Search form

Filemón 1

Ri Pablo nduteq ruxunaqil ruwech ri Filemón

1Riyin Pablo, yin tzꞌapel pa cheꞌ roma nitzijoj ri rutzij ri Cristo Jesús.+ Wachibꞌilan ri hermano Timoteo nitzꞌibꞌaj e re wuj reꞌ chawa rat Filemón ri tzꞌan ngatiqajoꞌ y rat qachibꞌil chupan ri rusamaj ri Dios. 2Ndiqateq e ruxunaqil ruwech ri hermana Apia. Y ndiqateq e chuqaꞌ ruxunaqil ruwech ri hermano Arquipo ri qachibꞌil chupan ri rusamaj ri Dios,+ y chake chuqaꞌ ri kitaqin ri Jesucristo ri ndikimal kiꞌ pa awachoch. 3Ri Qatataꞌ Dios y ri Ajaw Jesucristo kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima.

Ri Pablo ndimatioxin chare ri Dios roma ri Filemón

4Kin nimatioxij+ chare ri nu-Dios awoma rat Filemón, y jumul ngatinkꞌuxlaꞌaj pa teq nu-oración, 5porque yin wakꞌaxan chi rat kin kuqul akꞌuꞌx rikꞌin ri Ajaw Jesús y kin ndawojoꞌ, y keriꞌ chuqaꞌ ngaꞌawojoꞌ konojel ri loqꞌolej teq ralkꞌuaꞌl ri Dios.+ 6Yin nikꞌutuj chare ri Dios chi roma kuqul akꞌuꞌx rikꞌin ri Ajaw Jesús, ngojatoꞌ y keriꞌ qachibꞌil qiꞌ pa rusamaj ri Dios. Kꞌo nimalej teq achike ngojtiker ndiqabꞌen y kin xtiqabꞌen wi rikꞌin ndawetamaj nojel ri favor yoꞌon chaqe qonojel, chin ndiyoꞌox ruqꞌij ri Cristo. 7Porque riyin santienta ngikikot y kꞌo ruchuqꞌaꞌ wánima, roma wakꞌaxan chi rat kin ngaꞌawojoꞌ ri loqꞌolej teq ralkꞌuaꞌl ri Dios y kin ayoꞌon ruchuqꞌaꞌ kánima.+

Ri Pablo ndukꞌutuj kamelal chare ri Filemón

8Roma kꞌa riꞌ, maske yin jun rusamajel ri Cristo, y kꞌo uchuqꞌaꞌ pa nuqꞌaꞌ chin nibꞌij chawa ri ndikꞌatzin chi ndabꞌen, 9pero ma niwojoꞌ ta nibꞌen mandar chawa. Xa más utz nikꞌutuj kamelal chawa roma ri ajowabꞌel chin ri Ajaw kꞌo pa qánima. Takꞌuxlaꞌaj chi yin rijilej chik achi, y pa ruwiꞌ riꞌ, wokami chuqaꞌ yin tzꞌapel pa cheꞌ+ roma nitzijoj ri rutzij ri Cristo Jesús. 10Yin nikꞌutuj kamelal chawa roma ri Onésimo.+ Porque rijaꞌ xutaqij ri Jesucristo chireꞌ apeꞌ yin tzꞌapel pa cheꞌ, y romariꞌ xok achel walkꞌuaꞌl.+

11Jumbꞌey kan, rijaꞌ jun loqꞌon asamajel ri ma kin ta xarutoꞌ. Pero wokami yalan toꞌonik nduyaꞌ chuwa, y keriꞌ nderubꞌanaꞌ awikꞌin rat chuqaꞌ. 12Y chin ngabꞌerutoꞌ, niteq e ri Onésimo ri tzꞌan niwojoꞌ. 13Yin niwojoꞌ chi rijaꞌ ndikꞌojeꞌ ta waweꞌ chin ngirutoꞌ pa akꞌexel rat+ ri janipeꞌ qꞌij xkitzꞌapeꞌ pa cheꞌ roma nitzijoj ri utzulej teq tzij chin kolotajik. 14Pero ma jun achike xinwojoꞌ xinbꞌen ri man ta xatinkꞌulubꞌej rat, chin keriꞌ ri kamelal ri nikꞌutuj chawa, kin rikꞌin nojel awánima ndabꞌen,+ y ma roma ta chi jariꞌ niwojoꞌ riyin. 15Porque kolopeꞌ kꞌo utz ndukꞌen pe chawa+ chi ri Onésimo xbꞌa chik jukꞌan y ma xarutoꞌ ta chik, porque wokami ri nditzolij apu awikꞌin, jumul yan chik ngarutoꞌ. 16Pero ma achel chi ta jun relik loqꞌon asamajel, porque wokami más reqalen ke chuwech jun loqꞌon samajel, roma rijaꞌ jun hermano+ ri tzꞌan ndiqajoꞌ. Riyin santienta niwojoꞌ, y rat ndikꞌatzin chi más ndawojoꞌ, porque rijaꞌ wokami ma xe ta jun asamajel, chuqaꞌ jun hermano ri achoq pa ránima kꞌo ri Ajaw.

17Y keriꞌ, si rat ndanaꞌ chi junan qánima awikꞌin, takꞌamaꞌ apu ruwech ri Onésimo, achel kin ta ja yin ri ndakꞌen apu nuwech keriꞌ. 18Y si kꞌo jun chꞌaꞌoj rubꞌanun kan chawa, o si kꞌo rukꞌas awikꞌin, tabꞌij chuwa, y yin xkitojo richin. 19Riyin Pablo, rikꞌin nuqꞌaꞌ nitzꞌibꞌaj e chawa chi kin nitaj wi ri rukꞌas. Pero nikꞌuxlaꞌaj apu chawa chi rat kꞌo akꞌas chuqaꞌ wikꞌin, porque xawil kꞌakꞌakꞌ akꞌaslen roma xintzijoj ri rutzij ri Dios chawa. 20Rat hermano Filemón, niwojoꞌ chi ndabꞌen ri kamelal ri nikꞌutuj chawa, y chi ndabꞌen chuwa chi ngikikot awoma, roma xe jun qabꞌanun rikꞌin ri Cristo.

21Yin xintzꞌibꞌaj e re wuj reꞌ chawa roma wetaman chi kin nganiman wi, y chi xtabꞌen más ke chuwech ri nikꞌutuj chawa. 22Tabꞌanaꞌ apu chuqaꞌ rukꞌojlen jun apeꞌ ngikꞌojeꞌ, porque yin kuqul nukꞌuꞌx chi roma ri oración ri ndibꞌen rix woma,+ ri Dios kin xtubꞌen chi ngixbꞌentzꞌetaꞌ.

Ri rukꞌisibꞌel teq ruxunaqil ruwech ri Filemón

23Ri hermano Epafras+ ri junan roj tzꞌapel rikꞌin pa cheꞌ roma ndiqatzijoj ri rutzij ri Cristo Jesús, nduteq e ruxunaqil awech. 24Y ri Marcos, ri Aristarco, ri Demas y ri Lucas+ ri ewachibꞌil pa samaj ndikiteq e chuqaꞌ ruxunaqil awech.

25Ri favor ri nduyaꞌ ri Ajaw Jesucristo kin ta xtikꞌojeꞌ pa iwánima.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index