Search form

Apocalipsis 5

Ri Alaj Karneꞌl y ri bꞌoton wuj

1Y xintzꞌet pa rikiqꞌaꞌ ruqꞌaꞌ ri Dios ri tzꞌuyul pa ru-trono jun bꞌoton wuj tzꞌibꞌan rij-rupan,+ y wuquꞌ sellos+ tzꞌamayon richin. 2Y xintzꞌet jun ángel tzꞌan ruchuqꞌaꞌ ri rikꞌin kaw ruchꞌabꞌel xubꞌij: ¿Achike ta kꞌa jun rukꞌulun chin ndujeq ri bꞌoton wuj y ngerelesaj ri sellos tzꞌamayon richin? 3Pero nixta jun xilitej chikaj, chochꞌulew, nixta chuxeꞌ qa ri rochꞌulew, ri rukꞌulun ta chin ndujeq ri bꞌoton wuj, o ndunikꞌoj ri tzꞌibꞌan chupan. 4Riyin Juan santienta nginoqꞌ, porque nixta jun xilitej ri rukꞌulun ta chin ndujeq ri bꞌoton wuj, nixta chin ndunikꞌoj ri tzꞌibꞌan chupan. 5Ja atoq riꞌ jun chikikajal ri rijilej teq achiꞌaꞌ xubꞌij pe chuwa: Ma ngatoqꞌ chik. Tatzꞌetaꞌ, chikikajal ri santienta eriy-rumam ri Judá+ ilon jun ri achel koj+ porque tzꞌan ruchuqꞌaꞌ, jun riy-rumam kan ri rey David. Rijaꞌ xtiker xubꞌen nojel ri xubꞌij ri Dios chare, y rukꞌulun chi ngerelesaj ri wuquꞌ sellos tzꞌamayon richin ri bꞌoton wuj y ndujeq.

6Y atoq xitzuꞌun apu apeꞌ kꞌo ri trono, pa kinikꞌajal ri kajiꞌ kꞌo kikꞌaslen y ri 24 rijilej teq achiꞌaꞌ, xintzꞌet jun Alaj Karneꞌl+ peꞌel apu chiriꞌ, y ndiqꞌalajin chi altíra sokotajneq roma ri kamik xuqꞌasaj. Xintzꞌet chi kꞌo wuquꞌ rukꞌaꞌ y wuquꞌ runaqꞌ teq ruwech,+ y riꞌ ja ri wuquꞌ teq espíritu+ chin ri Dios etaqon chuwech nojel ri rochꞌulew.+ 7Ri Alaj Karneꞌl riꞌ xjel apu y xukꞌen apu ri bꞌoton wuj pa rikiqꞌaꞌ ruqꞌaꞌ ri Dios ri tzꞌuyul pa ru-trono. 8Y atoq xukꞌen apu ri bꞌoton wuj, ri kajiꞌ kꞌo kikꞌaslen y ri 24 rijilej teq achiꞌaꞌ, xexukeꞌ y xelukeꞌ chuwech ri Alaj Karneꞌl. Chikijununal kikꞌuan jujun arpa y jujun mixixára bꞌanun chare qꞌanapueq ri enojneq rikꞌin pon. Ri pon riꞌ, ja ri ki-oraciones+ ri loqꞌolej rutinamit ri Dios. 9Rejeꞌ ndikibꞌixaj jun kꞌakꞌakꞌ bꞌix+ ri kereꞌ ndubꞌij:

Ja rat ri kin rukꞌulun+ chi xakꞌen apu ri bꞌoton wuj y ndawelesaj ri wuquꞌ sellos tzꞌamayon richin,

Porque altíra xasokotej atoq xakamisex.

Y rikꞌin ri akikꞌel xaꞌalaqꞌ+ jalajaj kiwech wineq, ri jalajaj kichꞌabꞌel, kitinamit y kirochꞌulew chin xeꞌok ralkꞌuaꞌl ri Dios.

10Xabꞌen chake chi xeꞌok jun tinamit apeꞌ ja ri qa-Dios ri Rey,

Y xabꞌen chuqaꞌ chake chi xeꞌok sacerdotes+ chin ndikibꞌen ri rusamaj,

Y rejeꞌ ndekibꞌanaꞌ reinar chochꞌulew.

11Y xinwakꞌaxaj kichꞌabꞌel santienta ángeles y xintzꞌet chi kimolon apu kiꞌ chirij ri trono, y chikij chuqaꞌ ri kajiꞌ kꞌo kikꞌaslen y chikij ri rijilej teq achiꞌaꞌ. Ri ángeles+ riꞌ e-millones y millones ri maneq cheꞌel ngeꞌajilex ejarupeꞌ. 12Ri ángeles riꞌ rikꞌin kaw kichꞌabꞌel ndikibꞌilaꞌ:

Ri Alaj Karneꞌl ri xkamisex,

Kin rukꞌulun chi ndubꞌen mandar pa ruwiꞌ nojel, y chi kꞌo nojel bꞌeyomal pa ruqꞌaꞌ,

Kin rukꞌulun chuqaꞌ chi ndikꞌojeꞌ nojel etamabꞌel rikꞌin, y chi pa ruqꞌaꞌ rijaꞌ kꞌo nojel ruwech uchuqꞌaꞌ,

Rukꞌulun chi ndinimrisex rubꞌiꞌ, chi ndiyoꞌox ruqꞌij y kin utz ndibꞌix utzulej teq tzij chare.+

13Y nojel ri kꞌo kikꞌaslen chikaj, chochꞌulew, chuxeꞌ qa ri rochꞌulew, y chupan ri mar, y nojel ri chꞌaqa chik ebꞌanun roma ri Dios, xenwakꞌaxaj chi kereꞌ ndikibꞌij:

Chare ri Dios ri tzꞌuyul pa ru-trono y chare ri Alaj Karneꞌl

Kin utz ndibꞌix utzulej teq tzij, ndiyoꞌox kiqꞌij, ndinimrisex kibꞌiꞌ, y kin ta kichin chuqaꞌ rejeꞌ ri uchuqꞌaꞌ

Pa ruwiꞌ nojel chin jumul.+

14Y ri kajiꞌ kꞌo kikꞌaslen, kereꞌ ndikibꞌilaꞌ: ¡Kin keriꞌ kꞌa tibꞌanatej! Y ri rijilej teq achiꞌaꞌ xexukeꞌ, xelukeꞌ+ y xkiyaꞌ ruqꞌij ri Dios y ri Alaj Karneꞌl.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index