Search form

Apocalipsis 1

Ri Juan nduteq ruxunaqil kiwech wuquꞌ bꞌotzaj hermanos

1Chupan re wuj reꞌ tzꞌibꞌan wi ri xuqꞌalajrisaj+ ri Dios chare ri Jesucristo, chin keriꞌ ri Jesucristo nduqꞌalajrisaj chikiwech ri rusamajelaꞌ nojel ri ndikꞌatzin chi ngebꞌanatej yan. Rijaꞌ xuteq pe ri ru-ángel+ chin xuqꞌalajrisaj nojel reꞌ chinuwech yin Juan, ri rusamajel ri Jesucristo. 2Y yin kin niyaꞌ rutzijol chi qetzij ri xuqꞌalajrisaj ri Dios, chi qetzij ri xuqꞌalajrisaj ri Jesucristo, y qetzij nojel ri xintzꞌet+ chuqaꞌ.

3Kin jabꞌel roruqꞌij ri ndibꞌanun leer re wuj reꞌ, y keriꞌ chuqaꞌ ri ngeꞌakꞌaxan+ y ndikibꞌen ri ndubꞌij+ ri tzij eqꞌalajrisan kan chupan, porque naqaj chik kꞌo ri qꞌij chin ngebꞌanatej nojel ri tzꞌibꞌan chupan.

4Riyin Juan nitzꞌibꞌaj re wuj reꞌ chiwa rix hermanos, ri rix wuquꞌ bꞌotzaj ralkꞌuaꞌl ri Dios, ri ndimal iwiꞌ pa rubꞌiꞌ rijaꞌ pa teq itinamit chin ri rochꞌulew Asia. Ri Dios kin ta xtuyaꞌ ru-favor pa iwiꞌ y xtuyaꞌ chuqaꞌ uxlanen pa iwánima. Rijaꞌ kin xixkꞌo wi pe,+ kꞌo wokami y kin xtuqaqa wi. Keriꞌ chuqaꞌ ri wuquꞌ teq espíritu ekꞌo apu chuwech ri qa-Dios ri tzꞌuyul pa ru-trono, kin ta xtikiyaꞌ favor pa iwiꞌ y xtikiyaꞌ chuqaꞌ uxlanen pa iwánima. 5Keriꞌ chuqaꞌ ri Ajaw Jesucristo ri ma jumbꞌey rujalon ruwech ri ruqꞌalajrisan, kin ta xtuyaꞌ ru-favor pa iwiꞌ y xtuyaꞌ chuqaꞌ uxlanen pa iwánima. Ja rijaꞌ ri nabꞌey xkꞌastej pe chikikajal ri animaꞌiꞌ+ y ma ndiken chi ta. Ja rijaꞌ ri nimalej Ajaw pa kiwiꞌ konojel reyes chochꞌulew. Rijaꞌ ngojrajoꞌ y xojrukal chuwech ri qamak rikꞌin ri rukikꞌel.+ 6Y xubꞌen chaqe chi xojok jun tinamit apeꞌ ja rijaꞌ ri Rey+ y xubꞌen chuqaꞌ chi xojok sacerdotes chin ndiqabꞌen ri rusamaj ri ru-Dios y Rutataꞌ. ¡Kin ta xtiyoꞌox nimalej ruqꞌij y kin ta pa ruqꞌaꞌ rijaꞌ xtikꞌojeꞌ ri uchuqꞌaꞌ pa ruwiꞌ nojel chin jumul! Amén.

7Titzꞌetaꞌ, ri Jesucristo pataneq pa teq nube,+

Y konojel wineq ngetzꞌeto richin,

Ndikitzꞌet chuqaꞌ ri xekamisan+ e richin,

Y konojel ri jalajaj teq wineq chochꞌulew

Ngeꞌoqꞌ roma rijaꞌ.

¡Kin keriꞌ wi ndibꞌanatej! Amén.

8Ri Ajaw Dios ri kin xixkꞌo wi pe, kꞌo wokami y kin xtuqaqa wi, ndubꞌij: Ja riyin ri Alfa y ri Omega, ri nabꞌey y ri rukꞌisibꞌel chin nojel.+ Pa nuqꞌaꞌ riyin kꞌo nojel uchuqꞌaꞌ.

Ri Jesucristo nduqꞌalajrisaj riꞌ chuwech ri apóstol Juan

9Riyin Juan, yin i-hermano y iwachibꞌil chupan ri kꞌayew ndiqaqꞌasaj, y keriꞌ chuqaꞌ junan roj jun tinamit apeꞌ ri Dios ndubꞌen reinar pa qawiꞌ, y junan chuqaꞌ qakochꞌon qawech chupan ri ndiqaqꞌasaj roma xe jun qabꞌanun rikꞌin ri Jesús. Riyin Juan xibꞌeyoꞌox pa jun chꞌuti rochꞌulew rubꞌiniꞌan Patmos ri kꞌo pa mar, roma nitzijoj ri utzulej rutzij ri Dios y niyaꞌ rutzijol ri xuqꞌalajrisaj ri Jesús. 10Pa jun domingo, qꞌij ri ndibꞌix chin ri Ajaw chare, xikꞌojeꞌ chuxeꞌ ruchuqꞌaꞌ ri Espíritu Santo y xinwakꞌaxaj jun chꞌabꞌel chuwij ri kaw xchꞌaꞌa pe, y ri chꞌabꞌel riꞌ achel ndiqꞌajan jun trompeta. 11Y xubꞌij pe chuwa: Tatzꞌibꞌaj chuwech jun wuj ri ndatzꞌet, y tataqaꞌ e chake ri bꞌotzaj teq ralkꞌuaꞌl ri Dios ri ndikimal kiꞌ pa rubꞌiꞌ rijaꞌ pa teq kitinamit pa rochꞌulew Asia. Ri wuquꞌ tinamit riꞌ ja ri Éfeso, ri Esmirna, ri Pérgamo, ri Tiatira, ri Sardes, ri Filadelfia y ri Laodicea.

12Riyin xinyaꞌ vuelta chin nitzꞌet ri ndichꞌaꞌa pe chuwa. Y atoq nuyoꞌon chik vuelta, xintzꞌet wuquꞌ candeleros+ ebꞌanun chare qꞌanapueq. 13Y pa kinikꞌajal ri candeleros xintzꞌet Jun ri kin achel ri aj chikaj ri xuꞌalex chiqakajal.+ Ri rutziaq rukusan ndeqaqa hasta chiruqul raqen y ximil rorukꞌuꞌx rikꞌin jun ximibꞌel bꞌanun chare qꞌanapueq.+ 14Ri rusmal ruwiꞌ puchupuj achel rusaqil ri lana+ y ri saqbꞌach, y ri pa teq ruwech achel ruxaq qꞌaqꞌ+ keriꞌ. 15Ri raqen ngetzꞌintzꞌot achel bronce jabꞌel juqun ruwech.+ Y ri ruchꞌabꞌel ndiqꞌajan, achel ngeqꞌajan santienta yaꞌ+ ri ngeqaqa pa kiwiꞌ abꞌej. 16Pa rikiqꞌaꞌ ruqꞌaꞌ kꞌo wuquꞌ chꞌumil, y pa ruchiꞌ ndel pe jun espada+ chꞌut rutzaꞌ ri kaꞌiꞌ apeꞌ kꞌo rey, y ri ruwech ndiyikꞌan achel ri qꞌij atoq tzꞌan ruchuqꞌaꞌ.

17Y atoq xintzꞌet reꞌ, achel yin kamineq xitzaq qa chiraqen.+ Pero rijaꞌ xuyaꞌ ri rikiqꞌaꞌ ruqꞌaꞌ pa nuwiꞌ y xubꞌij chuwa: Ma taxibꞌij awiꞌ. Ja riyin ri nabꞌey y ri rukꞌisibꞌel chare nojel,+ 18ja riyin chuqaꞌ ri kꞌo nukꞌaslen, y xiken chochꞌulew, pero kin kꞌo wi nukꞌaslen chin jumul, y kꞌo uchuqꞌaꞌ pa nuqꞌaꞌ pa ruwiꞌ ri kamik y pa ruwiꞌ ri lugar apeꞌ yoꞌon kánima ri animaꞌiꞌ. 19Tatzꞌibꞌaj ri eꞌatzꞌeton pe, ri ndajin wokami y ri ngebꞌanatej más apu chuwech ri ndajin wokami. 20Ri xatzꞌet yan y ma kin ta qꞌalej rubꞌeyal chawech, ja niqꞌalajrisaj chawech: Ri wuquꞌ chꞌumil xatzꞌet pa wikiqꞌaꞌ jareꞌ: Ri wuquꞌ chꞌumil, ewuquꞌ nusamajelaꞌ ri ekꞌo pa kiwiꞌ wuquꞌ bꞌotzaj ralkꞌuaꞌl ri Dios ri ndikimal kiꞌ pa rubꞌiꞌ rijaꞌ pa rochꞌulew Asia, y ri wuquꞌ candeleros ebꞌanun chare qꞌanapueq, ja ri wuquꞌ bꞌotzaj ralkꞌuaꞌl ri Dios riꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index