Search form

Apocalipsis 22

1Atoq nutzꞌeton chik reꞌ, ri ángel ri ukꞌuayon wichin xukꞌut chinuwech jun raqen yaꞌ ri ndiyoꞌon ri kꞌaslen ma ndikꞌis ta. Ri raqen yaꞌ riꞌ, achel vidrio nditzuꞌun y ndalex pe+ apeꞌ kꞌo ki-trono ri Dios y ri Alaj Karneꞌl. 2Pa runikꞌajal ri nimabꞌey chin ri kꞌakꞌakꞌ tinamit Jerusalén ndeqꞌax ri raqen yaꞌ riꞌ y chi kaꞌiꞌ lado chin ri raqen yaꞌ kꞌo ri cheꞌ ri ndiyoꞌon ri kꞌaslen+ ma ndikꞌis ta. Ri cheꞌ riꞌ kabꞌlajuj mul nduyaꞌ ruwech pa jun junaꞌ, ikꞌ-ikꞌ ndiwachin. Ri ruxaq ri cheꞌ ndikꞌatzin chin ngeꞌoqꞌomex ri jalajaj kiwech wineq ekꞌo chochꞌulew. 3Y chiriꞌ pa tinamit nixta jun ndikꞌojeꞌ chuxeꞌ ruchuqꞌaꞌ royowal ri Dios. Ri ki-trono ri Dios y ri Alaj Karneꞌl ndikꞌojeꞌ pa tinamit, y ri rusamajelaꞌ ri Dios ndikiyaꞌ ruqꞌij rijaꞌ, 4y ndikitzꞌet ruwech+ ri Dios, y ri rubꞌiꞌ ndikꞌojeꞌ pa runikꞌajal kiwech. 5Chiriꞌ ma ndichaqꞌaꞌ chi ta qa y ma ndikꞌatzin ta ruyikꞌinik lámparas nixta ruyikꞌinik ri qꞌij chake ri ngekꞌojeꞌ chiriꞌ, porque chiriꞌ ja ri Ajaw Dios ri ndiyikꞌan+ kichin, y rejeꞌ ndikibꞌen reinar+ chin jumul.

Ri Ajaw Jesús nduqaqa yan

6Y ri ángel xubꞌij chuwa: Re tzij re awakꞌaxan kin qetzij y kin utz chi nditaqix. Ri Ajaw Dios, ri ndiyoꞌon ri rutzij pa kánima ri profetas+ chin ndikiqꞌalajrisaj, xuteq ri ru-ángel chin nduruqꞌalajrisaj chikiwech ri rusamajelaꞌ ri ndikꞌatzin chi ngebꞌanatej yan.

7Ja atoq riꞌ ri Ajaw xubꞌij: ¡Tiwakꞌaxaj kꞌa! ¡Riyin ngibꞌa yan qa+ chochꞌulew! ¡Kin jabꞌel roruqꞌij ri ndibꞌanun ri ndubꞌij ri tzij etzꞌibꞌan kan chupan re wuj reꞌ!+ xchajeꞌ.

8Y ja riyin Juan ri xinakꞌaxan y xitzꞌeto+ nojel reꞌ, y atoq xinwakꞌaxaj y xintzꞌet yan nojel ri xkꞌut chinuwech roma ri ángel, xixukeꞌ y xilukeꞌ chiraqen chin niyaꞌ ruqꞌij.+ 9Pero ri ángel xubꞌij chuwa: ¡Ma ndabꞌen kelaꞌ! Porque chi roj kaꞌiꞌ roj rusamajelaꞌ ri Dios, achel ri a-hermanos ri profetas, achel chuqaꞌ konojel ri ndikibꞌen ri ndubꞌij ri qꞌalajrisan kan chupan re wuj reꞌ. ¡Ja ri Dios tayaꞌ ruqꞌij!

10Y ri ángel xubꞌij chuqaꞌ chuwa: Ma tawewaj pa awánima ri tzij eqꞌalajrisan kan chupan re wuj reꞌ, porque ri qꞌij chin ngebꞌanatej, nduqaqa yan. 11Ri ma kikꞌuan ta jun chojmilej kꞌaslen, kꞌa keriꞌ tikibꞌanaꞌ, y ri kikꞌuan jun seqꞌ kꞌaslen, kꞌa keriꞌ tikibꞌanaꞌ+ chuqaꞌ. Ri kikꞌuan jun chojmilej kꞌaslen, kꞌa keriꞌ tikibꞌanaꞌ, y ri kikꞌuan jun loqꞌolej kꞌaslen, kꞌa keriꞌ tikibꞌanaꞌ.

12Ri Ajaw xubꞌij: ¡Tiwakꞌaxaj kꞌa! ¡Riyin ngibꞌa yan qa chochꞌulew!+ Y nikꞌuaj qa ri rajel-rukꞌexel ri rukꞌulun chi niyaꞌ chake ri wineq roma ri kibꞌanun pa kikꞌaslen chikijununal.+ 13Ja riyin ri Alfa y ri Omega, ri nabꞌey y ri rukꞌisibꞌel chin nojel,+ ja riyin ri kin yinkꞌo wi y ngikꞌojeꞌ chin jumul.

14Jabꞌel rokiqꞌij ri ndikichꞌajchꞌojrisaj ri kikꞌaslen. Chake rejeꞌ ndiyoꞌox qꞌij chin ndikikꞌux ruwech ri cheꞌ ri ndiyoꞌon kꞌaslen ma ndikꞌis ta, y chuqaꞌ chin ngeqꞌax chupan ri puerta chin ngeꞌok apu pa kꞌakꞌakꞌ tinamit Jerusalén. 15Pero chiriꞌ, ma ngeꞌok ta+ ri tzꞌiꞌ teq wineq, ri aj itz, ri ndikikꞌamalaꞌ qa kiꞌ xa achoq na ikꞌin chin ndikibꞌen mak, ri ngekamisan, ri ngeyoꞌon kiqꞌij tiox, y konojel ri ndiqaꞌ chikiwech ngereqꞌon y jutaqil ngereqꞌon.

16Riyin Jesús, xinteq ri nu-ángel chin xbꞌeruqꞌalajrisaj nojel reꞌ chiwech rix ri bꞌotzaj teq ralkꞌuaꞌl ri Dios ri ndimal iwiꞌ pa rubꞌiꞌ. Y ja riyin ri ruxeꞌel kan ri rey David+ y ri riy-rumam kan chuqaꞌ; ja riyin ri chꞌumil ri ndiyikꞌan atoq ndiseqresan pe.

17Ri Espíritu Santo y ri xten ri ndok rixjayil ri Alaj Karneꞌl kereꞌ ndikibꞌij: ¡Katuqaqa yan! Y ri ndirakꞌaxaj, tubꞌij chuqaꞌ: ¡Katuqaqa yan! Ri ndichaqiꞌj ruchiꞌ, tipuꞌun,+ y ri ndirajoꞌ ndutij ri yaꞌ ndisipex, tutijaꞌ ri yaꞌ ndiyoꞌon ri kꞌaslen ma ndikꞌis ta.

18Chake konojel ri ndikakꞌaxaj ri tzij eqꞌalajrisan kan chupan re wuj reꞌ nibꞌij: Si jun nduyaꞌ ruwiꞌ ri tzꞌibꞌan kan chupan,+ ri Dios nduyaꞌ pa ruwiꞌ ri jun riꞌ ri castigo etzꞌibꞌan kan chupan. 19Y si jun wineq kꞌo ndirelesaj chare ri qꞌalajrisan kan chupan re wuj reꞌ, ri Dios ma nduyaꞌ ta qꞌij chare+ chin ndukꞌux ruwech ri cheꞌ ri ndiyoꞌon kꞌaslen ma ndikꞌis ta, y ma nduyaꞌ ta chuqaꞌ qꞌij chare chi ndok apu pa loqꞌolej tinamit, y nixta nduyaꞌ chare ri utzulej rajel-rukꞌexel sujun kan chupan re wuj reꞌ.

20Ri xqꞌalajrisan re tzij reꞌ chinuwech, ndubꞌij: ¡Riyin ngibꞌa yan qa chochꞌulew! Y riyin xinbꞌij: Amén, ¡Katuqaqa yan, Ajaw Jesús!

21Ri favor ri nduyaꞌ ri Ajaw Jesús kin ta xtikꞌojeꞌ pa iwiꞌ rix iwonojel.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index