Search form

Apocalipsis 17

Ri xbꞌanatej nabꞌey chi ndiyoꞌox castigo chare ri ixaq tzꞌuyul chirij ri itzel chikap keq rij

1Y jun chikiwech ri wuquꞌ ángeles ri achoq chake xyoꞌox ri wuquꞌ copas xjel pe wikꞌin y xubꞌij chuwa: ¡Katámpe! Y nikꞌut chawech ri castigo ndiyoꞌox chare ri ixaq itzel chubꞌanik ri ndukꞌayilaꞌ riꞌ+ chake achiꞌaꞌ. Ri ixaq riꞌ tzꞌuyul pariꞌ santienta yaꞌ.+ 2Rikꞌin rijaꞌ xkikꞌamalaꞌ qa kiꞌ ri reyes chin ri rochꞌulew chin xkibꞌen mak, y ri wineq ekꞌo chochꞌulew xkiqꞌabꞌarisalaꞌ kiꞌ rikꞌin rumak+ ri ixaq ri xa achoq na ikꞌin ndubꞌanalaꞌ.

3Y chuxeꞌ ruchuqꞌaꞌ ri Espíritu Santo yinkꞌo atoq ri ángel xirukꞌuaj pa jun chaqiꞌj y tzꞌiran ulew.

Ri ixaq tzꞌuyul chirij ri itzel chikap

Chiriꞌ xintzꞌet jun ixaq tzꞌuyul chirij jun itzel chikap keq rij. Ri chikap riꞌ kꞌo wuquꞌ rujolon y lajuj rukꞌaꞌ,+ y nojneq rij rikꞌin bꞌiꞌaj ri nduyaqꞌ rubꞌiꞌ ri Dios.

4Ri ixaq riꞌ, ruweqon riꞌ rikꞌin tzieq morado y keq y chuqaꞌ rikꞌin qꞌanapueq, jabꞌel teq abꞌej y perlas.+ Pa ruqꞌaꞌ rukꞌuan jun copa bꞌanun chare qꞌanapueq, nojneq rikꞌin mak ri ndimulu rukꞌuꞌx ri Dios rikꞌin, y keriꞌ chuqaꞌ nojneq kikꞌin seqꞌ teq mak ri ngerubꞌanalaꞌ ri ixaq xa achoq na ikꞌin. 5Pa runikꞌajal ruwech ri ixaq riꞌ, tzꞌibꞌan jun bꞌiꞌaj ri ma kin ta qꞌalej rubꞌeyal ri achike ndubꞌij tzij: Ri nimalej tinamit Babilonia, kiteꞌ ri ixoqiꞌ ri ndikikꞌayilaꞌ kiꞌ chake achiꞌaꞌ, y kiteꞌ ri ngebꞌanun seqꞌ teq mak chochꞌulew ri ndimulu rukꞌuꞌx ri Dios kikꞌin. 6Y xintzꞌet chi ri ixaq riꞌ ruqꞌabꞌarisan riꞌ rikꞌin ri kikikꞌel ri loqꞌolej ralkꞌuaꞌl ri Dios y rikꞌin ri kikikꞌel ri ekamisan+ roma xkiyaꞌ rutzijol ri rubꞌiꞌin kan ri Jesús.

Y atoq xintzꞌet ri ixaq riꞌ, santienta xsach nukꞌuꞌx. 7Y ri ángel xubꞌij chuwa: ¿Achike roma xsach akꞌuꞌx? Riyin niqꞌalajrisaj chawech achike ndubꞌij tzij ri itzel chikap keq rij, wuquꞌ rujolon y lajuj rukꞌaꞌ, y ri ixaq tzꞌuyul chirij. 8Ri itzel chikap xatzꞌet, xa jun ri xkꞌojeꞌ yan rukꞌaslen, y ma kꞌo chi ta, pero maske ma kꞌo ta, xa jubꞌaꞌ chik ndirajoꞌ chin ndel pe chupan ri rar siwan,+ nabꞌey chi ndeyoꞌox apeꞌ ngeyoꞌox ri ma ngekolotej ta. Y ri wineq ekꞌo chochꞌulew, ri xe jampeꞌ pa nabꞌey atoq kꞌajani tibꞌan ri rochꞌulew+ ma tzꞌibꞌan ta kibꞌiꞌ chupan ri wuj apeꞌ tzꞌibꞌan kibꞌiꞌ ri ndiyoꞌox ri kꞌaslen ma ndikꞌis ta chake, rejeꞌ ndisach kikꞌuꞌx chirij ri itzel chikap ri xkꞌojeꞌ yan y ma kꞌo chi ta, y ndekꞌojeꞌ chik jumbꞌey.

9Kꞌiy nojibꞌel+ ndirajoꞌ chin ndikꞌoxomex ri ndubꞌij tzij reꞌ: Ri wuquꞌ rujolon+ ri chikap, ewuquꞌ juyuꞌ ri achoq pa kiwiꞌ tzꞌuyul ri ixaq, y ewuquꞌ reyes chuqaꞌ. 10Ewoꞌoꞌ chikiwech ri reyes riꞌ ma ndikibꞌen chi ta reinar, jun ndubꞌen reinar wokami, y jun kꞌajani tubꞌen reinar, y atoq nderubꞌanaꞌ reinar, xa chi jubꞌaꞌ ok tiempo ndubꞌen reinar. 11Ri itzel chikap ri xkꞌojeꞌ yan y ma kꞌo chi ta, ri ndeyoꞌox apeꞌ ngeyoꞌox ri ma ngekolotej ta, ja rijaꞌ ri ruwaqxaq rey y jun chikikajal ri wuquꞌ teq reyes.

12Ri lajuj teq ukꞌaꞌ+ xatzꞌet, elajuj reyes ri kꞌajani tikibꞌen reinar,+ pero xa jubꞌaꞌ ok tiempo ndiyoꞌox chake chin ndikibꞌen reinar junan rikꞌin ri itzel chikap. 13Ri lajuj reyes riꞌ, xe jun ruwech kitzij ndikibꞌen chin ndikijech ri uchuqꞌaꞌ kꞌo pa kiqꞌaꞌ y ri ki-reino chare ri itzel chikap. 14Y ndikibꞌen guerra+ chare ri Alaj Karneꞌl, pero ri Alaj Karneꞌl nditiker pa kiqꞌaꞌ, porque rijaꞌ Rey pa kiwiꞌ konojel reyes y Ajaw pa kiwiꞌ konojel ajaw.+ Y ri ekꞌo rikꞌin ri Alaj Karneꞌl, jariꞌ ri eꞌoyon, echaꞌon y ma jumbꞌey kiyoꞌon kan rijaꞌ.

15Y ri ángel xubꞌij chuqaꞌ chuwa: Ri santienta yaꞌ atzꞌeton apeꞌ tzꞌuyul ri ixaq ri ndukꞌayilaꞌ riꞌ chake achiꞌaꞌ, ndubꞌij tzij: Santienta wineq jalajaj kitinamit, kirochꞌulew y kichꞌabꞌel. 16Ri lajuj teq ukꞌaꞌ y ri itzel chikap ri xaꞌatzꞌet, itzel ndikitzꞌet ruwech ri ixaq ri ndukꞌayilaꞌ riꞌ chake achiꞌaꞌ; ndikimej e nojel ri achoq chare ruweqon riꞌ y ndikichꞌanabꞌaꞌ kan,+ ndikikꞌux ri ruchꞌakul y ri rubꞌaqil ndikiporoj. 17Porque ri Dios xuyaꞌ pa kánima rejeꞌ chin ndikibꞌen achel ndirajoꞌ rijaꞌ. Y romariꞌ ri reyes riꞌ, xe jun ruwech kitzij ndikibꞌen chin ndikiyaꞌ chare ri itzel chikap ri ki-reino, hasta kꞌa tibꞌanatej na+ ri rubꞌiꞌin kan ri Dios. 18Y ri ixaq xatzꞌet, ja ri nimalej tinamit+ ri kꞌo uchuqꞌaꞌ pa ruqꞌaꞌ pa kiwiꞌ ri reyes chochꞌulew.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index