Search form

Romanos 10

Ri israelitas y ri utzulej teq tzij chin kolotajik

1Hermanos, nibꞌij chiwa chi ri ndurayij ri wánima y ri jumul nikꞌutuj pa nu-oración pa kiwiꞌ ri nuwinaqul israelitas, ja chi ngekolotej.+ 2Porque riyin nutzꞌeton pe chi rejeꞌ kin ndikitij kiqꞌij chi ndikibꞌen ri ndubꞌij ri Dios,+ pero ma kikꞌoxoman ta ri qitz méra rubꞌeyal chin ndikibꞌen. 3Porque rejeꞌ ma kikꞌoxoman ta chi ja ri Dios ndibꞌanun chi nixta jun rumak ndireqalej jun wineq, y romariꞌ xa kiyon chikiwech kikanon qa jun chik rubꞌeyal+ chin ta ma jun kimak ndikeqalej,+ y kiyoꞌon kan rokacheq chuwech ri rubꞌeyal ri rukꞌutun kan ri Dios. 4Porque rikꞌin ri xubꞌen ri Cristo, xbꞌanatej nojel ri achike roma ri Dios xuyaꞌ pe ri ley, porque ri Cristo kin xubꞌen nojel ri ndubꞌij ri ley, y keriꞌ konojel ri xtikitaqij rijaꞌ, nixta jun kimak ndikeqalej chuwech ri Dios.+

5Porque ri Moisés pa ruwiꞌ ri achike ndikꞌatzin ndubꞌen jun wineq chin nixta jun mak ndireqalej chuwech ri Dios, kereꞌ rutzꞌibꞌan kan chupan ri ley: Ri ndibꞌanun nojel ri ndubꞌij re ley reꞌ, kin ndiril ri qetzij kꞌaslen+ ri nduyaꞌ ri Dios. Keriꞌ rutzꞌibꞌan kan. 6Pero chupan chuqaꞌ ri ley, ndukꞌut ri kꞌakꞌakꞌ rubꞌeyal chin nixta jun mak ndireqalej jun wineq chuwech ri Dios, y riꞌ roma ndutaqij ri Jesucristo. Porque ri ley tzꞌibꞌan kan ndubꞌij chuqaꞌ: Ma tabꞌij pa awánima: ¿Achike jun wineq xtibꞌa e chikaj? Keriꞌ ndubꞌij chupan ri ley chi ma tiqabꞌij. Porque ri keriꞌ ndabꞌij, ndubꞌij tzij chi ndawojoꞌ ndabꞌen ri xe ri Dios nditiker ndubꞌen, porque ndawojoꞌ ndabꞌen chi ndiqaqa chi pe ri Cristo+ chochꞌulew. 7Y ri ley ndubꞌij chuqaꞌ: Ma tabꞌij pa awánima: ¿Achike jun wineq xtiqaqa qa chupan ri rar siwan? Keriꞌ chuqaꞌ ndubꞌij chupan ri ley chi ma tiqabꞌij. Porque ri keriꞌ ndabꞌij, ndubꞌij tzij chi ndawojoꞌ ndabꞌen ri xe ri Dios nditiker ndubꞌen, porque ndawojoꞌ chi ndekꞌamer qa ri Cristo chikikajal ri animaꞌiꞌ, y ri Dios xrelesaj yan pe+ chiriꞌ. 8Pero, ¿achike qitz méra ndubꞌij ri rutzij ri Dios pa ruwiꞌ ri nixta jun amak ndaweqalej chuwech? Ri ndubꞌij, jareꞌ: Chiꞌanaqaj kꞌo ri rutzij, pa achiꞌ y pa awánima kꞌo wi.+ Keriꞌ ndubꞌij ri tzꞌibꞌan kan. Y ja tzij riꞌ ri ndiqatzijoj roj, tzij ri ndubꞌij chi ndikꞌatzin ndataqij ri Jesucristo. 9Ndubꞌij chi ndikꞌatzin ndabꞌij rikꞌin achiꞌ chi ja ri Jesús ri Awajaw,+ y ndikꞌatzin chuqaꞌ chi rikꞌin awánima ndataqij chi ri Dios xukꞌastajbꞌaꞌ pe chikikajal ri animaꞌiꞌ.+ Si keriꞌ ndabꞌen, kin ngakolotej wi. 10Porque rikꞌin awánima ndataqij ri Jesucristo, chin keriꞌ ri Dios ndubꞌen chawa chi nixta jun amak ndaweqalej chuwech, y rikꞌin achiꞌ ndabꞌij chi ja rijaꞌ ri Kolonel chin ngakolotej. 11Achel ndubꞌij chupan ri rutzij ri Dios: Konojel ri ngetaqin richin rijaꞌ ma jumbꞌey xkekꞌixbꞌisex,+ porque kin ndiyoꞌox wi chake ri sujun kan. Keriꞌ tzꞌibꞌan kan.

12Porque chuwech ri Dios, junan kiwech ri israelitas y ri ma israelitas ta,+ porque rijaꞌ Ajaw pa kiwiꞌ konojel wineq.+ Y tzꞌan favor nduyaꞌ pa kiwiꞌ konojel ri wineq ri ndikikꞌutuj kikolotajik chare. 13Porque ri rutzij ri Dios kereꞌ ndubꞌij: Konojel ri ngekꞌutun kitoꞌik+ chare ri Ajaw, kin ngekolotej wi. 14Pero, ¿achike modo ndikikꞌutuj ri wineq kitoꞌik chare, si xa ma kitaqin ta chi ja rijaꞌ ri Kolonel? y, ¿achike modo ndikitaqij ri Cristo, si ma kakꞌaxan ta achike rijaꞌ?+ y, ¿achike modo xtikakꞌaxaj achike rijaꞌ, si ma jun xtiyoꞌon rutzijol chake?+ 15Y, ¿achike modo xkebꞌa ri ngeyoꞌon utzulej rutzijol ri Cristo si ma jun nditaqo e kichin? Porque chupan ri rutzij ri Dios kereꞌ ndubꞌij: ¡Kin tzꞌan ndikikot ri awánima, atoq ngetuqaqa ri ekꞌamayon pe rutzijol ri utzulej teq tzij chin kolotajik!+ Keriꞌ ndubꞌij ri rutzij ri Dios.

16Pero ma konojel ta kitaqin ri utzulej teq tzij chin kolotajik, achel ndubꞌij ri tzꞌibꞌan kan roma ri profeta Isaías: Ajaw, ¿kꞌo kami xetaqin ri qabꞌiꞌin pe pa abꞌiꞌ?+ Keriꞌ tzꞌibꞌan kan. 17Y keriꞌ kꞌa, chin ndalex pe pa awánima chi ndataqij ri Cristo, ndikꞌatzin ndawakꞌaxaj ri utzulej teq tzij+ ri nditzijox, y ri utzulej teq tzij nditzijox, ja ri ndichꞌaꞌa pa ruwiꞌ ri Cristo.

18Pero riyin nibꞌij: ¿La ma xkakꞌaxaj ta kami ri wineq re utzulej tzij reꞌ? Kin xkakꞌaxaj wi. Porque chupan ri rutzij ri Dios kereꞌ ndubꞌij:

Chuwech nojel ri rochꞌulew xakꞌaxex kitzij ri ngetzijon ri rutzij ri Dios,+

Hasta ri lugar más nej chin ri rochꞌulew xbꞌeqaqa ri kitzij.

Keriꞌ ndubꞌij ri tzꞌibꞌan kan.

19Pero nibꞌij chuqaꞌ: ¿La ma xkikꞌoxomaj ta kami ri nuwinaqul israelitas re tzij reꞌ? ¡Xkikꞌoxomaj wi! Nabꞌey niwojoꞌ chi ndiqatzꞌet ri rutzij ri Dios ri rutzꞌibꞌan kan ri Moisés ri kereꞌ ndubꞌij:

Nduqaqa jun qꞌij atoq nibꞌen chiwa chi ndiqꞌaxa iwánima

Chirij jun tinamit ri ma nutinamit ta.

Y nibꞌen chiwa chi ndipuꞌun iwoyowal+ chake

Porque niyaꞌ ri nu-favor pa kiwiꞌ, maske pa iwech rix, rejeꞌ ma jun kinoꞌoj.

20Y keriꞌ chuqaꞌ ri profeta Isaías ma xuxibꞌij ta riꞌ chin xutzꞌibꞌaj ri xubꞌij kan ri Dios:

Xinyaꞌ qꞌij chi xinkil ri ma nginikikanoj ta,

Y xinqꞌalajrisaj wiꞌ chikiwech ri ma ndikikꞌutuj ta razón+ achike riyin.

Keriꞌ ndubꞌij ri tzꞌibꞌan kan.

21Pero chupan ri wuj rutzꞌibꞌan kan ri Isaías, ri Dios kereꞌ rubꞌiꞌin kan pa kiwiꞌ ri nuwinaqul israelitas: Nojel qꞌij nulibꞌan nuqꞌaꞌ chin nikꞌen apu kiwech jun tinamit ri ma ndikinimaj ta nutzij, y ja ri ma ndiqaꞌ ta chinuwech ri ngekibꞌanalaꞌ.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index