Search form

Romanos 9

Ma konojel ta ri israelitas eralkꞌuaꞌl ri Dios

1Riyin ri xe jun nubꞌanun rikꞌin ri Cristo, ma aqꞌ ta ri nibꞌij chiwa, xa kin qetzij, y ri wánima ukꞌuan roma ri Espíritu Santo retaman+ chi re nibꞌij chiwa wokami kin qetzij wi: 2Riyin santienta bꞌis y kꞌayew ninaꞌ koma ri nuwinaqul. 3Y hasta wojowan chi tiqaqa royowal ri Dios pa nuwiꞌ y kinelesex e pa ruqꞌaꞌ+ ri Cristo, si rikꞌin ta riꞌ ngekolotej konojel ri nuwinaqul woxpochel. 4Rejeꞌ e-israelitas, ri achoq chake ri Dios rusujun pe chi nduyaꞌ rubꞌiꞌ chikij chin ndubꞌen ralkꞌuaꞌl chake.+ Chikikajal rejeꞌ ruqꞌalajrisan pe ri nimalej ruqꞌij, kikꞌin rejeꞌ erubꞌanun pe pactos,+ y chin kꞌo utz ndukꞌen pe chake rejeꞌ xuyaꞌ pe ri ley+ chare ri Moisés. Chikiwech ri ojer teq katit-kimamaꞌ ri Dios xukꞌut ri achike rubꞌeyal ndikiyaꞌ ruqꞌij,+ y kichin chuqaꞌ ri israelitas ri jalajaj teq achike xusuj ri Dios.+ 5Rejeꞌ ekiy-kimam kan ri Abraham, ri Isaac y ri Jacob, y chikikajal xuꞌalex ri Jun ri xtaq pe roma ri Dios chukolik ri rutinamit. Riꞌ ja ri Jesucristo ri kin Dios wi pa ruwiꞌ nojel.+ ¡Kin ta jumul xtiyoꞌox ruqꞌij! Amén.

6Pero ma roma ta ejubꞌaꞌ ok nuwinaqul kitaqin ri Cristo, ma ndubꞌij ta tzij chi ri rutzij ri Dios ma xel ta achel runojin rijaꞌ pa kiwiꞌ, porque ma konojel ta ri eriy-rumam kan ri Israel eqetzij israelitas+ pa ruwech ri Dios. 7Y keriꞌ chuqaꞌ ma konojel ta ri eriy-rumam kan ri Abraham+ eralkꞌuaꞌl ri Dios. Porque ri Dios kereꞌ xubꞌij chare: Chikikajal ri riy-rumam kan ri akꞌajol Isaac+ xkenchaꞌ ri xkeꞌok nutinamit. 8Y reꞌ ndubꞌij tzij chi ma konojel ta ri eriy-rumam ri Abraham eqetzij ralkꞌuaꞌl ri Dios, xa kin xe ri echaꞌon roma ri Dios chin ndikil ri rusujun,+ xaxe rejeꞌ eralkꞌuaꞌl ri Dios. 9Porque atoq ri Dios xchꞌaꞌa chare ri Abraham, kereꞌ xusuj chare: Kewaꞌ junaꞌ nginuqaqa chik y ri awixjayil Sara ndikꞌojeꞌ jun chꞌuti ral alaꞌ,+ xchajeꞌ.

10Y ma xe ta pa rukꞌaslen ri Abraham xukꞌut ri Dios chi ma konojel ta akꞌolaꞌ ri ngeralkꞌualaj rijaꞌ eqetzij ralkꞌuaꞌl ri Dios. Keriꞌ chuqaꞌ xukꞌut ri Dios pa rukꞌaslen ri ojer qamamaꞌ Isaac, atoq royobꞌen chik akꞌual ri Rebeca ri rixjayil.+ 11Porque atoq kꞌajani keꞌalex ri tioxiꞌ ralkꞌuaꞌl ri Isaac, y kꞌajani tikibꞌen ri utz o ma utz ta, ri Dios xuchaꞌ jun chikiwech ri kaꞌiꞌ akꞌolaꞌ, y chiriꞌ nditzꞌetetej chi pa ruqꞌaꞌ ri Dios kꞌo chin ngeruchaꞌ+ ri ngeꞌok ralkꞌuaꞌl. 12Porque atoq kꞌajani keꞌalex ri tioxiꞌ akꞌolaꞌ, ri Dios kereꞌ xubꞌij chare ri Rebeca: Ri nimalaꞌtz ndok rusamajel ri chaqꞌilaꞌtz,+ xchajeꞌ. 13Achel ndubꞌij ri rutzij ri Dios tzꞌibꞌan kan: Ja ri Jacob xinchaꞌ chin xok nutinamit, jakꞌa ri Esaú naq.+

Pa ruqꞌaꞌ ri Dios kꞌo wi chi ndubꞌen ri ndirajoꞌ ndubꞌen

14¿Achike ndiqabꞌij pa ruwiꞌ nojel reꞌ? ¿Ma pa ruchojmil ta kami xubꞌen+ ri Dios rikꞌin ri ma xeruchaꞌ ta jujun chin ngeꞌok rutinamit? ¡Ma ke ta riꞌ! 15Porque ri Dios kereꞌ xubꞌij chare ri Moisés: Ri niwojoꞌ nijoyowaj ruwech, kin nijoyowaj ruwech, y ri niwojoꞌ nipoqonaj ruwech, kin nipoqonaj ruwech,+ xchajeꞌ. 16Y rikꞌin ri keriꞌ xubꞌij, nditzꞌetetej chi ma roma ta jun wineq ndirajoꞌ o nduxikꞌ riꞌ, roma ta riꞌ ndijoyowex ruwech roma ri Dios. Ndijoyowex ruwech xa kin xe roma ri Dios ndirajoꞌ ndujoyowaj ruwech. 17Porque tzꞌibꞌan kan chupan ri rutzij ri Dios chi kereꞌ xubꞌij ri Dios chare ri Faraón: Xatinyaꞌ pa kiwiꞌ ri aj Egipto, chin ndiqꞌalajin chi ri wuchuqꞌaꞌ+ más nim ke chuwech ri awuchuqꞌaꞌ rat. Y keriꞌ konojel wineq ndikiyaꞌ utzulej nutzijol, xchajeꞌ. 18Y rikꞌin ri keriꞌ xubꞌij, nditzꞌetetej chi ri Dios ndujoyowaj ruwech ri wineq ri ndirajoꞌ ndujoyowaj ruwech, y ndukowirisaj ránima ri wineq ri ndirajoꞌ ndukowirisaj ránima.+

19Pero rikꞌin jubꞌaꞌ kꞌo jun ri kereꞌ xtubꞌij: Si rikꞌin ri Dios kꞌo wi chi ndubꞌen ri ndirajoꞌ ndubꞌen pa qawiꞌ roj wineq, ¿utz kami ndubꞌen chi ndukꞌusaj pa qawiꞌ chi roj aj mak,+ xu maneq cheꞌel ndiqapabꞌaꞌ qiꞌ chuwech ri achike ndirajoꞌ ndubꞌen?+ 20Pero riyin kereꞌ rutzolixik rutzij niyaꞌ ri ndibꞌiꞌin keriꞌ: ¿Achike kꞌa ok rat pa atzij chin ngachꞌojin chare ri Dios? ¿La ndubꞌij kami jun bꞌambꞌel bꞌanun rikꞌin chꞌabꞌeq chare ri bꞌanayon richin: Achike roma kereꞌ xabꞌen chuwa?+ 21¿Ma pa ruqꞌaꞌ ta kami ri bꞌanuy bꞌojoꞌy kꞌo chin ndubꞌen ri ndirajoꞌ rikꞌin ri chꞌabꞌeq ndusamajij? Jaꞌn, kin pa ruqꞌaꞌ rijaꞌ kꞌo chin ndubꞌen jun bꞌambꞌel ri nim reqalen chikiwech ri wineq o jun bꞌambꞌel ri maneq ok reqalen.+

22Keriꞌ chuqaꞌ pa ruqꞌaꞌ ri Dios kꞌo ri achike ndirajoꞌ ndubꞌen. Rijaꞌ maske xrajoꞌ xukꞌut ri nimalej ruchuqꞌaꞌ y ri royowal, pero erukochꞌon+ wi pe ri wineq ri kin erukꞌulun chi ndiqaqa pa kiwiꞌ ri castigo nduyaꞌ rijaꞌ chin ndikꞌis kiqꞌij.+ 23Keriꞌ xubꞌen rijaꞌ chin xuqꞌalajrisaj ri nimalej y utzulej runoꞌoj chikiwech ri wineq ri kin xe jampeꞌ pa nabꞌey erunabꞌan chin ndujoyowaj kiwech y ndikꞌojeꞌ kiqꞌij+ chupan ri nimalej ruqꞌij rijaꞌ. 24Y chikikajal ri ndijoyowex kiwech, rojkꞌo roj ri roj oyon+ pe roma ri Dios chikikajal ri israelitas y chikikajal ri ma israelitas ta.+ 25Y kin pa ruqꞌaꞌ ri Dios kꞌo wi chin ngeruchaꞌ ri ndujoyowaj kiwech. Keriꞌ ndiqꞌalajin chupan ri rutzꞌibꞌan kan ri profeta Oseas, atoq ri Dios kereꞌ xubꞌij:

Ri ma enutinamit ta, kꞌo jun qꞌij nibꞌij nutinamit chake.+

Ri ma ngenwojoꞌ ta, kꞌo jun qꞌij ngenwojoꞌ.

26Y ndubꞌij chuqaꞌ:

Apeꞌ xbꞌix chake: Rix ma rix ta nutinamit,

Chiriꞌ ndibꞌix chake: Rix ralkꞌuaꞌl ri Kꞌaslik Dios.+

27Y keriꞌ chuqaꞌ ri profeta Isaías kereꞌ xubꞌij kan pa kiwiꞌ ri israelitas: Maske ri israelitas kin esantienta achel ri sanayiꞌ kꞌo chuchiꞌ ri mar,+ xa ejubꞌaꞌ ok ri ngekolotej.+ 28Porque kin qetzij wi chi ri Ajaw ndubꞌen ri xubꞌij, y pa jumel ruwech nduyaꞌ castigo pa kiwiꞌ ri aj rochꞌulew.+ 29Y kereꞌ chuqaꞌ xubꞌij ri profeta Isaías nabꞌey chi xbꞌanatej:

Si ri Ajaw ri kꞌo nojel uchuqꞌaꞌ pa ruqꞌaꞌ man ta xuyaꞌ qꞌij chi xekꞌaseꞌ kan jujun qawinaqul israelitas,

Xa xbꞌanatej ta qikꞌin achel xbꞌanatej kikꞌin ri aj Sodoma y xqakꞌulwachij ta achel xkikꞌulwachij ri aj Gomorra+ ri xkꞌis kiqꞌij.

Keriꞌ xubꞌij ri Isaías.

30¿Achike ndiqabꞌij pa ruwiꞌ nojel reꞌ? Nojel reꞌ ndukꞌut chiqawech chi ri ma israelitas ta, maske ma ndikitij ta kiqꞌij chi nixta jun kimak ndikeqalej chuwech ri Dios, kin ja yan chik rejeꞌ xkil chi nixta jun kimak ndikeqalej chuwech, y riꞌ roma xkitaqij ri Jesucristo.+ 31Jakꞌa ri israelitas ri ndikitij kiqꞌij chi ndikibꞌen ri ndubꞌij ri ley+ xyoꞌox chare ri Moisés, rejeꞌ rikꞌin ri keriꞌ ndikibꞌen xkajoꞌ ta xkil chi nixta jun kimak ndikeqalej chuwech ri Dios, pero ma xkil ta. 32¿Achike roma? Porque ma xkitaqij ta ri Jesucristo chin ta ma jun kimak xkeqalej chuwech ri Dios, xaxe xkitij kiqꞌij chin xkibꞌen ri ndubꞌij ri ley. Romariꞌ, achel ta xkipajkꞌilaꞌ kaqen chuwech abꞌej,+ y ri abꞌej riꞌ ja ri Jesucristo. 33Achel tzꞌibꞌan kan chupan ri rutzij ri Dios, ri kereꞌ ndubꞌij:

Tiyaꞌ cuenta chare, pa tinamit Sión riyin niyaꞌ jun nusamajel ri nijunumaj rikꞌin jun abꞌej

Ri achoq chuwech ndikipajkꞌij kaqen ri wineq, jun abꞌej ri ndubꞌen chake chi ngetzaq.

Y ri nditaqin richin rijaꞌ, ma jumbꞌey xtikꞌixbꞌisex, porque kin ndiyoꞌox wi chare ri sujun kan.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index