Search form

Apocalipsis 4

Ri Juan ndutzꞌet chi ri Dios tzꞌuyul pa ru-trono

1Y atoq xbꞌix yan reꞌ chuwa, riyin Juan kꞌateꞌ ruwech xintzꞌet jun puerta jaqel chikaj, y ri jun chꞌabꞌel ri xinwakꞌaxaj pa nabꞌey ri ndiqꞌajan achel jun trompeta,+ kereꞌ xubꞌij chuwa: Kajoteꞌ pe chireꞌ y riyin nikꞌut chawech ri ndikꞌatzin chi ngebꞌanatej más apu chuwech ri xatzꞌet+ yan.

2Y kin ja atoq riꞌ xikꞌojeꞌ chuxeꞌ ruchuqꞌaꞌ ri Espíritu Santo,+ y kꞌateꞌ ruwech xintzꞌet jun trono chikaj y xintzꞌet chuqaꞌ ri Dios tzꞌuyul pariꞌ+ ri trono riꞌ. 3Y ri tzꞌuyul pa ru-trono, nditzuꞌun achel ri abꞌej ndibꞌix jaspe y cornalina chake. Y chirij ri trono rusiriren riꞌ jun kotoqꞌaꞌ,+ rex nditzuꞌun achel ri abꞌej ndibꞌix esmeralda chare. 4Chirij ri trono riꞌ, kisiriren kiꞌ 24 tronos, y pa kiwiꞌ ri tronos riꞌ etzꞌuyul 24 rijilej teq achiꞌaꞌ+ kiweqon kiꞌ rikꞌin seq teq tzieq y pa kijolon kikusan coronas ebꞌanun chare qꞌanapueq. 5Y chiriꞌ apeꞌ kꞌo ri trono ngeꞌel pe koyopaꞌ,+ y rayos ri santienta ngeqꞌajan. Chuwech ri trono ngekꞌat chuqaꞌ wuquꞌ antorchas,+ y ri wuquꞌ antorchas riꞌ ja ri wuquꞌ teq espíritu chin ri Dios. 6Y chuwech ri trono kꞌo jun achel mar+ vidrio nditzuꞌun ruwech achel jun cristal, y pa nikꞌaj apeꞌ kꞌo ri trono kisiriren kiꞌ chirij ri trono ekajiꞌ ri kꞌo kikꞌaslen+ ri nojneq runaqꞌ teq kiwech chikij y chikiwech. 7Ri nabꞌey chikiwech ri kajiꞌ kꞌo kikꞌaslen, achel jun koj keriꞌ. Ri rukan achel jun alaj wakx, ri rox achel ruwech jun achi keriꞌ, y ri rukaj achel jun kot ndirapap chikaj.+ 8Ri kajiꞌ kꞌo kikꞌaslen, chikijununal kꞌo waqiꞌ kixikꞌ, y ri kixikꞌ nojneq rij-ruxeꞌ rikꞌin runaqꞌ teq kiwech. Y chi chaqꞌaꞌ chi paqꞌij ma ngeꞌuxlan ta ndikibꞌilaꞌ:

Kin loqꞌolej, kin loqꞌolej, kin loqꞌolej ri Ajaw Dios

Ri achoq pa ruqꞌaꞌ kꞌo nojel uchuqꞌaꞌ.+

Ja rijaꞌ ri kin xixkꞌo wi pe, kꞌo wokami y kin xtuqaqa wi.+

9Y nojel mul atoq ri kajiꞌ kꞌo kikꞌaslen ndikinimrisaj rubꞌiꞌ ri Dios tzꞌuyul pa ru-trono+ ri kin jumul wi kꞌo rukꞌaslen,+ y ndikiyaꞌ chuqaꞌ ruqꞌij y ngematioxin chare, 10ri 24 rijilej teq achiꞌaꞌ ngexukeꞌ y ngelukeꞌ chuwech+ ri tzꞌuyul pa ru-trono, chin ndikiyaꞌ ruqꞌij rijaꞌ ri kin jumul wi kꞌo rukꞌaslen. Ndikiyalaꞌ apu ri ki-coronas chuwech y kereꞌ ndikibꞌilaꞌ chare:

11Ajaw y qa-Dios,

Ja rat ri kin rukꞌulun chi ndiyoꞌox aqꞌij, y ndinimrisex abꞌiꞌ,

Ja rat ri kin rukꞌulun chi achajin nojel ruwech uchuqꞌaꞌ.+

Porque xe wi rat bꞌanayon nojel ri ebꞌanun,+

Y roma arayibꞌel rat ekꞌo.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index