Search form

Apocalipsis 19

1Atoq xintzꞌet yan reꞌ, xinwakꞌaxaj jun nim chꞌabꞌel ri achel kichin santienta wineq chikaj, ri kereꞌ ndubꞌij:

¡Tinimrisex rubꞌiꞌ ri qa-Dios!

Porque ja rijaꞌ ri ndiyoꞌon ri kolotajik,+

Ja chuqaꞌ rijaꞌ ri kin rukꞌulun wi chi ndiyoꞌox ruqꞌij

Y pa ruqꞌaꞌ rijaꞌ kꞌo nojel uchuqꞌaꞌ.+

2Porque pa ruchojmil nduqꞌet tzij+ y ja ri castigo ri rukꞌulun chi ndiyoꞌox, jariꞌ ri nduyaꞌ.

Porque pa ruchojmil xuyaꞌ castigo chare ri ixaq itzel chubꞌanik ri ndukꞌayilaꞌ riꞌ chake achiꞌaꞌ.

Keriꞌ xubꞌen chare roma ri ixaq riꞌ xerutaqchiꞌij ri wineq chochꞌulew chin ndikikꞌamalaꞌ qa kiꞌ rikꞌin chin ndikibꞌen mak.

Ja chuqaꞌ rijaꞌ ri xkamisan kichin ri erusamajelaꞌ ri Dios,

Y romariꞌ ri Dios xuyaꞌ rukꞌexel+ chare.

3Y ri santienta wineq xkibꞌij chik jumbꞌey:

¡Tinimrisex rubꞌiꞌ ri Dios!

Porque ri rusibꞌil ri tinamit Babilonia chin jumul ndijoteꞌ+ chikaj,

xechajeꞌ.

4Y ri 24 rijilej teq achiꞌaꞌ+ y ri kajiꞌ kꞌo kikꞌaslen, xexukeꞌ y xelukeꞌ y xkiyaꞌ ruqꞌij ri Dios ri tzꞌuyul pa ru-trono, y xkibꞌij: ¡Amén! ¡Tinimrisex rubꞌiꞌ ri Dios! xechajeꞌ.

5Y xel pe pa trono jun chꞌabꞌel ri kereꞌ xubꞌij:

¡Tinimrisaj ruqꞌij ri qa-Dios+

Rix iwonojel ri rusamajelaꞌ.

Chi chꞌutiꞌq chi nimaꞌq

Rix ri iniman rutzij, tiyaꞌ ruqꞌij!

Ri Dios ndiyoꞌox ruqꞌij

6Y xinwakꞌaxaj achel kichꞌabꞌel santienta wineq ri ngeqꞌajan achel santienta yaꞌ+ ri ngeqaqa pa kiwiꞌ abꞌej, y chuqaꞌ achel ngeqꞌajan rayos, y kereꞌ ndikibꞌij:

¡Tinimrisex rubꞌiꞌ ri Dios!

Porque ri Ajaw qa-Dios ri achoq pa ruqꞌaꞌ kꞌo nojel uchuqꞌaꞌ, kin ndubꞌen reinar.

7Y qojkikot,

Tiqabꞌanaꞌ nimaqꞌij+ y tiqayaꞌ ruqꞌij ri Dios,

Porque ja xuqaqa ri qꞌij

Chin ndikꞌuleꞌ ri Alaj Karneꞌl,

Y ri xten ri ndok rixjayil rubꞌanun chik rukꞌojlen riꞌ.

8Y xyoꞌox qꞌij chare chi xuweq riꞌ

Rikꞌin tzieq bꞌanun rikꞌin lino jabꞌel ruwech ri kin chꞌajchꞌaj y nditzꞌintzꞌot.

Y ri lino riꞌ, ja ri utz ri ekibꞌanaloꞌon+

Ri loqꞌolej ralkꞌuaꞌl ri Dios,

xechajeꞌ.

9Y kereꞌ xubꞌij ri ángel chuwa: Tatzꞌibꞌaj reꞌ: ¡Kin jabꞌel rokiqꞌij ri xeꞌoyox chin ngewaꞌ chupan ri nimaqꞌij+ chin rukꞌulubꞌik ri Alaj Karneꞌl! Y xubꞌij chuqaꞌ chuwa: Re tzij re xinbꞌij chawa kin eqetzij wi, porque erutzij ri Dios.

10Y riyin xixukeꞌ y xilukeꞌ chin xiyaꞌ ruqꞌij ri xchꞌaꞌa pe chuwa, pero rijaꞌ xubꞌij: ¡Ma ndabꞌen kelaꞌ!+ Porque chi roj kaꞌiꞌ roj rusamajelaꞌ ri Dios, achel ri chꞌaqa chik a-hermanos ri ma kiyoꞌon ta kan chi ndikiyaꞌ utzulej rutzijol ri Jesús. ¡Ja ri Dios tayaꞌ ruqꞌij!

Porque ri ngeyoꞌon utzulej rutzijol ri Jesús, eꞌukꞌuan roma ri Espíritu ri xukꞌuan kichin ri profetas.

Ri Jun ri tzꞌuyul pe chirij jun kej seq rij

11Y xintzꞌet ri kaj jaqel, y kꞌateꞌ ruwech xqꞌalajin jun kej seq rij, y ri Jun ri tzꞌuyul pe chirij, ja ri kin ndubꞌen wi ri ndubꞌij y kin qetzij+ ri ndubꞌij. Rijaꞌ kin pa ruchojmil+ nduqꞌet tzij pa kiwiꞌ ri wineq y ndubꞌen guerra. 12Ri runaqꞌ teq ruwech eꞌachel ruxaq qꞌaqꞌ,+ pa rujolon ekꞌiy coronas kꞌo, y kꞌo chuqaꞌ jun rubꞌiꞌ+ tzꞌibꞌan, ri nixta jun etamayon, xa kin xe rijaꞌ. 13Ri rutziaq muꞌul pe pa kikꞌ,+ y ri rubꞌiꞌ ndibꞌix chare, jareꞌ: Ri ndiqꞌalajrisan runoꞌoj ri Dios.+ 14Y ri aj chikaj ejército koqan pe, kikusan tzieq bꞌanun rikꞌin lino jabꞌel ruwech, seq y chꞌajchꞌaj+ y etzꞌuyul pe chikij kej seq kij. 15Y pa ruchiꞌ+ ri Jun bꞌaneq chikiwech ri ejército, ndel pe jun espada chꞌut rutzaꞌ, ri achoq ikꞌin ngerusak ri jalajaj kiwech wineq chochꞌulew, y kin achel rukꞌuan jun chꞌichꞌ+ pa ruqꞌaꞌ ri achoq chare ndubꞌen chi ndikinimaj rutzij. Y achel ndibꞌan chare ri ruwech uva, ngeyeqꞌeloꞌox chi aqen+ apeꞌ ngepitzꞌ, keriꞌ chuqaꞌ rijaꞌ ngeruyeqꞌelaꞌ chi aqen ri kiyakon royowal ri Dios ri kꞌo nojel uchuqꞌaꞌ pa ruqꞌaꞌ, y nduyaꞌ nojel ruchuqꞌaꞌ ri castigo chake. 16Chirij ri rutziaq y chirij ri raꞌ tzꞌibꞌan jun bꞌiꞌaj ri ndubꞌij: Rey pa kiwiꞌ konojel reyes, y Ajaw pa kiwiꞌ konojel ajaw.+

Ri itzel chikap nditorix qa chupan ri qꞌaqꞌ ri ndiraqa rikꞌin azufre

17Y xintzꞌet jun ángel peꞌel pariꞌ ri qꞌij ndisikꞌin chake ri chikap ngerapap pa runikꞌajal ri kaj y ndubꞌij: Kixámpe, timoloꞌ iwiꞌ chin ngixkꞌojeꞌ chupan ri nimalej waꞌin+ rubꞌanun rukꞌojlen ri Dios chiwa, 18chin ndikꞌux kichꞌakul reyes, kichꞌakul ri eꞌukꞌuey kibꞌey soldados más nim kiqꞌij, kichꞌakul ri kꞌo uchuqꞌaꞌ pa kiqꞌaꞌ,+ kichꞌakul kej y ri etzꞌuyul chikij, kichꞌakul chuqaꞌ nojel kiwech wineq, chi loqꞌon teq samajelaꞌ chi e-libre, chi chꞌutiꞌq chi nimaꞌq, xchajeꞌ.

19Y ja atoq riꞌ xintzꞌet ri itzel chikap, xentzꞌet chuqaꞌ ri reyes chin ri rochꞌulew y ri ki-ejércitos, kimolon kiꞌ chin ndikibꞌen guerra+ chare ri Jun ri tzꞌuyul chirij ri kej seq rij y chare ri ru-ejército. 20Y xtzꞌan ri itzel chikap y ri achi ri ruqꞌabꞌan riꞌ chi profeta, ri rubꞌanun pe nimalej teq milagros chuwech ri itzel chikap. Rikꞌin ri milagros xerubꞌanalaꞌ ri achi riꞌ, xeruchꞌakatij ri wineq ri xkiyaꞌ qꞌij chin xyoꞌox retal ru-sello ri nabꞌey itzel chikap chikiqꞌaꞌ o pa runikꞌajal kiwech, y xubꞌen chuqaꞌ chake chi xkiyaꞌ ruqꞌij rachibꞌel ri itzel chikap. Rijaꞌ junan rikꞌin ri itzel chikap, kꞌa keriꞌ na ekꞌes xetorix qa chupan ri qꞌaqꞌ+ ri ndiraqa rikꞌin azufre. 21Y ri chꞌaqa chik ebꞌaneq pa guerra ekachibꞌilan ri ekaꞌiꞌ riꞌ, xekamisex rikꞌin ri espada ri ndel pe pa ruchiꞌ ri Jun tzꞌuyul chirij ri kej seq rij. Y konojel ri aj xikꞌ teq chikap, xenanoꞌ chukꞌuxik kichꞌakul ri xekamisex chiriꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index