Search form

Romanos 11

Ri Dios ma erumalin ta kan ri israelitas

1Romariꞌ nikꞌutuj razón, ¿la xerumalij kami kan ri Dios ri rutinamit Israel?+ ¡Ma ke ta riꞌ! Tiyaꞌ cuenta chare chi riyin, yin israelita,+ chin ru-tribu ri Benjamín,+ jun riy-rumam kan ri Abraham, y kꞌamon nuwech roma ri Dios. 2Ri Dios xe jampeꞌ pa nabꞌey+ xeruchaꞌ ri israelitas chin xeꞌok rutinamit, y ma erumalin ta kan.+ ¿Ma iwetaman ta kꞌa ri ndubꞌij ri rutzij ri Dios pa ruwiꞌ ri profeta Elías, ri xchꞌaꞌa rikꞌin ri Dios chin xerusujuj ri israelitas chuwech? 3Rijaꞌ kereꞌ xubꞌij: Ajaw, xekikamisaj ri chꞌaqa chik a-profetas, xekiwulij ri altares ri apeꞌ ndiyoꞌox aqꞌij, y xaxe chik riyin yinkꞌo kan, y nginikikanoj chin nginikikamisaj.+ 4Pero, ¿achike xubꞌij pe ri Dios chare? Ri Dios kereꞌ xubꞌij: Ma ayon ta ratkꞌo, porque riyin kꞌa enukolon 7,000 achiꞌaꞌ chin ndikiyaꞌ nuqꞌij, achiꞌaꞌ ri ma jumbꞌey kiqꞌochon kichꞌek chuwech ri tiox rubꞌiniꞌan Baal.* Keriꞌ xubꞌij ri Dios chare ri Elías. 5Y keriꞌ chuqaꞌ chupan re tiempo rojkꞌo, kꞌa rojkꞌo jubꞌaꞌ israelitas ri roj chaꞌon roma ri Dios chin nduyaꞌ ri ru-favor pa qawiꞌ.+ 6Y ri xojchaꞌox, ma roma ta kꞌo utzulej teq achike xeqabꞌanalaꞌ, porque xa ta xojchaꞌox roma kꞌo utz qabꞌanaloꞌon pe, ri favor yoꞌon pa qawiꞌ chi xojchaꞌox, man ta ndiqꞌalajin chi favor+ ruyoꞌon pe ri Dios.

7¿Achike kꞌa ndiqabꞌij pa ruwiꞌ nojel reꞌ? Ri ndiqabꞌij, jareꞌ: Ri ru-favor ri Dios ri tzꞌan xkajoꞌ xkil ri israelitas, ekꞌiy chikiwech rejeꞌ ma xkil ta,+ y xa xkowirisex ri kánima. Pero roj ri roj chaꞌon roma ri Dios, kin xqil wi. 8Achel tzꞌibꞌan kan pa kiwiꞌ ri nuwinaqul chupan ri rutzij ri Dios, ri kereꞌ ndubꞌij: Ri Dios xubꞌen chake achel sikirneq ri kinoꞌoj. Rikꞌin ri kiwech achel ma ngetzuꞌun ta, y rikꞌin ri kixikin achel ma ngeꞌakꞌaxan ta,+ y kꞌa keriꞌ kibꞌanun wokami.+ 9Y ri David kereꞌ xubꞌij kan:

Ri nimalej teq waꞌin ngekibꞌanalaꞌ, kin ta xtok trampa+ ri nditzꞌamo kichin, kin ta xtubꞌen chi ndikinaꞌ chi achel utz kibꞌanun chuwech ri Dios.

Y kin ta xtok qa tzaqoy kichin, chin ndiqaqa pa kiwiꞌ ri castigo nduyaꞌ ri Dios.

10Kin ta xtiqꞌeqꞌumer qa ri kinoꞌoj, chin ma ndikikꞌoxomaj ta ri ndikitzꞌet.

Y kin ta chin jumul xtilukuluꞌ qa ri rokacheq chuxeꞌ al teq eqaꞌ.+

Roma xetzaq ri israelitas, ri Dios xukꞌen pe kolotajik chake ri ma israelitas ta

11Y rikꞌin ri qabꞌiꞌin pe, ¿la ndubꞌij kami tzij chi jumul xetzaq ri nuwinaqul israelitas atoq achel xkipajkꞌilaꞌ kaqen rikꞌin ri ma xkitaqij ta ri Jesucristo? ¡Ma chin ta jumul! Qetzij wi chi xetzaq, pero riꞌ xubꞌen chi ri Dios xukꞌen pe kolotajik chake ri ma israelitas ta,+ chin keriꞌ ri israelitas ndiqꞌaxa kánima chikij ri ma israelitas ta y nditzolij pe kánima+ rikꞌin ri Dios. 12Y roma xetzaq ri israelitas, xkꞌojeꞌ ri favor nduyaꞌ ri Dios pa kiwiꞌ jalajaj kiwech wineq chochꞌulew. Ri israelitas kin ma xkil ta ri favor nduyaꞌ ri Dios, y romariꞌ xkꞌojeꞌ ri favor nduyaꞌ ri Dios pa kiwiꞌ ri ma israelitas ta. Y romariꞌ, ¡kin más kꞌiy favor ndukꞌen pe, atoq ri israelitas nditzolij chi pe kánima rikꞌin ri Dios!

13Chiwa rix ri ma rix israelitas ta nibꞌij: Riyin yin apóstol taqon roma ri Dios chin nibꞌen ri rusamaj chiꞌikajal,+ y kin nitij nuqꞌij nibꞌen utz chare ri samaj riꞌ. 14Keriꞌ nibꞌen chin rikꞌin ta riꞌ, ri nuwinaqul israelitas ndikirayij ri ruyoꞌon ri Dios chiwa rix, y ekꞌo ta jujun chikikajal ngekolotej.+ 15Y si roma xemalix kan jubꞌaꞌ ri israelitas, ri Dios xukꞌen apu kiwech ri jalajaj kiwech wineq, kin más kꞌiy utz ndukꞌen pe atoq ndikꞌan chi apu kiwech ri israelitas roma ri Dios. Kin achel ta ngekꞌastajbꞌex pe+ chikikajal ri animaꞌiꞌ chin ndikꞌojeꞌ chi pe kikꞌaslen keriꞌ. 16Ri ojer teq katit-kimamaꞌ ri israelitas kin xechaꞌox wi roma ri Dios. Rejeꞌ eꞌachel ri nabꞌey teq kaxlan wey ri ngeꞌelesex rikꞌin jun siraj keꞌen y ngesuj chuwech ri Dios, y rikꞌin ri ngesuj chuwech ri Dios, nojel ri keꞌen ndok loqꞌolej. Ri ojer teq katit-kimamaꞌ eꞌachel chuqaꞌ ruxeꞌ jun cheꞌ ri okuneq loqꞌolej chuwech ri Dios, y si loqꞌolej ri eruxeꞌel ri cheꞌ, eloqꞌolej chuqaꞌ ruqꞌaꞌ ri cheꞌ.

17Ri ojer teq katit-kimamaꞌ ri israelitas eꞌachel ruxeꞌ ri cheꞌ rubꞌiniꞌan olivo, ri tikon y kin loqꞌolej wi. Pero ekꞌo ruqꞌaꞌ ri xejoqꞌ e. Y rat ri ma rat israelita ta, xa rat ruqꞌaꞌ jun aj pa qꞌayis olivo, ri xa ruyon xbꞌeꞌel pe. Pero xabꞌan injertar pa kikꞌexel ri ruqꞌaꞌ ri olivo ri xejoqꞌ e, chin xakꞌojeꞌ chikikajal ri ruqꞌaꞌ ri olivo tikon, y keriꞌ ri ruchuqꞌaꞌ ri rukꞌaslen ri olivo tikon ndeqꞌax pa akꞌaslen chuqaꞌ rat. 18Romariꞌ, ma tanaꞌ chi kꞌo más aweqalen+ chikiwech ri ruqꞌaꞌ ri olivo tikon, porque si keriꞌ ndabꞌen, takꞌuxlaꞌaj chi ma ja ta rat ri tzꞌamayon ruxeꞌ ri olivo, xa kin ja ri ruxeꞌ ri olivo tikon tzꞌamayon awichin rat.

19Y rat ma tabꞌij kereꞌ: Xejoqꞌ e jujun ruqꞌaꞌ ri olivo tikon, chin xibꞌan injertar yin pa kikꞌexel. 20Qetzij wi. Pero rejeꞌ xejoqꞌ e roma ma xkitaqij ta ri Jesucristo, y rat xakꞌojeꞌ kan pa kikꞌexel, roma xataqij ri Jesucristo. Romariꞌ, ma tanimrisaj awiꞌ,+ xa kin taxibꞌij awiꞌ+ chuwech ri Dios. 21Porque, si ri Dios ma xupoqonaj ta kiwech, xerujaqꞌ e ri qitz méra ruqꞌaꞌ ri olivo tikon, keriꞌ chuqaꞌ ma ndupoqonaj ta awech rat. 22Tatzꞌetaꞌ kꞌa chi ri Dios kin utz y jabꞌel runoꞌoj kikꞌin ri ngetaqin, pero ma ndupoqonaj ta kiwech ri ma ngetaqin ta. Ma xupoqonaj ta kiwech ri xetzaq, y kin utz y jabꞌel runoꞌoj xubꞌen chawa rat, pero si ma ngakꞌojeꞌ ta chupan ri favor+ nduyaꞌ rijaꞌ, ngarujaqꞌ e chuqaꞌ rat.

23Y si ri israelitas xtikitaqij ri Ajaw, ngebꞌan chi apu injertar jumbꞌey chirij ri olivo tikon, porque ri Dios kin kꞌo ruchuqꞌaꞌ chin ngerubꞌen injertar. 24Y si rat xachoy pe rikꞌin ri aj pa qꞌayis olivo ri xa ruyon xbꞌeꞌel pe, y xabꞌan apu injertar chirij ri olivo tikon, xbꞌan awikꞌin ri ma jumbꞌey ndibꞌan. Y si xabꞌan apu injertar rat, más ma cuesta ta ngebꞌan apu injertar ri israelitas ri qitz méra eruqꞌaꞌ ri olivo tikon.

Ri kikolotajik ri israelitas

25Hermanos, riyin niwojoꞌ chi ndikꞌoxomaj ri ma kin ta qꞌalej rubꞌeyal ojer kan chupan ri tiempos eqꞌaxneq pe, pero wokami xqꞌalajrisex, chin keriꞌ ma ndinimrisaj iwiꞌ. Y ri xqꞌalajrisex, jareꞌ: Chiqakajal roj israelitas ekꞌo ekꞌiy kikowirisan ri kánima,+ y keriꞌ xtubꞌen ri kánima hasta kꞌa ngekolotej na konojel ri ma israelitas ta ri echaꞌon chin ngekolotej. 26Y kꞌajariꞌ konojel ri nuwinaqul israelitas ngekolotej, achel ndubꞌij chupan ri rutzij ri Dios:

Chikikajal ri israelitas ndipuꞌun ri Kolonel,+

Y nduchꞌajchꞌojrisaj kánima ri eriy-rumam ri Jacob, chin ma ndikibꞌen chik ri ma utz ta chin ndibꞌan.

27Y kereꞌ chuqaꞌ ndubꞌij ri Dios chupan ri rutzij:

Jareꞌ ri pacto nibꞌen kikꞌin rejeꞌ,+

Atoq niwelesaj ri kimak chikij.

Keriꞌ rubꞌiꞌin kan ri Dios.

28Kin qetzij chi ekꞌo nuwinaqul israelitas eyakatajneq chirij ri utzulej teq tzij chin kolotajik, pero riꞌ chin kꞌo utz xukꞌen pe chiwa rix ma israelitas ta. Pero qetzij chuqaꞌ chi ri Dios xeruchaꞌ ri nuwinaqul israelitas y romariꞌ tzꞌan ngerajoꞌ,+ roma keriꞌ rusujun kan chake ri ojer teq katit-kimamaꞌ. 29Porque ri rusujun ri Dios chi ndubꞌen, kin ndubꞌen wi y ma ndujel ta ruwech rutzij,+ y si ri Dios eroyon ri nuwinaqul israelitas, ma ndutzolij ta chuqaꞌ rutzij. 30Rubꞌanun kan rix ma xixniman ta chuwech ri Dios,+ pero xjoyowex iwech roma ri Dios, y riꞌ roma ri israelitas ma xeniman ta chuwech. 31Keriꞌ chuqaꞌ, ri israelitas ri ma kiniman ta ri Dios, ndipoqonex chik kiwech, y riꞌ roma ri Dios xujoyowaj iwech rix. 32Keriꞌ nibꞌij, porque ri Dios rubꞌiꞌin chi konojel wineq ma ngeniman ta chuwech,+ chin keriꞌ ndujoyowaj kiwech konojel.

33¡Kin santienta nim ri retamabꞌel y ri runojibꞌal ri Dios, kin achel jun nimalej bꞌeyomal keriꞌ! Ma jumbꞌey ngojtiker ndiqakꞌoxomaj+ ri ndubꞌen ruwech rijaꞌ chi ndubꞌen, nixta ngojtiker ndiqakꞌoxomaj ri runoꞌoj ndubꞌen chaqe roj wineq. 34Achel ndubꞌij chupan ri rutzij ri Dios ri tzꞌibꞌan kan: ¿Kꞌo kami jun wineq retaman achike ndunojij ri Ajaw? O, ¿kꞌo kami jun wineq xtitiker xtunukꞌ rubꞌeyal chuwech ri Dios pa ruwiꞌ ri achike utz chin ndubꞌen?+ Nixta jun. 35Y, ¿kꞌo kami jun wineq ruyoꞌon nabꞌey jun achike chare ri Dios, chin keriꞌ ri Dios ndikꞌatzin ndutzolij rajel-rukꞌexel chare ri jun wineq riꞌ? Nixta jun. Keriꞌ tzꞌibꞌan kan. 36Porque nojel ri ebꞌanun, ja rijaꞌ ri bꞌanayon kichin,+ ja rijaꞌ ri tzꞌamayon kichin, y chin ndikiyaꞌ ruqꞌij rijaꞌ erubꞌanun. ¡Kin ta jumul xtiyoꞌox ruqꞌij! Amén.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index