Search form

Apocalipsis 21

1Y xintzꞌet jun kꞌakꞌakꞌ kaj y jun kꞌakꞌakꞌ rochꞌulew,+ porque ri nabꞌey kaj y ri nabꞌey rochꞌulew emaneq chik, y ri mar maneq chik chuqaꞌ.

Ri kꞌakꞌakꞌ tinamit Jerusalén

2Y xintzꞌet ri loqꞌolej tinamit, ri kꞌakꞌakꞌ Jerusalén+ eleneq pe chikaj apeꞌ kꞌo ri Dios. Ri tinamit riꞌ, ruweqon pe riꞌ achel jun xten ndikꞌuleꞌ rikꞌin ri kꞌajol ndok rachijil. 3Y xinwakꞌaxaj jun chꞌabꞌel xsikꞌin pe apeꞌ kꞌo ru-trono ri Dios ri kereꞌ xubꞌij: ¡Tatzꞌetaꞌ! Ri Dios ndubꞌen rachoch chikikajal ri wineq.+ Ja rejeꞌ ri rutinamit, y ja rijaꞌ ri ki-Dios y ndikꞌojeꞌ chikikajal. 4Rijaꞌ ndusuꞌ nojel ruyiꞌal teq kiwech+ ri koqꞌej, y chiriꞌ maneq chik kamik, y ma ngeꞌoqꞌ chi ta, nixta ngejila chi bꞌis y ma jun chik qꞌaxon ndikinaꞌ,+ porque nojel ri richin ri nabꞌey kꞌaslen xekꞌis yan.

5Y ri Jun tzꞌuyul+ pa ru-trono xubꞌij: ¡Tatzꞌetaꞌ! Riyin nibꞌen kꞌakꞌakꞌ+ chare nojel. Y xubꞌij pe chuwa: Tatzꞌibꞌaj reꞌ, porque re tzij reꞌ, kin qetzij y kin utz chi nditaqix.

6Y xubꞌij chuqaꞌ chuwa: Riyin xinbꞌen yan kꞌakꞌakꞌ chare nojel. Ja riyin ri Alfa y ri Omega, ri nabꞌey y ri rukꞌisibꞌel chin nojel. Ri ndichaqiꞌj ruchiꞌ, niyaꞌ qꞌij chare chi ndutij ri yaꞌ ndel pe pa alaxbꞌel yaꞌ ri ndiyoꞌon ri kꞌaslen+ ma ndikꞌis ta. 7Chare ri xtitiker ndubꞌen ri nubꞌiꞌin kan, kin niyaꞌ nojel reꞌ chare, y kin xtiqꞌalajin chi ja riyin ri ru-Dios+ y ja rijaꞌ ri walkꞌuaꞌl. 8Pero ri ndikixibꞌij kiꞌ ndikitzijoj ri nutzij, ri ma nginikitaqij ta, ri ndikikꞌuaj jun kꞌaslen ri ndimulu nukꞌuꞌx rikꞌin, ri ngekamisan, ri ndikikꞌamalaꞌ qa kiꞌ xa achoq na ikꞌin chin ndikibꞌen mak, ri eꞌaj itz, ri ngeyoꞌon kiqꞌij tiox y konojel ri ngereqꞌon, konojel rejeꞌ ndiyoꞌox rukꞌexel chake chupan ri qꞌaqꞌ ri ndiraqa rikꞌin azufre.+ Jareꞌ ri rukan kamik, xchajeꞌ.

9Y ri apeꞌ yinkꞌo, xjel pe jun chikiwech ri wuquꞌ ángeles+ ri xeqꞌijo ri wuquꞌ rukꞌisibꞌel teq kꞌayew pa ruwiꞌ ri rochꞌulew, kꞌayew ri ekikꞌuan pa teq copas, y ri ángel riꞌ xubꞌij chuwa: ¡Katámpe! Nikꞌut chawech ri xten ndok rixjayil ri Alaj Karneꞌl.

10Y xikꞌojeꞌ chuxeꞌ ruchuqꞌaꞌ ri Espíritu Santo,+ y ri ángel xirukꞌuaj pariꞌ jun nimalej juyuꞌ nej jatal chikaj, y xukꞌut chinuwech ri loqꞌolej tinamit Jerusalén ri pataneq chikaj, apeꞌ kꞌo ri Dios. 11Ri tinamit riꞌ roma ri nimalej ruqꞌij ri Dios+ nditzꞌintzꞌot achel jun abꞌej santienta rajel, achel ri abꞌej ndibꞌix jaspe chare, ri achel vidrio+ ri kꞌo cheꞌel ngatzuꞌun apu chupan. 12Ri tinamit riꞌ tzꞌapin rij roma jun pimilej xan nej rujotolen. Ri xan riꞌ, ruchajin kabꞌlajuj puertas y chikijununal ri puertas yoꞌon jun chajinel ángel chikichiꞌ. Chikij chi jujun ri puertas tzꞌibꞌan jun bꞌiꞌaj, y ri bꞌiꞌaj riꞌ ja ri kibꞌiꞌ ri kabꞌlajuj rukꞌajol ri ojer tataꞌatz rubꞌiniꞌan Israel. 13Oxiꞌ puertas chin ri xan ngetzuꞌun ri lado apeꞌ ndalex pe ri qꞌij, oxiꞌ ri lado apeꞌ ndiqaqa ri qꞌij, oxiꞌ ngetzuꞌun ri lado norte y oxiꞌ ri lado sur.+ 14Ruxeꞌel ri xan+ chin ri tinamit kabꞌlajuj abꞌej okuneq, y chikij chikijununal ri abꞌej, tzꞌibꞌan jun bꞌiꞌaj kichin ri kabꞌlajuj ru-apóstoles+ ri Alaj Karneꞌl.

15Ri ángel ri ndichꞌaꞌa chuwa rukꞌuan jun aj bꞌanun chare qꞌanapueq chin ndiretaj+ ri tinamit, ri xan+ y ri kabꞌlajuj ru-puertas. 16Ri tinamit Jerusalén cuadrado rubꞌanun, ri raqen y ri ruwech ejunan. Ri ángel xretaj ri tinamit rikꞌin ri aj, ri ruwech 2,200 kilómetros, keriꞌ ri raqen y keriꞌ chuqaꞌ ri rujotolen. 17Y xretaj chuqaꞌ ri xan ri tzꞌapiyon rij ri tinamit, y ri rupimilen ri xan xretaj 64 metros. Ri aj ri xukusaj ri ángel chin xretaj, achel ri ndikikusaj ri wineq chochꞌulew keriꞌ.

18Ri xan chirij ri tinamit, bꞌanun chare abꞌej rubꞌiniꞌan jaspe, y ri tinamit bꞌanun chare qꞌanapueq qꞌasan pa qꞌaqꞌ y achel vidrio josqꞌin ruwech nditzuꞌun. 19Ruxeꞌel ri xan chin ri tinamit, eweqon rikꞌin kabꞌlajuj abꞌej+ santienta kajel. Ri nabꞌey abꞌej rubꞌiniꞌan jaspe, ri rukan zafiro, ri rox ágata, ri rukaj esmeralda, 20ri ruwoꞌ ónice, ri ruwaq cornalina, ri ruwuq crisólito, ri ruwaqxaq berilo, ri rubꞌelej topacio, ri rulajuj crisoprasa, ri rujulajuj jacinto, y ri rukabꞌlajuj amatista. 21Ri kabꞌlajuj puertas chin ri xan, chare kabꞌlajuj perlas ebꞌanun, y chi jujun ri puertas jun perla okuneq. Ri nimabꞌey+ chin ri tinamit, chare qꞌanapueq qꞌasan pa qꞌaqꞌ bꞌanun y achel vidrio ri kꞌo cheꞌel ngatzuꞌun apu chupan.

22Y chupan ri tinamit, ma jun achoch apeꞌ ndiyoꞌox ruqꞌij ri Dios xintzꞌet, porque ja ri Ajaw Dios ri kꞌo nojel uchuqꞌaꞌ pa ruqꞌaꞌ+ y ri Alaj Karneꞌl ri eꞌokuneq rachoch ri Dios chiriꞌ. 23Y ma ndikꞌatzin chi ta chi ri qꞌij y ri raqen ikꞌ ngeyikꞌan richin ri tinamit. Porque ja ri nimalej ruqꞌij ri Dios ndiyikꞌan richin, y ri Alaj Karneꞌl ndiyikꞌan chuqaꞌ richin ri tinamit. 24Ri jalajaj kiwech wineq ekꞌo chochꞌulew kin xkebꞌiyaj pa ruyikꞌinik+ ri tinamit riꞌ. Y ri reyes chin ri rochꞌulew kin xtekijachaꞌ ri kibꞌeyomal chiriꞌ. 25Ri puertas chin ri tinamit, jumul ejaqel, y ma ngetzꞌapix ta,+ porque chiriꞌ ma ndichaqꞌaꞌ ta qa. 26Ri kibꞌeyomal ri jalajaj kiwech wineq ekꞌo chochꞌulew, bꞌeyomal ri bꞌanayon chake chi kꞌo kiqꞌij, ndejach chare. 27Pero ri wineq ri ngekibꞌanalaꞌ seqꞌ teq achike,+ ma jumbꞌey xkeꞌok chupan ri tinamit riꞌ, nixta ri wineq ri ngebꞌanun chi ndimulu rukꞌuꞌx ri Dios, nixta ri ereqꞌóta. Xa kin xe ngeꞌok chiriꞌ ri kꞌo kibꞌiꞌ chupan ri wuj apeꞌ tzꞌibꞌan kibꞌiꞌ ri ndiyoꞌox ri kꞌaslen+ ma ndikꞌis ta chake. Ri wuj riꞌ chin ri Alaj Karneꞌl.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index