Search form

Romanos 5

Ri Dios ndukꞌut chiqawech roj aj mak chi ngojrajoꞌ

1Romariꞌ, roj ri nixta jun qamak+ qeqalen chuwech ri Dios roma qataqin ri rubꞌiꞌin pe, maneq chik achike jachayon qawech rikꞌin rijaꞌ, roma ri xubꞌen ri Qajaw Jesucristo pa qakꞌexel. 2Y roma qataqin ri Qajaw Jesucristo, xuyaꞌ qꞌij chaqe chi xojok chupan ri favor nduyaꞌ ri Dios, ri achoq chupan qꞌij-qꞌij+ kaw roj peꞌel y ngojkikot qoyobꞌen ri qꞌij atoq ndikꞌojeꞌ qaqꞌij chupan ri nimalej ruqꞌij ri Dios. 3Y ma xe ta riꞌ, xa kin ngojkikot chuqaꞌ atoq ndiqaqꞌasaj kꞌayew+ pa qakꞌaslen, porque qetaman chi ri kꞌayew riꞌ ndubꞌen chaqe chi más ngojkochꞌon. 4Ri ngojkochꞌon ndubꞌen chi ndiqꞌalajin chuwech ri Dios chi kuqul qakꞌuꞌx rikꞌin, y roma kuqul qakꞌuꞌx rikꞌin ri Dios, riꞌ ndubꞌen chaqe chi más ndiqoyobꞌej+ chi ndekꞌojeꞌ qaqꞌij chupan ri nimalej ruqꞌij rijaꞌ. 5Y kin ma xqojkꞌixbꞌisex ta rikꞌin ri keriꞌ qoyobꞌen, porque ri Dios rikꞌin ri Espíritu Santo ri ruyoꞌon pa qánima,+ rukꞌutun chiqawech chi santienta ngojrajoꞌ.

6Porque chupan ri tiempo atoq xkꞌojeꞌ ruchuqꞌaꞌ ri mak pa qawiꞌ, xuqaqa ri qꞌij chi ri Cristo xken qoma+ roj qonojel wineq ri kin ma utz ta qakꞌaslen chuwech ri Dios. 7Y kin qetzij wi, cuesta chi jun wineq xtirajoꞌ xtuyaꞌ rukꞌaslen pa rukꞌexel jun ri rukꞌuan jun chojmilej kꞌaslen. O rikꞌin jubꞌaꞌ kꞌo jun ri xtukowij riꞌ chin xtuyaꞌ rukꞌaslen pa rukꞌexel jun ri rukꞌuan utzulej kꞌaslen. 8Pero ri Dios ndukꞌut chiqawech chi kin ngojrajoꞌ,+ porque ri Cristo xken qoma atoq kꞌa rojkꞌo chuxeꞌ ruchuqꞌaꞌ ri mak.+ 9Romariꞌ, roj ri xbꞌan yan chaqe chi nixta jun qamak qeqalen chuwech ri Dios roma xbꞌiyin rukikꞌel+ ri Cristo qoma, kin más ndiqꞌalajin chi roma ri xubꞌen ri Cristo qoma, ngojkolotej chuqaꞌ chuwech ri castigo+ nduyaꞌ ri Dios chupan ri qꞌij atoq ndiqaqa royowal pa kiwiꞌ ri wineq. 10Keriꞌ nibꞌij chiwa, porque atoq kꞌa rojkꞌo contra ri Dios, rijaꞌ xrelesaj ri qamak jachayon qawech rikꞌin y xukꞌen apu qawech, y riꞌ roma ri kamik xuqꞌasaj ri Rukꞌajol. Y kami ke elesan ri mak jachayon qawech rikꞌin,+ kin más ndiqꞌalajin chi ngojkolotej roma rukꞌaslen ri Rukꞌajol. 11Y ma xe ta riꞌ, xa kin ngojkikot chuqaꞌ roma xe jun qabꞌanun rikꞌin ri Dios roma ri Qajaw Jesucristo, ri xelesan ri mak jachayon qawech rikꞌin ri Dios.

Ri xubꞌen ri Adán xukꞌen pe kamik y ri xubꞌen ri Jesucristo xukꞌen pe kꞌaslen

12Rikꞌin ri qabꞌiꞌin pe, ndiqabꞌij chuqaꞌ chi roma jun achi, xok pe ri mak chochꞌulew, y ri mak xukꞌen pe kamik.+ Ja atoq riꞌ xtzꞌukutej pe chi konojel wineq ngeken, porque konojel ndikibꞌen mak. 13Atoq kꞌajani tiyoꞌox ri ley chare ri Moisés, ri wineq ngetajin chik rikꞌin mak chochꞌulew, pero apeꞌ maneq ley yoꞌon kan pa kiwiꞌ ri wineq, maneq cheꞌel xtibꞌix chi kꞌo mak ndajin. 14Rikꞌin riꞌ, ndiqabꞌij chi xe jampeꞌ pa ru-tiempo ri Adán, hasta kꞌa xuqaqa na ri qꞌij atoq xyoꞌox ri ley chare ri Moisés, kin xqꞌalajin chi ri wineq xkibꞌen mak, porque konojel xeken, maske ri wineq ma xkiqꞌej ta jun mandamiento achel xubꞌen ri Adán ri ma xunimaj ta ri ru-mandamiento ri Dios. Ri xubꞌen ri Adán kꞌo xukꞌen pe, achel chuqaꞌ kꞌo xukꞌen pe ri xubꞌen ri Jun ri bꞌiꞌin kan chi nduqaqa.

15Pero jun wi ndukꞌen pe ri kolotajik ndusipaj ri Dios y jun wi ndukꞌen pe ri mak xubꞌen ri Adán, porque ri rumak ri Adán, xukꞌen pe ri kamik pa qawiꞌ roj qonojel wineq, pero kin más wi nim reqalen ri ru-favor ri Dios y ri sipanik ri xuyaꞌ ri Jesucristo chaqe roj kꞌiy.+ 16Ri xukꞌen pe ri favor xubꞌen ri Jesucristo, jun wi ke chuwech ri xukꞌen pe ri mak xubꞌen ri Adán. Porque roma ri jun mak ri xubꞌen ri Adán, ri Dios ruqꞌaton tzij pa kiwiꞌ konojel wineq chin ndukꞌen pe castigo chake, pero ri kolotajik ndusipaj ri Dios roma ri xubꞌen ri Jesucristo, xuqaqa roma ri santienta mak eqabꞌanaloꞌon pe roj wineq, y ri kolotajik riꞌ ndubꞌen chi nixta jun qamak ndiqeqalej chuwech ri Dios. 17Porque si rikꞌin ri mak ri xubꞌen ri Adán, roj qonojel xojok chuxeꞌ ruchuqꞌaꞌ ri kamik, kin más ndiqꞌalajin chi chupan ri kꞌakꞌakꞌ kꞌaslen xtiqabꞌen reinar+ roj ri yoꞌon chaqe ri nimalej ru-favor ri Dios y ri sipanik chi nixta jun qamak ndiqeqalej chuwech, y riꞌ roma ri xubꞌen ri Jesucristo pa qakꞌexel.

18Romariꞌ, achel ri mak xubꞌen ri Adán ndukꞌen pe castigo pa qawiꞌ roj wineq, keriꞌ chuqaꞌ roma ri chojmilej favor xubꞌen ri Jesucristo+ konojel wineq kꞌo cheꞌel ndibꞌan chake chi nixta jun kimak ndikeqalej chuwech ri Dios, y ndikil ri kꞌaslen ma ndikꞌis ta. 19Porque si jun achi ri ma xniman ta chuwech ri Dios xubꞌen chaqe chi roj qonojel xojok aj mak, keriꞌ chuqaꞌ roma ri Jun ri xniman chuwech ri Dios,+ roj kꞌiy ndibꞌan chaqe chi nixta jun qamak ndiqeqalej chuwech ri Dios.

20Ri ley xyoꞌox chare ri Moisés, xkꞌatzin chin xebꞌeqꞌalajin pe ri kimak ri wineq, y roma xqꞌalajin pe chi ri mak kin kꞌiy, xqꞌalajin pe chuqaꞌ chi ri ru-favor+ ri Dios pa kiwiꞌ ri wineq kin más wi kꞌiy. 21Chin keriꞌ, achel ri mak xkꞌojeꞌ ruchuqꞌaꞌ pa kiwiꞌ ri wineq chin ngerukꞌuaj pa kamik, keriꞌ chuqaꞌ ri nimalej ru-favor ri Dios ndikꞌojeꞌ ruchuqꞌaꞌ pa kiwiꞌ ri wineq, y ndubꞌen chake chi nixta jun kimak ndikeqalej chin ngerukꞌuaj chupan ri kꞌaslen ma ndikꞌis ta roma ri xubꞌen ri Qajaw Jesucristo+ pa kikꞌexel.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index