Search form

Apocalipsis 12

Ri ixaq ri ndalex ral

1Y xtzꞌetetej jun nimalej etal chikaj. Ri etal riꞌ jun ixaq ruweqon riꞌ chare ri qꞌij, y chuxeꞌ qa ri raqen kꞌo ri raqen ikꞌ y pa rujolon rukusan jun corona ruchajin kabꞌlajuj chꞌumil. 2Ri ixaq riꞌ ndisikꞌin roma ri qꞌaxomal ndunaꞌ, porque pataneq alanik chirij y ja ndajin ruqꞌaxon roma ndalex ri ral.

Ri ojer itzel kumetz keq rij

3Y xtzꞌetetej chik jun etal chikaj, y ri etal riꞌ jun mama itzel kumetz keq rij. Ri kumetz riꞌ wuquꞌ rujolon, lajuj rukꞌaꞌ+ y pa teq rujolon rukꞌuan jujun corona. 4Ri kumetz riꞌ, rikꞌin ri rujey ruqiriren jun rox parte ri chꞌumilaꞌ chikaj, y xerukiraj pe chochꞌulew.+ Ri itzel kumetz riꞌ xbꞌepeꞌeꞌ chuwech ri ixaq ri ndajin ruqꞌaxon roma ndalex ri ral, chin keriꞌ xe xtalex ri ral, ja nduqetzelaꞌ.+ 5Y ri ixaq riꞌ xalex jun chꞌuti ral alaꞌ ri ndekꞌojeꞌ pa kiwiꞌ nojel kiwech wineq chochꞌulew, y kin achel rukꞌuan jun chꞌichꞌ+ pa ruqꞌaꞌ ri achoq chare ndubꞌen chake ri wineq chi ndikinimaj rutzij. Y ri ral ri ixaq xkꞌan e y xukꞌuꞌex e apeꞌ kꞌo ri Dios y ri ru-trono. 6Ri ixaq riꞌ, xanimej xbꞌa pa jun chaqiꞌj y tzꞌiran ulew, apeꞌ ri Dios rubꞌanun rukꞌojlen jun lugar chare, chin ndilix 1,260 qꞌij.

7Y xbꞌanatej chuqaꞌ jun guerra chikaj. Ri Miguel+ y ri ángeles ekꞌo chuxeꞌ rutzij xkibꞌen guerra chare ri itzel kumetz y ri ru-ángeles. Keriꞌ chuqaꞌ ri itzel kumetz y ri ru-ángeles xkipabꞌaꞌ kiꞌ chuwech ri Miguel, 8pero ma xetiker ta pa ruqꞌaꞌ, y ma xyoꞌox chi ta qꞌij chake chi xekꞌojeꞌ chikaj. 9Xelesex kꞌa e ri mama ojer itzel kumetz+ ri ndibꞌix chuqaꞌ Satanás+ chare. Ja rijaꞌ ri ndichꞌakatin kichin ri jalajaj kiwech wineq chochꞌulew. Y xetorix qa rijaꞌ y ri ru-ángeles+ chochꞌulew.

10Ja atoq riꞌ xinwakꞌaxaj jun nim chꞌabꞌel chikaj ri xubꞌij:

Wokami ri qa-Dios jabꞌel ruqꞌalajrisan chi ngerukal+ ri rutinamit,

Chi kꞌo nimalej ruchuqꞌaꞌ, chi ja rijaꞌ ri ndubꞌen reinar,+

Y chi kin kꞌo uchuqꞌaꞌ pa ruqꞌaꞌ ri Jun ri xuteq chochꞌulew chukolik ri rutinamit;

Porque ja xsututex e ri sujunel+ kichin ri qa-hermanos,

Ri ngerusujuj chi chaqꞌaꞌ chi paqꞌij

Chuwech ri qa-Dios.

11Y ri qa-hermanos riꞌ xetiker+ chirij ri itzel,

Roma rukikꞌel ri Alaj Karneꞌl

Y roma chuqaꞌ xkiyaꞌ rutzijol chi kitaqin rijaꞌ.

Ma xkipoqonaj ta ri kikꞌaslen, maske xekamisex.

12Roma kꞌa riꞌ, kixkikot rix,

Ri rixkꞌo chikaj,

Pero, ¡juyo iwech rix ri rixkꞌo chochꞌulew y rix ri rixkꞌo pa mar!

Porque ri itzel kin retaman chi xa jubꞌaꞌ chi ok qꞌij yoꞌon chare,

Y santienta royowal qajneq qa chochꞌulew apeꞌ rixkꞌo,

xchajeꞌ.

13Atoq ri itzel kumetz xuyaꞌ cuenta chare chi xtorix qa chochꞌulew, xutzeqlebꞌej ri ixaq ri xalex chꞌuti ral alaꞌ chin ndubꞌen itzel chare.+ 14Y xyoꞌox chare ri ixaq riꞌ ri kaꞌiꞌ ruxikꞌ ri nimalej kot, chin ndirapap ndibꞌa pa chaqiꞌj y tzꞌiran ulew, apeꞌ kꞌo ri lugar bꞌanun rukꞌojlen chin ndilix jun junaꞌ, kaꞌiꞌ junaꞌ y nikꞌaj chik junaꞌ, chin ma tilitej roma ri itzel kumetz. 15Atoq ri itzel kumetz xutzꞌet chi keriꞌ, xupubꞌaj pe pa ruchiꞌ jun achel raqen yaꞌ, chin ta xqirirex ri ixaq roma ri yaꞌ. 16Pero ri rochꞌulew xjaqatej ruchiꞌ chin xutoꞌ ri ixaq y xubꞌiqꞌ qa ri yaꞌ ri xupubꞌaj pe ri itzel kumetz pa ruchiꞌ. 17Ja atoq riꞌ ri itzel kumetz xyakatej santienta royowal chare ri ixaq, romariꞌ xbꞌerubꞌanaꞌ guerra chake ri chꞌaqa chik ral ri ixaq+ ri kiniman ri mandamientos ruyoꞌon kan ri Dios y ma kiyoꞌon ta kan chi ndikiyaꞌ utzulej rutzijol ri Jesús.+ 18Y ri itzel kumetz xbꞌepeꞌeꞌ pariꞌ ri sanayiꞌ chin ri mar.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index