Search form

Mateo 7

Ma utz ta ngojwalal chirij ri achike rubꞌanun kikꞌaslen ri wineq

(Lc. 6:37, 38, 41, 42)

1Ma kixwalal chirij rukꞌaslen jun wineq,+ chin ma xtibꞌan ta keriꞌ chiwij rix. 2Porque achel ri castigo xtirayij rix chi ndiqaqa pa kiwiꞌ chꞌaqa chik, keriꞌ xtirayix chi ndiqaqa pa iwiꞌ rix. Y achel runikꞌoxik kikꞌaslen ri wineq xtibꞌen rix, keriꞌ chuqaꞌ xtibꞌan chiwa. 3¿Achike roma ndatzꞌet ri chꞌuti kꞌin qꞌatel pa ruwech ri a-hermano, y ma ndayaꞌ ta cuenta chare ri ten qꞌatel pa awech rat? 4Si rat qꞌatel jun ten pa awech, ¿achike roma kaw awech ndabꞌij kereꞌ chare ri a-hermano: Tayaꞌ qꞌij chuwa chi niwelesaj la chꞌuti kꞌin qꞌatel pa awech? 5Rat xa kaꞌiꞌ apalej. Nabꞌey tawelesaj e ri ten qꞌatel pa awech, y keriꞌ chaj ngatzuꞌun chin ndawelesaj e ri chꞌuti kꞌin qꞌatel pa ruwech ri a-hermano.

6Rix ma ndiyaꞌ ta chikiwech tzꞌiꞌ jun achike ri kin loqꞌolej wi, porque ma ketaman ta ri reqalen y kꞌo cheꞌel xkepuꞌun chiwij y xkixkixil chi eyaj.+ Keriꞌ chuqaꞌ, ma ndiyaꞌ ta perlas chikiwech aq, porque ma ndikiyaꞌ ta cuenta chare ri keqalen, xa ngekiyeqꞌ chi aqen. Keriꞌ chuqaꞌ ma tiyaꞌ ri qetzij chin ri Dios chikiwech wineq ri iwetaman chi ma xtikiyaꞌ ta cuenta chare ri nimalej reqalen, y xa xkeyakatej chiwij.

Tikꞌutuj, tikanoj y kixkꞌujkꞌut apu chi puerta

(Lc. 11:9-13; 6:31)

7Ma tiyaꞌ kan rukꞌutuxik ri ndikꞌutuj, y kin xtiyoꞌox chiwa,+ tikanoj ri ndiwojoꞌ, y kin xtiwil,+ kixkꞌujkꞌut apu chi puerta, y kin xtijaq pe chiwech. 8Porque konojel ri ma ndikiyaꞌ ta kan rukꞌutuxik ri ndikikꞌutuj, kin ndiyoꞌox wi chake. Keriꞌ chuqaꞌ ri ndikikanoj ri ndikajoꞌ, kin ndikil wi, y ri ngekꞌujkꞌut apu chi puerta, kin ndijaq wi pe chikiwech.

9¿La kꞌo kami jun achi chiꞌikajal ri xa jun abꞌej nduyaꞌ chare ri ralkꞌuaꞌl, atoq ri ralkꞌuaꞌl ndukꞌutuj jun kaxlan wey chare? 10O xa ta ndukꞌutuj jun ker chare, ¿la nduyaꞌ kami jun kumetz chare? 11Y si rix ri ma utz ta inoꞌoj iwetaman ndiyaꞌ utzulej teq achike chake ri iwalkꞌuaꞌl, ¡kin más wi retaman nduyaꞌ utzulej teq achike ri aj chikaj Itataꞌ+ Dios chake ri ngekꞌutun chare!

12Romariꞌ, tibꞌanaꞌ chake ri wineq achel ndirayij rix chi ndikibꞌen rejeꞌ+ chiwa. Porque jareꞌ rukꞌuꞌx ri ndubꞌij ri ley+ y rukꞌuꞌx ri kitzꞌibꞌan kan ri profetas.

Kixok chupan ri puerta kaꞌal ruwech

(Lc. 13:24)

13Kixok apu chupan ri puerta kaꞌal ruwech.+ Porque nim ruwech ri puerta y nim ruwech ri bꞌey ri ndukꞌuan pa kamik, y ekꞌiy wineq ngeꞌok apu chupan. 14Pero ri puerta y ri bꞌey ri ndukꞌuan chin ndawil ri kꞌaslen ma ndikꞌis ta, kaꞌal ok kiwech, y ma ekꞌiy ta ndikil ri bꞌey riꞌ, porque kꞌayew ngabꞌiyin chupan.

Rix ndiwetamaj kinoꞌoj ri wineq roma ri ngekibꞌanalaꞌ

(Lc. 6:43, 44)

15Rix tichajij iwiꞌ chikiwech ri ndikiqꞌabꞌaj kiꞌ chi e-profetas chin ri Dios,+ porque atoq ngebꞌeqaqa chiꞌikajal, eꞌachel teq karneꞌl ri nixta jun kimak ndikibꞌen, pero pa kánima ri itzel teq wineq riꞌ eꞌachel kꞌuxunel teq utiwaꞌ,+ porque ndikajoꞌ ngixkikꞌis. 16Rix ngixtiker ndiyaꞌ cuenta chare si utz o ma utz ta kinoꞌoj ri wineq ri ngebꞌeqaqa chiꞌikajal roma ri ngekibꞌanalaꞌ. Rix iwetaman chi ri kꞌixlej teq qꞌayis ma ndikiyaꞌ ta uvas, nixta higos. 17Y keriꞌ chuqaꞌ nojel utzulej cheꞌ, utz kiwech ndikiyaꞌ, jakꞌa ri ma eꞌutzulej ta chi cheꞌ, ma utz ta kiwech ndikiyaꞌ. 18Jun utzulej cheꞌ ma nduyaꞌ ta ma utz ta ruwech, y jun ma utzulej ta cheꞌ ma nduyaꞌ ta utz ruwech. 19Y nojel cheꞌ ri ma ndikiyaꞌ ta utzulej kiwech, ngechoy y ngetorix pa qꞌaqꞌ.+ 20Romariꞌ nibꞌij chiwa chi rix kin xtiyaꞌ cuenta chare si utz o ma utz ta kinoꞌoj ri wineq ri ngebꞌeqaqa chiꞌikajal roma ri ngekibꞌanalaꞌ.

Ri ngebꞌanun rurayibꞌel ri Dios ngeꞌok pa aj chikaj reino

(Lc. 13:25-27)

21Ma konojel ta ri ngebꞌiꞌin Ajaw, Ajaw+ chuwa, xkeꞌok chupan ri aj chikaj reino, xa kin xe wi ri ngebꞌanun ri rurayibꞌel ri Nataꞌ Dios+ kꞌo chikaj. 22Atoq xterilaꞌ ri qꞌij riꞌ, ekꞌiy ndikibꞌilaꞌ chuwa: Ajaw, Ajaw, roj pa abꞌiꞌ xqaqꞌalajrisaj ri xayaꞌ pa qánima, pa abꞌiꞌ xeqelesaj+ e itzel teq espíritu pa kikꞌaslen ri wineq y pa abꞌiꞌ xqabꞌen kꞌiy milagros.+ 23Pero riyin nibꞌij chake: Ma jumbꞌey xinbꞌij chi wetaman iwech, ¡kixel e+ chinuwech, rix bꞌanuy itzel teq achike!

Ri jay tikil pa xeq ulew y ri jay pabꞌan pariꞌ sanayiꞌ

(Mr. 1:22; Lc. 6:47-49)

24Romariꞌ, ri ndirakꞌaxaj ri tzij ngitajin chubꞌixik y ndubꞌen pa rukꞌaslen, nijunumaj rikꞌin jun achi ri kin ndikaney runoꞌoj. Ri achi riꞌ nej xukꞌat qa ri ulew chin xubꞌen qa ruxeꞌ ri rachoch pa xeq ulew. 25Y xqaqa qatataꞌ, xenimer pe raqen teq yaꞌ y xepuꞌun kaqiqꞌ rikꞌin nojel kuchuqꞌaꞌ chirij ri achoch, pero ma xwuluwuꞌ ta, porque kin tikil qa pa xeq ulew. 26Pero ri ndakꞌaxan ri tzij ngitajin chubꞌixik y ma ndubꞌen ta ri nibꞌij chare, nijunumaj rikꞌin jun achi ri ma ndikaney ta runoꞌoj, ri pariꞌ sanayiꞌ xupabꞌaꞌ ri rachoch. 27Xqaqa qatataꞌ, xenimer pe raqen teq yaꞌ y xpuꞌun kaqiqꞌ rikꞌin nojel ruchuqꞌaꞌ chirij ri achoch, y ri achoch xwuluwuꞌ y xkꞌis ruqꞌij.

28Atoq ri Jesús xukꞌis rubꞌixik re tzij reꞌ, ri santienta wineq ri kimolon apu kiꞌ chiriꞌ, xsach kikꞌuꞌx+ roma ri tijonik nduyalaꞌ chikiwech. 29Porque ngerutijoj achel jun ri santienta uchuqꞌaꞌ rukꞌuan ri tzij+ ngerubꞌilaꞌ, y ma achel ta ri tijonik ndikiyaꞌ ri kitijonelaꞌ chin ri ley xyoꞌox chare ri Moisés.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index