Search form

Filipenses 3

Nim reqalen ri kuqul akꞌuꞌx rikꞌin ri Cristo

1Nu-hermanos, jun chik achike ri niwojoꞌ nibꞌij chiwa, jareꞌ: Kixkikot+ roma xe jun ibꞌanun rikꞌin ri Ajaw. Riyin ma ngikos ta nitzꞌibꞌaj chi e jumbꞌey chiwa ri xinbꞌij yan, y wetaman chi reꞌ kin ngixrutoꞌ chin ma ngixsach. 2Tibꞌanaꞌ cuenta iwiꞌ chikiwech ri ngeyoꞌon itzel teq tijonik. Ri wineq riꞌ ndikiqꞌabꞌaj kiꞌ chi erusamajelaꞌ ri Dios y ndikikꞌut chi ndikꞌatzin ndabꞌen circuncidar awiꞌ chin ngakolotej. Xa eꞌachel yawaꞌ teq tzꞌiꞌ ri kin ja paqiꞌ ngatikiqetz ndikajoꞌ. Tibꞌanaꞌ cuenta iwiꞌ chikiwech. 3Porque ri circuncisión ri kꞌo reqalen chuwech ri Dios, ja ri bꞌanun pa qánima roj+ ri rikꞌin rutoꞌik ri Espíritu Santo ndiqayaꞌ ruqꞌij ri Dios, y yalan ngojkikot chi xe jun qabꞌanun rikꞌin ri Cristo Jesús, y ma kuqul ta qakꞌuꞌx chi ngojkolotej roma ri circuncisión bꞌanun chare ri qa-cuerpo. 4Pero xa ta riyin niwojoꞌ, kꞌo ta cheꞌel nikuqeꞌ nukꞌuꞌx chi ngikolotej roma rubꞌeyal ri nukꞌaslen. Porque si kꞌo jun ndunojij chi rukꞌulun ndikolotej roma rubꞌeyal ri rukꞌaslen, riyin más kꞌo ta cheꞌel ninojij keriꞌ. 5Porque riyin waqxaqiꞌ qꞌij kinalex atoq xbꞌan ri circuncisión chuwa, achel rubꞌiꞌin ri Dios chi tibꞌan chaqe roj israelitas. Yin israelita, jun riy-rumam kan ri ojer tataꞌatz rubꞌiniꞌan Benjamín. Riyin walaxibꞌen pe chi yin jun wineq hebreo, xinok jun fariseo,+ y ja ri fariseos ri más ndikitij kiqꞌij ndikibꞌen ri ndubꞌij ri ley xyoꞌox chare ri Moisés. 6Y chuqaꞌ rikꞌin nojel wánima xinbꞌen ri pa nutzij yin ndiqaꞌ chuwech ri Dios, y romariꞌ hasta xentzeqlebꞌej ri kitaqin ri Cristo chin xinbꞌen itzel chake.+ Y nixta jun nditiker ndubꞌij chi ma xinbꞌen ta cumplir ri ndubꞌij ri ley ri xyoꞌox chare ri Moisés. 7Pero nojel re kin tzꞌan reqalen chuwa+ rubꞌanun kan, wokami nubꞌanun chare chi ma jun reqalen, roma niwojoꞌ nibꞌen ri ndirajoꞌ ri Cristo chuwa. 8Y ma xe ta riꞌ, porque hasta nojel ri nubꞌanaloꞌon pa nukꞌaslen ma jun reqalen chuwa atoq nijunumaj rikꞌin retamaxik ri nimalej runoꞌoj+ ri Cristo Jesús ri Wajaw. Y roma niwojoꞌ ri kolotajik ri ndusuj rijaꞌ, ma kuqul chi ta nukꞌuꞌx chi ngikolotej roma rubꞌeyal ri nukꞌaslen rubꞌanun kan, xa nubꞌanun achel seqꞌ chare ri ojer kꞌaslen riꞌ, chin keriꞌ ja ri Cristo Rajaw ri nukꞌaslen. 9Riyin niwojoꞌ nginilitej chi xe jun nubꞌanun rikꞌin rijaꞌ. Niwojoꞌ chuqaꞌ chi nixta jun mak weqalen chuwech ri Dios,+ pero ma roma ta nibꞌen ri ndubꞌij ri ley xyoꞌox chare ri Moisés, xa kin roma nutaqin ri Cristo. Porque roma ndiqataqij ri Cristo nixta jun qamak ndiqeqalej chuwech ri Dios. 10Niwojoꞌ niwetamaj utz-utz runoꞌoj ri Cristo, y niwojoꞌ chuqaꞌ niwetamaj pa nukꞌaslen ri ndubꞌen ri ruchuqꞌaꞌ ri Dios ri xkꞌastajbꞌan pe ri Cristo chikikajal ri animaꞌiꞌ. Niwojoꞌ niqꞌasaj kꞌayew+ achel ri Cristo xuqꞌasaj kꞌayew, y niwojoꞌ nijech nukꞌaslen pa kamik chubꞌanik ri ndirajoꞌ ri Dios, achel xubꞌen ri Cristo, kin xujech rukꞌaslen pa kamik. 11Jariꞌ ri niwojoꞌ nibꞌen, porque niwojoꞌ chuqaꞌ ngikꞌastajbꞌex pe chikikajal ri animaꞌiꞌ, si yin kamineq chik atoq ngekꞌastajbꞌex pe ri animaꞌiꞌ.

Ri Pablo tzꞌan ndurayij nderilaꞌ ri ndusuj ri Cristo

12Riyin ma nibꞌij ta chi nubꞌanun chik nojel reꞌ y ma nibꞌij ta chuqaꞌ chi yin okuneq nojel ri ndirajoꞌ ri Dios chi nginok. Pero nitij nuqꞌij+ chi tzꞌaqet ndubꞌen pa nukꞌaslen nojel ri xrajoꞌ ri Cristo Jesús chuwa atoq xirukal. 13Hermanos, yin ma nibꞌij ta chi wilon chik nojel ri ndirajoꞌ rijaꞌ chuwa, pero ri nibꞌen, ja ri nimestaj jumul ri xeqꞌax yan kan, y nitij nuqꞌij chin newilaꞌ ri kꞌa ndikꞌatzin na chare ri ndirajoꞌ rijaꞌ chuwa. 14Y roma ri xubꞌen ri Cristo Jesús woma, ri Dios yin royon chin newilaꞌ ri ndusuj rijaꞌ chikaj. Kin nixikꞌ wiꞌ chin newilaꞌ, achel ndubꞌen jun ri ndok pa jun maratón, kin nduxikꞌ riꞌ chin nderukꞌisaꞌ ri janipeꞌ bꞌey qꞌaton chin nduchꞌek ri premio+ sujun.

15Roma kꞌa riꞌ, qonojel ri roj kꞌiyineq pa qakꞌaslen chuwech ri Dios, keriꞌ tiqanojij, pero si rix ma junan ta ndinojij wikꞌin, ri Dios kin xtuqꞌalajrisaj chuqaꞌ rubꞌeyal chiwech. 16Pero ma qojtzolij chiqij, xa kin jumul tiqꞌalajin qikꞌin ri jarupeꞌ roj kꞌiyineq pa qakꞌaslen chuwech ri Dios.

Chikaj kꞌo wi ri qetzij qatinamit

17Hermanos, junan iwánima tiwoqaj rij ri nukꞌaslen, y tiyaꞌ utz-utz cuenta chare rubꞌeyal kikꞌaslen+ ri kikꞌuan jun kꞌaslen achel qakꞌutun kan roj chiwech. 18Porque ekꞌiy maneq reqalen ndikibꞌen chare rukamik ri Cristo cho cruz rikꞌin ri kꞌaslen kikꞌuan. Y reꞌ kꞌiy mul nubꞌiꞌin chiwa, y wokami rikꞌin oqꞌej nikamuluj rubꞌixik chiwa. 19Ri wineq riꞌ pa qꞌaqꞌ ngebꞌekꞌis wi, y xa ja ri itzel teq rayinik chin ri ki-cuerpo+ ri okuneq ki-dios. Rejeꞌ nim ngekinaꞌ chare ri kꞌixbꞌel palej ngetajin rikꞌin, y xe ri achike chin re rochꞌulew ndikinojij. 20Pero rix tiwoqaj rij ri qakꞌaslen roj, porque chikaj+ kꞌo wi ri qetzij qatinamit, y nojel qánima qoyobꞌen+ chi chikaj ndipuꞌun wi ri Kolonel, ri Ajaw Jesucristo. 21Rijaꞌ kin xtujel ruwech ri qa-cuerpo ri xa kin chin wi ndiken. Ndubꞌen kꞌakꞌakꞌ chare chin ndikꞌojeꞌ ruqꞌij achel ruqꞌij ri ru-cuerpo rijaꞌ.+ Keriꞌ ndubꞌen chaqe rikꞌin ri nimalej ruchuqꞌaꞌ ri ndubꞌen chi pa ruqꞌaꞌ rijaꞌ ndikꞌojeꞌ nojel ri kꞌo.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index