Search form

Romanos 12

Ri kꞌakꞌakꞌ kꞌaslen kichin ri kitaqin ri Cristo

1Hermanos, rikꞌin nojel ri qabꞌiꞌin pe, kin qatzꞌeton chi ri Dios tzꞌan rujoyowan qawech. Romariꞌ, nikꞌutuj kamelal chiwa chi tijachaꞌ iwiꞌ+ pa ruqꞌaꞌ, achel jun kꞌaslik y loqꞌolej ofrenda ri ndisuj chuwech. Porque kin keriꞌ wi rukꞌulun chi ndiyoꞌox ruqꞌij rijaꞌ, y jariꞌ ri ndiqaꞌ chuwech. 2Ma tibꞌen rix achel ndikibꞌen ri wineq bꞌaneq kánima chirij ri ndusuj ri rochꞌulew, xa kin tiyaꞌ qꞌij chare ri Dios chi tuyaꞌ jun kꞌakꞌakꞌ nojibꞌel+ chiwa chin ndijalatej ri ikꞌaslen, y keriꞌ ndiwetamaj ri rurayibꞌel ri Dios, rayibꞌel ri kin utz, kin tzꞌaqet y kin ndiqaꞌ chuwech chi ndibꞌan.

3Riyin roma ri favor ruyoꞌon ri Dios pa nuwiꞌ chin nibꞌen ri rusamaj,+ nibꞌij chiwa chiꞌijununal: Ma tinaꞌ chare chi más nim iqꞌij ke chuwech ri rubꞌanun ri Dios chiwa. Pa rukꞌexel riꞌ, xa kin tinojilaꞌ utz-utz achike rubꞌanun ri ikꞌaslen, y ri ndinojilaꞌ, kin ta rukꞌuan riꞌ rikꞌin ri janipeꞌ rix kꞌiyineq chupan ri kuqubꞌel kꞌuxlaj ruyoꞌon ri Ajaw chiwa chiꞌijununal. 4Porque achel roj wineq kꞌo qa-cuerpo ri kꞌiy ruwachinel ruqꞌa-raqen+ ruchajin, y jalajaj kisamaj ndikibꞌen chikijununal, 5keriꞌ chuqaꞌ roj ri qataqin ri Cristo, roj kꞌiy, pero xe jun cuerpo qabꞌanun rikꞌin+ rijaꞌ, y roj ruwachinel ruqꞌa-raqen ri ru-cuerpo ri ndiqatolaꞌ qiꞌ chiqawech.

6Ri Dios ruyoꞌon ri ru-favor pa qawiꞌ, y romariꞌ ruyoꞌon jalajaj loqꞌolej teq sipanik chaqe+ chin ndiqabꞌen ri rusamaj. Si ri loqꞌolej sipanik yoꞌon chare jun, ja ri nduqꞌalajrisaj ri ndubꞌij pe ri Dios pa ránima, ri nduqꞌalajrisaj kin ta rukꞌuan riꞌ rikꞌin ri tijonik ruyoꞌon kan ri Ajaw chaqe. 7Si ri loqꞌolej sipanik yoꞌon chare jun, ja ri ngerubꞌen servir ri eralkꞌuaꞌl ri Dios, kin jariꞌ ri tubꞌanaꞌ. Si ri loqꞌolej sipanik yoꞌon chare chik jun, ja ri ngerutijoj ri hermanos rikꞌin ri rutzij ri Dios, kin kerutijoj kꞌa. 8Si ri loqꞌolej sipanik yoꞌon chare chik jun, ja ri nduyaꞌ ruchuqꞌaꞌ ránima jun chik, kin jariꞌ ri tubꞌanaꞌ,+ y si ri loqꞌolej sipanik yoꞌon chare chik jun, ja ri ngerutoꞌ ri ndikꞌatzin kitoꞌik, ma tukꞌekꞌej, xa kin rikꞌin nojel ránima titoꞌon, y si ri loqꞌolej sipanik yoꞌon chare chik jun, ja ri ndukꞌuaj kibꞌey ri hermanos, tutijaꞌ ruqꞌij chi utz kikꞌuaxik+ ndubꞌen, y si ri loqꞌolej sipanik yoꞌon chare chik jun, ja ri ndupoqonaj kiwech chꞌaqa chik, tikikot ndipoqonan.

Ri ndikꞌatzin ndikibꞌen ri kitaqin chik ri Cristo

9Kixojowan rikꞌin nojel iwánima, tiyaꞌ kan roꞌiwacheq chuwech ri ma utz ta+ y kin tiwoqaj ri utz. 10Rix ichaqꞌ-inimal iwiꞌ roma itaqin ri Cristo, romariꞌ tiwojoꞌ iwiꞌ chiwech rikꞌin nojel iwánima, y tinaꞌ iwiꞌ chiꞌijununal chi más jubꞌaꞌ ok iqꞌij ke chikiwech ri ichaqꞌ-inimal iwiꞌ kikꞌin.+

11Titijaꞌ iqꞌij chi ndibꞌen ri samaj ruyoꞌon ri Ajaw chiwa, y ma kixqꞌoran, xa kin rikꞌin nojel iwánima tibꞌanaꞌ.

12Tzꞌan kixkikot chiroyobꞌexik ri favor nduyaꞌ ri Dios. Tikochꞌoꞌ ri kꞌayew ndiqꞌasaj pa ikꞌaslen, y jumul tibꞌanaꞌ orar.

13Keꞌitoꞌ ri hermanos ri ndikꞌatzin kitoꞌik.+ Ri epataneq jukꞌan chik tinamit, tikꞌamaꞌ apu kiwech chin ndikiqꞌasaj ri aqꞌaꞌ pa iwachoch.

14Tikꞌutuj ru-favor ri Dios pa kiwiꞌ ri wineq ri ngixkitzeqlebꞌej chin ndikibꞌen itzel chiwa.+ Ja ri utz tikꞌutuj y ma tikꞌutuj chi ndiqaqa kꞌayew pa kiwiꞌ.

15Kixkikot kikꞌin ri ngekikot, y kixoqꞌ kikꞌin ri ngeꞌoqꞌ.+

16Junan ruwech itzij tibꞌanaꞌ chiwech, ma tinimrisaj iwiꞌ,+ xa kin utz tinaꞌ chare ngeꞌiwachibꞌilaj ri maneq ok kiqꞌij. Ma tibꞌen chi achel xe ta rix tzꞌan iwetaman chikiwech chꞌaqa chik.

17Ma tibꞌen rukꞌexel+ chake ri ndikibꞌen itzel chiwa, titijaꞌ iqꞌij chi ndibꞌen ri kin utz pa kiwech konojel. 18Tibꞌanaꞌ ri janipeꞌ ngixtiker ndibꞌen chin utz ndikꞌuaj iwiꞌ kikꞌin konojel wineq.+ 19Hermanos ri tzꞌan ngixinwojoꞌ, nibꞌij chiwa chi ma tibꞌen rukꞌexel+ chare jun ri rubꞌanun itzel chiwa, xa kin tiyaꞌ qꞌij chi ja ri Dios xtiyoꞌon rukꞌexel chare. Porque chupan ri rutzij tzꞌibꞌan kan, kereꞌ ndubꞌij: Pa nuqꞌaꞌ riyin kꞌo chin niyaꞌ castigo,+ y pa nuqꞌaꞌ riyin kꞌo chin niyaꞌ rukꞌexel. Keriꞌ tzꞌibꞌan kan. 20Romariꞌ, si ndichꞌumu rupan ri itzel nditzꞌeto awichin, tatzuquꞌ, si ndichaqiꞌj ruchiꞌ, tayaꞌ ruyaꞌ.+ Porque si keriꞌ ndabꞌen, kin ndabꞌen chare chi ndikꞌix roma ri ma utz ta rubꞌanun chawa. 21Ma tayaꞌ qꞌij chi ngachꞌakatej pa ruqꞌaꞌ ri ma utz ta, xa kin tabꞌanaꞌ ri utz chin ndichꞌakatej pa aqꞌaꞌ ri ma utz ta.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index