Search form

Apocalipsis 2

Ri xtzꞌibꞌex chake ri eralkꞌuaꞌl ri Dios ekꞌo pa tinamit Éfeso

1Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Éfeso:+ Riyin ri Jesucristo ri ekꞌo wuquꞌ chꞌumil pa wikiqꞌaꞌ nuqꞌaꞌ y ngibꞌiyaj pa kinikꞌajal ri wuquꞌ candeleros ebꞌanun chare qꞌanapueq, nibꞌij kereꞌ: 2Riyin wetaman ri ngaꞌabꞌanalaꞌ,+ chi atijon aqꞌij ndabꞌen ri nusamaj y akochꞌon awech chupan ri kꞌayew ndaqꞌasaj, y ma akꞌamon ta apu kiwech ri wineq itzel kinoꞌoj. Keriꞌ chuqaꞌ eꞌatojtobꞌen ri ndikibꞌij chi e-apóstoles y xa kiqꞌabꞌan kiꞌ y xaꞌawil chi xa ereqꞌóta.+ 3Ma amalin ta kan nuwech, kin akochꞌon ri bꞌanun pe chawa roma yin ataqin y ma poyineq ta akꞌuꞌx.+ 4Pero kꞌo jun achike pa akꞌaslen ri ma ndiqaꞌ ta chinuwech, chi xa ma ngatojowan chi ta achel xatojowan pa nabꞌey.+ 5Romariꞌ takꞌuxlaꞌaj ri kꞌaslen akꞌuan pa nabꞌey, tajalaꞌ anoꞌoj y titzolij pe awánima wikꞌin, y tabꞌanaꞌ achel xabꞌen pa nabꞌey. Si ma ke ta riꞌ xtabꞌen, ngibꞌa qa apeꞌ ratkꞌo, y niwelesaj e+ ri a-candelero pa rukꞌojlibꞌel. 6Pero kꞌa kꞌo achike ri ndabꞌen pa akꞌaslen ri ndiqaꞌ chinuwech, chi itzel ndatzꞌet chare ri ndikibꞌanalaꞌ ri wineq ri ndibꞌix nicolaítas+ chake, y ri ndikibꞌanalaꞌ rejeꞌ, itzel chuqaꞌ nitzꞌet chare riyin. 7¡Ri ndirajoꞌ ndukꞌoxomaj, tukꞌoxomaj ri ndubꞌij ri Espíritu Santo chake ri bꞌotzaj teq ralkꞌuaꞌl ri Dios! Chare ri xtitiker ndubꞌen ri nubꞌiꞌin kan, niyaꞌ qꞌij chi ndukꞌux ruwech ri cheꞌ ri nduyaꞌ ri kꞌaslen+ ma ndikꞌis ta, ri kꞌo pa qꞌusqꞌuj ru-paraíso ri Dios.

Ri xtzꞌibꞌex chake ri eralkꞌuaꞌl ri Dios ekꞌo pa tinamit Esmirna

8Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Esmirna: Riyin ri Jesucristo ri nabꞌey y ri rukꞌisibꞌel+ chare nojel, ri xiken y xkꞌojeꞌ chik nukꞌaslen, nibꞌij kereꞌ: 9Riyin wetaman ri kꞌayew ndaqꞌasaj y chi maneq ok achajin, pero pa nuwech riyin kin rat bꞌeyon.+ Wetaman chuqaꞌ chi ri ngebꞌiꞌin chi e-israelitas pero xa kiqꞌabꞌan kiꞌ, tzꞌan itzel teq tzij ndikibꞌilaꞌ chawij. Rejeꞌ xa jun bꞌotzaj wineq ri koqan rutijonik ri itzel. 10Ma taxibꞌij awiꞌ+ rikꞌin ri ndaꞌaqꞌasaj, porque ri itzel ndubꞌen chake jujun ri ekꞌo chiꞌikajal chi ngeyoꞌox pa cheꞌ, chin ngixtojtobꞌex si qetzij yin itaqin, y lajuj qꞌij ndiqꞌasaj kꞌayew pa ikꞌaslen. Ma tajel ruwech atzij chi yin ataqin maske ndipuꞌun kamik+ chawij, y riyin niyaꞌ jun nimalej rajel-rukꞌexel chawa, y riꞌ ja ri kꞌaslen ma ndikꞌis ta.+ 11¡Ri ndirajoꞌ ndukꞌoxomaj, tukꞌoxomaj ri ndubꞌij ri Espíritu Santo chake ri bꞌotzaj teq ralkꞌuaꞌl ri Dios! Ri xtitiker ndubꞌen ri nubꞌiꞌin kan, nixta jun ruqꞌaꞌ ri rukan kamik chare.+

Ri xtzꞌibꞌex chake ri eralkꞌuaꞌl ri Dios ekꞌo pa tinamit Pérgamo

12Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Pérgamo: Riyin ri Jesucristo ri nukꞌuan ri espada+ chꞌut rutzaꞌ ri kaꞌiꞌ apeꞌ kꞌo rey, nibꞌij kereꞌ: 13Riyin wetaman chi ri tinamit apeꞌ ratkꞌo, rubꞌanun rukꞌojlibꞌel ri itzel chare, pero rat ma jumbꞌey yin ayoꞌon kan, y ma axibꞌin ta awiꞌ ndabꞌij chi yinkꞌo pa awánima, nixta chupan teq ri qꞌij atoq xkamisex ri nusamajel Antipas, ri ma jumbꞌey xujel ruwech rutzij chi yin rutaqin. Y rijaꞌ kin chiriꞌ chiꞌikajal xkamisex wi, pa itinamit apeꞌ kꞌo rukꞌojlibꞌel ri itzel. 14Pero ekꞌo achike pa akꞌaslen ri ma ndiqaꞌ ta chinuwech, roma ayoꞌon qꞌij chi ekꞌo jujun chiꞌikajal ri koqan rutijonik ri Balaam,+ ri xukꞌut chuwech ri Balac achike rubꞌeyal xubꞌen chake ri israelitas chin xkiyaꞌ kan ri Dios. Ri Balaam xubꞌij chare chi kerutaqchiꞌij ri israelitas chin ndikikꞌux ri rikil sujun chikiwech tiox, y kerutaqchiꞌij chuqaꞌ chin ndikikꞌamalaꞌ qa kiꞌ xa achoq na ikꞌin+ chin ndikibꞌen mak. 15Keriꞌ chuqaꞌ, ayoꞌon qꞌij chi chiꞌikajal ekꞌo jujun ri koqan ri kitijonik ri wineq ndibꞌix nicolaítas+ chake. 16Roma kꞌa riꞌ, ma tayaꞌ chik qꞌij chi ngekꞌojeꞌ chiꞌikajal y titzolij pe awánima wikꞌin. Si ma xtabꞌen ta keriꞌ, ngibꞌa yan qa paqiꞌ apeꞌ ratkꞌo, y nikusaj ri espada ndel pe pa nuchiꞌ chikij ri wineq riꞌ. 17¡Ri ndirajoꞌ ndukꞌoxomaj, tukꞌoxomaj ri ndubꞌij ri Espíritu Santo chake ri bꞌotzaj teq ralkꞌuaꞌl ri Dios! Ri xtitiker ndubꞌen ri nubꞌiꞌin kan, niyaꞌ chare jubꞌaꞌ chin ri maná ewan kan chi ndukꞌux, y niyaꞌ chuqaꞌ chare jun chꞌuti seq abꞌej apeꞌ tzꞌibꞌan jun kꞌakꞌakꞌ bꞌiꞌaj.+ Xa kin xe ri achoq chare niyaꞌ ndiretamaj ri bꞌiꞌaj riꞌ, y ma jun chik.

Ri xtzꞌibꞌex chake ri eralkꞌuaꞌl ri Dios ekꞌo pa tinamit Tiatira

18Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Tiatira: Riyin ri Jesucristo, ri Rukꞌajol ri Dios, ri pa teq nuwech+ achel ruxaq qꞌaqꞌ keriꞌ, y ri waqen ngetzꞌintzꞌot chuqaꞌ achel bronce jabꞌel juqun ruwech, nibꞌij kereꞌ: 19Wetaman ri ngaꞌabꞌanalaꞌ, wetaman chi ngatojowan, chi yin ataqin, chi eꞌatoꞌon ri ndikꞌatzin kitoꞌik y akochꞌon ri kꞌayew ndaqꞌasaj pa akꞌaslen. Wetaman chuqaꞌ chi wokami más ndabꞌen ri nusamaj ke pa nabꞌey. 20Pero kꞌo achike ndabꞌen ri ma ndiqaꞌ ta chinuwech, chi ayoꞌon qꞌij chare ri jun ixaq rubꞌiniꞌan Jezabel,+ ri ndubꞌij chi kꞌo ruqꞌalajrisan ri Dios chare, y xa ma qetzij ta. Rijaꞌ ngerutijoj y ngerutaqchiꞌij ri nusamajelaꞌ chin ndikikꞌamalaꞌ qa kiꞌ xa achoq na ikꞌin chin ndikibꞌen mak, y ngerutaqchiꞌij chuqaꞌ chin ndikikꞌux ri rikil sujun chikiwech tiox. 21Y riyin nuyoꞌon tiempo chare ri ixaq riꞌ chi ndujel runoꞌoj,+ y nduyaꞌ ránima wikꞌin, pero rijaꞌ ma ndirajoꞌ ta nduyaꞌ kan chi ndukꞌamalaꞌ qa riꞌ xa achoq na ikꞌin chin ndubꞌen mak. 22Romariꞌ, riyin nibꞌen chare chi ndiqaqa chochꞌat roma yabꞌil, y ri ndikibꞌen mak rikꞌin, niyaꞌ santienta kꞌayew pa kikꞌaslen si ma ndikiyaꞌ ta kan ri mak ri xerutijoj ri ixaq rikꞌin, y nditzolij pe ri kánima wikꞌin. 23Y pa kikꞌaslen ral ri ixaq riꞌ niyaꞌ jun yabꞌil chin kamik; y keriꞌ konojel bꞌotzaj ralkꞌuaꞌl ri Dios ndiketamaj chi ja riyin ri etamayon ri kꞌo pa kánima konojel y ri achike ndikinojij,+ y chikijununal niyaꞌ rukꞌexel chake achel rukꞌulun chi niyaꞌ+ roma ri ngekibꞌanalaꞌ. 24Jakꞌa rix y ri chꞌaqa chik ri ekꞌo chuqaꞌ pa tinamit Tiatira, ri ma ibꞌanun ta ri ndukꞌut ri ixaq Jezabel, y ma iwetaman ta ri ndibꞌix nimalej teq noꞌoj chin ri Satanás chare, chiwa rix iwonojel kereꞌ nibꞌij: Ma niyaꞌ chi ta jun eqaꞌ más chiwij.+ 25Xe niwojoꞌ chi titijaꞌ iqꞌij chi ma tikꞌis qa ri utz ndibꞌanalaꞌ, y keriꞌ jumul, hasta kꞌa kinuqaqa na chik jumbꞌey. 26Chare ri xtitiker ndubꞌen ri nubꞌiꞌin kan, y ndubꞌen ri nusamaj qꞌij-qꞌij hasta pa rukꞌisibꞌel, niyaꞌ uchuqꞌaꞌ pa ruqꞌaꞌ pa kiwiꞌ ri jalajaj kiwech wineq ekꞌo chochꞌulew, 27Kin nibꞌen chare chi achel rukꞌuan jun chꞌichꞌ pa ruqꞌaꞌ ri achoq chare ndubꞌen chi ndikinimaj rutzij, o ndukꞌis kiqꞌij achel ngepaxloꞌox bꞌambꞌel+ ebꞌanun rikꞌin chꞌabꞌeq. 28Niyaꞌ ri uchuqꞌaꞌ riꞌ chare achel ruyoꞌon ri Nataꞌ chuwa riyin, y niyaꞌ chuqaꞌ chare ri chꞌumil+ nditzꞌetetej kumaj saqer. 29¡Ri ndirajoꞌ ndukꞌoxomaj, tukꞌoxomaj ri ndubꞌij ri Espíritu Santo chake ri bꞌotzaj teq ralkꞌuaꞌl ri Dios!

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index