Search form

Apocalipsis 11

1Xyoꞌox pe jun aj chuwa ri achel cheꞌ chin nginetan,+ y kereꞌ xbꞌix chuwa: Kayakatej, taꞌawetaj ri rachoch ri Dios y ri altar; kaꞌawajilaj chuqaꞌ ri ngeyoꞌon ruqꞌij ri Dios chiriꞌ. 2Pero ri chijay chin rachoch ri Dios, ma tawetaj, porque jachon pa kiqꞌaꞌ wineq ma israelitas ta, y 42 ikꞌ ndikiyeqꞌelaꞌ chi aqen+ ri loqꞌolej tinamit. 3Y riyin niyaꞌ uchuqꞌaꞌ chake ri ekaꞌiꞌ nusamajelaꞌ enuchaꞌon chin ndikiqꞌalajrisaj nutzij 1,260 qꞌij, y rejeꞌ ndikikusaj tzieq chin bꞌis atoq riꞌ.

4Ri ekaꞌiꞌ yoꞌol rutzijol nutzij, ja ri kaꞌiꞌ cheꞌ olivos+ y ri kaꞌiꞌ candeleros, rejeꞌ ekꞌo apu chuwech ri Dios Rajaw ri rochꞌulew, xchajeꞌ. 5Y xa achike na jun ri ndirajoꞌ ndubꞌen itzel chake, ma nditiker ta, porque pa kichiꞌ ri ekaꞌiꞌ riꞌ ndel pe qꞌaqꞌ+ ri achoq ikꞌin ngekiporoj ri itzel ngetzꞌeto kichin. Keriꞌ ri kamik ndukꞌulwachij xa achike na ri ndirajoꞌ ndubꞌen itzel chake. 6Ri ekaꞌiꞌ riꞌ yoꞌon uchuqꞌaꞌ pa kiqꞌaꞌ chin ndikibꞌen chi ma tiqaqa pe jabꞌ+ chikaj, chupan teq ri qꞌij atoq ndikiqꞌalajrisaj ri ndubꞌij pe ri Dios pa kánima. Y chuqaꞌ yoꞌon uchuqꞌaꞌ pa kiqꞌaꞌ pa ruwiꞌ ri yaꞌ chin ndikibꞌen chi ndok qa kikꞌ, y chin ndikiyaꞌ jalajaj teq kꞌayew pa ruwiꞌ ri rochꞌulew jarupeꞌ na mul ndikajoꞌ ndikiyaꞌ. 7Y atoq ndikikꞌis rutzijol ri bꞌiꞌin pe chake chin ndikiqꞌalajrisaj, ri itzel chikap ri ndel pe pa rar siwan, nderubꞌanaꞌ guerra+ chake, nditiker pa kiqꞌaꞌ y ngerukamisaj. 8Y ri ki-cuerpos ri ekaꞌiꞌ riꞌ ngepokꞌeꞌ pa nimabꞌey chin ri nimalej tinamit apeꞌ xkamisex ri Kajaw rejeꞌ cho cruz. Ri tinamit riꞌ ndijunumex rikꞌin ri tinamit Sodoma y rikꞌin ri rochꞌulew Egipto apeꞌ kꞌiy itzel teq achike xebꞌanatej. 9Y ekꞌo wineq jalajaj kitinamit, jalajaj katit-kimamaꞌ, jalajaj kichꞌabꞌel y jalajaj kirochꞌulew,+ ngekitzꞌet ri cuerpos epakꞌal. Oxiꞌ qꞌij rikꞌin nikꞌaj ngepokꞌeꞌ+ ri cuerpos chiriꞌ y ri wineq ma ndikiyaꞌ ta qꞌij chin ngemuq. 10Ja atoq riꞌ ri wineq chochꞌulew ngekikot, ndikibꞌanalaꞌ nimaqꞌij y ndikitaqalaꞌ sipanik chikiwech, porque xeken ri ekaꞌiꞌ riꞌ+ ri xeyoꞌon kꞌayew pa kikꞌaslen ri wineq chochꞌulew. 11Y atoq qꞌaxneq chik ri oxiꞌ qꞌij rikꞌin nikꞌaj, ri Dios nduteq espíritu chin kꞌaslen+ chin ndok pa ki-cuerpo ri ekaꞌiꞌ riꞌ, y ngebꞌeyakatej chi pe. Y ri wineq ri ngetzꞌeto kichin, santienta xibꞌriꞌil ndok pa kánima. 12Y ri ekaꞌiꞌ samajelaꞌ riꞌ xkakꞌaxaj jun chꞌabꞌel chikaj ri kaw xubꞌij: ¡Kixjoteꞌ pe chireꞌ! Y xejoteꞌ e+ chikaj chupan jun nube+ chikiwech ri itzel xetzꞌeto kichin. 13Y ja atoq riꞌ xbꞌanatej jun nimalej kobꞌraqen,+ y jun lajuj parte chin ri nimalej tinamit xwuluwuꞌ, y xeken wuquꞌ mil wineq. Y ri ma xeken ta, santienta xkixibꞌij kiꞌ y xkiyaꞌ ruqꞌij ri aj chikaj Dios.

14Rikꞌin nojel re xbꞌanatej, xqꞌax yan ri rukan kꞌayew, pero ja pataneq ri rox.

Ri ndibꞌanatej atoq ndixulex ri ruwuq trompeta

15Ri ruwuq ángel xuxulaj ri trompeta yoꞌon chare+ y chikaj xeꞌakꞌaxex nimalej teq chꞌabꞌel ri kereꞌ ndikibꞌilaꞌ:

Wokami pa ruqꞌaꞌ ri Qajaw Dios

Xyoꞌox ri aj rochꞌulew reino,

Y pa ruqꞌaꞌ chuqaꞌ ri Jun ri xuteq chochꞌulew chukolik ri rutinamit.

Y Rijaꞌ ndubꞌen reinar chin jumul+ pa kiwiꞌ.

16Y ri 24 rijilej teq achiꞌaꞌ ri etzꞌuyul pa teq ki-tronos+ chuwech ri Dios, xexukeꞌ y xelukeꞌ. Y chin ndikiyaꞌ ruqꞌij ri Dios, 17kereꞌ ndikibꞌilaꞌ:

Ajaw Dios, pa aqꞌaꞌ rat kꞌo nojel uchuqꞌaꞌ.

Kin ratkꞌo wi pe y ratkꞌo wokami.

Chawa rat ndiqamatioxij porque wokami xqꞌalajin ri nimalej awuchuqꞌaꞌ,

Y xatzꞌuk e chin ndabꞌen reinar.

18Xyakatej koyowal jalajaj teq tinamit chawa,

Pero ja xuqaqa ri tiempo chin ndiqaqa awoyowal pa kiwiꞌ.

Ja xuqaqa ri tiempo chin ndaqꞌet tzij pa kiwiꞌ ri ekamineq,+

Y chin chuqaꞌ ndayaꞌ rajel-rukꞌexel chake ri profetas roma ri samaj kibꞌanaloꞌon,

Chake ri loqꞌolej teq awalkꞌuaꞌl

Y chake ri kinimrisan ri abꞌiꞌ.

Chi chꞌutiꞌq chi nimaꞌq, kin ndayaꞌ rajel-rukꞌexel chake,

Y xuqaqa chuqaꞌ ri tiempo chin ndakꞌis kiqꞌij ri ngekꞌiso ruqꞌij ri rochꞌulew.

Ri ndibꞌanatej nabꞌey chi ngeqꞌalajin nimalej teq etal chikaj

19Y xjaqatej chikaj ri puerta chin ri rachoch ri Dios, y chiriꞌ xtzꞌetetej ri káxa+ ri achoq chupan yakel ri pacto ri xubꞌen ri Dios rikꞌin ri rutinamit. Xetiker pe koyopaꞌ y rayos ri santienta ngeqꞌajan, xbꞌanatej jun nim kobꞌraqen y xubꞌen chuqaꞌ santienta saqbꞌach.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index