyaꞌ kan chuqaꞌ soldados chin ndikichajij.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index