Search form

Apocalipsis 16

1Ja atoq riꞌ xinwakꞌaxaj chi chupan ri más loqꞌolej kꞌojlibꞌel chin ri rachoch ri Dios, kꞌo jun ri rikꞌin kaw ruchꞌabꞌel kereꞌ xubꞌij pe chake ri wuquꞌ ángeles: ¡Kixbꞌiyin y teꞌiwoxij pa ruwiꞌ ri rochꞌulew ri ruchuqꞌaꞌ ri castigo nduyaꞌ ri Dios+ chin ndukꞌusaj royowal,+ castigo ri kꞌo chupan ri wuquꞌ copas ikꞌuan!

Ri wuquꞌ copas

2Ri nabꞌey ángel+ xbꞌa, y pa ruwiꞌ ri rochꞌulew xbꞌeruwoxij ri kꞌo chupan ri copa rukꞌuan, y ri wineq ri xkiyaꞌ qꞌij chin xyoꞌox retal ru-sello ri nabꞌey itzel chikap chikij, y ndikiyalaꞌ chuqaꞌ ruqꞌij ri rachibꞌel ri chikap riꞌ, xebꞌeꞌel pe itzel y chuwilej teq chꞌaꞌk+ chikij ri ngeruyaꞌ pa qꞌaxomal.

3Ri rukan ángel xbꞌa, y pa ruwiꞌ ri mar xbꞌeruwoxij ri kꞌo chupan ri copa rukꞌuan, y ri mar xchuwir qa, kin achel rukikꞌel jun ámna xubꞌen qa, y nojel ri kꞌo kikꞌaslen pa mar xeken.+

4Ri rox ángel xbꞌa, y pa kiwiꞌ ri raqen teq yaꞌ y ri alaxbꞌel teq yaꞌ+ xbꞌeruwoxij ri kꞌo chupan ri copa rukꞌuan, y ri yaꞌ xok qa kikꞌ.+ 5Y xinwakꞌaxaj ruchꞌabꞌel ri ángel ri yoꞌon uchuqꞌaꞌ chare pa ruwiꞌ ri yaꞌ chi kereꞌ xubꞌij:

Ajaw, rat ri kin rat loqꞌolej wi, ri kin ratkꞌo wi pe,+ y ratkꞌo wokami,

Kin pa ruchojmil+ xabꞌen, roma kereꞌ castigo xayaꞌ.

6Porque rejeꞌ xekikamisaj

Ri loqꞌolej awalkꞌuaꞌl

Y ri a-profetas,+

Y rat xabꞌen chake chi ndikitij kikꞌ,+

Kin achel rukꞌulun chi ndibꞌan chake,

xchajeꞌ.

7Y xinwakꞌaxaj jun chꞌabꞌel cho altar ri xubꞌij pe: Kin keriꞌ wi, Ajaw Dios, ri kꞌo nojel uchuqꞌaꞌ pa aqꞌaꞌ. Kin pa ruchojmil+ ndayaꞌ castigo, y ja ri castigo ri rukꞌulun chi ndiyoꞌox, jariꞌ ri ndayaꞌ.

8Ri rukaj ángel+ xbꞌa, y pa ruwiꞌ ri qꞌij xbꞌeruwoxij ri kꞌo chupan ri copa rukꞌuan, y ri qꞌij xkꞌojeꞌ ruchuqꞌaꞌ chin ngerukꞌatisaj ri wineq rikꞌin ruqꞌaqꞌal. 9Janíma xekꞌat ri wineq rikꞌin ruqꞌaqꞌal ri qꞌij y xkiyaqꞌ rubꞌiꞌ ri Dios ri kꞌo uchuqꞌaꞌ pa ruqꞌaꞌ pa ruwiꞌ teq ri kꞌayew riꞌ. Y ri wineq ma xkijel ta kinoꞌoj nixta xkiyaꞌ kánima rikꞌin ri Dios, chin ta xkiyaꞌ ruqꞌij.

10Ri ruwoꞌ ángel xbꞌa, y pa ruwiꞌ ru-trono ri nabꞌey itzel chikap xbꞌeruwoxij ri kꞌo chupan ri copa rukꞌuan, y jun nimalej qꞌequꞌ+ xkꞌojeꞌ pa ruwiꞌ ri rochꞌulew apeꞌ ndubꞌen reinar ri chikap riꞌ. Y ri wineq ndikikachꞌulaꞌ kaqꞌ roma ri qꞌaxomal ndikinaꞌ. 11Y roma ri qꞌaxomal ndikinaꞌ y roma ri itzel y chuwilej teq chꞌaꞌk kꞌo chikij,+ ri wineq ndikiyaqꞌ rubꞌiꞌ ri aj chikaj Dios, y ma xkiyaꞌ ta kan ri itzel teq achike ngekibꞌanalaꞌ.

12Ri ruwaq ángel xbꞌa, y pa ruwiꞌ ri nimalej raqen yaꞌ rubꞌiniꞌan Éufrates+ xbꞌeruwoxij ri kꞌo chupan ri copa rukꞌuan, y ri raqen yaꞌ riꞌ xchaqiꞌj+ qa chin xbꞌan kan rukꞌojlen ri bꞌey apeꞌ ngeꞌeqꞌax ri reyes ri ngeꞌel pe apeꞌ ndalex ri qꞌij.+

13Y xintzꞌet chi pa ruchiꞌ ri itzel kumetz,+ pa ruchiꞌ ri nabꞌey itzel chikap y pa ruchiꞌ ri achi ri ruqꞌabꞌan riꞌ chi profeta,+ xebꞌeꞌel pe oxiꞌ seqꞌ teq espíritu eꞌachel xpeq. 14Ri espíritus riꞌ, kin erichin wi ri itzel. Ngekibꞌanalaꞌ nimalej teq milagros,+ ngebꞌa chikimolik ri ki-ejército ri reyes chochꞌulew chin ndikibꞌen guerra+ chare ri Dios chupan ri nimalej qꞌij atoq nduyaꞌ castigo ri Dios ri achoq pa ruqꞌaꞌ kꞌo nojel uchuqꞌaꞌ.

15Ri Ajaw Jesucristo ndubꞌij: Kꞌateꞌ ruwech nginuqaqa achel nduqaqa jun eleqꞌon.+ Kin jabꞌel rokiqꞌij ri ndikichajij kiꞌ y ndikikꞌuaj jun chojmilej kꞌaslen. Porque ri keriꞌ ngebꞌanun, kin achel kikusan kitziaq ngeꞌilitej atoq nginuqaqa, y ma ngekꞌix ta achel ndikꞌix jun ri ma rukusan ta rutziaq ndilitej.

16Ri oxiꞌ itzel teq espíritu xekimal ri reyes y ri ki-ejército pa jun lugar ri pa chꞌabꞌel hebreo rubꞌiniꞌan Harmagedón.

17Ri ruwuq ángel xbꞌa, y pa kaqiqꞌ xbꞌeruwoxij ri kꞌo chupan ri copa rukꞌuan. Y pa kꞌojlibꞌel más loqꞌolej chin ri rachoch ri Dios chikaj, apeꞌ kꞌo ri ru-trono, kꞌo jun ri rikꞌin kaw ruchꞌabꞌel kereꞌ xubꞌij pe: Rikꞌin xwoxix ri kꞌo chupan ri copa, xtzꞌaqet rukꞌusaxik ri royowal ri Dios pa kiwiꞌ ri wineq, xchajeꞌ. 18Ja atoq riꞌ xetiker pe koyopaꞌ, y rayos ri santienta ngeqꞌajan, y xbꞌanatej jun nim kobꞌraqen ri ma jumbꞌey keriꞌ bꞌanatajneq xe jampeꞌ ekꞌo pe wineq chochꞌulew.+ 19Y ri nimalej tinamit xperetej pa oxiꞌ y ri chꞌaqa chik tinamit ri ekꞌo jalajaj rochꞌulew, xewulutej, y ri Dios xukꞌuxlaꞌaj ri nimalej tinamit Babilonia+ chin ndubꞌen chare chi tutijaꞌ+ nojel ruchuqꞌaꞌ ri castigo nduyaꞌ chin ndiqaqa ruqꞌaqꞌal ri royowal pa kiwiꞌ. 20Y konojel ri chꞌuteq rochꞌulew ri ekꞌo pa mar xekꞌis qa pa yaꞌ y ri juyuꞌ ma xeꞌilitej ta+ chik. 21Y chikaj xtzaq pe chikij ri wineq nimaꞌq teq saqbꞌach+ jubꞌama laꞌeq jun quintal kalal chi jujun. Y ri wineq xkiyaqꞌ rubꞌiꞌ ri Dios porque ri saqbꞌach riꞌ santienta kꞌayew xukꞌen pe chake.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index