Search form

Filipenses 2

Tiqaqasaj qiꞌ y xe jun qánima tiqabꞌanaꞌ

1Hermanos, ri Cristo ngixrubꞌochiꞌij rix ri xe jun ibꞌanun rikꞌin, nduyaꞌ chuqaꞌ ruchuqꞌaꞌ iwánima roma ngixrajoꞌ, ri Espíritu Santo ngixrutoꞌ chi xe jun iwánima ndibꞌen chiwech, y ri Cristo kin ndujoyowaj iwech. 2Romariꞌ, tibꞌanaꞌ chi riyin tzꞌaqet ngikikot rikꞌin ndibꞌen kereꞌ: Xe jun ruwech itzij tibꞌanaꞌ, tiwojoꞌ iwiꞌ chiwech, xe jun iwánima tibꞌanaꞌ,+ y xe jun ruwech tinojij rix iwonojel. 3Atoq ndibꞌen jun achike, ma tibꞌen xe chin ndiwojoꞌ ngixqꞌalajin chi más kꞌo iqꞌij ke chuwech jun chik, nixta tibꞌen xe roma nim ndinaꞌ chare, xa kin tiqasaj iwiꞌ.+ Chiꞌijununal tinaꞌ pa iwánima chi más kꞌo keqalen ri chꞌaqa chik.+ 4Ma jun chiwech rix tukanoj ri xe chare rijaꞌ kꞌo utz ndukꞌen pe, xa kin tukanoj chuqaꞌ ri kꞌo utz ndukꞌen pe chake ri chꞌaqa chik.+

Ri Cristo xuqasaj riꞌ y xnimrisex ruqꞌij

5Tibꞌanaꞌ chare ri iwánima, achel xubꞌen chare ránima ri Cristo Jesús,+

6Porque rijaꞌ kin Dios wi,+ pero ma rikꞌin ta riꞌ,

Xa kin xubꞌen achel man ta Dios y xuyaꞌ kan jubꞌaꞌ chi junan ruqꞌij rikꞌin ri Dios,

7Xa kin xuyaꞌ kan ri nimalej ruqꞌij chikaj,

Xuꞌalex chochꞌulew achel xa achike na chi wineq,+

Y xok achel jun loqꞌon samajel.+

8Y chupan teq ri qꞌij atoq xkꞌojeꞌ chochꞌulew, xuqasaj riꞌ,

Xunimaj nojel ri xubꞌij ri Dios chare, hasta janipeꞌ na xkamisex,

Y xuqꞌasaj jun kꞌixbꞌilej kamik cho cruz.+

9Romariꞌ, ri Dios santienta xunimrisaj+ rubꞌiꞌ ri Jesús,

Y xubꞌen chare chi xkꞌojeꞌ más nimalej ruqꞌij ke chikiwech konojel ri kꞌo kiqꞌij,+

10Chin keriꞌ konojel ri ekꞌo chikaj, ri ekꞌo chochꞌulew y ri ekꞌo chuxeꞌ ulew,+

Kexukeꞌ chin ndikiyaꞌ ruqꞌij.

11Y konojel tikibꞌij chi ri Jesucristo kin Ajaw wi,+

Chin ndiyoꞌox ruqꞌij ri Tataꞌaj Dios.

Roj ri qataqin ri Cristo, tiyikꞌan qakꞌaslen chochꞌulew

12Roma kꞌa riꞌ, hermanos ri tzꞌan ngixinwojoꞌ, achel jumul xixniman, ma xe ta atoq xikꞌojeꞌ chiꞌikajal, xa kin más wokami ri ma yinkꞌo ta apu iwikꞌin, tiyaꞌ pa iwánima chi kin nimalej wi ruqꞌij ri Dios, y romariꞌ ndikꞌatzin chi ndikꞌuaj ri kꞌaslen ri rukꞌulun chi ndikꞌuaj roma rix kolotajneq chik. 13Porque ja ri Dios ndiyoꞌon pa iwánima chi ndirayij ndibꞌen ri ndiqaꞌ chuwech,+ y nduyaꞌ chuqaꞌ iwuchuqꞌaꞌ chin ndibꞌen.

14Y nojel ri ndibꞌen, ma tibꞌen rikꞌin wololenik, nixta tichꞌolilaꞌ iwiꞌ pa ruwiꞌ. 15Chin keriꞌ ma jun itzel ndilitej pa ikꞌaslen,+ y ndiqꞌalajin chi qetzij rix ralkꞌuaꞌl ri Dios y chꞌajchꞌaj ikꞌaslen chikikajal ri wineq ri ma chaj ta chi kꞌaslen kikꞌuan y emachꞌikilik chikibꞌanik. Y keriꞌ ngixyikꞌan+ chikikajal achel ngeyikꞌan ri chꞌumilaꞌ chuwech ri kaj. 16Ma jumbꞌey tiyaꞌ kan rutaqixik ri utzulej teq tzij chin ri kꞌaslen ma ndikꞌis ta, chin keriꞌ chupan ri qꞌij atoq nduqaqa chik ri Cristo, riyin yalan ngikikot iwoma, porque ndiqꞌalajin chi kꞌo xkꞌatzin chi xintij nuqꞌij xinbꞌen rusamaj ri Dios chiꞌikajal. 17Porque rix kuqul ikꞌuꞌx rikꞌin ri Dios y romariꞌ ndibꞌen ri rusamaj. Ri keriꞌ ngixtajin rikꞌin, kin achel rix jun ofrenda ri ndiyaꞌ chare rijaꞌ. Y si riyin ngikamisex, ri nukamik ndok rutzꞌaqat ri ofrenda riꞌ, kin achel ri vino rutzꞌaqat ri ofrenda ri ndisujeꞌ cho altar.* Y maske xkikamisex, kin xkikikot junan iwikꞌin rix iwonojel, porque rix y riyin ndiqayaꞌ qiꞌ chi ofrenda chare ri Dios. 18Kixkikot chuqaꞌ rix, y kixkikot junan wikꞌin.

Ri Pablo rubꞌanun ruwech chi nduteq ri Timoteo pa tinamit Filipos

19Nubꞌanun ruwech chi niteq yan e ri hermano Timoteo chiꞌitzꞌetik, si keriꞌ ndirajoꞌ ri Ajaw Jesús, chin keriꞌ achel ndikuqer qa ikꞌuꞌx rix ri ndiwetamaj achike nubꞌanun riyin, keriꞌ chuqaꞌ riyin ndikuqer qa nukꞌuꞌx ri niwetamaj achike ibꞌanun rix. 20Porque maneq chik jun chikiwech ri ekꞌo wikꞌin ri kin ta junan qánima rikꞌin pa ruwiꞌ ri ndikꞌatzin chiwa rix, porque rijaꞌ qetzij nderutijaꞌ ruqꞌij chin ndubꞌen ri kꞌo utz ndukꞌen pe chiwa. 21Porque konojel xe ri kꞌo utz ndukꞌen pe chake chikijununal ri bꞌaneq kánima chirij,+ y ma ja ta ri achike ndikꞌatzin pa rusamaj ri Jesucristo. 22Y rix iwetaman ri utzulej runoꞌoj ri Timoteo, porque kin samajneq pe wikꞌin chutzijoxik ri utzulej teq tzij chin kolotajik, rubꞌanun pe achel jun akꞌual ri ndiretamaj apu rusamaj ri rutataꞌ. 23Roma kꞌa riꞌ, nubꞌanun ruwech chi niteq e apeꞌ rixkꞌo. Atoq xtinwetamaj achike chi tzij xtiqꞌat pa nuwiꞌ, kin ja paqiꞌ niteq e. 24Y kuqul nukꞌuꞌx rikꞌin ri Ajaw chi ngibꞌa yan chuqaꞌ riyin chiꞌitzꞌetik.

Ri Pablo ndirajoꞌ nduteq chuqaꞌ ri hermano Epafrodito pa tinamit Filipos

25Pero ndunaꞌ wánima chi wokami ndikꞌatzin niteq chi apu jumbꞌey iwikꞌin ri hermano Epafrodito,+ ri itaqon pe chin ngirutoꞌ rikꞌin ri achike ndikꞌatzin chuwa. Rijaꞌ jun hermano ri yin rachibꞌilan chutzijoxik ri utzulej teq tzij chin kolotajik y junan qatijon qaqꞌij ndiqakꞌut chi kin qetzij ri ndubꞌij ri tzij riꞌ, maske ekꞌo wineq ma ndiqaꞌ ta chikiwech. 26Porque rijaꞌ bꞌaláta ngixbꞌerutzꞌetaꞌ rix iwonojel ndirajoꞌ, y tzꞌan ruchajin pena iwoma, porque xretamaj chi rix chuqaꞌ ichajin pena roma xiwakꞌaxaj chi xyawej. 27Kin qetzij chi rijaꞌ xyawej, y hasta jubꞌama xken, pero ri Dios xujoyowaj ruwech y xujoyowaj chuqaꞌ nuwech riyin. Porque xa ta xken ri Epafrodito, más ta xumal qa riꞌ bꞌis pa wánima pa ruwiꞌ ri bꞌis nuchajin. 28Romariꞌ, niteq e paqiꞌ chiꞌitzꞌetik, chin ngixkikot atoq xtitzꞌet chik ruwech jumbꞌey, y keriꞌ ngikikot chuqaꞌ riyin y ma ngibꞌison chi ta más iwoma. 29Y atoq ndeqaqa apeꞌ rixkꞌo, kixkikot tikꞌamaꞌ apu ruwech+ achel rukꞌulun chi ndibꞌen roma itaqin ri Ajaw, y ri hermanos eꞌachel rijaꞌ, kin ta kꞌo kiqꞌij pa iwech. 30Porque ri Epafrodito, chubꞌanik rusamaj ri Cristo, hasta jubꞌama xken, porque maske xuqꞌasaj jun yabꞌil ri jubꞌama xukꞌuaj pa kamik, xurubꞌanaꞌ ri achike ndikꞌatzin chuwa, ri maneq cheꞌel xibꞌen rix porque ma rixkꞌo ta pe chireꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index