Search form

Romanos 13

1Tinimaj kitzij ri kꞌo uchuqꞌaꞌ pa kiqꞌaꞌ pa ruwiꞌ ri itinamit,+ porque nixta jun ri kꞌo uchuqꞌaꞌ pa ruqꞌaꞌ ri man ta ja ri Dios yoyon,+ y konojel ri ekꞌo, ja ri Dios yoyon ri uchuqꞌaꞌ pa kiqꞌaꞌ. 2Romariꞌ, ri ndupabꞌaꞌ riꞌ chuwech ri kꞌo uchuqꞌaꞌ pa ruqꞌaꞌ pa ruwiꞌ ri tinamit, chuwech ri ruyoꞌon ri Dios ndupabꞌaꞌ riꞌ. Y ri keriꞌ ngebꞌanun, ndiyoꞌox castigo pa kiwiꞌ. 3Porque ri kꞌo uchuqꞌaꞌ pa kiqꞌaꞌ pa ruwiꞌ ri tinamit ma eyoꞌon ta chin ndikiyaꞌ xibꞌriꞌil pa kánima ri ngebꞌanun ri utz,+ xa chin ndikiyaꞌ xibꞌriꞌil pa kánima ri ngebꞌanun itzel teq achike. ¿Ndawojoꞌ rat ma ndaxibꞌij ta awiꞌ chuwech ri kꞌo uchuqꞌaꞌ pa ruqꞌaꞌ? Tabꞌanaꞌ ri utz y rijaꞌ utz ngarutzꞌet. 4Porque rijaꞌ rusamajel ri Dios chin ngaruchajij. Pero si ndabꞌen ri ma utz ta, taxibꞌij awiꞌ chuwech, roma pa ruqꞌaꞌ rijaꞌ yoꞌon chi nduyaꞌ castigo. Porque rijaꞌ rusamajel ri Dios chin nduyaꞌ castigo chare ri ndibꞌanun itzel teq achike. 5Romariꞌ, ndikꞌatzin ndiqanimaj kitzij+ ri kꞌo uchuqꞌaꞌ pa kiqꞌaꞌ pa ruwiꞌ ri tinamit, ma xe ta chin ma tikiyaꞌ castigo pa qawiꞌ, xa kin roma chuqaꞌ ndiqanaꞌ pa qánima chi ri keriꞌ ndiqabꞌen, kin utz chuwech ri Dios. 6Y roma chuqaꞌ riꞌ ndiqataj impuestos, porque ri kꞌo uchuqꞌaꞌ pa kiqꞌaꞌ, erusamajelaꞌ ri Dios, y ja samaj riꞌ ri ndikibꞌen.

7Titojoꞌ nojel ri ndikꞌatzin chi nditaj.+ Chare ri ndimolon xa achike na ruwech impuesto, titojoꞌ kꞌa. Keriꞌ chuqaꞌ ri kin rukꞌulun ndinimex rutzij, tinimaj rutzij. Y ri wineq ri kin nim kiqꞌij, nim kiqꞌij keꞌitzꞌetaꞌ chuqaꞌ rix.

8Ma jun achoq ikꞌin tikꞌojeꞌ ikꞌas, xa kin xe ri ndiwojoꞌ iwiꞌ chiwech+ tibꞌanaꞌ achel ikꞌas chare. Porque ri ngerajoꞌ ri wineq, kin rubꞌanun cumplir nojel ri ndubꞌij ri ley xyoꞌox chare ri Moisés. 9Porque ri ley ndubꞌij: Ma takanoj rukꞌexel ri achoq ikꞌin rat kꞌulan, ma kakamisan, ma kateleqꞌan, ma tarayij ri ruchajin jun chik. Keriꞌ ndubꞌij. Nojel reꞌ y ri chꞌaqa chik mandamientos ngeqabꞌen cumplir si ndiqabꞌen ri jun mandamiento ri kereꞌ ndubꞌij: Kaꞌawojoꞌ ri wineq achel ndawojoꞌ awiꞌ rat.+ Keriꞌ ndubꞌij ri mandamiento. 10Ri jun ri ndojowan nixta jun itzel ndubꞌen chake ri wineq. Romariꞌ ri jun ri ndojowan, kin qetzij rubꞌanun cumplir nojel ri ndubꞌij ri ley.+ 11Y tibꞌanaꞌ nojel reꞌ, porque iwetaman chi ri tiempo rojkꞌo wokami, kin tiempo chik chin ngixkꞌastej pe.+ Keriꞌ nibꞌij chiwa porque wokami más naqaj chik kꞌo ri qakolotajik ke atoq xqataqij. 12Ri qꞌequꞌ ndeqꞌax yan, y ja ndiseqresan pe. Romariꞌ tiqayaꞌ kan nojel ri itzel teq achike ngeqabꞌanalaꞌ ri kin chin wi ri qꞌequꞌ,+ y tiqaweqaꞌ qiꞌ rikꞌin ri luz ri kin achel jun tobꞌel nduyaꞌ ri Dios chaqe. 13Tiqakꞌuaj jun chꞌajchꞌaj y chojmilej kꞌaslen, achel rukꞌulun chi ndikikꞌuaj ri ekꞌo pa luz, y ma tiqabꞌanalaꞌ xa apux chi mak rikꞌin ri qa-cuerpo, ma tiqaqꞌabꞌarisaj qiꞌ,+ ma tiqakꞌamalaꞌ qa qiꞌ xa achoq na ikꞌin chin ndiqabꞌen mak, ma tiqabꞌanalaꞌ ri itzel teq rayinik chin ri cuerpo, ma tiqabꞌen oyowal y ma itzel tiqanaꞌ chare chikij wineq ri utz kibꞌanun.+ 14Xa kin tiyaꞌ qꞌij chare ri Ajaw Jesucristo chi ndisamej pa ikꞌaslen chin keriꞌ ri inoꞌoj ndubꞌen qa achel runoꞌoj rijaꞌ.+ Ma tibꞌen ruwech chi ndibꞌen ri itzel teq rayinik+ chin ri i-cuerpo.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index