Search form

Apocalipsis 10

Ri ndibꞌanatej nabꞌey chi ndixulex ri ruwuq trompeta

1Y xintzꞌet chik jun ángel santienta ruchuqꞌaꞌ bꞌaneq qa chochꞌulew pa jun nube, y jun kotoqꞌaꞌ,+ pariꞌ ri rujolon. Ri ruwech ri ángel riꞌ achel ri qꞌij+ nditzuꞌun y ri raqen achel ruxaq teq qꞌaqꞌ.+ 2Pa ruqꞌaꞌ rukꞌuan jun chꞌuti bꞌoton wuj jaqel, y ri rikiqꞌaꞌ raqen xuyaꞌ pariꞌ ri mar, y ri ruxakan raqen pariꞌ ri rochꞌulew. 3Y kaw xsikꞌin pe, achel ruchꞌabꞌel jun koj. Y atoq xsikꞌin, xechꞌaꞌa pe wuquꞌ rayos+ y xqꞌajan kichꞌabꞌel. 4Atoq xechꞌaꞌa pe ri wuquꞌ rayos, riyin Juan ja nitzꞌuk qa kitzꞌibꞌaxik ri xkibꞌij, atoq xinwakꞌaxaj jun chꞌabꞌel chikaj ri xubꞌij chuwa: Tayakaꞌ pa awánima+ ri xkibꞌij ri wuquꞌ rayos y ma tatzꞌibꞌaj.

5Ri ángel ri xintzꞌet chi peꞌel pariꞌ ri mar y ri rochꞌulew, xujotobꞌaꞌ ri rikiqꞌaꞌ ruqꞌaꞌ chikaj,+ 6y pa rubꞌiꞌ ri Dios ri kin jumul wi kꞌo rukꞌaslen,+ y kin bꞌanayon ri kaj y nojel ri kꞌo chuwech, ri rochꞌulew y nojel ri kꞌo chuwech, y ri mar y nojel ri kꞌo chupan, kereꞌ xubꞌen jurar: ¡Ma kꞌiy chi ta tiempo ndeqꞌax chin ndibꞌanatej ri rubꞌiꞌin ri Dios! 7Porque chupan teq ri qꞌij atoq ri ruwuq ángel ja ndutzꞌuk ruxulik ri trompeta+ yoꞌon chare, ri Dios ndutzꞌaqatisaj ri rubꞌanun pe ruwech chi ndubꞌen, achel ruqꞌalajrisan kan chikiwech ri profetas ri erusamajelaꞌ, xchajeꞌ.

8Y ri aj chikaj chꞌabꞌel ri xinwakꞌaxaj xchꞌaꞌa chi pe chuwa y xubꞌij: Kaxuleꞌ qa apeꞌ kꞌo ri ángel peꞌel pariꞌ ri mar y ri rochꞌulew y takꞌamaꞌ apu pa ruqꞌaꞌ ri bꞌoton wuj jaqel. 9Xixuleꞌ qa apeꞌ kꞌo ri ángel, y xinbꞌij chare chi tuyaꞌ pe ri bꞌoton wuj chuwa, y rijaꞌ xubꞌij pe chuwa: Takꞌamaꞌ apu y takꞌuxuꞌ.+ Ri apan kin ndikꞌayir rikꞌin, pero pa achiꞌ achel rukiꞌil kabꞌ+ chin wanan xtanaꞌ chare, xchajeꞌ chuwa.

10Xinkꞌen kꞌa apu ri bꞌoton wuj pa ruqꞌaꞌ ri ángel y xinkꞌux. Pa nuchiꞌ xinnaꞌ achel rukiꞌil ri kabꞌ+ chin wanan, pero atoq xinbꞌiqꞌ qa, xinnaꞌ chi xkꞌayir nupan. 11Y xbꞌix chuwa: Ndikꞌatzin ndaqꞌalajrisaj chik jumbꞌey ri ndubꞌij ri Dios pa ruwiꞌ ri ndebꞌanatej kikꞌin santienta wineq jalajaj kitinamit, jalajaj kirochꞌulew, y jalajaj kichꞌabꞌel y ri ndebꞌanatej kikꞌin reyes, xinucheꞌex.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index