Search form

Tito 2

Jujun teq pixabꞌanik

1Pero rat Tito, kin ja achel ndirajoꞌ ri utzulej teq tijonik ruyoꞌon ri Dios ri kꞌutun kan chawech, jariꞌ ri tatzijoj. 2Ri rijilej teq achiꞌaꞌ ndikꞌatzin chi kereꞌ ndiqꞌalajin pa kikꞌaslen: Ketaman ndikijekꞌ kiꞌ rikꞌin ri ndikibꞌij y ri ndikibꞌen, ndikikꞌuaj jun kꞌaslen ri utz nditzꞌetetej koma ri wineq, ndikinojij utz-utz ri ndikibꞌen, kuqul kikꞌuꞌx rikꞌin ri utzulej teq tijonik ruyoꞌon ri Dios ri kꞌutun kan chikiwech, ngeꞌojowan y ngekochꞌon chupan ri kꞌayew ndikiqꞌasaj pa kikꞌaslen. 3Keriꞌ chuqaꞌ, ri rijilej teq ixoqiꞌ ndikꞌatzin chi kereꞌ ndiqꞌalajin pa kikꞌaslen: Ndikikꞌuaj jun loqꞌolej kꞌaslen ri ndiqaꞌ chuwech ri Dios, ma ndikitzꞌuk ta aqꞌ, ndikiqꞌet kiꞌ chuwech rutijik yaꞌ, y ngekitijoj chꞌaqa rikꞌin ri utz.+ 4Ndikꞌatzin chuqaꞌ ngekitijoj ri ixoqiꞌ ri más kꞌa eꞌakꞌolaꞌ chi kekajoꞌ ri kachijil y ri kal, 5chi tikijekꞌaꞌ kiꞌ rikꞌin ri ndikibꞌij y ri ndikibꞌen, chi tikikꞌuaj jun chꞌajchꞌaj kꞌaslen, chi jabꞌel tikibꞌanaꞌ chare ri kopísa chikachoch,+ chi utz tikibꞌanaꞌ chake chꞌaqa, y chi tikinimaj kitzij ri kachijil.+ Keriꞌ tijonik tikiyaꞌ chake ri ixoqiꞌ ri más kꞌa eꞌakꞌolaꞌ chin ma tiyoqꞌotej ri rutzij ri Dios.

6Y rat Tito, kaꞌapixabꞌaj chuqaꞌ ri kꞌajolaꞌ chin tikijekꞌaꞌ kiꞌ rikꞌin ri ndikibꞌij y ri ndikibꞌen. 7Y nojel ri ndabꞌen, takꞌutuꞌ rikꞌin ri akꞌaslen ri utz ri ndikꞌatzin chi ndikibꞌen ri kitaqin ri Ajaw. Y atoq ngaꞌatijoj rikꞌin ri rutzij ri Dios, kin pa ruchojmil tayaꞌ ri tijonik, y tiqꞌalajin chuqaꞌ chi kin kꞌo reqalen ri ndabꞌij. 8Kaꞌakusaj tzij ri rukꞌulun chi ndakusaj chubꞌixik, tzij ri ma jun itzel achike ndibꞌix chikij, chin keriꞌ ri ngechꞌaꞌa chirij ri rutzij ri Dios kin xkekꞌix, roma ma jun achike itzel ndikil chin ndikibꞌij chiqij.

9Ndikꞌatzin chi ri loqꞌon teq samajelaꞌ ndikinimaj kitzij ri kajaw rikꞌin nojel ri samaj ndibꞌix chake. Kin ja ta ri ndiqaꞌ chikiwech ri kajaw ri ndikibꞌen, y ma tikikꞌululaꞌ ruwech kitzij ri kajaw. 10Ma tok kiqꞌaꞌ pa ruwiꞌ ri ma kichin ta, xa kin tiqꞌalajin pa kikꞌaslen chi rukꞌulun chi ri kajaw kuqul rukꞌuꞌx kikꞌin, chin keriꞌ ndiqꞌalajin reqalen ri tijonik ri kꞌutun chiqawech roma ri Dios ri Qakolonel.

11Porque xuqꞌalajin chikiwech konojel wineq ri favor nduyaꞌ ri Dios ri rukꞌamon pe kolotajik.+ 12Y ri favor riꞌ ndukꞌut chiqawech chi tiqayaꞌ kan rubꞌanik nojel ri itzel teq achike ri ndikibꞌanalaꞌ ri wineq maneq Dios pa kiwech y chi tiqayaꞌ kan nojel ri itzel teq rayinik ri ekꞌo chochꞌulew. Mientras rojkꞌo chochꞌulew, tiqajekꞌaꞌ qiꞌ rikꞌin ri ndiqabꞌij y ri ndiqabꞌen, tiqakꞌuaj jun chojmilej kꞌaslen y tiqabꞌanaꞌ ri ndiqaꞌ chuwech ri Dios. 13Keriꞌ tiqabꞌanaꞌ ri janipeꞌ tiempo ndiqoyobꞌej ri favor+ ri rusujun kan ri Dios chi nduyaꞌ chaqe atoq nduqaqa chik jumbꞌey ri nimalej qa-Dios y Qakolonel Jesucristo rikꞌin nimalej ruqꞌij.+ 14Rijaꞌ kin xujech riꞌ pa kamik qoma chin xojrelesaj pa ruqꞌaꞌ nojel ruwech mak ri tzꞌamayon qichin. Xuchꞌajchꞌojrisaj chuqaꞌ ri qakꞌaslen+ chin keriꞌ xojok jun tinamit ri kin richin wi rijaꞌ, jun tinamit ri ndibꞌa qánima chubꞌanik ri utz.+

15Nojel re nubꞌiꞌin pe chawa, tabꞌij atoq ndayaꞌ tijonik. Ri kikꞌuan jun utzulej kꞌaslen, tabꞌij chake chi ma tikiyaꞌ kan. Y ri itzel kikꞌaslen, tabꞌij chake chi tikiyaꞌ kan ri itzel kꞌaslen riꞌ. Ma taxibꞌij awiꞌ ndabꞌen keriꞌ, porque ja ri Dios yoyon uchuqꞌaꞌ pa aqꞌaꞌ. Y ma tayaꞌ qꞌij chi ma jun aweqalen ndibꞌan chawa.+

Ri Dios ndichꞌaꞌa chaqe pa qachꞌabꞌel wokami

© Wycliffe Bible Translators, Inc. All rights reserved.

More Info | Version Index