Search form

Romanos 3

1Wokami kꞌa, ¿achike más keqalen ri nuwinaqul israelitas ke chikiwech ri ma israelitas ta? Y, ¿achike utz rukꞌamon pe ri circuncisión bꞌanun chake ri israelitas? 2Riyin nibꞌij chi kꞌiy utz rukꞌamon pe chake. Keriꞌ nibꞌij, nabꞌey porque chake rejeꞌ xyoꞌox kan ri rutzij ri Dios.+ 3Pero roma ekꞌo chiqakajal roj israelitas ri ma xkitaqij ta+ ri Dios, ¿roma kami riꞌ ri Dios ma ndubꞌen ta ri rubꞌiꞌin kan chi ndubꞌen?+ 4¡Ma ke ta riꞌ! Ri Dios kin ndubꞌen wi ri rubꞌiꞌin chi ndubꞌen, maske konojel wineq xa etzꞌukuy aqꞌ, achel ndubꞌij chupan ri rutzij ri Dios tzꞌibꞌan kan ri kereꞌ ndubꞌij:

Kin ta xtiqꞌalajin chikiwech ri wineq chi kin chojmilej wi ri ndabꞌij,

Y kin ta xtikitzꞌet chi pa ruchojmil xabꞌen chi xayaꞌ castigo pa nuwiꞌ.+

Keriꞌ tzꞌibꞌan kan.

5Pero pa ruwiꞌ ri xinbꞌij, ekꞌo ri kereꞌ ndikinojilaꞌ: Si ja ri ma chaj ta ri ngeqabꞌanalaꞌ roj ndibꞌanun chi ndiqꞌalajin chi ri Dios pa ruchojmil ndubꞌen nojel, ¿ma ndubꞌij ta kami tzij chi ma pa ruchojmil ta ndubꞌen ri Dios atoq nduyaꞌ castigo pa qawiꞌ roma ri ma chaj ta ngeqabꞌanalaꞌ? ngechajeꞌ. 6¡Riꞌ ma ke ta riꞌ! Ri Dios kin pa ruchojmil wi ndubꞌen nojel. Xa man ta qetzij chi keriꞌ, ¿achike modo chi pa ruchojmil nduqꞌet tzij pa kiwiꞌ konojel ri wineq?

7Rikꞌin jubꞌaꞌ kꞌo jun wineq kereꞌ ndunojij: Si ja ri aqꞌ nibꞌen riyin ndiqꞌalajrisan chi qetzij ri ndubꞌij ri Dios, y romariꞌ ndinimrisex ruqꞌij, ¿achike roma ngirubꞌen castigar, achel ndubꞌen chare jun aj mak? xtichajeꞌ. 8Pero xa ta qetzij ri ndunojij ri jun wineq riꞌ, ¿achike roma ma ndiqabꞌen ta ri ma chaj ta chin keriꞌ ndinimrisex rubꞌiꞌ ri Dios?+ Ekꞌo jujun ngebꞌiꞌin chi jariꞌ ri ndiqakꞌut roj, pero ri keriꞌ ngebꞌiꞌin chiqij, kin erukꞌulun chi ndiqaqa ri castigo nduyaꞌ ri Dios pa kiwiꞌ.

Konojel wineq ndikꞌatzin ndikitaqij ri Jesucristo roma eꞌaj mak

9¿Achike ndiqabꞌij pa ruwiꞌ nojel reꞌ? ¿Kꞌo kami más favor chin ri Dios pa qawiꞌ roj israelitas ke pa kiwiꞌ ri ma israelitas ta? ¡Ma ke ta riꞌ! Achel xqabꞌij yan pe, chi israelitas y ma israelitas ta, konojel ekꞌo chuxeꞌ ruchuqꞌaꞌ ri mak.+ 10Achel ndubꞌij ri rutzij ri Dios tzꞌibꞌan kan:

Nixta jun wineq ri chojmilej ta rukꞌaslen chuwech ri Dios, nixta jun.+

11Nixta jun ndikꞌoxoman ri qetzij rukꞌutun kan rijaꞌ,

Y nixta jun ndikanon richin.

12Konojel xkiyaꞌ kan rokacheq chuwech,

Y konojel itzel xubꞌen qa ri kikꞌaslen.

¡Ma jun ndibꞌanun ri utz!

¡Nixta jun!

13Ri tzij ndikibꞌij re wineq reꞌ, kin eꞌitzel achel teq jul+ jaqel kichin animaꞌiꞌ ri santienta chuw kuxlaꞌ.

Rikꞌin ri tzij ngekibꞌilaꞌ, ngechꞌakatin.

Achel ri qꞌaxon nduyaꞌ ru-ponzoña kumetz ri tzij ngekibꞌilaꞌ.

14Xe mal y kꞌayilej teq tzij ri ngekibꞌilaꞌ.+

15Kin ma achike tibꞌix chake, ja paqiꞌ ngekamisan.+

16Nojel ndikikꞌis kan ruqꞌij, y ndikitik kan kꞌayew apeꞌ ngeꞌeqꞌax.

17Ma ketaman ta ndikꞌojeꞌ uxlanen chikikajal kikꞌin chꞌaqa chik wineq.

18Nixta jubꞌaꞌ ndikixibꞌij kiꞌ chuwech ri Dios.+

Keriꞌ tzꞌibꞌan kan.

19Pa ruwiꞌ ri qabꞌiꞌin pe, qetaman chi ri ley xyoꞌox chare ri Moisés, chake ri ekꞌo chuxeꞌ ri ley riꞌ ndichꞌaꞌa. Rikꞌin riꞌ ndiqꞌalajin chi nixta jun xtitiker xtubꞌij chi maneq rumak chuwech ri Dios. Konojel kin rukꞌulun chi ndiyoꞌox castigo chake. 20Roma kꞌa riꞌ, maske jun wineq ndubꞌen ri ndubꞌij ri ley, ma roma ta riꞌ ma jun rumak ndireqalej chuwech ri Dios, porque ri ley ndukꞌut chiqawech chi roj qonojel roj aj mak.+

21Pero wokami ri Dios ruqꞌalajrisan achike modo jun wineq nixta jun rumak ndireqalej+ chuwech, maske ri wineq riꞌ ma rubꞌanun ta nojel ri ndubꞌij ri ley. Ri modo riꞌ, kin kꞌo tzꞌibꞌan kan pa ruwiꞌ chupan ri ley xyoꞌox chare ri Moisés y chupan ri kitzꞌibꞌan kan ri profetas+ ojer. 22Y ri modo riꞌ ndubꞌij chi ja ri Dios ndibꞌanun chake ri wineq ri ndikitaqij ri Jesucristo chi nixta jun kimak ndikeqalej,+ y riꞌ chake konojel ri ngetaqin, porque ri Dios junan kiwech+ ngerutzꞌet konojel, 23porque konojel kibꞌanun mak,+ y riꞌ rubꞌanun chake chi ma ngeꞌok ta achel ndirajoꞌ ri nimalej ruqꞌij Dios chi ngeꞌok. 24Pero roma ri favor+ rusipan pe ri Dios, wokami ri wineq nixta jun kimak ndikeqalej chuwech, y riꞌ roma ri Cristo Jesús+ xerulaqꞌ chin xerelesaj pa ruqꞌaꞌ ri tzꞌamayon kichin. 25Ri Dios xubꞌen chi rikꞌin rujachik rukꞌaslen ri Cristo Jesús pa kamik pa kikꞌexel, xkꞌis ri oyowal+ ri rukꞌulun chi xqaqa ta pa kiwiꞌ roma ri kimak, y xubꞌen chake chi nixta jun kimak ndikeqalej, atoq ndikitaqij chi ja ri rukikꞌel ri Cristo nditojo kimak, y chiriꞌ nditzꞌetetej chi ri Dios pa ruchojmil xubꞌen, atoq xerukachꞌ ri wineq ojer kan y ma xuyaꞌ yan ta rukꞌexel chake roma ri mak xekibꞌanalaꞌ. 26Y keriꞌ xuqꞌalajrisaj chupan re tiempo reꞌ chi rijaꞌ kin chojmilej wi rikꞌin nojel ri ngerubꞌanalaꞌ, y chi ja rijaꞌ ri ndibꞌanun chake ri wineq chi nixta jun kimak ndikeqalej chuwech roma ndikitaqij ri Jesús.

27Y romariꞌ, ¿utz kami chi ri wineq ndikinimrisaj kiꞌ+ chuwech ri Dios? Ma utz ta. ¿Achike roma? Porque nixta jun kimak ndikeqalej chuwech ri Dios kin xe roma ndikitaqij ri Jesucristo, y ma roma ta ndikibꞌen nojel ri ndubꞌij chupan ri ley. 28Porque roj qataqin chi jun wineq nixta jun rumak ndireqalej chuwech ri Dios kin xe roma ndutaqij ri Cristo,+ y ma roma ta ndubꞌen ri ndubꞌij ri ley. Porque nixta jun nditiker ndubꞌen nojel ri ndubꞌij ri ley.

29Ri Dios, ¿kin xe kami ki-Dios ri israelitas? ¿Ma ki-Dios ta kami ri ma israelitas ta chuqaꞌ? Jaꞌn, ri Dios kin ki-Dios chuqaꞌ ri ma israelitas ta. 30Porque xe jun Dios kꞌo, y ja rijaꞌ ri ndibꞌanun chi nixta jun kimak ndikeqalej konojel ri ndikitaqij ri Jesucristo. Keriꞌ ndubꞌen chake ri israelitas, y keriꞌ chuqaꞌ ndubꞌen chake ri ma israelitas ta.+ 31¿Ndubꞌij kami tzij riꞌ chi atoq ndiqataqij ri Jesucristo, maneq reqalen ndiqabꞌen chare ri ley xyoꞌox chare ri Moisés? Ma ke ta riꞌ, xa kin ndiqabꞌen chare ri ley riꞌ chi kꞌo reqalen.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index