Search form

Tito 1

Ri Pablo nduteq ruxunaqil ruwech ri Tito

1Riyin Pablo, yin rusamajel ri Dios y ru-apóstol ri Jesucristo y yin taqon chikitoꞌik ri echaꞌon roma ri Dios chin ndikitaqij ri Jesucristo. Yin taqon chuqaꞌ chin ndiketamaj utz-utz ri qetzij+ ri ndukꞌut chikiwech achike ndikibꞌen chin ndikikꞌuaj jun loqꞌolej kꞌaslen achel ndirajoꞌ ri Dios.+ 2Ri rukꞌuꞌx ri kꞌaslen riꞌ, ja ri ndoyobꞌex ri kꞌaslen ma ndikꞌis ta. Y ja kꞌaslen riꞌ rusujun ri Dios chi nduyaꞌ xe jampeꞌ atoq kꞌajani titzꞌukutej pe ri tiempo+ ojer kan. Y kin nduyaꞌ wi ri rusujun, porque ri Dios ma ndireqꞌon ta. 3Y atoq xuqaqa ri tiempo ri rubꞌanun wi pe ruwech ri Dios ri Qakolonel, xuqꞌalajrisaj ri rutzij y xuyaꞌ pa nuqꞌaꞌ+ chin nitzijoj, kin achel xubꞌen mandar chuwa chi nibꞌen. 4Nitzꞌibꞌaj e re wuj reꞌ chawa rat Tito, ri kin qetzij rat achel nukꞌajol roma junan qataqin+ ri Cristo Jesús. Ri Qatataꞌ Dios y ri Qakolonel Cristo Jesús kin ta xtikiyaꞌ ki-favor pa awiꞌ y xtikiyaꞌ chuqaꞌ uxlanen pa awánima.

Ri ndikꞌatzin nditzꞌetetej pa kikꞌaslen ri ndikajoꞌ ngeꞌok ukꞌuey bꞌey chikiwech ri hermanos

5Riyin xatinyaꞌ kan pa rochꞌulew Creta, chin ndatzꞌaqatisaj nojel ri ndikꞌatzin chi ndibꞌan rukꞌojlen. Y kereꞌ xinbꞌij chawa: Nojel tinamit apeꞌ ekꞌo ralkꞌuaꞌl ri Dios ri ndikimal kiꞌ pa rubꞌiꞌ, kaꞌachaꞌ hermanos chin ngeꞌok ukꞌuey bꞌey chikiwech.+ 6Y jun ri ndok ukꞌuey bꞌey chikiwech ri ndikimal kiꞌ pa rubꞌiꞌ ri Dios, ndikꞌatzin chi rukꞌuan jun chojmilej kꞌaslen, chin keriꞌ ma jun itzel ndilitej pa rukꞌaslen. Y ndikꞌatzin chi xaxe jun rixjayil kꞌo y chi kitaqin chuqaꞌ ri Jesucristo ri eralkꞌuaꞌl, y man ta ndibꞌix chikij ri eralkꞌuaꞌl chi kikꞌuan xa apux chi kꞌaslen o ma ngeniman ta.+ 7Ri ndok ukꞌuey bꞌey kin ndikꞌatzin chi ma jun itzel ndilitej pa rukꞌaslen, porque pa ruwiꞌ rusamaj ri Dios ndiyoꞌox wi. Romariꞌ ndikꞌatzin chi ma nim kerunaꞌ chare, ma chaꞌanin ta ndipuꞌun royowal, nduqꞌet riꞌ chuwech rutijik yaꞌ,+ ma chꞌeyonel ta, y ma ndibꞌa ta ránima chirij méra ri ma pa ruchojmil ta ndichꞌak. 8Ndikꞌatzin chuqaꞌ chi jabꞌel ndukꞌen apu kiwech pa rachoch ri epataneq jukꞌan chik apeꞌ, bꞌaneq ránima chubꞌanik ri utz, ndunojij utz-utz ri ndubꞌen, rukꞌuan jun chojmilej kꞌaslen, chꞌajchꞌaj rukꞌaslen, y nditiker nduqꞌet riꞌ chuwech ri mak. 9Ri ndok ukꞌuey bꞌey ndikꞌatzin chi ndukꞌut ri rutzij ri Dios achel ri qetzij kꞌutun kan chuwech, chin keriꞌ nditiker ndubꞌochiꞌij kánima ri hermanos rikꞌin utzulej teq tijonik, y nditiker chuqaꞌ ndubꞌen chake ri eyakatajneq chirij ri qetzij chi ndikiyaꞌ cuenta chare chi ma ja ta ri ngetajin rikꞌin.

Ndikꞌatzin chi ri Tito ndupabꞌaꞌ riꞌ chikiwech ri eyakatajneq chirij ri utzulej tijonik

10Porque ekꞌiy ri eyakatajneq chirij ri utzulej tijonik y ndikikꞌut tzij ri ma jun keqalen ri achoq kikꞌin ngechꞌakatin. Y ri más ngebꞌanun keriꞌ ja ri nuwinaqul israelitas ri ngebꞌiꞌin chi ri ndikajoꞌ ngekolotej, ndikꞌatzin chi ndikibꞌen circuncidar kiꞌ.+ 11Rukꞌulun chi ndibꞌan chake ri ngeyoꞌon jun tijonik keriꞌ chi kechꞌojochiꞌ, porque ngekichꞌakatij chi teꞌej-tataꞌatz y ri kalkꞌuaꞌl. Y ma xe ta riꞌ ndikibꞌen, xa kin ndikajoꞌ chi ngetoj roma ri tijonik ndikiyaꞌ, tijonik ri ma rukꞌulun ta chi ndiyoꞌox.

12Xkꞌojeꞌ jun kiwinaqul ri xubꞌij kan kereꞌ pa kiwiꞌ: Ri aj rochꞌulew Creta jumul ngereqꞌon. Xa kin itzel kinoꞌoj achel ta eꞌitzel teq chikap keriꞌ, eqꞌoroy ri xe waꞌin koma. Keriꞌ xubꞌij ri jun achi ri ndibꞌix profeta chare koma ri ruwinaqul aj rochꞌulew Creta. 13Y kin qetzij ri xubꞌij kan. Roma kꞌa riꞌ, rat Tito, kaꞌachꞌolij chin tikiyaꞌ kan nojel ri tijonik ri ma pa rubꞌeyal ta y tikitaqij ri qetzij. 14Tabꞌij chuqaꞌ chake chi ma tikiyaꞌ kixikin rikꞌin tzꞌukun y nojin teq tzij eyoꞌon qa ruqꞌa-raqen, ri ndikitzijoj ri nuwinaqul israelitas, nixta tikiyaꞌ kixikin rikꞌin mandamientos ri xa epataneq kikꞌin wineq ri ndikiyaꞌ kan rokacheq chuwech ri qetzij.+

15Ri wineq chꞌajchꞌaj kikꞌaslen, chꞌajchꞌaj chuqaꞌ ndikitzꞌet chare nojel. Jakꞌa ri wineq ma chꞌajchꞌaj ta kikꞌaslen y ma kitaqin ta chuqaꞌ ri Dios, nojel ma chꞌajchꞌaj ta ndikitzꞌet chare, porque nixta ri achike ndikinojij, nixta ri kánima ma chꞌajchꞌaj ta chuwech ri Dios.+ 16Ndikibꞌij chi ketaman runoꞌoj ri Dios, pero roma ri itzel ndikibꞌanalaꞌ, kin ndiqꞌalajin chi xa maneq Dios pa kiwech. Xa ndimulu rukꞌuꞌx ri Dios rikꞌin ri itzel ngetajiyaj. Ma ngeniman ta y ma jun kikꞌaꞌtz chin ndikibꞌen ri utz.

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index