Search form

Apocalipsis 20

Ri itzel nditorix qa pa rar siwan

1Y xintzꞌet jun ángel xulan pe chikaj rukꞌuan ri lawiꞌil chin ri rar siwan,+ y rukꞌuan chuqaꞌ pa ruqꞌaꞌ jun mama cadena. 2Ri ángel riꞌ xutzꞌen ri ojer itzel kumetz ri ndibꞌix Diablo y Satanás+ chare, xuxim chin mil junaꞌ, 3y xutorij qa pa rar siwan y xutzꞌapij kan. Xubꞌen kan sellar ruwiꞌ ri rar siwan chin keriꞌ ri ojer kumetz ma ngeruchꞌakatij chi ta ri wineq,+ hasta kꞌa titzꞌaqet na ri mil junaꞌ y kꞌateriꞌ, ndikꞌatzin ndikir chik jumbꞌey, pero xe chin jubꞌaꞌ teq qꞌij.

4Y xentzꞌet tronos y chiriꞌ xetzꞌuyeꞌ qa ri xyoꞌox uchuqꞌaꞌ pa kiqꞌaꞌ chin ndikiqꞌet tzij. Xintzꞌet chuqaꞌ kánima ri xqupix kiqul roma xkitzijoj ri utzulej rutzij ri Dios+ y ma xkiyaꞌ ta kan chin ndikiyaꞌ utzulej rutzijol ri Jesús, y xentzꞌet chuqaꞌ ri ma xkiyaꞌ ta ruqꞌij ri itzel chikap+ y ri rachibꞌel, y ma xkiyaꞌ ta qꞌij chi xyoꞌox chikiqꞌaꞌ o pa runikꞌajal teq kiwech ri retal ru-sello ri itzel chikap. Konojel riꞌ xkꞌojeꞌ chik kikꞌaslen y xkibꞌen reinar junan rikꞌin ri Cristo mil junaꞌ. 5Jareꞌ ri nabꞌey kꞌastajibꞌel kichin ri animaꞌiꞌ,+ jakꞌa ri chꞌaqa chik animaꞌiꞌ, hasta kꞌa ndeqꞌax na ri mil junaꞌ, kꞌajariꞌ ngekꞌastajbꞌex pe. 6Kin jabꞌel rokiqꞌij y loqꞌolej kikꞌaslen ri ngekꞌastajbꞌex pe chupan ri nabꞌey kꞌastajibꞌel. Ri rukan kamik+ maneq ruqꞌaꞌ chake, xa kin ngebꞌeꞌok ru-sacerdotes ri Dios y ri Cristo, y ndikibꞌen reinar junan rikꞌin chin mil junaꞌ.

7Y atoq nditzꞌaqet ri mil junaꞌ,+ ri Satanás ndelesex pe apeꞌ tzꞌapin. 8Y ndibꞌa chin ngerutaqchiꞌij rikꞌin chꞌakatinik ri jalajaj kiwech wineq chin ngebꞌa pa guerra+ junan rikꞌin. Keriꞌ ndubꞌen chake ri ekꞌo chuwech ri kajiꞌ ruchiꞌ ri rochꞌulew, y riꞌ ja ri aj rochꞌulew Gog y ri aj rochꞌulew Magog.+ Y ri ngemol kiwech, esantienta. Kin eꞌachel ri sanayiꞌ chuchiꞌ ri mar keriꞌ. 9Y kinojisan ruwech ri rochꞌulew ebꞌaneq e, y xkisirirej kiꞌ chirij ri tinamit ri tzꞌan ndirajoꞌ ri Dios apeꞌ ekꞌo ri loqꞌolej ralkꞌuaꞌl. Pero ja atoq riꞌ xqaqa pe qꞌaqꞌ chikaj y xerukꞌatisaj konojel ri kimolon kiꞌ chirij ri tinamit. 10Y ri itzel ri xchꞌakatin kichin ri jalajaj kiwech wineq, xtorix qa chupan ri qꞌaqꞌ ri ndiraqa rikꞌin azufre, apeꞌ ekꞌo ri itzel chikap y ri achi ri ruqꞌabꞌan riꞌ chi profeta. Chiriꞌ ngeyoꞌox pa qꞌaxomal chi chaqꞌaꞌ chi paqꞌij chin jumul.

Ri castigo ri nduyaꞌ ri Jun tzꞌuyul pa jun trono seq

11Y xintzꞌet jun nimalej trono seq rij y ri Jun tzꞌuyul chupan. Y chuwech ri Jun riꞌ xeꞌanimej ri rochꞌulew y ri kaj, y ma jumbꞌey chik xeꞌilitej.+ 12Xentzꞌet chuqaꞌ ri ekamineq, chi chꞌutiꞌq chi nimaꞌq epeꞌel apu chuwech ri Jun tzꞌuyul pa trono, y xejaq jujun teq wuj, y xjaq chuqaꞌ ri wuj apeꞌ tzꞌibꞌan kibꞌiꞌ ri ndiyoꞌox ri kꞌaslen+ ma ndikꞌis ta chake. Y kin ja ri tzꞌibꞌan chupan teq ri wuj ri xekusex chin xqꞌat tzij pa kiwiꞌ ri ekamineq, y kin achel xkibꞌanalaꞌ+ atoq xekꞌaseꞌ chochꞌulew, keriꞌ rajel-rukꞌexel xyoꞌox chake. 13Ri mar xerujech ri xeken chupan, keriꞌ chuqaꞌ ri kamik y ri lugar apeꞌ yoꞌon kánima ri animaꞌiꞌ, xekijech ri ekamineq ekꞌo kikꞌin. Y ri wineq riꞌ xqꞌat tzij pa kiwiꞌ chin xyoꞌox rajel-rukꞌexel chake achel xkibꞌanalaꞌ+ pa kikꞌaslen. 14Ri kamik+ y ri lugar apeꞌ xkꞌojeꞌ kánima ri animaꞌiꞌ, xetorix qa chupan ri qꞌaqꞌ ri ndiraqa rikꞌin azufre. Ri qꞌaqꞌ riꞌ, jariꞌ ri rukan kamik. 15Y konojel ri ma xilitej ta kibꞌiꞌ chupan ri wuj apeꞌ tzꞌibꞌan kibꞌiꞌ ri ndiyoꞌox ri kꞌaslen ma ndikꞌis ta chake, xetorix qa chupan ri qꞌaqꞌ ri ndiraqa rikꞌin azufre.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index