Search form

Apocalipsis 9

Ri ruwoꞌ trompeta ndixulex

1Atoq ri ruwoꞌ ángel xuxulaj ri trompeta yoꞌon chare, xintzꞌet chikaj jun chꞌumil tzaqineq qa chochꞌulew, y chare ri chꞌumil riꞌ xyoꞌox ri lawiꞌil chin ri rar siwan.+ 2Ri chꞌumil riꞌ xujeq ruchiꞌ ri rar siwan, y xbꞌeꞌel pe sibꞌ, achel ri sibꞌ ndel pe pa jun nim horno. Y ri sibꞌ riꞌ xubꞌen chi xqꞌeqꞌumer+ ruwech ri qꞌij y ri kaqiqꞌ. 3Chupan ri sibꞌ xebꞌeꞌel pe sakꞌ+ ri xebꞌa chuwech ri rochꞌulew, y xyoꞌox uchuqꞌaꞌ chake chin ngetiꞌon achel alacranes. 4Y xbꞌix chake chi ma tikibꞌen chꞌaꞌoj+ chake ri qꞌayis, ri tikoꞌ y ri cheꞌ ekꞌo chochꞌulew, xaxe tikiyaꞌ kꞌayew pa kiwiꞌ ri wineq maneq retal ru-sello ri Dios pa runikꞌajal kiwech.+ 5Pero ma xyoꞌox ta qꞌij chake chin ngekikamisaj ri wineq, xaxe chin ngekiyaꞌ pa qꞌaxomal woꞌoꞌ ikꞌ. Y ri qꞌaxomal ndikiyaꞌ, achel ri qꞌaxon nduyaꞌ jun alacrán atoq nditiꞌon.

6Chupan teq ri qꞌij riꞌ, ri wineq ndikikanolaꞌ kikamik+ y ma ndikil ta. Ndikirayilaꞌ pa kánima ngeken chin ngeꞌuxlan, pero ma jubꞌaꞌ ngerukꞌuaj ri kamik.

7Ri sakꞌ riꞌ eꞌachel teq kej+ enabꞌan chik chin ngebꞌa pa guerra. Pa kijolon kꞌo achel coronas ebꞌanun chare qꞌanapueq, y ri kipalej achel kiwech wineq keriꞌ. 8Ri kiwiꞌ achel rusmal kiwiꞌ ixoqiꞌ keriꞌ, y ri keyaj achel kichin koj,+ 9kikusan chuqaꞌ jun tobꞌel chokikꞌuꞌx achel ri tobꞌel ebꞌanun rikꞌin chꞌichꞌ, y ri kixikꞌ ngeqꞌajan achel ngeqꞌajan ekꞌiy carruajes+ eqiriren koma kej ebꞌaneq pa guerra. 10Ri kijey y ri ruchꞌutal kijey achel kijey alacranes keriꞌ, y chikijey kꞌo kuchuqꞌaꞌ chin ngekiyaꞌ pa qꞌaxomal ri wineq woꞌoꞌ ikꞌ. 11Ri ki-rey+ ri sakꞌ riꞌ, ja ri ángel rajawal ri rar siwan. Ri ángel riꞌ pa chꞌabꞌel hebreo rubꞌiniꞌan Abadón, y pa chꞌabꞌel griego rubꞌiniꞌan Apolión.

12Xqꞌax ri nabꞌey kꞌayew, pero chirij riꞌ epataneq kaꞌiꞌ chik kꞌayew.

Ri ruwaq trompeta ndixulex

13Y ri ruwaq ángel xuxulaj ri trompeta yoꞌon chare, y xinwakꞌaxaj jun chꞌabꞌel xel pe chikikajal ri kajiꞌ ukꞌaꞌ chin ri altar bꞌanun chare qꞌanapueq+ ri kꞌo apu chuwech ri Dios. 14Ri chꞌabꞌel riꞌ kereꞌ xubꞌij chare ri ruwaq ángel ri rukꞌuan ri trompeta: Kaꞌakiraꞌ ri ekajiꞌ ángeles eximil chuchiꞌ ri nimalej raqen yaꞌ rubꞌiniꞌan Éufrates.+ 15Y xesoqꞌopix ri kajiꞌ ángeles ri enabꞌan apu chin ri hora, ri qꞌij, ri ikꞌ y ri junaꞌ chaꞌon chin ngekikamisaj jun rox parte ri wineq. 16Riyin Juan xinwakꞌaxaj chi ri ki-ejército ri ángeles riꞌ e-200 millones ri ndikitzꞌuyubꞌej kej.

17Chupan ri achel achikꞌ nibꞌen, xintzꞌet chi ri kej y ri etzꞌuyul chikij, chokikꞌuꞌx kikusaloꞌon tobꞌel keq nditzuꞌun achel qꞌaqꞌ, azul achel ri abꞌej rubꞌiniꞌan jacinto, y qꞌen achel ri azufre. Ri kijolon ri kej riꞌ, achel kijolon koj+ keriꞌ, y pa kichiꞌ ndel pe qꞌaqꞌ, sibꞌ y azufre. 18Y roma ri qꞌaqꞌ, ri sibꞌ, y ri azufre ri ndel pa kichiꞌ, xeken jun rox parte ri wineq. 19Ri kej riꞌ, pa kichiꞌ y chikijey kꞌo wi ri kuchuqꞌaꞌ; ri kijey kꞌo kijolon achel kijolon kumetz, y rikꞌin riꞌ ndikiyaꞌ qꞌaxomal.

20Ri wineq ri ma xeken ta pa ruqꞌaꞌ ri kꞌayew riꞌ, ma xkijel ta kinoꞌoj+ chin ta xkiyaꞌ kan ruyaꞌik kiqꞌij itzel teq espíritu+ y tiox ekibꞌanun+ chare qꞌanapueq, saqipueq, bronce, abꞌej y cheꞌ, tiox ri xa ma ngetzuꞌun ta, ma ngeꞌakꞌaxan ta+ y ma ngebꞌiyin ta. 21Ma xkijel ta kinoꞌoj chin ta xkimalij kan ri ma utz ta ngetajin rikꞌin, achel ri ngekamisan, ri ngeꞌeleqꞌan, ri ndikibꞌen kiqꞌij wineq, y ri ndikikꞌamalaꞌ qa kiꞌ xa achoq na ikꞌin chin ndikibꞌen mak.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index