Search form

Apocalipsis 3

Ri xtzꞌibꞌex chake ri eralkꞌuaꞌl ri Dios ekꞌo pa tinamit Sardes

1Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Sardes: Riyin ri Jesucristo ri kꞌo ri wuquꞌ teq espíritu chin ri Dios wikꞌin y chuqaꞌ ri wuquꞌ chꞌumil, nibꞌij kereꞌ: Riyin wetaman ri ngaꞌabꞌanalaꞌ, wetaman chi ndibꞌix chawij chi yalan ri akꞌaslen, pero ma qetzij ta, rat xa rat kamineq+ pa nuwech. 2¡Tikꞌastej awech!+ Tabꞌanaꞌ chi ndikꞌamo pe riꞌ ri kaꞌi-oxiꞌ utz ri kꞌa kꞌo pa akꞌaslen, ma tayaꞌ qꞌij chi ngeken qa, porque nitzꞌet chi ma yalan ta utz ri ngaꞌabꞌanalaꞌ chuwech ri nu-Dios. 3Takꞌuxlaꞌaj ri tijonik yoꞌon kan chawa y awakꞌaxan pe, y tabꞌanaꞌ ri ndubꞌij. Tajalaꞌ ri anoꞌoj y titzolij pe awánima rikꞌin ri Dios. Porque si ma ndikꞌaseꞌ ta awech, kꞌateꞌ ruwech ngibꞌeqaqa apeꞌ ratkꞌo achel ndeqaqa jun eleqꞌon,+ y nixta ndanabꞌej atoq ngibꞌeqaqa pa awiꞌ. 4Pero kꞌa ekꞌo na jujun ralkꞌuaꞌl ri Dios pa tinamit Sardes ri ma kiseqꞌan ta ri kikꞌaslen rikꞌin ri ma utz ta. Rejeꞌ kin erukꞌulun chi ngebꞌiyaj wikꞌin kikusan puchupuj teq tzieq.+ 5Ri xtitiker ndubꞌen ri nubꞌiꞌin kan, kin niweq rikꞌin puchupuj teq tzieq, y ma jumbꞌey xtinyuj ri rubꞌiꞌ chupan ri wuj apeꞌ tzꞌibꞌan kibꞌiꞌ ri ndiyoꞌox ri kꞌaslen+ ma ndikꞌis ta chake, y xtinbꞌij chuwech ri Nataꞌ y chikiwech ri ru-ángeles chi rijaꞌ wichin riyin.+ 6¡Ri ndirajoꞌ ndukꞌoxomaj, tukꞌoxomaj ri ndubꞌij ri Espíritu Santo chake ri bꞌotzaj teq ralkꞌuaꞌl ri Dios!

Ri xtzꞌibꞌex chake ri eralkꞌuaꞌl ri Dios ekꞌo pa tinamit Filadelfia

7Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Filadelfia: Riyin ri Jesucristo ri yin loqꞌolej,+ ri yin qetzij, ri yin ukꞌuayon ri lawiꞌil chin ri rey David,+ ri ngijaqo y nixta jun nditiker nditzꞌapin y atoq nitzꞌapij, nixta jun nditiker ndijaqo+ nibꞌij kereꞌ: 8Riyin wetaman ri ngaꞌabꞌanalaꞌ. Tatzꞌetaꞌ chi nujaqon jun puerta chawech ri nixta jun nditiker nditzꞌapin richin. Rat maske jubꞌaꞌ ok awuchuqꞌaꞌ, kin abꞌanun wi pe ri nubꞌiꞌin y ma awewan ta chi yin ataqin.+ 9Ri jun bꞌotzaj wineq ri kitaqin rutijonik ri Satanás, ri ndikibꞌij chi e-israelitas pero xa kiqꞌabꞌan kiꞌ, tayaꞌ cuenta chare, riyin nibꞌen chi jujun chikiwech rejeꞌ ngebꞌexukeꞌ y ndikiqasaj kijolon chiꞌawaqen,+ y ndiketamaj chi riyin ngatinwojoꞌ.+ 10Y roma abꞌanun pe ri nubꞌiꞌin chawa chi takochꞌoꞌ ri ndaqꞌasaj pa akꞌaslen, riyin ngatinkal chuqaꞌ chuwech ri kꞌayew+ nduqaqa pa ruwiꞌ nojel ri rochꞌulew ri achoq chupan ngetojtobꞌex ri wineq. 11Riyin nginuqaqa yan.+ Ma tayaꞌ kan chi yin ataqin, chin keriꞌ nixta jun xtimajo ri nimalej rajel-rukꞌexel xtiyoꞌox chawa.+ 12Ri xtitiker ndubꞌen ri nubꞌiꞌin kan, riyin nibꞌen chare chi ndok columna chin rachoch ri nu-Dios y kin chiriꞌ rikꞌin ri Dios xtikꞌojeꞌ wi jumul. Riyin nitzꞌibꞌaj ri rubꞌiꞌ+ ri nu-Dios chirij, y keriꞌ chuqaꞌ ri rubꞌiꞌ ri rutinamit ri nu-Dios, ri kꞌakꞌakꞌ Jerusalén ri ndiqaqa pe chikaj apeꞌ kꞌo ri nu-Dios. Keriꞌ chuqaꞌ nitzꞌibꞌaj ri kꞌakꞌakꞌ nubꞌiꞌ yin chirij. 13¡Ri ndirajoꞌ ndukꞌoxomaj, tukꞌoxomaj ri ndubꞌij ri Espíritu Santo chake ri bꞌotzaj teq ralkꞌuaꞌl ri Dios!

Ri xtzꞌibꞌex chake ri eralkꞌuaꞌl ri Dios ekꞌo pa tinamit Laodicea

14Tatzꞌibꞌaj reꞌ chare ri nusamajel kꞌo pa ruwiꞌ ri bꞌotzaj ralkꞌuaꞌl ri Dios ri ndikimal kiꞌ pa tinamit Laodicea: Riyin ri Jesucristo, kin ja wi ri nibꞌij, y ri achike nuqꞌalajrisan, kin qetzij y ma jumbꞌey nujalon ruwech. Ja riyin ri xirukusaj ri Dios chin xubꞌen nojel ri kꞌo,+ y ja riyin ri kereꞌ nibꞌij: 15Riyin wetaman ri ngaꞌabꞌanalaꞌ, chi nixta rat tew nixta rat maqꞌen chinuwech. ¡Más ta kꞌa utz chi rat ta tew o rat ta maqꞌen! 16Pero roma ma rat maqꞌen ta nixta rat tew, y xa rat lilaj, riyin ngatinxaꞌaꞌ e pa nuchiꞌ. 17Rat kereꞌ ndabꞌilaꞌ: Yin bꞌeyon,+ santienta nuchajin, y ma jun achike ri man ta kꞌo wikꞌin, ngachajeꞌ. Pero ma ndanaꞌ ta awiꞌ chi xa juyo awech, lutz rubꞌanun ri akꞌaslen, maneq achike achajin, y xa achel rat soqꞌ y rat chꞌanel keriꞌ. 18Romariꞌ ngatinpixabꞌaj chi taloqꞌoꞌ qꞌanapueq chꞌajchꞌojrisan pa qꞌaqꞌ ri nikꞌayij yin, chin keriꞌ ndikꞌojeꞌ ri qetzij bꞌeyomal awikꞌin. Taloqꞌoꞌ chuqaꞌ seq teq tzieq chin ndakusaj, y keriꞌ ma nditzꞌetetej ta chik ri akꞌix, porque xa rat chꞌanel. Taloqꞌoꞌ chuqaꞌ aqꞌon chin ndayaꞌ pa teq awech y keriꞌ chaj ngatzuꞌun. 19Riyin nikꞌajisaj kiwech y nichojmirisaj kikꞌaslen konojel ri ngenwojoꞌ.+ Roma kꞌa riꞌ, ma kakanej lilaj, xa kin tatijaꞌ aqꞌij chi ndayaꞌ kan ri itzel teq achike ngaꞌabꞌanalaꞌ y titzolij pe awánima rikꞌin ri Dios. 20Tayaꞌ cuenta chare chi riyin yin peꞌel chuchiꞌ ri puerta y ngikꞌujkꞌut apu. Si kꞌo jun ndirakꞌaxaj ri nuchꞌabꞌel y ndujeq pe ri puerta chinuwech,+ riyin nginok apu rikꞌin, ngiwaꞌ rikꞌin y rijaꞌ ndiwaꞌ wikꞌin riyin. 21Ri xtitiker ndubꞌen ri nubꞌiꞌin kan, niyaꞌ qꞌij chare chi nditzꞌuyeꞌ wikꞌin pa nu-trono, achel riyin xitiker xinbꞌen ri xubꞌij ri Nataꞌ chuwa y xitzꞌuyeꞌ rikꞌin rijaꞌ pa ru-trono.+ 22¡Ri ndirajoꞌ ndukꞌoxomaj, tukꞌoxomaj ri ndubꞌij ri Espíritu Santo chake ri bꞌotzaj teq ralkꞌuaꞌl ri Dios!

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index