Search form

Apocalipsis 15

Ri wuquꞌ ángeles y ri wuquꞌ kꞌayew

1Riyin Juan xintzꞌet jun chik nimalej etal chikaj ri ndisach akꞌuꞌx ndatzꞌet: Ri etal riꞌ, wuquꞌ ángeles kikꞌuan wuquꞌ rukꞌisibꞌel teq kꞌayew. Y kikꞌin ri kꞌayew riꞌ nditzꞌaqet rukꞌusaxik ri royowal+ ri Dios pa kiwiꞌ ri wineq.

Ri ndibꞌanatej nabꞌey chi ndiwoxix ri kꞌo chupan ri copas

2Y xintzꞌet jun achel mar+ vidrio xolon rikꞌin qꞌaqꞌ nditzuꞌun, y pa ruwiꞌ ri achel mar riꞌ epeꞌel apu ri xetiker pa ruqꞌaꞌ ri nabꞌey itzel chikap y pa ruqꞌaꞌ ri rachibꞌel, y ma xkiyaꞌ ta qꞌij chi xyoꞌox ri ru-número ri rubꞌiꞌ chikiqꞌaꞌ, o pa runikꞌajal kiwech. Rejeꞌ kikꞌuan arpas ri xyoꞌox chake roma ri Dios. 3Y ndikibꞌixaj ri bꞌix ri xubꞌixaj ri Moisés+ rusamajel ri Dios y ri bꞌix chin ndiyoꞌox ruqꞌij ri Alaj Karneꞌl, y kereꞌ ndikibꞌij:

Ajaw Dios, pa aqꞌaꞌ rat kꞌo nojel uchuqꞌaꞌ.

Ndisach qakꞌuꞌx roma ri nimalej teq asamaj abꞌanun,

Kin qetzij y chojmilej+ wi ri ngaꞌabꞌanalaꞌ.

Ja rat ri Rey pa kiwiꞌ ri wineq jalajaj kirochꞌulew.

4Ajaw, ¿kꞌo kami jun ri man ta ndunimrisaj abꞌiꞌ

Y man ta nduyaꞌ aqꞌij?

Porque xa kin xe wi rat ri rat loqꞌolej.

Romariꞌ konojel wineq ri jalajaj teq kirochꞌulew ngetuqaqa y ndukiyaꞌ aqꞌij.

Porque xqꞌalajin chi ri ndabꞌen, kin pa ruchojmil ndabꞌen, xechajeꞌ.

5Y atoq xbꞌanatej yan riꞌ, kꞌateꞌ ruwech xintzꞌet chi chikaj xjaq+ ri más loqꞌolej kꞌojlibꞌel chupan ri rachoch ri Dios ri bꞌanun chare kꞌul, apeꞌ kꞌo ri káxa ri achoq chupan yakel ri tzꞌajtzꞌeq teq abꞌej ri achoq chikiwech tzꞌibꞌan ri ley ri xyoꞌox chare ri Moisés. 6Y chupan ri loqꞌolej kꞌojlibꞌel riꞌ xebꞌeꞌel pe ri wuquꞌ ángeles kikꞌuan ri wuquꞌ kꞌayew. Ri ángeles riꞌ kiweqon kiꞌ rikꞌin chꞌajchꞌaj teq tzieq bꞌanun chare lino+ nditzꞌintzꞌot, y ximil rokikꞌuꞌx rikꞌin ximibꞌel bꞌanun chare qꞌanapueq. 7Y jun chikikajal ri kajiꞌ kꞌo kikꞌaslen+ xujech wuquꞌ copas ebꞌanun chare qꞌanapueq chake ri wuquꞌ ángeles, jujun chikijununal xuyaꞌ chake. Ri copas riꞌ enojneq rikꞌin ruchuqꞌaꞌ ri castigo nduyaꞌ ri Dios ri kin jumul kꞌo rukꞌaslen. 8Ri loqꞌolej kꞌojlibꞌel chin ri rachoch ri Dios, xnoj+ rikꞌin sibꞌ+ retal ri nimalej ruqꞌij y ruchuqꞌaꞌ ri Dios, y nixta jun nditiker ndok apu chiriꞌ, hasta kꞌa nditzꞌaqet na ri wuquꞌ kꞌayew ri ndikiyaꞌ ri wuquꞌ ángeles riꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index