Search form

Romanos 1

Ri Pablo nduteq ruxunaqil kiwech ri hermanos aj Roma

1Riyin Pablo rusamajel+ ri Cristo Jesús, yin oyon chin xinok jun apóstol,+ yin chaꞌon+ pe chuqaꞌ roma ri Dios chin nitzijoj ri utzulej teq tzij chin kolotajik+ ri pataneq rikꞌin rijaꞌ. 2Ri tzij riꞌ, rusujun kan chi nduyaꞌ pe,+ achel ndiqatzꞌet chupan ri loqꞌolej rutzij tzꞌibꞌan kan koma ri profetas.+ 3Ri utzulej teq tzij chin kolotajik riꞌ, ndichꞌaꞌa pa ruwiꞌ ri Rukꞌajol ri Dios. Rijaꞌ atoq xalex chochꞌulew, xuꞌok riy-rumam ri rey David.+ 4Pero ma xe ta xuꞌok riy-rumam ri David, xa kin rikꞌin ruchuqꞌaꞌ ri Espíritu Santo xkꞌastajbꞌex pe chikikajal ri animaꞌiꞌ, y keriꞌ xqꞌalajin chi rijaꞌ Rukꞌajol ri Dios ri kꞌo uchuqꞌaꞌ pa ruqꞌaꞌ. Y riꞌ ja ri Jesucristo ri Qajaw.

5Y roma ri xubꞌen ri Jesucristo, y chin ndinimrisex rubꞌiꞌ, xyoꞌox favor chaqe chin xojok ru-apóstoles y romariꞌ ndiqatzijoj chake ri jalajaj kiwech wineq chochꞌulew chi tikitaqij rijaꞌ y tikinimaj rutzij. 6Y chikikajal konojel rejeꞌ, rixkꞌo rix ri rix oyon+ chin ngixok richin ri Jesucristo. 7Nitzꞌibꞌaj e re wuj reꞌ chiwa rix iwonojel hermanos ri rixkꞌo pa tinamit Roma, ri tzꞌan ngixojowex+ roma ri Dios, y rix oyon chin ngixok loqꞌolej teq ralkꞌuaꞌl.+ Ri Qatataꞌ Dios y ri Qajaw Jesucristo kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima.+

Ri Pablo ndirajoꞌ ngebꞌerutzꞌetaꞌ ri hermanos aj Roma

8Ri nabꞌey niwojoꞌ nibꞌij chupan re wuj reꞌ, jareꞌ: Nimatioxij chare ri nu-Dios pa rubꞌiꞌ ri Ajaw Jesucristo iwoma rix. Porque chuwech nojel ri rochꞌulew nditzijox chi kuqul ikꞌuꞌx rikꞌin ri Jesucristo. 9Nimatioxij porque ri Dios ri nojel wánima nibꞌen rusamaj chutzijoxik ri utzulej teq tzij ri ndichꞌaꞌa pa ruwiꞌ ri kolotajik nduyaꞌ ri Rukꞌajol, rijaꞌ kin retaman chi ngixinkꞌuxlaꞌaj pa nu-oración+ chi chaqꞌaꞌ chi paqꞌij. 10Y jumul nikꞌutuj chare chi man ta chik kꞌo achike ndiqꞌato chinuwech chin ngibꞌa apu chiꞌitzꞌetik si jariꞌ rurayibꞌel rijaꞌ.+ 11Porque tzꞌan nurayin ngixbꞌentzꞌetaꞌ,+ chin ta ndikꞌen kan rix ri loqꞌolej teq sipanik ri nduyaꞌ ri Espíritu Santo, chin keriꞌ más ndikꞌojeꞌ ruchuqꞌaꞌ iwánima rikꞌin ri Dios. 12O más utz nibꞌij chi ndiqayalaꞌ ruchuqꞌaꞌ qánima chiqawech atoq ndiqatzijoj ri utz rubꞌanun ri Ajaw chaqe, roma qakuqubꞌan qakꞌuꞌx rikꞌin.

13Hermanos, riyin niwojoꞌ chi ndiwetamaj chi kꞌiy mul nubꞌanun ruwech chi yin ta bꞌaneq chiꞌitzꞌetik, pero kꞌo ta man kꞌo okuneq chupan.+ Nirayij chi kin ta ngixkꞌiy pa ikꞌaslen chiraqen ri Cristo,+ achel bꞌanatajneq rikꞌin ri nusamaj chikikajal ri chꞌaqa chik ma israelitas ta. 14Riyin kin kꞌas chuwij chi nitzijoj ri utzulej teq tzij chin kolotajik chake konojel wineq, chake ri nimalej teq kiqꞌij y ri ma nimalej ta kiqꞌij, chake ri kꞌiy kinojibꞌal y ri maneq ok ketaman. 15Romariꞌ, riyin tzꞌan nurayin netzijoj chuqaꞌ ri utzulej teq tzij chin kolotajik chiwa rix ri rixkꞌo pa tinamit Roma.

Ri utzulej teq tzij chin kolotajik kin ruchuqꞌaꞌ wi ri Dios

16Y ma ngikꞌix ta nitzijoj ri utzulej teq tzij chin kolotajik, porque ja utzulej tzij riꞌ ri uchuqꞌaꞌ+ ndukusaj ri Dios chin ngerukal konojel ri ndikitaqij. Ri utzulej teq tzij riꞌ nabꞌey xtzijox chake ri israelitas, y chake chuqaꞌ ri ma israelitas ta. 17Y ja chupan ri utzulej teq tzij riꞌ, ndiqꞌalajin chi rikꞌin ri Dios pataneq ri achike ndubꞌen chin nixta jun mak ndikeqalej ri wineq chuwech, y kin xe roma ndikitaqij+ chi ja ri Jesucristo Kikolonel, xe romariꞌ nixta jun mak ndikeqalej chuwech, achel tzꞌibꞌan kan chupan ri rutzij ri Dios, ri kereꞌ ndubꞌij: Ri nixta jun rumak reqalen chuwech ri Dios, kin ndiril ri qetzij kꞌaslen, roma kuqul rukꞌuꞌx rikꞌin ri Dios.+

Ri wineq kibꞌanun ri ma utz ta chuwech ri Dios

18Ri castigo nduyaꞌ ri Dios,+ ndipuꞌun chikaj pa kiwiꞌ ri wineq maneq Dios pa kiwech y ma echaj ta rikꞌin ri ndikibꞌanalaꞌ. Ri wineq riꞌ, rikꞌin ri ma chaj ta ngekibꞌanalaꞌ ndikiqꞌet ruwech ri qetzij pataneq rikꞌin ri Dios. 19Porque ri kꞌo cheꞌel ndetamex pa ruwiꞌ ri Dios,+ rejeꞌ kin ketaman wi, porque ja ri Dios xqꞌalajrisan chikiwech. 20Ri Dios ma nditzꞌetetej ta. Pero xe jampeꞌ xtzꞌukutej pe ri rochꞌulew, kin ja ri ebꞌanun roma rijaꞌ ri ngeqꞌalajrisan chi rijaꞌ Dios, y kꞌo uchuqꞌaꞌ pa ruqꞌaꞌ chin jumul y romariꞌ, ri wineq maneq cheꞌel xtikibꞌij chi ma ketaman ta chi kꞌo Dios. 21Y maske xketamaj chi kꞌo Dios, y kin rukꞌulun chi ndikiyaꞌ ruqꞌij, xa ma xkiyaꞌ ta, nixta xematioxin chare, xa xsach qa kinoꞌoj, y maneq rubꞌeyal ri ndikinojilaꞌ. Ri kánima xqꞌeqꞌumer qa y xenakanoꞌ. 22Maske rejeꞌ ndikibꞌilaꞌ chi santienta kinojibꞌal, xa xenakanoꞌ.+ 23Rejeꞌ xkiyaꞌ kan rokacheq chuwech ri nimalej ruqꞌij Dios ri jumul kꞌo rukꞌaslen, chin xekiyalaꞌ kiqꞌij kachibꞌel wineq ri xa ngeken, kachibꞌel aj xikꞌ teq chikap, chikap kajkej kaqen+ y kumatziꞌ teq chikap,+ y xa xkibꞌen kitiox chake.

24Romariꞌ, ri Dios xerujech+ pa seqꞌ teq rayinik+ ri ndalex pe pa kánima, itzel rayinik ri nditaqchiꞌin kichin chin ndikikꞌamalaꞌ qa kiꞌ xa achoq na ikꞌin chin ndikibꞌen kꞌixbꞌel teq mak rikꞌin ri ki-cuerpo+ chikiwech. 25Rejeꞌ ma xkoqaj ta ri qetzij rubꞌiꞌin kan ri Dios. Pa rukꞌexel riꞌ, xa xkoqaj ri ma qetzij ta, xekiyalaꞌ kiqꞌij ri ebꞌanun roma ri Dios y xeꞌok kisamajelaꞌ, y ma xkiyaꞌ ta ruqꞌij ri Dios ri bꞌanayon nojel, ri Dios ri kin rukꞌulun ndiyoꞌox ruqꞌij jumul.+ ¡Amén!

26Romariꞌ, ri Dios xerujech pa seqꞌ teq rayinik ri ndukꞌen pe kꞌix. Porque hasta ri ixoqiꞌ ma xekajoꞌ chi ta achiꞌaꞌ, xa chi ixoqiꞌ xkikꞌamalaꞌ qa kiꞌ chin xkibꞌen mak. 27Y keriꞌ chuqaꞌ ri achiꞌaꞌ ma xekajoꞌ chi ta ixoqiꞌ, xa xqꞌaqꞌer pe ri seqꞌ teq rayinik pa kánima y xkikꞌamalaꞌ qa kiꞌ chi achiꞌaꞌ chin xkibꞌen mak y xkibꞌanalaꞌ ri ndukꞌen pe kꞌix. Y keriꞌ, pa ki-cuerpo xkil ri castigo ri xukꞌen pe ri kimak, roma xkiyaꞌ kan rubꞌey ri Dios.

28Y roma xkichaꞌ chi ma ndikiyaꞌ ta pa cuenta ri ketaman pa ruwiꞌ ri Dios, ri Dios xerujech chupan ri itzel teq achike ndikinojilaꞌ chin ndikibꞌanalaꞌ ri ma utz ta chin ndibꞌan. 29Ri kánima nojneq rikꞌin ri ma chaj ta ndikibꞌanalaꞌ,+ eꞌitzel chikibꞌanik, ngejamem chirij xa achike na, itzel teq kinoꞌoj chi wineq, itzel ndikinaꞌ chare roma utz kibꞌanun chꞌaqa chik, ekamisanel, xe oyowal koma, tzꞌan ngechꞌakatin, ndikikusaj ri kinojibꞌal chin ndikibꞌen itzel chake chꞌaqa chik, ja ma ja teq tzij ndikibꞌilaꞌ chikij wineq, 30etzꞌukuy teq aqꞌ, itzel ndikitzꞌet ri Dios, ma jubꞌaꞌ ndikiqꞌet kiꞌ rikꞌin ri ndikibꞌilaꞌ chake wineq, ma jun keqalen ndikibꞌen chake ri wineq, tzꞌan ndikinimrisalaꞌ kiꞌ,+ ngekinojilaꞌ kꞌakꞌakꞌ teq mak chin ndikibꞌen, ma ndikinimaj ta kitzij kite-kitataꞌ,+ 31ma jun kinoꞌoj, ma ndikibꞌen ta cumplir ri kitzij ndikiyaꞌ, ma ngeꞌojowan ta y ma ngepoqonan ta chuqaꞌ. 32Rejeꞌ ketaman chi ri Dios kin pa ruchojmil rubꞌanun chi ruqꞌaton kan kamik pa kiwiꞌ ri ngebꞌanun mak achel ri xqabꞌij yan pe. Pero maske rejeꞌ ketaman chi keriꞌ, ma xe ta ngekibꞌanalaꞌ, xa kin utz ngekitzꞌet chi chꞌaqa chik ngekibꞌanalaꞌ+ chuqaꞌ.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index