Search form

Romanos 8

Ri eꞌukꞌuan roma ri Espíritu Santo kin eralkꞌuaꞌl ri Dios

1Wokami, roj ri xe jun qabꞌanun rikꞌin ri Cristo Jesús, ma jun castigo+ ndiqaqa pa qawiꞌ. 2Porque ukꞌuan qakꞌaslen roma ri Espíritu Santo ri ndiyoꞌon kꞌaslen, y ja rijaꞌ kꞌisiyon ruqꞌij ruchuqꞌaꞌ ri mak ri xa kamik ndukꞌen pe chaqe. Y riꞌ roma xe jun qabꞌanun rikꞌin ri Cristo Jesús. 3Porque rikꞌin ri xqatij qaqꞌij chin xqabꞌen ri ndubꞌij ri ley ruyoꞌon pe ri Dios, ma xkꞌis ta ruchuqꞌaꞌ ri mak, porque nixta jun wineq nditiker ndubꞌen nojel ri ndubꞌij ri ley, pero ri Dios chin xojrukal xuteq pe ri Rukꞌajol chochꞌulew y xuyaꞌ jun cuerpo chare achel qa-cuerpo roj wineq ri roj aj mak, pero rijaꞌ kin ma aj mak ta, y ri Dios xujech pa kamik chutojik ri qamak y keriꞌ xukꞌis ruchuqꞌaꞌ ri mak.+ 4Keriꞌ xubꞌen ri Dios, chin keriꞌ ri chojmilej kꞌaslen ri ndubꞌij ri ley chi ndikꞌatzin ndiqakꞌuaj roj wineq, kin ndiqꞌalajin pa qakꞌaslen roj ri ma roj ukꞌuan chi ta roma ri itzel teq rayinik chin ri qa-cuerpo, xa kin roj ukꞌuan roma ri Espíritu Santo.+

5Porque ri wineq ri eꞌukꞌuan roma ri itzel teq rayinik chin ri ki-cuerpo, xa kin bꞌaneq kánima chirij ri itzel teq rayinik riꞌ, jakꞌa ri eꞌukꞌuan roma ri Espíritu Santo, kin ja ri ndirajoꞌ ri Espíritu+ ri bꞌaneq kánima chirij chin ndikibꞌen. 6Ri bꞌaneq kánima chirij ri itzel teq rayinik, kamik ndukꞌen pe+ chake, jakꞌa ri bꞌaneq kánima chirij ri ndirajoꞌ ri Espíritu Santo, uxlanen ndukꞌen pe pa kánima y ndukꞌen pe chuqaꞌ ri kꞌaslen ma ndikꞌis ta.+ 7Porque ri bꞌaneq kánima chirij ri itzel teq rayinik chin ri ki-cuerpo, eyakatajneq chirij ri Dios,+ porque ma ndikibꞌen ta ri ndubꞌij ri ley ruyoꞌon pe ri Dios, nixta ngetiker ndikinimaj ri ley riꞌ. 8Romariꞌ ri eꞌukꞌuan roma ri itzel teq rayinik,+ ma ngetiker ta ndikibꞌen ri ndiqaꞌ chuwech ri Dios.

9Pero ma rix ukꞌuan ta roma ri itzel teq rayinik chin ri i-cuerpo, xa kin rix ukꞌuan roma ri Espíritu Santo, porque ri Espíritu Santo chin ri Dios kin kꞌo pa iwánima.+ Y si jun wineq maneq pa ránima ri Espíritu pataneq rikꞌin ri Cristo, ri jun riꞌ ma richin ta ri Cristo. 10Pero si kꞌo ri Cristo pa iwánima,+ maske ri i-cuerpo ndiken e roma ri mak, ri iwánima kꞌo rukꞌaslen, porque ri Dios rubꞌanun chiwa chi nixta jun imak iweqalen chuwech rijaꞌ. 11Y si kꞌo pa iwánima ri Espíritu chin ri Dios ri xkꞌastajbꞌan pe ri Jesús chikikajal ri animaꞌiꞌ,+ rijaꞌ ri xkꞌastajbꞌan pe ri Cristo, kin xtuyaꞌ chuqaꞌ rukꞌaslen ri i-cuerpo+ ri xa ndiken wi e, y keriꞌ ndibꞌanatej porque kin pa iwánima kꞌo ri Espíritu chin ri Dios.

12Romariꞌ hermanos, roj kin kꞌas chiqij chi ndiqabꞌen ri ndirajoꞌ ri Espíritu Santo, pero ma kꞌas ta chiqij chi ndiqabꞌen ri itzel teq rayinik chin ri qa-cuerpo. 13Porque si ri ikꞌaslen ukꞌuan roma ri itzel teq rayinik, riꞌ ndukꞌen pe kamik chin jumul chiwa. Pero si rikꞌin ruchuqꞌaꞌ ri Espíritu Santo ndikamisaj ri itzel teq rayinik ngeꞌibꞌanalaꞌ, riꞌ ndukꞌen pe kꞌaslen+ chin jumul chiwa.

14Porque konojel ri eꞌukꞌuan roma ri Espíritu chin ri Dios, kin eralkꞌuaꞌl ri Dios.+ 15Porque rix ma xyoꞌox ta pa iwánima jun espíritu ri ngixruxim chik chuxeꞌ ruchuqꞌaꞌ ri mak, chin ta ndixibꞌij+ chik iwiꞌ chi ri Dios nduyaꞌ castigo chiwa. Pa rukꞌexel riꞌ, rix kin ja ri Espíritu Santo yoꞌon pa iwánima, y roma ri xubꞌen pa ikꞌaslen, ri Dios xuyaꞌ rubꞌiꞌ chiwij chin xixok ralkꞌuaꞌl. Y ja Espíritu riꞌ ndibꞌanun chaqe chi ndiqabꞌij ¡Nataꞌ!+ chare ri Tataꞌaj Dios. 16Y ja ri Espíritu Santo ri ndiyoꞌon pa qánima chi ndiqanaꞌ chi qetzij roj ralkꞌuaꞌl ri Dios. 17Y roma roj ralkꞌuaꞌl chik ri Dios, kin nduyaꞌ chaqe ri rusujun kan,+ y kꞌo ri ruyoꞌon chik chare ri Cristo ri ndiyoꞌox chuqaꞌ chaqe roj. Pero ndikꞌatzin ndiqaqꞌasaj kꞌayew+ achel rijaꞌ, chin keriꞌ ndikꞌojeꞌ qaqꞌij rikꞌin, chupan ri nimalej ruqꞌij rijaꞌ.

Ri nimalej ruqꞌij ri Dios kin xtiqꞌalajin pa kikꞌaslen ri eralkꞌuaꞌl

18Porque riyin nukꞌoxoman chi ri kꞌayew ri ngeqaqꞌasaj chupan re tiempo rojkꞌo, ma jubꞌaꞌ junan rikꞌin ri nimalej ruqꞌij ri Dios ri kꞌo jun qꞌij xtiqꞌalajrisex+ chiqawech. 19Nojel ri ebꞌanun roma ri Dios bꞌaneq kánima chiroyobꞌexik+ ri qꞌij riꞌ, atoq ndiqꞌalajrisex achike ri eqetzij ralkꞌuaꞌl ri Dios.+ 20Porque nojel ri ebꞌanun roma ri Dios, wokami ma ngekꞌatzin chi ta achel ri kikꞌaꞌtz xyoꞌox roma ri Dios, pero ma roma ta keriꞌ xkajoꞌ rejeꞌ, xa kin ja ri Dios xbꞌanun+ keriꞌ chake, chin ndikoyobꞌej ri qꞌij atoq xtiqꞌalajrisex achike ri eqetzij ralkꞌuaꞌl ri Dios. 21Atoq nduqaqa ri qꞌij riꞌ, ri ebꞌanun roma ri Dios ngekolotej chuxeꞌ ruchuqꞌaꞌ ri rijixik ri ekꞌo wi wokami,+ ngesoqꞌopitej chin ngekꞌojeꞌ chupan ri nimalej ruqꞌij ri Dios junan kikꞌin ri eralkꞌuaꞌl ri Dios. 22Keriꞌ nibꞌij chiwa porque qetaman chi nojel ri ebꞌanun roma ri Dios, konojel junan ngejila xe jampeꞌ ojer hasta re qꞌij reꞌ y ndikiqꞌasaj qꞌaxomal achel jun ixaq ri yaméra ndalan qa. 23Y ma xe ta rejeꞌ ngejila, jajun chuqaꞌ roj ri kꞌo chik ri Espíritu Santo+ pa qánima, y ja ri Espíritu Santo ri nabꞌey sipanik xuyaꞌ ri Dios chaqe, retal chi kꞌo chik más nduyaꞌ. Y roj qoyobꞌen ri qꞌij atoq kin xtiqꞌalajin chi ri Dios xuyaꞌ rubꞌiꞌ chiqij chin xojok ralkꞌuaꞌl, y xtiqꞌalajin chuqaꞌ chi xulaqꞌ ri qa-cuerpo chin xojrelesaj pa ruqꞌaꞌ ri tzꞌamayon qichin. 24Y roj rukolon chin ndiqoyobꞌej+ ri qꞌij riꞌ, pero xa ta kꞌo chik qikꞌin ri qoyobꞌen, ¿achike ndikꞌatzin chi ndiqoyobꞌej? Y, ¿achike kꞌa jun ri ndiroyobꞌej ri kꞌo chik rikꞌin? Ma jun. 25Pero si qoyobꞌen ri kꞌajani tuyaꞌ ri Dios chaqe, kin rikꞌin nojel qánima ndiqoyobꞌej y ma ndikꞌo ta qakꞌuꞌx chiroyobꞌexik.

26Y keriꞌ chuqaꞌ ri Espíritu Santo ngojrutoꞌ roma maneq ok ruchuqꞌaꞌ qánima, porque ma qetaman ta achike ri qitz méra ndikꞌatzin ndiqakꞌutuj pa qa-oración, pero ri Espíritu ndichꞌaꞌa pa qakꞌexel chare ri Dios, y hasta ndijila rikꞌin tzij maneq rubꞌixik chochꞌulew atoq ndichꞌaꞌa pa qakꞌexel. 27Y ri Dios ri ndinikꞌon kánima+ ri wineq, kin retaman ri ndirajoꞌ ndubꞌij ri Espíritu Santo pa qakꞌexel, porque kin ja ri rurayibꞌel ri Dios ri ndukꞌutuj pa qawiꞌ roj ri loqꞌolej rutinamit ri Dios.

Nixta jun nditiker pa qaqꞌaꞌ roma rojkꞌo pa ruqꞌaꞌ ri Dios

28Y roj ri ndiqajoꞌ ri Dios, qetaman chi nojel ri ngebꞌanatej pa qakꞌaslen, rijaꞌ ndubꞌen chare chi kꞌo utz ndukꞌen pe chaqe. Keriꞌ ndubꞌen chaqe roj ri roj royon,+ porque keriꞌ wi rubꞌanun pe ruwech pa qawiꞌ. 29Porque rijaꞌ xe jampeꞌ pa nabꞌey kin retaman wi pe kiwech+ ri eruchaꞌon chin ngeꞌok loqꞌolej achel ri Rukꞌajol,+ chin keriꞌ ja ri Rukꞌajol ri nimalaꞌtz chikiwech ekꞌiy ruchaqꞌ. 30Y ri echaꞌon pe, xeroyoj+ chin xkiyaꞌ kánima chare, y ri xeroyoj xubꞌen chake chi nixta jun kimak ndikeqalej+ chuwech, y ri nixta jun kimak keqalen, xubꞌen chake chi ndikꞌojeꞌ kiqꞌij chupan ri nimalej ruqꞌij rijaꞌ.

31¿Achike ndiqabꞌij pa ruwiꞌ nojel reꞌ? Nojel reꞌ ndukꞌut chiqawech chi ri Dios kꞌo qikꞌin chin ngojrutoꞌ, romariꞌ ma jun ndubꞌen si kꞌo ndiyakatej pe chiqij.+ 32Ri Dios hasta ri Rukꞌajol ma xupoqonaj ta xuteq pe+ chochꞌulew chin xken chujoyowaxik qawech roj ri qataqin rijaꞌ. Y si xuteq yan pe ri Rukꞌajol, ¿ruyon kꞌa ma xtuyaꞌ ta pe ri chꞌaqa chik ru-favor chaqe? 33¿Kꞌo kami jun ndisujun chuwech ri Dios chiqij roj ri roj chaꞌon roma rijaꞌ,+ y nduchꞌek ri sujunik riꞌ? Nixta jun. Porque ja ri Dios bꞌanayon chi nixta jun qamak qeqalen chuwech. 34Y nixta jun chuqaꞌ nditiker chiqij chin ta ngojruteq chupan ri castigo nduyaꞌ ri Dios, porque ja ri Cristo Jesús xken qoma chutojik ri qamak, y ma xe ta riꞌ, keriꞌ chuqaꞌ xkꞌastajbꞌex pe chikikajal ri animaꞌiꞌ, y wokami kꞌo e chikaj pa rikiqꞌaꞌ ri Dios, y ndukꞌutuj chi ndikuyutej qamak.+ 35¿Kꞌo kami jun achike ngojelesan pa ruqꞌaꞌ ri Cristo ri tzꞌan ngojrajoꞌ? Nixta jun. Nixta ri kꞌayew,+ nixta ri qꞌaxomal, nixta ri ngojtzeqlebꞌex chin ndibꞌan itzel chaqe, nixta ri wayijal,+ nixta ri maneq ok qachajin, nixta ri jubꞌama ngojkamisex, nixta ri ngojkamisex ta rikꞌin espada. Ma jun chikiwech nojel reꞌ nditiker ngojrelesaj e. 36Achel tzꞌibꞌan kan chupan ri rutzij ri Dios ri kereꞌ ndubꞌij:

Roma rat qataqin, qꞌij-qꞌij ndirayix ri qakamik,

Ndibꞌan chaqe achel ndibꞌan chake ri karneꞌl ri nojin chik pa kiwiꞌ chi ngekamisex.+

Keriꞌ tzꞌibꞌan kan.

37Pero pa ruwiꞌ nojel ri kꞌayew ndiqaqꞌasaj pa qakꞌaslen, roj más quchuqꞌaꞌ ndiqil chin ngojjel chuwech roma ri qatoꞌik+ nduyaꞌ ri Cristo ri ndojowan qichin. 38Porque kin kuqul nukꞌuꞌx chi nixta ri kamik y ri kꞌaslen, nixta ri ángeles y ri itzel teq espíritu, nixta ri ndiqaqꞌasaj pa qakꞌaslen wokami y ri ndiqaqꞌasaj pa qakꞌaslen más chiqawech apu, nixta ri espíritus kꞌo uchuqꞌaꞌ pa kiqꞌaꞌ, 39nixta ri kꞌo e chikaj y ri kꞌo qa chuxeꞌ ri rochꞌulew, nixta jun ri ebꞌanun roma ri Dios ngetiker ngojkelesaj e+ chupan ri rajowabꞌel ri Dios,+ y riꞌ roma xe jun qabꞌanun rikꞌin ri Qajaw Cristo Jesús.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index